មេរៀនទី៤៧

តើអ្នកត្រៀមខ្លួនដើម្បីទទួលការជ្រមុជទឹកហើយឬនៅ?

ឯកសារជាសៀវភៅ

ចាប់ពីពេលអ្នករៀនគម្ពីរ អ្នកបានស្គាល់អ្វីជាច្រើនអំពីព្រះយេហូវ៉ា។ អ្នកទំនងជាបានផ្លាស់ប្ដូរទម្លាប់មួយចំនួនតាមអ្វីដែលអ្នកបានរៀន។ ប៉ុន្តែ ប្រហែលជាមានអ្វីមួយចំនួនដែលរារាំងអ្នកមិនឲ្យប្រគល់ខ្លួនជូនព្រះ និងទទួលការជ្រមុជទឹក។ មេរៀននេះនឹងពិគ្រោះអំពីឧបសគ្គខ្លះដែលប្រហែលជារារាំងអ្នកមិនឲ្យទទួលការជ្រមុជទឹក និងអំពីរបៀបដែលអ្នកអាចយកឈ្នះឧបសគ្គទាំងនោះ។

១. មុនអ្នកអាចទទួលការជ្រមុជទឹក តើអ្នកត្រូវមានចំណេះច្រើនប៉ុណ្ណា?

ដើម្បីអ្នកអាចទទួលការជ្រមុជទឹក អ្នកត្រូវមាន«ចំណេះត្រឹមត្រូវអំពីសេចក្ដីពិត»។ (ធីម៉ូថេទី១ ២:៤) នេះមិនមានន័យថាអ្នកត្រូវស្គាល់ចម្លើយទាំងអស់ក្នុងគម្ពីរ មុនអ្នកអាចទទួលការជ្រមុជទឹកទេ។ សូម្បីតែគ្រិស្តសាសនិកដែលបានទទួលការជ្រមុជទឹកអស់ជាច្រើនឆ្នាំ ក៏ពួកគាត់នៅតែបន្តទទួលចំណេះពីគម្ពីរដែរ។ (កូឡុស ១:៩, ១០) ទោះជាយ៉ាងនេះក្ដី អ្នកត្រូវមានចំណេះបឋមអំពីសេចក្ដីបង្រៀនក្នុងគម្ពីរ។ អ្នកចាស់ទុំក្នុងក្រុមជំនុំនឹងជួយអ្នកឲ្យដឹងថា អ្នកមានចំណេះគ្រប់គ្រាន់ឬយ៉ាងណា។

២. មុនទទួលការជ្រមុជទឹក តើអ្នកត្រូវធ្វើតាមជំហានអ្វីខ្លះ?

មុនអ្នកអាចទទួលការជ្រមុជទឹក អ្នកត្រូវ«ប្រែចិត្ត ហើយវិលមកវិញ»។ (សូមអាន សកម្មភាព ៣:១៩) នេះមានន័យថា អ្នកសោកស្ដាយយ៉ាងស្មោះចំពោះកំហុសដែលអ្នកបានធ្វើ ហើយអ្នកសុំព្រះយេហូវ៉ាអភ័យទោសឲ្យអ្នក។ ម្យ៉ាងទៀត អ្នកប្ដេជ្ញាចិត្តមិនធ្វើអ្វីដែលព្រះចាត់ទុកថាអាក្រក់ ហើយតាំងចិត្តមានរបៀបរស់នៅដែលលោកពេញចិត្ត។ បន្ថែមទៅទៀត អ្នកក៏ចូលរួមកិច្ចប្រជុំក្នុងក្រុមជំនុំ និងផ្សព្វផ្សាយជាមួយបងប្អូនក្នុងក្រុមជំនុំដែរ។

៣. ហេតុអ្វីអ្នកមិនគួរឲ្យការភ័យខ្លាចរារាំងអ្នក?

អ្នកខ្លះភ័យខ្លាចថាពួកគេនឹងមិនអាចធ្វើតាមអ្វីដែលពួកគេបានសន្យាចំពោះព្រះយេហូវ៉ា។ ពិតណាស់ ជួនកាលយើងនឹងធ្វើខុសមែន។ នេះមិនចម្លែកទេ ព្រោះសូម្បីតែបុរសនិងស្ត្រីដ៏ស្មោះត្រង់ក្នុងគម្ពីរក៏បានធ្វើខុសដែរ។ ប៉ុន្តែ ព្រះយេហូវ៉ាមិនតម្រូវឲ្យអ្នកគោរពប្រណិប័តន៍លោក ប្រព្រឹត្តល្អឥតខ្ចោះឡើយ។ (សូមអាន ចម្រៀងសរសើរព្រះ ១០៣:១៣, ១៤) ផ្ទុយទៅវិញ លោកពេញចិត្តពេលអ្នកខំព្យាយាមធ្វើអស់ពីសមត្ថភាព! លោកនឹងជួយអ្នក។ ព្រះយេហូវ៉ាធានាចំពោះយើងថា គ្មានអ្វី«អាចធ្វើឲ្យយើងឃ្លាតចេញពីសេចក្ដីស្រឡាញ់របស់[លោក]»ឡើយ។—សូមអាន រ៉ូម ៨:៣៨, ៣៩

បង្កើនចំណេះ

សូមមើលមូលហេតុដែលការស្គាល់ព្រះយេហូវ៉ាកាន់តែច្បាស់ និងការព្រមទទួលជំនួយពីលោក អាចជួយអ្នកឲ្យយកឈ្នះឧបសគ្គដែលរារាំងអ្នកមិនឲ្យទទួលការជ្រមុជទឹក។

បណ្ដុំរូបភាព: នារីវ័យក្មេងម្នាក់កំពុងព្យាយាមយកឈ្នះឧបសគ្គផ្សេងៗដើម្បីទទួលការជ្រមុជទឹក។ ឈុតផ្សេងៗបានត្រូវរៀបរាប់ក្នុងមេរៀននេះ។

៤. ចូរស្គាល់ព្រះយេហូវ៉ាឲ្យបានច្បាស់ជាង

នារីនោះកំពុងរៀនគម្ពីរជាមួយនឹងសាក្សីព្រះយេហូវ៉ាម្នាក់។

មុនទទួលការជ្រមុជទឹក តើអ្នកត្រូវស្គាល់ព្រះយេហូវ៉ាច្បាស់ប៉ុណ្ណា? អ្នកត្រូវស្គាល់លោកច្បាស់ល្មមដើម្បីស្រឡាញ់លោក និងចង់ធ្វើឲ្យលោកពេញចិត្ត។ លេងវីដេអូ ដើម្បីមើលអំពីរបៀបដែលសិស្សគម្ពីរនៅប្រទេសផ្សេងៗបានធ្វើដូច្នេះ។ រួចពិភាក្សាសំណួរដូចតទៅ៖

វីដេអូ: ជំហាននៃការទទួលការជ្រមុជទឹក (៣:៥៦)

ក្នុងវីដេអូ តើអ្វីបានជួយបុគ្គលខ្លះឲ្យមានលក្ខណៈគ្រប់គ្រាន់ដើម្បីទទួលការជ្រមុជទឹក?

សូមអាន រ៉ូម ១២:២ រួចពិភាក្សាសំណួរដូចតទៅ៖

តើអ្នកមានការសង្ស័យអំពីសេចក្ដីបង្រៀនក្នុងគម្ពីរ ឬអំពីអ្វីដែលសាក្សីព្រះយេហូវ៉ាបង្រៀនឬទេ?
បើអ្នកសង្ស័យ តើអ្នកអាចធ្វើអ្វី?

៥. ចូរយកឈ្នះឧបសគ្គដែលរារាំងអ្នកមិនឲ្យទទួលការជ្រមុជទឹក

នារីនោះកំពុងដាក់គម្ពីរក្នុងកាបូប កាលដែលម្ដាយកំពុងស្ដីបន្ទោសឲ្យនាង។

យើងនឹងប្រឈមមុខការពិបាកផ្សេងៗ ពេលយើងសម្រេចចិត្តប្រគល់ខ្លួនជូនព្រះយេហូវ៉ានិងទទួលការជ្រមុជទឹក។ ដើម្បីមើលឧទាហរណ៍មួយ សូមលេងវីដេអូ រួចពិភាក្សាសំណួរដូចតទៅ៖

វីដេអូ: សេចក្ដីស្រឡាញ់ចំពោះព្រះយេហូវ៉ាជួយឲ្យយកឈ្នះឧបសគ្គ (៥:២២)

ក្នុងវីដេអូ តើណារ៉ាន់ចឺរ៉េលត្រូវយកឈ្នះឧបសគ្គអ្វីខ្លះដើម្បីបម្រើព្រះយេហូវ៉ា?
តើសេចក្ដីស្រឡាញ់ដែលគាត់មានចំពោះព្រះយេហូវ៉ាបានជួយគាត់ឲ្យយកឈ្នះឧបសគ្គទាំងនោះយ៉ាងដូចម្ដេច?

សូមអាន សុភាសិត ២៩:២៥ និងធីម៉ូថេទី២ ១:៧ រួចពិភាក្សាសំណួរនេះ៖

តើអ្វីអាចជួយយើងឲ្យមានចិត្តក្លាហានយកឈ្នះឧបសគ្គផ្សេងៗ?

៦. ចូរទុកចិត្តថាព្រះយេហូវ៉ានឹងជួយអ្នក

នារីនោះកំពុងផ្សព្វផ្សាយដល់ស្ត្រីវ័យចាស់ម្នាក់។ អ្នកបង្រៀនគម្ពីរនាងឈរក្បែរនាងពេលនាងផ្សព្វផ្សាយ។

ព្រះយេហូវ៉ានឹងជួយអ្នកឲ្យធ្វើអ្វីដែលលោកពេញចិត្ត។ លេងវីដេអូ រួចពិភាក្សាសំណួរដូចតទៅ៖

វីដេអូ: ព្រះយេហូវ៉ានឹងជួយអ្នក (២:៥០)

ក្នុងវីដេអូ ហេតុអ្វីសិស្សគម្ពីរស្ទាក់ស្ទើរទទួលការជ្រមុជទឹក?
តើអ្វីបានជួយគាត់ឲ្យកាន់តែទុកចិត្តព្រះយេហូវ៉ា?

សូមអាន អេសាយ ៤១:១០, ១៣ រួចពិភាក្សាសំណួរនេះ៖

ហេតុអ្វីអ្នកអាចជឿជាក់ថាអ្នកអាចធ្វើតាមអ្វីដែលអ្នកបានសន្យាពេលប្រគល់ខ្លួនជូនព្រះ?

៧. ចូរដឹងគុណព្រះយេហូវ៉ាកាន់តែខ្លាំងចំពោះសេចក្ដីស្រឡាញ់របស់លោក

ពេលអ្នករំពឹងគិតអំពីទំហំនៃសេចក្ដីស្រឡាញ់ដែលព្រះយេហូវ៉ាមានចំពោះអ្នក នោះអ្នកនឹងដឹងគុណលោកកាន់តែខ្លាំង ហើយចង់បម្រើលោកជារៀងរហូត។ សូមអាន ចម្រៀងសរសើរព្រះ ៤០:៥ រួចពិភាក្សាសំណួរនេះ៖

តើអ្នកដឹងគុណព្រះយេហូវ៉ាចំពោះពរមួយណាខ្លាំងជាងគេ?

យេរេមាដែលជាអ្នកប្រកាសទំនាយស្រឡាញ់ព្រះយេហូវ៉ានិងបណ្ដាំរបស់លោក ហើយគាត់មានអំណរគុណយ៉ាងជ្រាលជ្រៅចំពោះការធ្វើជាសាក្សីបញ្ជាក់អំពីនាមព្រះយេហូវ៉ា។ គាត់បាននិយាយថា៖ ‹ពេលខ្ញុំទទួលបណ្ដាំលោក ខ្ញុំបានរំពឹងគិតក្នុងចិត្ត។ បណ្ដាំរបស់លោកនាំឲ្យខ្ញុំត្រេកអរនិងរីករាយក្នុងចិត្ត ឱព្រះយេហូវ៉ាអើយ! ខ្ញុំបានត្រូវហៅតាមនាមលោក›។ (យេរេមា ១៥:១៦) សូមឆ្លើយសំណួរដូចតទៅ៖