មេរៀនទី៣៨
ចូរឲ្យតម្លៃជីវិតដែលជាអំណោយពីព្រះ
យើងអាចធ្វើអ្វីជាច្រើនដ៏សប្បាយរីករាយ ដោយសារយើងមានជីវិត។ ទោះជាយើងប្រឈមមុខបញ្ហាផ្សេងៗក៏ដោយ ជាធម្មតាយើងនៅតែអាចសប្បាយនឹងជីវិត។ តើតាមរបៀបណាយើងអាចបង្ហាញថា យើងឲ្យតម្លៃជីវិតដែលជាអំណោយពីព្រះយេហូវ៉ា? តើអ្វីជាមូលហេតុសំខាន់បំផុតដែលយើងឲ្យតម្លៃជីវិត?
១. ហេតុអ្វីយើងគួរឲ្យតម្លៃជីវិត?
យើងគួរឲ្យតម្លៃជីវិត ដោយសារនេះជាអំណោយពីព្រះយេហូវ៉ាដែលជាបិតាជាទីស្រឡាញ់របស់យើង។ លោកគឺជា«ប្រភពនៃជីវិត» ដោយសារលោកបានបង្កើតជីវិតទាំងអស់។ (ចម្រៀងសរសើរព្រះ ៣៦:៩) គម្ពីរចែងថា៖ «គឺលោកហើយដែលផ្ដល់ជីវិត ដង្ហើម និងអ្វីៗទាំងអស់ដល់មនុស្សគ្រប់រូប»។ (សកម្មភាព ១៧:២៥, ២៨) ព្រះយេហូវ៉ាផ្ដល់ឲ្យយើងនូវអ្វីដែលយើងត្រូវការ ដើម្បីយើងអាចមានជីវិតរស់នៅ។ មិនត្រឹមតែប៉ុណ្ណោះ លោកក៏ផ្ដល់ឲ្យយើងនូវអ្វីផ្សេងៗដែលជួយយើងឲ្យសប្បាយរីករាយនឹងជីវិតដែរ។—សូមអាន សកម្មភាព ១៤:១៧
២. តើតាមរបៀបណាយើងអាចបង្ហាញព្រះយេហូវ៉ាថា យើងឲ្យតម្លៃជីវិតដែលជាអំណោយពីលោក?
ព្រះយេហូវ៉ាបានយកចិត្តទុកដាក់ចំពោះអ្នក តាំងពីអ្នកនៅក្នុងផ្ទៃម្ដាយម្ល៉េះ។ ក្នុងគម្ពីរ ដាវីឌដែលជាអ្នកគោរពប្រណិប័តន៍ព្រះ បានអធិដ្ឋានទៅលោកថា៖ «ភ្នែកលោកបានឃើញខ្ញុំហើយ កាលដែលខ្ញុំមិនទាន់ចេញជារូបរាងនៅឡើយ»។ (ចម្រៀងសរសើរព្រះ ១៣៩:១៦) ព្រះយេហូវ៉ាឲ្យតម្លៃយ៉ាងខ្លាំងចំពោះជីវិតរបស់អ្នក។ (សូមអាន ម៉ាថាយ ១០:២៩-៣១) ប្រសិនបើអ្នកណាធ្វើអត្តឃាតa ឬសម្លាប់អ្នកឯទៀត នោះនឹងធ្វើឲ្យព្រះយេហូវ៉ាឈឺចិត្តខ្លាំងណាស់។ (ដំណើរចាកចេញ ២០:១៣) ម្យ៉ាងទៀត ប្រសិនបើអ្នកណាធ្វេសប្រហែស ឬមិនយកចិត្តទុកដាក់ក្នុងការការពារជីវិតខ្លួនឬជីវិតអ្នកឯទៀត នោះក៏នឹងធ្វើឲ្យព្រះយេហូវ៉ាឈឺចិត្តដែរ។ ពេលយើងការពារជីវិតរបស់យើងនិងគោរពជីវិតរបស់អ្នកឯទៀត នោះបង្ហាញថាយើងឲ្យតម្លៃជីវិតដែលជាអំណោយដ៏អស្ចារ្យពីព្រះ។
បង្កើនចំណេះ
សូមពិចារណាអំពីវិធីខ្លះដែលអ្នកអាចបង្ហាញថា អ្នកឲ្យតម្លៃជីវិតដែលជាអំណោយពីព្រះ។
៣. ចូរថែរក្សាសុខភាពរបស់អ្នក
គ្រិស្តសាសនិកដែលបានប្រគល់ខ្លួនជូនព្រះយេហូវ៉ា បានសន្យាថាពួកគាត់ប្រើអ្វីៗទាំងអស់ក្នុងជីវិតដើម្បីបម្រើលោក។ នេះហាក់ដូចជាពួកគាត់ប្រគល់រូបកាយជាគ្រឿងបូជាជូនព្រះ។ សូមអាន រ៉ូម ១២:១, ២ រួចពិភាក្សាសំណួរដូចតទៅ៖
តាមខគម្ពីរទាំងនេះ តើអ្វីគួរជំរុញចិត្តអ្នកឲ្យថែរក្សាសុខភាព?
តើអ្នកអាចធ្វើដូច្នេះតាមវិធីណាខ្លះ?
៤. ចូរប្រុងប្រយ័ត្នចំពោះអ្វីដែលនាំឲ្យមានគ្រោះថ្នាក់ឬស្លាប់
គម្ពីរលើកទឹកចិត្តយើងឲ្យជៀសវាងពីការធ្វើអ្វីដែលនាំឲ្យមានគ្រោះថ្នាក់។ លេងវីដេអូ ដើម្បីដឹងអ្វីមួយចំនួនដែលអ្នកអាចធ្វើដើម្បីមានសុវត្ថិភាព។
សូមអាន សុភាសិត ២២:៣ រួចពិភាក្សាអំពីរបៀបដែលអ្នកនិងមនុស្សឯទៀតអាចមានសុវត្ថិភាព . . .
ពេលនៅផ្ទះ។
ពេលនៅកន្លែងធ្វើការ។
ពេលលេងកីឡា។
ពេលបើកឡាន ពេលបើកម៉ូតូ ឬពេលធ្វើដំណើរជាមួយអ្នកឯទៀតជាដើម។
៥. ចូរឲ្យតម្លៃជីវិតកូនក្នុងផ្ទៃ
ដាវីឌបានពន្យល់ថា ព្រះយេហូវ៉ាចាប់អារម្មណ៍ចំពោះជីវិតរបស់ទារកនិងការលូតលាស់របស់ទារកក្នុងផ្ទៃម្ដាយ។ សូមអាន ចម្រៀងសរសើរព្រះ ១៣៩:១៣-១៧ រួចពិភាក្សាសំណួរនេះ៖
តើព្រះយេហូវ៉ាចាត់ទុកបុគ្គលម្នាក់ថាមានជីវិត ពេលដែលគាត់កើតមក ឬពេលដែលគាត់មានកំណើតនៅក្នុងផ្ទៃម្ដាយភ្លាម?
នៅសម័យបុរាណ ព្រះយេហូវ៉ាបានឲ្យច្បាប់ដល់ជនជាតិអ៊ីស្រាអែល ដើម្បីការពារម្ដាយនិងកូនដែលនៅក្នុងផ្ទៃ។ សូមអាន ដំណើរចាកចេញ ២១:២២, ២៣ រួចពិភាក្សាសំណួរដូចតទៅ៖
តើព្រះយេហូវ៉ាមានអារម្មណ៍យ៉ាងណាចំពោះអ្នកដែលគ្មានចេតនាធ្វើឲ្យកូនក្នុងផ្ទៃស្លាប់?
តើព្រះយេហូវ៉ាមានអារម្មណ៍យ៉ាងណាចំពោះអ្នកដែលមានចេតនាធ្វើឲ្យកូនក្នុងផ្ទៃស្លាប់?b
តើអ្នកគិតយ៉ាងណាអំពីទស្សនៈរបស់លោកអំពីរឿងនេះ?
សូម្បីតែស្ត្រីដែលឲ្យតម្លៃជីវិត ក៏អាចមានអារម្មណ៍ថាការរម្លូតកូនជាជម្រើសតែមួយគត់ដែរ។ សូមអាន អេសាយ ៤១:១០ រួចពិភាក្សាសំណួរដូចតទៅ៖
បើស្ត្រីម្នាក់ប្រឈមមុខនឹងការបង្ខិតបង្ខំឲ្យរម្លូតកូន តើនាងគួរសុំជំនួយពីអ្នកណា? ហេតុអ្វី?
មនុស្សខ្លះនិយាយថា៖ «ស្ត្រីមានផ្ទៃពោះមានសិទ្ធិសម្រេចចិត្តថាត្រូវរម្លូតឬត្រូវទុកកូន ព្រោះនោះជាខ្លួនប្រាណរបស់នាង»។
តើអ្វីធ្វើឲ្យអ្នកជឿជាក់ថាព្រះយេហូវ៉ាឲ្យតម្លៃជីវិតម្ដាយនិងជីវិតកូនក្នុងផ្ទៃនាង?
សេចក្ដីសង្ខេប
គម្ពីរបង្រៀនយើងឲ្យស្រឡាញ់ជីវិត និងឲ្យតម្លៃជីវិត ព្រមទាំងឲ្យយើងការពារជីវិតដែលជាអំណោយពីព្រះយេហូវ៉ា។ នេះរួមបញ្ចូលជីវិតយើងនិងជីវិតអ្នកឯទៀត។
រៀនសាឡើងវិញ
ហេតុអ្វីជីវិតមនុស្សមានតម្លៃខ្លាំងណាស់ចំពោះព្រះយេហូវ៉ា?
តើព្រះយេហូវ៉ាមានអារម្មណ៍យ៉ាងណា ពេលអ្នកណាម្នាក់ធ្វើអត្តឃាតឬសម្លាប់អ្នកឯទៀត?
ហេតុអ្វីអ្នកដឹងគុណព្រះចំពោះជីវិតដែលជាអំណោយពីលោក?
ស្វែងយល់ថែមទៀត
តើយើងអាចបង្ហាញយ៉ាងដូចម្ដេចថាយើងដឹងគុណព្រះយេហូវ៉ាចំពោះជីវិតដែលជាអំណោយពីលោក?
សូមស្វែងរកចម្លើយចំពោះសំណួរថា តើព្រះនឹងអភ័យទោសឲ្យស្ត្រីដែលរម្លូតកូនឬទេ?
«តើគម្ពីរចែងយ៉ាងណាអំពីការរម្លូតកូន?» (អត្ថបទក្នុងគេហទំព័រ)
ចុះបើបុគ្គលម្នាក់គិតចង់សម្លាប់ខ្លួន? សូមអានយោបល់ពីគម្ពីរដែលអាចជួយគាត់បាន។
a ព្រះយេហូវ៉ាយកចិត្តទុកដាក់យ៉ាងខ្លាំងចំពោះអស់អ្នកដែលមានចិត្តខ្ទេចខ្ទាំ។ (ចម្រៀងសរសើរព្រះ ៣៤:១៨) លោកយល់អារម្មណ៍ឈឺចាប់របស់អ្នកដែលគិតចង់សម្លាប់ខ្លួន ហើយលោកចង់ជួយគាត់។ ដើម្បីដឹងអំពីរបៀបដែលលោកជួយបុគ្គលបែបនេះ សូមអានអត្ថបទ«ខ្ញុំចង់ស្លាប់ តើគម្ពីរអាចជួយខ្ញុំពេលដែលខ្ញុំមានគំនិតចង់សម្លាប់ខ្លួនឬទេ?» នៅផ្នែកស្វែងយល់ថែមទៀតក្នុងមេរៀននេះ។
b អស់អ្នកដែលធ្លាប់រម្លូតកូនមិនចាំបាច់បន្ទោសខ្លួនហួសហេតុពេកទេ ព្រោះព្រះយេហូវ៉ាអាចអភ័យទោសឲ្យពួកគេបាន។ សម្រាប់ព័ត៌មានថែមទៀត សូមមើលអត្ថបទ«តើគម្ពីរចែងយ៉ាងណាអំពីការរម្លូតកូន?» នៅផ្នែកស្វែងយល់ថែមទៀតក្នុងមេរៀននេះ។