O ku Bhana o Tumikanda tua Lungu ni Lembalasa ia Jezú, Kua-nda Mateka mu Kizuua Kia 2 Kia Mbeji ia Kasamanu
1. Kizuua kuxi tua-nda mateka o ku bhana o tumikanda, tua lungu ni Lembalasa ia Jezú ku muvu iú, ni iebhi o valolo ia ku bhanga o kikalakalu kiki?
1 Tundé mu kizuua kia 2, katé mu kizuua kia 17 kia mbeji ia Kasamanu, tua-nda bhana o tumikanda tua Lembalasa, ia lungu ni kufuá kua Kristu. M’ukulu, athu avulu a xikinine o kuíza, phala ku kala n’etu mu kizuua kiki. Mu kifika, mu kizuua kia Lembalasa, saí muhatu ua xindi ku filiiale, iu uambe: “Kioso ki nga bhixila ku dibhata, nga sange o kamukanda bhoxi dia dibhitu diami. Eme nga-ndala kuia, maji ki ngejiia o ola.” O phang’etu ua mu jimbulula se kuebhi, kua tokala ku sanga o ola mu kamukanda. O muhatu uambe kua phang’etu kuila, “mu usuku iú, nga-ndaia mu kiônge kienu!”
2. Ihi i tu zuela, kioso ki tu bhana o kamukanda?
2 Kiebhi ki Tua-nda Bhanga: Mu ku mona kuila tuala ni kithangana kiofele, ki tu tokala kuzuela kiavulu, mu ku bhana o tumikanda. Tu zuela ngó: “Kiebhi ki uala. Tua mesena ku bhana ku muiji uê, o kamukanda kaka, ka lungu ni lembalasa ia Jezú, a-nda ku i bhanga ku mundu uoso, kia Lumingu mu kizuua kia 17 kia mbeji ia Kasamanu. [Bhana o kamukanda bhu maku a mukua dibhata.] O kizuua kiki, kiene o kizuua kia lembalasa ia kufuá kua Jezú. A-nda bhanga diskursu dijimbulula o mbote ijila mu kukula kua Kristu. O kamukanda kaka, muala o kididi, ni kithangana kia kiônge kiki mu mbanza ietu.”
3. Kiebhi ki tu tena kuixana athu avulu, se bhu bhana phala ku kala n’etu?
3 Se o kilunga kiala ni mbambe ia dikota, o tufunga a tena ku longa ku aboki phala ku xisa o kamukanda mu jinzo ki bhuala athu. Ua tokala ué ku bhana kamukanda ku jivizinhu jê, ku jindandu, ku jikoleka ja kikalakalu, ku jikoleka ja xikola, ni athu a mukuá u uejiia. Mu ku bhana o tumikanda mu disukilu dia semana, u bhana ué o madivulu se ki bhana. O kuila u tena ku kala muboki ua ithangana ni ithangana mu mbeji ia Kasamanu, ni ku bandekesa dingi o kikalakalu kiê mu sidivisu íii?
4. Mukonda diahi tua mesena kuila, o athu u tua exana a kala n’etu mu kizuua kia Lembalasa ia Jezú?
4 Athu oso a-nda kuíza phala kuívua o milongi íii, a-nda tambula milongi iambote! Ene a-nda kuívua o henda ia dikota ia Jihova, mu kukula kua mon’ê. (Nzuá 3:16) Ene a-nda di longa se kiebhi, o athu a tena ku katula mbote mu Utuminu ua Nzambi. (Iza. 65:21-23) Ene uâ, a-nda ku a kuatekesa mu ku bhinga ku alondekexi, milongi ia Bibidia mu kizuua kiki, phala kuijiia dingi. O misambu ietu ia kidi, ia-nda bhangesa kuila athu avulu a xikina ku kala n’etu, mu Lembalasa ia Jezú!