Xinganeka Kindala ni u Sanzumune o Ukunji uê
1. Ihi i tu londekesa mu ithangana ia Lembalasa ia kufuá kua Jezú, ni kiebhi ki tu tena ku di sokeka?
1 Kala muvu ua Lembalasa ia kufuá kua Jezú, ki tu bhana kithangana kia “ku sakidila jinga Jihova.” (Jisá. 109:30) O kuila ua-nda sanzumuna o ukunji uê mu mbeji ia Katanu, mu kulondekesa o kisakidilu kiê mu ujitu ua kukula? Kiki, kiene o kithangana kia ku bhanga ioso.—Jisa. 21:5.
2. Kiebhi ki ua divu kioso ki uevu o ngolokela ia lungu ni ujitu ua ku bhanga 30 a ji ola, ni kiebhi o jiphange ku mundu uoso a bhange mbandu?
2 Muboki ua Ithangana ni Ithangana: Ku muvu ua bhiti, o ilunga a sangulukile kiavulu kioso kiévu kuila eji tena ku kala aboki a ithangana ni ithangana mu ku bhanga ngó 30 a ji ola. Saí phange ua soneka: “Ngala hanji bhu xikola, mukonda dia kiki ki ngi mono o kithangana kia ku kala muboki ua thembu ioso. Maji nga-nda di soneka mu ku bhana 30 a ji ola, ni ku bhanga nguzu phala ku tenesa 50 a ji ola, mu mbeji ia Kasamanu.” O phange ia muhatu mukalakadi, ua soneka: “Makuinhi atatu—ki ki bhonzo!” Kioso kia bhange o ngolokela ia lungu ni ujitu iú, saí phange ua kexile kiá muboki ua thembu ioso m’ukulu, uala mu kitala kia 80 a mivu, uambe: “Kiki kiene o kithangana ki nga kexile mu kingila! Jihova uejidile kuila eme nga zolele kiavulu o ujitu iú!” O a mukua ka tenene ku kalakala kala aboki a ithangana ni ithangana, a suu mbambe ia ku bhanga dingi mu ukunji.
3. Ihi i tu bhangesa ku kala aboki a ithangana ni ithangana mu jimbeji ja Katanu, Kasamanu, ni Kasambuadi?
3 O mbeji ia Katanu, ia-nda kala mbeji iambote phala ku kalakala kala aboki a ithangana ni ithangana, mukonda tua-nda kala dingi ni ujitu ua 30 a ji ola, mba 50. Mu kiki mu kizuua kia 17, kia Sábhalu, tua-nda mateka ku bhana o tumikanda tua lungu ni Lembalasa ia kufuá kua Jezú, mu kuixana akuetu phala ku kala kumoxi n’etu mu kizuua kia 5 kia mbeji ia Kasamanu. Phange javulu a-nda sanguluka mu ku bandekesa o ukunji uâ. O ku sanguluka kuku, kua-nda kua bhangesa ué ku kala aboki a ithangana ni ithangana mu ku bhanga 50 a ji ola, mu jimbeji ja Kasamanu, ni Kasambuadi.
4. Kiebhi ki tu tena ku bandekesa o ukunji uetu, ni mbote iebhi i tu katula?
4 O kuila mu tena kuzuela mu kizuua kienu kia ubhezelu ku muiji, kiebhi kala muthu ku muiji u tena ku sanzumuna o ukunji uê mu kithangana kia Lembalasa ia kufuá kua Jezú? (Jisa. 15:22) Bhinga kua Jihova phala ku besoala o ukunji uê. (1 Nzuá 3:22) Kioso ki uia ni ku bandekesa o ukunji uê, ki ua-nda bhana ngó kijingu kua Jihova, maji ua-nda bandekesa ué o kisangusangu kiê.—2 Kol. 9:6.