Ku Bhana Umbangi mu Ididi ia Ikalakalu
1. Mukonda diahi ki tu tokala ku kala ni uôma ua ku bhana umbangi mu ididi ia ikalakalu?
1 O kuila u kala ni uôma ua ku bhana umbangi mu ididi ia ikalakalu? Se kiene, kana ku luuala, kala Phaulu uexile mukunji ua suína, ua ‘bhange nguzu’ phala ku boka. (1 Tes. 2:2) Tua-nda di longa o ibhidi i moneka dingi mu ku bhanga kiki, ni itendelesu i tu kuatekesa.
2. Mukonda diahi ki tu tokala ku thandanganha kuila tua-nda luualesa o akalakadi?
2 O Kuila o Akalakadi A-nda Tema se Tua Bhana Umbangi mu Ididi ia Ikalakalu iâ? Saí ididi ia ikalakalu, ene ejiia kiá kuila kua-nda kuíza athu a-nda zuela nau mu ola ia ku kalakala. Ene a talatala kiambote o athu enhá, bhenge-bhenge se a mona kuila muthu ua-nda sumba kama. Ku zuata kiambote ni kulondekesa kuila ua tululuka, mba u muthu ua sanguluka, ua-nda bhangesa o athu ku ku xila.
3. Ihi i tua tokala o ku bhanga phala ki tu tandanganhese o athu a mu sumba?
3 O Kuila Nga Tokala ku Bhanga Umbangi Bhu Pholo Dia Athu Eza mu Sumba? Se ki bhana, sola o kithangana kia kuila o maloja kezala luua, mba kioso kia a jikula. Kingila katé kioso o mutuameni ua diloja kia-nda bhixila mba o akalakadi. Kana ku bhanga ithangana iavulu, bhanga lusolo mu ku bhana o umbangi mu maloja.
4. Ihi i tu tena o kuzuela, kioso ki tu boka mu ididi ia ikalakalu?
4 Kiebhi ki Nga Tokala o Kuzuela? Zuela ni muendexi u langa o akalakadi oso. Eie u tena kuzuela kiki: “Ki bhonza ku sanga o athu ku mabhata mâ, mu kiki nga mu ku kunda bhu kididi kiê kia ku kalakala. Ngejiia kuila ua mu kalakala, nga-nda bhanga lusolo.” Phala ka tu mona kuila tua mu sumbisa, kana kuzuela ia lungu ni ku sangela kitadi phala o madivulu metu, zuela ngó, se n’a ku ibhula. Se bhu bhana, u tena ku bhinga ku muendexi ua ikalakalu phala kuzuela ni akalakadi a mukua. Bhitulula o milongi i ua mu zuela kua ene. Se bhu kala mukalakadi u moneka kuila kala ni kithangana, kana kuzuela kiavulu, u mu xila ngó o kamukanda. Se ki bhu bhana kuzuela ni akalakadi, nange a-nda kuehela kua xisa o madivulu mu kididi kia nhoha.
5. Ihi i tu bhangesa ku bhana umbangi mu ididi ia ikalakalu?
5 Jezú ni Phaulu, a boko o athu mu ididi ioso, eie u tena ué ku bhanga kiki. (Mat. 4:18-21; 9:9; Ika. 17:17) Bhinga kua Jihova, phala n’a ku kuatekese ku kala ni ku tululuka, ni ku kolokota. (Ika. 4:29) Tu sanga dingi athu mu ididi ia ikalakalu, ku mabhata ndenge, mu kiki, mukonda diahi ki u sota ku bhana umbangi bhu ididi ia ikalakalu?