O Kuila u Tena ku Boka mu Usuku?
1. Kala ki zuela o divulu, o poxolo Phaulu ua kexile múia mu boka mu ola iebhi?
1 O divulu Daily Life in Bible Times (A Vida Cotidiana nos Tempos Bíblicos) diambe kuila, o poxolo Phaulu ua kexile mu boka nzo ni nzo tunde “ku dikuinhi ni samanu dia ola ku tadidi katé mu usuku.” Ki tuejiia se kala kizuua Phaulu ua kexile kiá ni kithangana kia ku boka, maji tuejiia kuila Phaulu ua kexile polondo phala ‘ku bhanga o ima ioso mukonda dia ku tula o Njimbu Iambote.’ (1 Kol. 9:19-23) Kua bhingile ku sokejeka kiambote o ima iê, phala kuia mu zuela ni athu mu nzo ni nzo.
2. Mukonda diahi kima kiambote ku boka mu usuku?
2 Saí aboki mu jixi javulu, ene múia mu boka mu nzo ni nzo, mu usuku mu izuua ia semana. O kuila mu mbambe iê, u tena ku boka-mu mu usuku? Saí muboki ua thembu ioso uambe ia lungu ni mbambe iê: “Ku bhonza kiavulu ku sanga o athu mu muanha. Maji athu avulu ala mu mabhata mu usuku.” O ku boka mu usuku, ku kuatekesa kiavulu ku sanga o maiala m’onzo, phala ku a tudila o njimbu iambote. Tu tena ku sanga o mukua dibhata ua mu nhoha, phala kuzuela nê. Se ki bhana, o tufunga a tokala ku bhanga kiônge kia sidivisu ia ku boka mu usuku.
3. Kiebhi ki tu tena ku xinganeka kiambote kioso ki tu boka mu usuku?
3 Xinganeka Kiambote: Kioso ki tu boka mu usuku tua tokala ku xinganeka kiambote. Mu kifika, se uia mu sota mukua dibhata, u mu sange ua mu jandala, kieji kala kima kiambote ku mu tangela kuila ua-nda vutuka mu kizuua kiéngi. Se kua vundu, kála kididi ki kuatekesa o mukua dibhata ku ku mona, zuela ihi ia ku bheka. Kima kiambote ku boka mu kiiadi, mba ni jiphange mu ikoka, kana ku kala ubheka uê, kála mu ikoka mu bhita athu avulu. Kana kuia mu inzo ia mukua dibhata mu ola iê ia ku zeka. (2 Kol. 6:3) Se mu mbambe iê saí muthu u kala ni uôma mu ku mona o aboki a mu boka mu usuku, boka ku tádidi.—Jisa. 22:3.
4. Mabesá ahi u tu tambula mu ku boka mu usuku?
4 Mabesá: Tu kala dingi ni kisangusangu mu ku sanga athu mu inzo phala ku a tula o njimbu iambote. Kioso ki tu kala dingi ni kithangana kia ku boka, tua-nda tena dingi ku kuatekesa athu ‘n’a bhuluke, ni kuijiia o kidi.’ (1 Tim. 2:3, 4) O kuila u tena ku xa kithangana phala ku boka mu usuku?