O Jimbutu a Tokala ku ji Tekela Phala ji Sabhuke
1. Ihi ia tokala ku i tekela phala ku sabhuka ni ku kula?
1 O jimbutu jo kune a tokala ku ji tekela phala ji sabhuke. Kiene kimoxi ué ni jimbutu ja kidi kia Bibidia, kiene mu kuna mu kilunji kia athu mu ji mbambe jetu. (1 Kol. 3:6) Tua tokala ku vutuka ku mu a kunda dingi ni ku ji ta menha ku jimbutu ja kidi ni Maka a Nzambi, se tua mesena kuila jene ji kula.
2. Ihi i tu tena o ku bhanga phala ku kunda dingi o muthu?
2 Bhanga Kibhuidisu: Kioso ki u pelepalala i ua-nda zuela mu ukunji, mukonda diahi ki u pelepalale ué kibhuidisu kiambote, kieji bhangesa o muthu ku xikina ku mu kunda dingi? Bhanga kibhuidisu ku disukilu dia izuelu, ni kuzuela o kizuua ki ua-nda vutuka dingi. Athu avulu a uabhela ku sola milongi mu divulu Bibidia i Longa, ia-nda kua kuatekesa ku mateka ku longa o Bibidia.
3. Ihi i ua tokala o ku soneka ia lungu ni muthu?
3 Soneka ia Lungu ni Muthu: Kioso ki ua-nda xisa o dibhata dia dianga, soneka ioso i ua zuela ni muthu. Soneka o dijina dia muthu, ni kijimbuete kia dibhata. Kima kiambote ué ku soneka o kizuua, o ola i mua zuela, ihi i mua zuela, ni divulu diebhi di ua bhana. O kuila ua kuzuela kuma uala ni ngeleja? O kuila uala ni muiji? Muéne ua zuela o ibhindamu iê i mu thandanganhesa? O itendelesu íii, ia-nda ku kuatekesa kuzuela maka a uabhela o muthu. Soneka ué o kizuua ki ua-nda mu kunda dingi, ni kibhuidisu ki ua-nda tambuijila.
4. Mukonda diahi tua tokala ku kolokota mu ku kunda o athu alondekesa kuila a mesena?
4 Kolokota: Satanaji ka-nda ku bhuila mu ku katula o ‘maka’ o kune ku muxima ua muthu. (Marku 4:14, 15) Mu kienhiki, kana ku zoza se o muthu u ua mesena o ku mu kunda ku mu sange bhu. O kuila ueji tena ku tumikisa mukanda, mba ku xisa kijimbuete bhu dibhitu? Muboki ua thembu ioso ua mateka ku longa o Bibidia bhu dibhitu ni muhatu, maji kua bhonzele ku mu sanga dingi bhu bhata, mu kiki, muéne ua tumikisa mukanda. Kioso o phange ia muhatu ua mu sange bhu bhata, o muhatu ua londekesa kiebhi kia divu, mukonda dia henda ia londekesa kua muéne. Kioso ki tuia mu tekela o jimbutu ja kidi, tu tena ku kala ni kisangusangu kijila mu ku mona o jimbutu o kuima, o ku kula, ni ku bhana ‘makuinhi atatu a ji mbundu, íii makuinhi-a-samanu, íii hâma.’—Marku 4:20.