Ku Bandekesa o Uhete Uetu mu Ukunji—Ku Soneka o Ima ia Lungu ni Athu a Mesena ku di Longa

“Dilange eie-muéne, ni ulongelu ué.” (1 Tim. 4:16) O kitendelesu kiki, kia bhana poxolo Phaulu kua Timote, kilondekesa kuila, tua tokala ku di suínisa, phala ku bandekesa dingi o uhete uetu ua ku longa, ki kale se tua mu boka kiá tundé ukulu mba tua mateka kindala. Phala ku tu kuatekesa dingi ku kala ni uhete ua ku longa, mu Kikalakalu Kietu kia Utuminu, kua-nda kuíza milongi ia ubhe ni diambu “Ku Bandekesa o Uhete Uetu mu Ukunji.” Mu jimbandu jiji, tua-nda sanga-mu milongi, o mbote ia milongi, ndunge ni itendelesu, ni kiebhi ki tu tena ku kaiela o milongi. Mu mbeji i tua-nda di longa o milongi íii, o jiphange joso, a tokala ku kaiela o itendelesu. Kua-nda kuíza milongi mu Kiônge kia Sidivisu, ku disukilu dia mbeji, ia-nda tu bhana kithangana kia ku zuela o mbote i tua katula mu ku kaiela o milongi íii. Mu mbeji íii, tua tokala ku boka ni ku soneka o ima ia lungu ni athu a mesena kua longa.

Mukonda Diahi Kima Kiambote ku Bhanga Kiki: Phala ku kumbidila kiambote o ukunji uetu, ki tu tokala ngó o ku boka. Tua tokala ué ku vutuka phala ku kunda o athu u tua zuela nau, ni kua longa, phala ku tekela o jimbutu ja kidi, ji tua kunu. (Mat. 28:19, 20; 1 Kol. 3:6-9) Phala ku bhanga kiki, tua tokala ku kunda dingi o athu, ni ku suua o ibhindamu iâ, ni kua tangela o maka u tua-nda zuela mu kizuua ki tua-nda kua kunda dingi. Mu kiki-phe, kioso ki tu sanga muthu ua mesena ku mu longa, kima kiambote ku soneka o ima ia lungu ni muéne.