Kyebhi o Ita Yanda Bhwa?

NZAMBI WANDA BWIKA O JINGUVULU JA MUNDU

Nzambi wanda bwika o jinguvulu ja mundu mu ita a ixana Alumajedone.a (Dijingunwinu 16:16) Mu kithangana kyenyókyo, o “jisobha ja tungu mu ngongo yoso” anda “kwabhongolola mu ita ya kizuwa kya dikota kya Nzambi Muteni wa Yoso.” (Dijingunwinu 16:14) Kyoso kyanda bhita o ita ya Alumejadone, nuka dingi kwanda kala ita.

Nzambi wanda bwika o jinguvulu joso ja mundu, wandata o unguvulu wê, o Utuminu wa Nzambi. O unguvulu yú, wala ku dyulu, wanda tumina o ngongo yoso, nuka anda ubwika. (Daniyele 2:44) Nzambi wasolo Mon’ê, Jezú Kidistu phala kukala o Sobha ya Utuminu yú. (Izaya 9:​6, 7; Matesu 28:18) Yú wene o Utuminub wambe Jezú kwila o maxibulu mê atokala kubhinga phala kwiza. (Matesu 6:​9, 10) O athu mu ngongo yoso anda kala ngo ni unguvulu umoxi, Jezú mwéne wanda kala o Sobha yâ.

Jezú kanda kala kala o jinguvulu ja mundu. Mwene kanda kalakala ni kutena kwê phala o mbote yê. Mwene wayuka, ki mukwa katombo. Mu kiki seku muthu wanda kala ni woma wa kumutalatala kyayibha mukonda dya kididi mwamuvwalela, mba mukonda dya kukala mumbundu mba mundele. (Izaya 11:​3, 4) O athu kanda bhanga dingi jimvunda phala kwa atalatala kyambote. Mukonda dyahi? Mukonda Jezú wanda talatala kyambote athu oso. O Bibidya yamba kiki yalungu ni mwene: “Mwene u bindumuna o phulungu kyoso kya dikola; ni ngadyama, ni woso wa kambe o dilemba di mu kwatekesa. . . . U jituna o myenyu yâ ku ungungu wa kudya mangonya o manyinga mâ ma kala ni valolo ya dikota ku mesu mê.”—Jisálamu 72:​12-14.

O Utuminu wa Nzambi wanda sasujula o mauta moso. (Mikeya 4:3) O wene wanda bwika o athu oso ayibha ene mulwa o ita. (Jisálamu 37:​9, 10) O mayala moso, o ahatu oso ni ana-ndenge, enyoso anda kala ni kutululuka kabasa kididi bhwanda kala.—Izekiyele 34:28.

Kyoso o Utuminu wa Nzambi wanda tumina o ixi, athu oso anda kala ni mwenyu wambote, mwenyu wayuka. O wadyama, o nzala ni kukamba inzo, o maka oso yá kanda kala-ku dingi. Etu enyoso twanda kala ni kudya kwambote ni inzo yafwama.—Jisálamu 72:16; Izaya 65:​21-23.

O Utuminu wa Nzambi wanda zubha o maka oso atubheka o ita, kala o unema, o kikote ku muxima ni ibanzelu yayibha. O athu afu mu ita anda kwa afukununa phala kukala ku mwenyu wakalelaku mu ixi. (Izaya 25:8; 26:19; 35:​5, 6) Ibhidi yoso-yoso i tukala nayu mukonda dya ita, yanda kala mwaxaxi ka “ima ya dyangele-ku, yabhiti kyá.”—Dijingunwinu 21:4.

NZAMBI WANDA ZUBHA O ITUXI

Kyoso o Utuminu wa Nzambi wanda tumina o ixi, athu oso anda bheza o Nzambi imoxi-élele ya kidi, Jihovac, “o Nzambi ya henda, ni paze.” (2 Kolindu 13:11) Athu oso anda tunga kumoxi ni paze. (Izaya 2:​3, 4; 11:9) Enyoso anda belesela Nzambi kanda tala dingi hadi mukonda dya kituxi.—Loma 8:​20, 21.

NZAMBI WANDA BWIKA SATANAJI NI MADIMONYO MÊ

O Utuminu wa Nzambi wanda bwika o athu ene mufunyisa o ita: Satanaji ni madimonyo mê. (Dijingunwinu 20:​1-3, 10) Sé o kifunyisu kyâ, kwanda kala “paze inangenena.”—Jisálamu 72:7.

Eye utena kudyelela kwila Nzambi wanda kumbidila o kikanenu kyê kya kuzubha o ita. Mwene wala ni hânji ni kutena kwa kubhanga kiki.

• Nzambi wala ni kutena ni unjimu phala kuzubha o ita. (Jobe 9:4) Kwa Nzambi ima yoso itena kubhita.—Jobe 42:2.

• Nzambi wazembe kumona o athu kutala hadi. (Izaya 63:9) Mwene we ‘wazembe woso wazolo o usweya.’—Jisálamu 11:5.

• Nzambi ukumbidila jinga o kizwelu kyê, mwene kene mutanga makutu.—Izaya 55:​10, 11; Titu 1:2.