Гӧлан

Йаһоԝа чар кʹьтебед жь Мьзгини данә мә, ԝәки әм Кӧрʹе ԝи рʹьнд нас бькьн. Әв чар кʹьтеб мә һин дькьн кӧ Иса чь дькьр, чь дьгот у чь тʹәхмин дькьр. Бь ви щурʹәйи, әԝ кʹьтеб али мә дькьн кӧ әм дина хԝә бьдьн мәсәла Иса Мәсиһ. Бәле, әм дькарьн бежьн кӧ «пʹегәһа» кӧ Иса мәрʹа һиштийе, ван кʹьтебада нә! Ләма, сәва кӧ әм дьһа баш Иса нас бькьн, гәрәке әм ԝан кʹьтеба рʹьнд леколин бькьн. Әв йәк ԝе али мә бькә кӧ әм чʹәʹв бьдьнә ԝи у пʹегәһа ԝида һәрʹьн. Сәва кӧ әм жь ван чар кʹьтеба кʹаре бьстиньн, нә бәс ә кӧ әм ван тʹәне бьхуньн. Гәрәке әм вана кʹур леколин бькьн у ль сәр ван кʹур бьфькьрьн (Бәрамбәр кә Йешу 1:8). Ԛәԝьмандьнед жь ԝан кʹьтеба бьдә бәр чʹәʹве хԝә. Бьвинә, бьбьһе у тʹәхмин кә кӧ ԝи чахи чь ԛәԝьми. Бона ве йәке, ль әʹдәбйәтед тʹәшкиләта Йаһоԝа легәрʹине бькә. w21.04 4-5 ¶11-13

Йаһоԝа чәнд сәдсал бәре, пешийа кӧ Иса һатә сәр әʹрде бь сайа Хәбәра хԝә әʹйан кьрьбу кӧ Мәсиһ ԝе бь 30 зиви бе дайин дәсте хьраба (Зәкәрйа 11:12, 13). Жь бәрева һатьбу готьн кӧ йәк жь достед Иса ԝе нәмамийа ԝи бькә (Зәбур 41:9). Зәкәрйа пʹехәмбәр ӧса ньвисибу: «Ль шьван бьхә кӧ, бьра миһ бәла бьбьн» (Зәкәрйа 13:7). Гава әв пʹехәмбәртийед жь Ньвисаред Пироз һатьнә сери, мәрьвед дьлсах нәкʹәтьн шьке у нәлькʹӧмин, ле баԝәрийа ԝан дьһа ԛәԝи бу. Гәло әв проблем иро жи һәйә? Бәле. Ль рʹожед мә, һьнә Шәʹдед Йаһоԝа кӧ гәләка ԝана нас дькьр, рʹийа рʹастийе дәркʹәтьнә, бунә рʹабәр у паше хԝәстьнә кӧ кәсед дьн жи жь рʹийа рʹастийе дәрхьн. Ԝана хәбәред ниврʹаст у дәрәԝед дәрһәԛа Шәʹдед Йаһоԝа рʹожнәʹмә, телевизйон у интернетеда бәла кьрьнә. Ле кәсед дьлпʹак накʹәвьн шьке у налькʹӧмьн. Әԝана рʹьнд заньн кӧ Кʹьтеба Пироз пешда готьбу кӧ тьштед ӧса ԝе бьԛәԝьмьн (Мәтта 24:24; 2 Пәтрус 2:18-22). w21.05 11 ¶12; 12-13 ¶18-19

Кʹьтеба Пироз дьбежә кӧ гәрәке әм занәбунеда пешда һәрʹьн (Колоси 1:9, 10). Йаһоԝа рʹастийе гав пәй гав әʹйан дькә, у гәрәке әм бь сәбьр һивийе бьсәкьньн, һʹәта кӧ рʹонайа рʹастийе һе зедә шәԝԛ бьдә. Гава бьред жь Кʹома Рʹебәрийе тедәрдьхьн, ԝәки һинкьрьнәк бь щурʹәки дьн гәрәке бе фәʹмкьрьне, әԝана дәрберʹа ве гӧһастьне дькьн. Сәрԝеред религийа жи гәләк гӧһастьна дькьн, ле нета ԝан әԝ ә, ԝәки дьле мәрьва бькʹьрʹьн йан жи сәва кӧ жь ве дьнйайе щӧдә нәбьн. Ле тʹәшкиләта Йаһоԝа бь ве нете гӧһастьна дькә, ԝәки әм дьһа незики Йаһоԝа бьн у мина Иса Мәсиһ Хԝәде бьһʹәбиньн (Аԛуб 4:4). Әм һьнә фәʹмкьрьнед Кʹьтеба Пироз дьгӧһезьн нә жь бо ԝе йәке, кӧ фькред мәрьвед дьнйайе тенә гӧһастьне, ле жь бо ԝе йәке кӧ әм Кʹьтеба Пироз дьһа зәлал фәʹм дькьн. Бәле, әм рʹастийе һʹьз дькьн! (1 Тʹесалоники 2:3, 4). w21.10 22 ¶12

Дина хԝә бьде кӧ Йаһоԝа чаԝа пьштгьрийа тә дькә (Зәбур 55:22). Бь ви аԝайи, тӧйе фәʹм бьки кӧ тӧ тʹәне нини. Бьфькьрә кӧ Йаһоԝа ча аликʹарийе дьдә хушк у бьред кӧ хԝә тʹәне тʹәхмин дькьн (1 Пәтрус 5:9, 10). Бьраки бь наве Һироши, йе кӧ гәләк сала малбәта хԝәда тʹәк Шәʹде Йаһоԝа йә, ӧса дьбежә: «Һәр кәс чь жь дәсте ԝи те дькә кӧ Йаһоԝарʹа хьзмәт бькә, у әв йәк дькарә дьл бьдә кәсед кӧ сәр рʹийа рʹастийе тʹәне нә». Тʹьме дӧа бькә, хьзмәт кә у щьвина бәрʹнәдә. Дьле хԝә Йаһоԝарʹа вәкә. Бәрдәԝам кә Кʹьтеба Пироз бьхунә у сәр сәрһатийед кӧ нишан дькьн, ԝәки Йаһоԝа тә һʹьз дькә, кʹур бьфькьрә. Һьнә хушк у бьра рʹезед кӧ дьлбинийе дьдьн ԝан, әзбәри дькьн, мәсәла Зәбур 27:10 у Ишайа 41:10. Һьнә хушк у бьра жи, сәва кӧ хԝә тʹәне тʹәхмин нәкьн, гава хԝә бона щьвина һазьр дькьн йан жи Кʹьтеба Пироз дьхуньн, гӧһ дьдьн аудио ньвисандьнед жь малпәра мә. w21.06 9-10 ¶5-8

Һәгәр тӧ сәва мьрьна мәрьвәки хԝәйи һʹьзкьри хәмгин и, ԝе баш бә ԝәки тӧ рʹезед Кʹьтеба Пироз йед дәрһәԛа рʹабуна мьрийа, бьхуни. Һәгәр тӧ хәмгин и, чьмки мәрьвәки тә жь щьвате һатийә дәрхьстьне, ԝе баш бә ԝәки тӧ леколин бьки һәла щәзакьрьна жь Йаһоԝа чь кʹаре тинә. Проблема тә чь бә жи, сәр ве проблеме ча сәр мәщаләке бьньһерʹә, ԝәки баԝәрийа хԝә дьһа ԛәԝи бьки. Дьле хԝә Йаһоԝарʹа вәкә. Хԝә башԛә нәкә, ле хԝә незики хушк-бьра бьгьрә (Мәтʹәлок 18:1). Һәгәр диса жи дьле тә дьшәԝьтә у тәрʹа гәләк чәтьн ә, бәрдәԝам кә ван тьштава мьжул бә чь кӧ ԝе баԝәри у сәбьра тә ԛәԝи кьн (Зәбур 126:5, 6). Тʹьме Кʹьтеба Пироз бьхунә, хьзмәт у щьвина бәрʹнәдә, у дина хԝә бьдә кʹәрәмед кӧ һивийа тә нә. Чьԛас  тӧ бьвини кӧ Йаһоԝа чаԝа али тә дькә, һаԛас баԝәрийа тә ԝе дьһа ԛәԝи бә. w21.11 23 ¶11; 24 ¶17

Шагьртед Иса чьда мина «бьчʹука» нә? Мәрьвед ве дьнйайе һәри зедә ԛимәте дьдьн кәсед дәԝләмәнд у навдар, ле шагьртед Иса Мәсиһ бәр чʹәʹве ԝан «бьчʹук» у беԛимәт ьн (1 Корьнтʹи 1:26-29). Ле Йаһоԝа ԝана ӧса һʹәсаб накә. Гәло Иса чьрʹа бәʹса «ван бьчʹука» кьр? Чьмки шагьртед ԝи жь ԝи пьрсин: «Ль нав Пʹадшатийа Әʹзманада кʹи йә йе һәри мәзьн?» (Мәтта 18:1). Ԝи чахи гәләк Щьһу дьфькьрин кӧ нава щьмәʹтеда щийе бьльнд у навдәнги гәләк фәрз ьн. Леколинкʹарәк ӧса дьбежә: «Ԝи чахи мәрьв бона һӧрмәт, нав, навдари у ԛәдьре хԝә, дьжитьн у дьмьрьн». Иса рʹьнд заньбу кӧ бона шагьртед ԝи һеса нинә нәкʹәвьнә бьн байе култура Щьһуйа у мәрьварʹа нәкʹәвьнә рʹьке. w21.06 20 ¶2; 21 ¶6, 8; 22 ¶9

Паԝлосе шанди рʹуспийарʹа мәсәләкә баш һишт. Мәсәлә, гава хушк-бьред бажаре Тʹесалонике һʹәԝще ширәте бун, Паԝлос хԝә паш нәхьст, ԝәки бь һʹьзкьрьне ширәте бьдә ԝан. Нәʹмед хԝәда, Паԝлосе шанди пешийе бәʹса амьни, сәбьр у щәфе ԝан кьр. Ӧса жи, әԝи ԝанрʹа гот кӧ һʹале ԝан һеса нинә у пʹайе ԝан да, чьмки ԝана бәр зерандьна сәбьр дькьр (1 Тʹесалоники 1:3; 2 Тʹесалоники 1:4). Сәрда жи, әԝи ԝанрʹа гот кӧ әԝана бона хушк-бьред дьн мәсәләкә баш ьн (1 Тʹесалоники 1:8, 9). Готьнед Паԝлос бешьк дьле ԝан ша кьр! Те кʹьфше кӧ Паԝлос хушк у бьред Тʹесалонике гәләк һʹьз дькьр. Ләма жи, ширәтед кӧ Паԝлос нәʹмед хԝәда дан ԝан, гәләк керһати бун (1 Тʹесалоники 4:1, 3-5, 11; 2 Тʹесалоники 3:11, 12). w22.02 15 ¶6

Мире-щьна бь дәсте сәрԝеред религи дьбежә кӧ Йаһоԝа берʹәʹм ә у кӧ сәбәбе һʹәму кӧл у дәрда әԝ ә. Һәла һе һьнә кәс дьбежьн жи кӧ гава зарʹ дьмьрьн, әԝ ԛьрара Хԝәде йә, чьмки жерʹа сәр әʹзмана һе зедә мәләк лазьм ьн. Бӧхданәкә чьԛас мәзьн ә! Әм рʹьнд заньн кӧ гава әм гьран нәхԝәш дькʹәвьн йан гава мәрьвәки мәйи дәлал дьмьрә, әв йәк суще Хԝәде нинә. Әм баԝәр ьн кӧ рʹожәке, Хԝәде ԝе һәр тьшти рʹаст кә. У әм гәрәке дьнйа-әʹламрʹа бежьн кӧ Йаһоԝа чьԛас дьлован у бь һʹьзкьрьн ә. Хԝәде мәрʹа ӧса дьбежә: «Кӧрʹе мьн, сәрԝахт бә у дьле мьн ша кә, кӧ әз бькарьбьм щаба ԛардаред хԝә бьдьм» (Мәтʹәлок 27:11). Йаһоԝа дьлрʹәʹм ә. Гава әм сәва зерандьн, нәхԝәши йан ԛьсуред хԝә дьнальн, дьле ԝи сәр мә дьшәԝьтә (Зәбур 22:23, 24). Йаһоԝа еш у дәрдед мә дьвинә, у әԝ дьхԝазә мә жь ви һʹали хьлаз кә (Бәрамбәр кә Дәркʹәтьн 3:7, 8; Ишайа 63:9). w21.07 9-10 ¶9-10

Зутьрәке мәрьвед гӧһдар ԝе кʹәрәма һәри мәзьн бьстиньн: Әԝана ԝе һʹәта-һʹәтайе Йаһоԝа һʹьз бькьн у ԝирʹа хьзмәт бькьн! Иса Мәсиһ ԝе ахьрийа хьраб кӧ жь бо гӧне Адәм у Һеԝайе пешда һат, кʹокева бьдә һьлдане. Йаһоԝа ԝе бь милйона мәрьв жь мьрьне рʹакә у мәщале бьдә ԝан һʹәта-һʹәтайе бь сьһʹәта-ԛәԝата баш щьнәтеда бьжин (Луԛа 23:42, 43). Чахе хьзмәткʹаред Йаһоԝа бьбьн беԛьсур, әԝе «рʹумәт у рʹәԝшева» бенә хәмьландьне. Һәгәр тӧ пʹара ‹әʹлаләтәкә мәзьн и›, һевийа тә гәләк хԝәш ә (Әʹйанти 7:9). Хԝәде тә гәләк һʹьз дькә у әԝ дьхԝазә ԝәки тӧ бьби пʹара малбәта ԝи. Ләма жи, чь жь дәсте тә те бькә ԝәки әԝ жь тә рʹази бә. Һәр рʹож созед Хԝәде бинә бира хԝә. Ве мәщале ԛимәт бькә кӧ тӧ дькари ԝирʹа хьзмәт бьки у ша бә ԝәки те бькарьби һʹәта-һʹәтайе пәсне наве ԝи бьди! w21.08 7 ¶18-19

Йерәмйа пʹехәмбәр жи, хәбәра Хԝәде бь дәһа сала ԝан мәрьварʹа бәла дькьр, йед кӧ һьндава рʹастийе бетʹалаш бун у пәй ԝи дькʹәтьн. Щарәке, әԝ сәва ԛәрфед ԝан мәрьва һаԛас бәрхԝә кʹәт кӧ дьхԝәст хьзмәтийа хԝә бьда сәкьнандьне (Йерәмйа 20:8, 9). Ле Йерәмйа дьлтәнг нәбу! Гәло чь али ԝи кьр фькред негатив жь һʹьше хԝә дәрхә у жь хьзмәта хԝә шабуне бьстинә? Йерәмйа дина хԝә да дӧ тьштед фәрз: Йа йәке, әʹламәтийа жь Хԝәде һеви дьда мәрьва (Йерәмйа 29:11). Йа дӧда, Йаһоԝа Йерәмйа кʹьфш кьрьбу, ԝәки әԝ пеш ԝива әʹламәтийа ԝи дәрбази щьмәʹте кә (Йерәмйа 15:16). Мина Йерәмйа пʹехәмбәр, әм жи һевийе дьдьнә мәрьва, у наве Хԝәде ль сәр мә йә. Һәгәр мәрьв гӧһ нәдьн мә жи, әм дькарьн жь хьзмәта хԝә шабуне бьстиньн. Ләма жи, һәгәр хԝәндәкʹаре тә зу пешда начә, дьлтәнг нәбә у һевийа хԝә ӧнда нәкә. Бона шьхӧле һазьркьрьна шагьрта жи сәбьр лазьм ә (Аԛуб 5:7, 8). w21.10 27 ¶12-13

Фьрԛи тʹӧнә чәнд сал ә әм хьзмәткʹаред Йаһоԝа нә, гәрәке әм тʹьме баԝәрийа хԝә ԛәԝи бькьн. Гәло чьрʹа? Чьмки һәгәр әм һаш жь хԝә тʹӧнә бьн, баԝәрийа мә дькарә сьст бә. Бир нәкә ԝәки баԝәри сәр һʹиме ван избата йә кӧ найенә дитьне. Щарна әм тьштед кӧ навиньн, зу бир дькьн. Ләма жи, Паԝлосе шанди баԝәрийа сьст нав кьр ча «гӧне кӧ рʹьһʹәт ль мә дьԝәлә». Гәло әм чаԝа дькарьн хԝә жь ве тʹәльке дур бьгьрьн? (2 Тʹесалоники 1:3). Йа пешьн, тʹьме жь Йаһоԝа рʹӧһʹе пироз бьхԝазә. Гәло чьрʹа? Чьмки баԝәри, пʹарәкә «бәре рʹӧһʹ» ә (Галати 5:22, 23). Бе аликʹарийа рʹӧһʹе пироз, әм нькарьн баԝәрийа хԝә дьһа ԛәԝи кьн. Кʹьтеба Пироз дьбежә кӧ һәгәр әм бәрдәԝам кьн жь Йаһоԝа һиви бькьн ԝәки әԝ рʹӧһʹе пироз бьдә мә, әԝе дӧайед мә ԛәбул бькә (Луԛа 11:13). Әм дькарьн ӧса жи дӧа бькьн: «Баԝәрийа мә зедә кә» (Луԛа 17:5). Йа дӧда, тʹьме Кʹьтеба Пироз леколин бькә (Зәбур 1:2, 3). w21.08 18-19 ¶16-18

Хушк-бьред әʹмьрда мәзьн дькарьн гәләк тьштада кʹаре бьдьн тʹәшкиләте. Рʹаст ә ԛәԝата ԝан ида мина йа бәре нинә, ле әԝана гәләк щерʹьбанди нә. Мәсәлә, Кʹьтеба Пирозда чәнд сәрһатийед кәсед амьн һәнә, йед кӧ әʹмьре хԝәйә мәзьнда жи бь дьл у щан Йаһоԝарʹа хьзмәт дькьрьн. Йәк жь ԝана Муса бу. Гава әԝ бу пʹехәмбәр у сәроке мьләте Исраел, әԝ ԝәкә 80 сали бу. Чахе Данийел ԝәкә 90 сали зедәтьр бу, Йаһоԝа ԝи ча пʹехәмбәр дьда хәбате. Ӧса жи, чахе Йуһʹәннайе шанди жь бина бәр Хԝәде кʹьтеба Әʹйанти дьньвиси, әʹмре ԝи жи ԝәкә 90-и зедәтьр бу. Кʹьтеба Пироз тʹәне щарәке бәʹса каләмерәки бь наве Шьмһʹун дькә. Ле Йаһоԝа заньбу ԝәки әԝ йәки «рʹаст» у «хԝәдехоф» ә, ләма жи Йаһоԝа мәщал да ԝи, ԝәки әԝ Исайе вьрʹни бьвинә у дәрһәԛа ԝи у дийа ԝи пʹехәмбәртийе бькә (Луԛа 2:22, 25-35). w21.09 3-4 ¶5-7

Де-бав гәрәке зарʹед хԝә бәрамбәри һәв нәкьн у жь ԝан дәʹԝа нәкьн ве йәке, чь кӧ жь ԛәԝата ԝан дәр ә (Әфәси 6:4). Хушкәкә бь наве Сачико ӧса дьбежә: «Дийа мьн дьхԝәст, ԝәки әз һәр тʹьм нишанед һәри бьльнд бьстиньм, ле ԛәԝата мьн нәдьгьһиштә ве йәке. Рʹаст ә ида гәләк сал дәрбаз буйә, ле әв  йәк ӧса сәр мьн һʹӧкӧм  кьр, кӧ һʹәта рʹожа иро жи әз щарна дьфькьрьм гәло Йаһоԝа жь мьн рʹази йә гава әз чь дәсте мьн те дькьм». Даԝьд Пʹадша нәдькʹәт пәй тьштед мәзьн, демәк пәй тьштед кӧ жь ԛәԝата ԝи дәр бун. Мьлукти али ԝи дькьр, ԝәки рʹази бә бона ԝан тьштед кӧ щәм ԝи һәбун (Зәбур 131:2). Гәло де-бав дькарьн жь готьнед Даԝьд чь һин бьн? Де-бав гәрәке мьлук бьн у синоред зарʹед хԝә жи бьзаньбьн. Әԝана гәрәке сьстбун у ԛәԝата зарʹед хԝә тедәрхьн, ԝәки бькарьбьн нетед ԛаси ԛәԝата ԝан дайньн пешийа ԝан. w21.07 21-22 ¶5-6

Йаһоԝа азайа бьжартьне дайә мә. Демәк, әм дькарьн хԝәха сафи кьн гӧрʹа Йаһоԝа бькьн йан на. Һьнә де-бав зарʹед хԝәрʹа мәсәла баш ниньн, ле зарʹ диса жи жь рʹийа рʹастийе дәрнакʹәвьн. Жь алийе дьнва жи, һьнә де-бав алийе хԝәда һәр тьшти дькьн ԝәки зарʹед хԝә ль гора принсипед Кʹьтеба Пироз мәзьн бькьн, ле зарʹ йәкә пьшта хԝә дьдьнә рʹастийе. Ахьрийеда, гәрәке һәр кәс хԝәха сафи кә Йаһоԝарʹа хьзмәт кә йан на (Йешу 24:15). Ләма жи де-бавно, һәгәр һун дьлшкәсти нә, чьмки зарʹа ԝә пьшта хԝә дайә Йаһоԝа, нәфькьрьн кӧ әв йәк гӧне ԝә йә! Щарна, де йан бав һьм щьвате һьм жи нәфәред хԝә дьһелә (Зәбур 27:10). Гава тьштәки ӧса дьԛәԝьмә, зарʹарʹа әԝ йәк зийанәкә мәзьн тинә, чьмки әԝана де у баве хԝә гәләк һʹьз дькьн у ԛәдре ԝан дьгьрьн. Щаһьлно, һәгәр де йан баве ԝә жь щьвате һатийә дәрхьстьне, дьле мә сәр ԝә дьшәԝьтә! Баԝәр бьн кӧ Йаһоԝа жи еша дьле ԝә занә. Һьм Йаһоԝа һьм жи хушк-бьра ԝә һʹьз дькьн у амьнийа ԝә ԛимәт дькьн. Бир нәкьн, һун сәва сафикьрьнед де йан баве хԝә щабдар ниньн. w21.09 27 ¶5-7

Гава Мәсиһик жь щьвате те дәрхьстьне, әԝ мина бәрхәкә нәхԝәш ә у дькарә бәрхед дьн жи нәхԝәш бехә, чьмки әԝ жь алийе рʹӧһʹанива нәхԝәш ә (Аԛуб 5:14). Мина һьнә нәхԝәшийед физики, нәхԝәшийа рʹӧһʹани жи дькарә дәрбази мәрьвед дьн бә. Ләма жи, щарна лазьм дьбә ԝәки кәсе кӧ рʹӧһʹанида нәхԝәш ә, жь щьвате бе дәрхьстьне. Әв ширәткьрьна Йаһоԝа һʹьзкьрьна ԝи әʹйан дькә, йе кӧ дьхԝазә бәрхед хԝәйә дьн бьпарезә. Сәрда жи, әв щәза дькарә али кәсе гӧнәкʹар бькә, ԝәки әԝ тʹобә бькә. Мәрьве жь щьвате дәрхьсти, диса жи дькарә бе щьвата у хԝарьна рʹӧһʹани бьстинә. Ӧса жи, әԝ дькарә әʹдәбйәта бьстинә у JW Бродкастинг бьньһерʹә. Рʹуспийед кӧ дина хԝә дьдьн хирәт у пешдачуйина ԝи, дькарьн щара ширәт у рʹебәрийе бьдьнә ԝи, ԝәки әԝ алийе рʹӧһʹанида ԛәнщ бә у диса бьбә Шәʹде Йаһоԝа. w21.10 10 ¶9, 11

Һʹәбандьна мә мина һʹәбандьна Мәсиһийед ԛьрʹна йәке йә. Мәсәлә, әм мина щьвата ԛьрʹна йәке организәкьри нә. Ләма жи, тʹәшкиләта мәда бәрпьрсийаред мьһале, рʹуспи у бәрдәстийед щьвате һәнә (Филипи 1:1; Тито 1:5). Мина Мәсиһийед пешьн, әм гӧһ дьдьн ԛанунед Хԝәде бона зәԝащ, нав-намусийе у хуне, у әм ԝан Мәсиһийед кӧ гӧне хԝә надьнә рʹуйе хԝә, жь щьвате дәрдьхьн, ԝәки щьват тʹәмьз бьминә (Кʹаред Шандийа 15:28, 29; 1 Корьнтʹи 5:11-13; 6:9, 10; Ибрани 13:4). Ле Кʹьтеба Пироз әшкәрә дьбежә ԝәки Хԝәде тʹәне баԝәрик ԛәбул дькә (Әфәси 4:4-6). Әм чьԛас сәрбьльнд ьн жь бо ԝе йәке, кӧ әм нав хьзмәткʹаред Йаһоԝада ньн у рʹастийа дәрһәԛа Йаһоԝа у нетед ԝи заньн. Ләма жи, ԝәрә әм чь жь дәсте мә те бькьн, ԝәки хԝә ль рʹийа рʹастийе ԛайим бьгьрьн! w21.10 22-23 ¶15-17

Йәһошәфат пʹадша рʹасти проблемәкә мәзьн һат. Ордикә мәзьн йа дьжмьна һʹьщуми сәр ԝи, малбәта ԝи у щьмәʹта ԝи кьр (2 Дирок 20:1, 2). Гәло Йәһошәфат чь кьр? Әԝи итʹбарийа хԝә Йаһоԝа ани. Дӧайе ԝийә бь мьлукти, йа кӧ 2 Дирок 20:5-12-да һатийә ньвисандьн, нишан дькә ԝәки әԝ Баве хԝәйи әʹзманида чьԛас гӧман бу. Йаһоԝа бь сайа Леԝики бь наве Йаһазиел Йәһошәфатрʹа хәбәр да. Ләма жи Йәһошәфат хԝә бь тʹәмами спартә Хԝәде у гӧһ да ԝи. Гава әԝ тʹәви щьмәʹта хԝә бәрбь дьжмьна чун, әԝи нә кӧ әскәред һәри щерʹьбанди, ле странбежед бечʹәк дани рʹеза пешьн. Йаһоԝа созе хԝә ани сери у ордийа дьжмьна ԛьрʹ кьр (2 Дирок 20:18-23). w21.11 15-16 ¶6-7

Гава әм рʹасти тәнгасийа тен, Йаһоԝа али мә дькә, ԝәки әм бькарьбьн ԝирʹа амьн бьминьн (2 Корьнтʹи 4:7-9). Әм дькарьн баԝәр бьн ԝәки һʹьзкьрьна Йаһоԝайә амьн ԝе сәр мә бә, чьмки ча Кʹьтеба Пироз дьбежә, «чʹәʹве Хӧдан ль сәр хофкʹешед Ԝи нә у ль сәр ԝанә кӧ һивийа һʹӧба Ԝи нә» (Зәбур 33:18-22). Пешийа кӧ мә дәстпекьр Йаһоԝарʹа хьзмәт кьн, мә жь һʹьзкьрьна кӧ Йаһоԝа һәр кәсирʹа нишан дькә, кʹар дьстанд. Ле ньһа, чьмки әм хьзмәткʹаред ԝи нә, әм жь һʹьзкьрьна ԝийә амьн жи кʹаре дьстиньн. Жь бо ве һʹьзкьрьна хԝәйә амьн, Йаһоԝа мә һʹәмеза хԝәда хԝәй дькә у мә дьпарезә. Чʹәʹве Йаһоԝа тʹьме сәр мә йә, у әԝ ԝе һʹәму созед хԝә әʹсәйи бинә сери. Бәле, әԝ дьхԝазә кӧ әм пешдачуйи бьн у һʹәта-һʹәтайе достед ԝи бьн! (Зәбур 46:1, 2, 7). Ләма, әм рʹасти чь тәнгасийа бен жи, Йаһоԝа ԝе ԛәԝате бьдә мә, ԝәки әм бькарьбьн ԝирʹа амьн бьминьн. w21.11 7 ¶17-18

Дьбәкә тӧ жи һьнә кәса нас дьки, йед кӧ бь сала һәвалхәбатчи, һәвалдәрс йан мәрьвәки хԝәрʹа кʹине дажон. Мәсәлә, жь бо кʹин у нәфрʹәте, 10 бьред Усьв әԝ ча хӧлам фьротьн (Дәстпебун 37:2-8, 25-28). Ле Усьв мина ԝан нибу. Гава мәщал кʹәтә дәсте ԝи ԝәки һʹәйфе һьлдә, әԝи дьлрʹәʹми нишан кьр. Бәле, Усьв кʹин нәдажот, ле әԝи ӧса хԝә да кʹьфше, чаԝа кӧ ԝәʹдә шунда Ԛануна Кʹаһинтийе 19:18-да һатә ньвисаре (Дәстпебун 50:19-21). Мина Усьв, шагьртед Иса, йед кӧ дьхԝазьн дьле Хԝәде ша бькьн, гәрәке кʹине нәжон у һʹәйфе һьлнәдьн. Иса нишан кьр, ԝәки әм гәрәке кәсед кӧ һьндава мәда гӧнә дькьн, бьбахшиньн (Мәтта 6:9, 12). Паԝлосе шанди жи хушк-бьрарʹа ӧса гот: «Һʹәйфе һьлнәдьн, дәлално» (Рʹомайи 12:19). w21.12 11 ¶13-14

Еваре, 14 Нисане, сала 33 Д.М., Иса тʹәви шандийед хԝә чу бахче Гетшәмани. Ԝедәре, әԝи дьле хԝә Йаһоԝарʹа вәкьр (Луԛа 22:39-44). Ԝан сьһʹәтед чәтьнда, Иса бь «кʹәсәр у бь һесьра лава у рʹәща» Хԝәде дькьр (Ибрани 5:7). Шәва пешийа мьрьна хԝә, гәло Иса бона чь дӧа кьр? Әԝи ԛәԝат хԝәст, ԝәки бькарьбә Йаһоԝарʹа амьн бьминә у ԛьрара ԝи бинә сери. Йаһоԝа гӧһ да дӧайе Кӧрʹе хԝә у мәләкәк шанд, ԝәки ԝи бьшьдинә. Иса заньбу ԝәки гәләк фәрз ә кӧ әԝ амьн бьминә у наве Баве хԝә пироз кә. Йаһоԝа гӧһ да дӧа-дьрозге Иса. Гәло чьрʹа? Чьмки нета сәрәкә йа Иса әԝ бу, ԝәки Баве хԝәрʹа амьн бьминә у наве Ԝи пироз кә. Һәгәр нета мәйә сәрәкә жи әԝ бә, Йаһоԝа ԝе гӧһ бьдә дӧа-дьрозге мә жи (Зәбур 145:18). w22.01 18 ¶15-17

Гәләк кәс мә һʹьз накьн, чьмки әм тʹәвнәбуйине хԝәй дькьн у нәкʹәвьнә нава шьхӧлед политики. Әԝана дьхԝазьн кӧ әм жи һьлбьжартьнед политикада пьштгьрийа партийәке йан сәрԝерәки бькьн. Ле әԝед кӧ инсана ча һʹӧкӧмдаред хԝә һьлдьбьжерьн бь рʹасти Йаһоԝа инкʹар дькьн (1 Самуйел 8:4-7). Ӧса жи, гәләк кәс дьфькьрьн кӧ гәрәке әм мәкʹтәб у нәхԝәшхана ава бькьн у тьштед дьнда али мәрьва бькьн. Әԝана фәʹм накьн кӧ әм чьрʹа тьштәки накьн кӧ проблемед дьнйайе сафи бькьн, ле һәри зедә дина хԝә дьдьн бәлакьрьна мьзгине. Сәва кӧ әм нәлькʹӧмьн, гәрәке әм чь бькьн? (Мәтта 7:21-23). Гәрәке әм жь һәр тьшти зедәтьр дина хԝә бьдьн шьхӧле кӧ Иса Мәсиһ тʹәсмили мә кьрийә. Гәрәке әм изне нәдьнә хԝә кӧ бькʹәвьнә нава проблемед политики у сосйали. Әм һәмьки инсана һʹьз дькьн у бона ԝана хәм дькьн, ле әм заньн кӧ аликʹарийа һәри баш әв ә ԝәки әм ԝанрʹа бәʹса Пʹадшатийа Хԝәде бькьн у али ԝан бькьн кӧ әԝана бьбьн достед Йаһоԝа. w21.05 7 ¶19-20

Иро гәләк сәрԝер хԝә ча мәрьвед хԝәденас нишан дькьн, ле әԝана нахԝазьн ԛәԝат у һʹӧкӧме хԝә ӧнда кьн. Ләма жи мина сәрԝеред рʹожед Исада, сәрԝеред иройин жи мьԛабьли Пʹадше кʹьфшкьри рʹадьбьн у һʹьщуми хьзмәткʹаред Йаһоԝа дькьн (Кʹаред Шандийа 4:25-28). Ле Йаһоԝа ча сәр ве йәке дьньһерʹә? Зәбур 2:10-12-да, Йаһоԝа ван сәрԝерарʹа ӧса дьбежә: «Дә ньһа фәʹм бькьн, гәли пʹадша, сәрԝеред әʹрде ԝәрьнә сәр һʹьша! Бь хоф хӧламтийе Хӧданрʹа бькьн, жь дәст саԝа Ԝи бьләрьзьн, Кӧрʹ рʹамусьн кӧ һерс нәкʹәвә, кӧ рʹеда жь ԝә кәс ӧнда нәбә, гава һерса Ԝи ньшкева рʹабә. Хԝәзи ль һʹәмуйед хԝә дьсперьнә Ԝи». Йаһоԝа бь дьловани мәщале дьдә ван мьԛабьла, ԝәки әԝ бен сәр һʹьше хԝә у Пʹадшатийа ԝи ԛәбул бькьн. Ле ԝәхт һьндьк майә (Ишайа 61:2). Лазьм ә кӧ һәр кәс рʹастийе бьбьһе у зу сафикьрьна рʹаст бькә! w21.09 15-16 ¶8-9

Паԝлос готьбу кӧ чь дәсте мәда һәбә, гәрәке әм бь ван тьшта рʹази бьн (Филипи 4:12). Жийина мәда тьште һәри фәрз у ԛимәт әԝ һәйә достийа незик тʹәви Йаһоԝа, нә кӧ һәбука мә (Һәбаԛуԛ 3:17, 18). Паши 40 салед бәрʹийеда, Муса пʹехәмбәр Исраелийарʹа ӧса гот: «Хӧдан Хԝәдейе тә һʹәму шьхӧлед дәстед тә бьмбарәк кьр. . . . Әва чьл сал ә кӧ Хӧдан Хԝәдейе тә тʹәви тәйә у кемасийа тʹӧ тьшти тә нәдит» (Ԛануна Дӧщари 2:7). Нава ван 40 салада, Йаһоԝа мана дьда Исраелийа. Кʹьнщед ԝан, демәк кʹьнщед кӧ ль сәр ԝан бун гава әԝана жь Мьсре дәркʹәтьн, нәмашийан! (Ԛануна Дӧщари 8:3, 4) Йаһоԝа дьхԝазә, ԝәки чь кӧ әԝ дьдә мә, бьшекьриньн у ча кʹәрәм һʹәсаб кьн. w22.01 5 ¶10-11

Мерно, һун бона хер у хԝәшийа малбәта хԝә щабдар ьн, ләма һун бь дьл у щан бона әʹбура малбәта хԝә дьхәбьтьн. Гава һун рʹасти чәтьнайа тен, дьбәкә һун дьфькьрьн ԝәки дькарьн хԝәха вана сафи кьн. Ле хԝә нәсперьн ԛәԝат у аԛьле хԝә. Щара башԛә Йаһоԝарʹа дӧа бькьн у жь ԝи аликʹарийе бьхԝазьн. Ӧса жи, тʹәви жьна хԝә жь дьл дӧа бькьн. Кʹьтеба Пирозда у әʹдәбйәтада рʹебәрийа Йаһоԝа бьгәрʹьн у гӧһ бьдьн ван ширәта. Дьбәкә һьнә кәс бьфькьрьн ԝәки сафикьрьнед кӧ һун ль гора рʹебәрийа Кʹьтеба Пироз дькьн, нә баш ьн. Әԝана дьԛәԝьмә бежьн ԝәки бона хԝәйкьрьна малбәте, пʹәрә тьште һәри фәрз ә. Ле сәрһатийа Йәһошәфат пʹадша биньн бира хԝә (2 Дирок 20:1-30). Бь готьн у кьред хԝә, әԝи хԝә дьспарт Йаһоԝа. Йаһоԝа әԝ мәрьве амьн нәһишт, у әԝе ԝә жи нәһелә (Зәбур 37:28; Ибрани 13:5). w21.11 15 ¶6; 16 ¶8

Әм гӧнәкʹар ьн, ләма жи ньһерʹандьна мә сәр һәԛийе щарна шаш ә. Хԝәде әм сурәте хԝәда әʹфьрандьнә, ләма жи әм жь нәһәԛийе әʹщьз дьбьн (Дәстпебун 1:26). Ле чьԛас жи әм бьфькьрьн кӧ әм һәр тьшти заньн, йәкә әм ԛьсурдар ьн у ньһерʹандьна мә дькарә нәрʹаст бә. Мәсәлә, бинә бира хԝә кӧ гава Йаһоԝа сафи кьр ԝәки рʹәʹма хԝә щьмәʹта Нәйноԝайе бинә, Уньс чьԛас әʹщьз бу (Уньс 3:10–4:1). Ле дина хԝә бьде кӧ сафикьрьна Йаһоԝа кʹарәкә чьԛас мәзьн ани! Зедәтьри 120 000 кәсед кӧ тʹобә кьрьн, сах ман. Әʹйан ә кӧ ньһерʹандьна Уньс шаш бу, ле ньһерʹандьна Йаһоԝа рʹаст бу. Йаһоԝа мәщбур нинә бона сафикьрьнед хԝә һʹәсаба бьдә мә. Бәле, Йаһоԝа щарна изьн дьда кӧ хьзмәткʹаред ԝи фькьред хԝә һьндава сафикьрьнед ԝи бежьн (Дәстпебун 18:25; Уньс 4:2, 3). Щарна жи Йаһоԝа хԝәха мәʹнийед сафикьрьнед хԝә ԝанрʹа шьровәдькьр (Уньс 4:10, 11). Ле Әԝ һʹәԝще ԛәбулкьрьна мә нинә, нә пешийа кӧ әԝ тьштәки бькә, нә жи паши ве йәке (Ишайа 40:13, 14; 55:9). w22.02 3-4 ¶5-6

Гава әм мәрьва сәр хԝәрʹа дьгьрьн, бь рʹабун-рʹуньштьна хԝә әм дьбьнә мина «йе һәри бьчʹук» (Филипи 2:3). Һәгәр ньһерʹандьна мә ӧса бә, әме дьле кәсед дьн нәешиньн. Һʹәму хушк у бьред мә һьлбәт тьштәкида мә четьр ьн. Һәгәр әм дина хԝә бьдьн хәйсәтед ԝанә баш, әме ве йәке һеса бьвиньн. Ԝе баш бә кӧ әм ве ширәта Паԝлосе шанди бир нәкьн: «Кʹи тә жь хәлԛе фьрԛи дькә? Чи тә һәйә, кӧ тә пʹешкʹеш нәстандийә? Ле ԝәки тә стандийә, чьма пʹәйе хԝә дьди чаԝа тә нәстандьбә?» (1 Корьнтʹи 4:7). Гәрәке әм нәфькьрьн кӧ әм жь кәсед дьн четьр ьн. Һәгәр кәсәк пʹайе мә бьдә, чьмки готаред мә хԝәш ьн йан чьмки әм һеса һинбунед Кʹьтеба Пироз дәстпедькьн, гәрәке әм дәрберʹа рʹумәте бьдьнә Йаһоԝа. w21.06 22 ¶9-10

Һьнә ԝәлатада, бона Шәʹдед Йаһоԝа гәләк зор ә кӧ мәрьва ль мале бьвиньн. Гәләк хани у авайи парасти нә, у чәтьн ә кӧ хушк-бьред мә бькʹәвьн щийед ӧса. Нобәдар дьбәкә изне надьн кӧ кәсед кӧ нәһатьнә тʹәглифкьрьн бькʹәвьн һӧндӧрʹ. Ль һьнә дәра жи, хушк-бьред мә мал бь мал хьзмәт дькьн, ле гәләк кәс нә ль мале нә, йан жи ль щийед дур хьзмәт дькьн, кʹидәре кӧ һьнә мәрьв дьжин. Әԝана дьбәкә гәләк рʹе дьчьн сәва кӧ һәрʹьн маләке, ле гава әԝана дьгьһижьн ԝе дәре, тʹӧ кәс ль мале нинә. Гава әм рʹасти чәтьнайед ӧса тен, гәрәке әм хирәта хԝә ӧнда нәкьн. Сьһʹәтәкә дьн һәрʹә хьзмәте. Сәва кӧ әм рʹасти дьһа зедә мәрьва бен, гәрәке әм рʹож у сьһʹәтед кӧ әԝана ль мале нә һәрʹьн щәм ԝан. Зу йан дәрәнг, һәр кәс дьчә мала хԝә, нә ӧса йә? Гәләк хушк у бьра паши нивро йан еваре дьчьн хьзмәте, чьмки ԝе ԝәхте зедәтьр мәрьв ль мале нә. Ӧса жи, хԝәйед мале ԝе дьбәкә ль ԝан сьһʹәта дьһа рʹьһʹәт бьн у һазьр бьн кӧ хәбәр дьн. w21.05 15 ¶5, 7

Гәло әв проблем иро жи һәйә? Бәле. Гәләк кәс дьхәйидьн, чьмки Шәʹдед Йаһоԝа рʹожед мәхсус у щәжнед ӧса ча рʹожа буйине йан Сәре Сале тʹәви ԝан дәрбаз накьн. Һьнә кәс жи һерс дькʹәвьн, чьмки Шәʹдед Йаһоԝа щәжнед мьләтийе дәрбаз накьн, ӧса жи әʹйдед мьрийа у әʹдәтед чʹәʹлкьрьне накьн, йед кӧ мьԛабьли Хәбәра Хԝәде нә. Мәрьвед кӧ сәва ван тьшта әʹщьз дьбьн дьбәкә жь дьл баԝәр ьн кӧ әԝ бь щурʹе рʹаст Хԝәде дьһʹәбиньн. Ле һʹәта кӧ әԝана әʹрф-әʹдәтед дьнйайе сәр готьнед Кʹьтеба Пирозрʹа бьгьрьн, Хԝәде ԝе жь ԝан рʹази нибә (Марԛос 7:8, 9). Сәва кӧ әм нәлькʹӧмьн, гәрәке әм чь бькьн? Гәрәке әм ԛанун у принсипед Йаһоԝа жь дьл һʹьз бькьн (Зәбур 119:97, 113, 163-165). Һәгәр әм Йаһоԝа һʹьз бькьн, әме әʹрф-әʹдәтед кӧ ль ԝи хԝәш найен, инкʹар бькьн. Әме изне нәдьн кӧ тьштәк достийа мә тʹәви Йаһоԝа хьраб кә. w21.05 6 ¶15-16

Чаԝа әм дькарьн ве ширәта Паԝлос бьдьнә хәбате? Сәва кӧ баԝәрийа мә ԛәԝи бә, гәрәке әм бәрдәԝам Кʹьтеба Пироз леколин бькьн, дӧа бькьн у шьхӧле кӧ Йаһоԝа дайә мә, бь дьл у щан бькьн (2 Тимотʹейо 4:4). Һәгәр баԝәрийа мә ԛәԝи бә, әме сәва әʹламәтийед хьраб тʹәвльһәв нәбьн (Ишайа 28:16). Әм Йаһоԝа, Хәбәра ԝи у хушк-бьра һʹьз дькьн, ләма жи әме нәкʹәвьн бәр байе кәсед кӧ жь рʹийа рʹастийе дәркʹәтьнә. Ԛьрʹна йәкеда, гәләк кәс лькʹӧмин, у ԝана Иса Мәсиһ ԛәбул нәкьрьн. Жь алийе дьнда, гәләк кәсед дьн Иса ча Мәсиһе создайи ԛәбул кьрьн. Дь нав ԝанда, гәләк кʹаһин бун у һәри кем әндәмәки щьвина Гьрәгьра жи  һәбу (Кʹаред Шандийа 6:7; Мәтта 27:57-60; Марԛос 15:43). Иро жи, бь милйона кәс накʹәвьн шьке у налькʹӧмьн. Гәло чьма? Чьмки әԝана рʹастийа Кʹьтеба Пироз заньн у ве рʹастийе һʹьз дькьн. Хәбәра Хԝәде ӧса дьбежә: «Әԝед хԝәйе һинкьрьна Тә нә, жь рʹе накʹәвьн, әʹдьлайеда нә» (Зәбур 119:165). w21.05 13 ¶20-21

Паԝлосе шанди заньбу кӧ гәрәке әԝ хьзмәта Йаһоԝа, нә бь ԛәԝата хԝә, ле бь ԛәԝата Хԝәде бинә сери. Бь сайа рʹӧһʹе пироз, Йаһоԝа ԛәԝат дьда Паԝлос, ԝәки әԝ бькарьбә хьзмәта хԝә ԝәʹде зерандьне, гьртьне у тәнгасийед дьн бинә сери. Һәвале Паԝлос Тимотʹейо жи һʹәԝще ԛәԝата Хԝәде бу кӧ хьзмәта хԝә бинә сери. Тимотʹейо тʹәви Паԝлос дьчу щийед дур кӧ мьзгине бәла бькә. Ӧса жи, Паԝлос әԝ тʹәне дьшанд щийед дьн жи, ԝәки әԝ мерхасийе бьдә щьвата (1 Корьнтʹи 4:17). Тимотʹейо дьбәкә щарна дьфькьри кӧ әԝ һаԛас щерʹьбанди нинә кӧ бькарьбә ван тьшта бькә. Ле Паԝлосе шанди ԝирʹа ӧса гот: «Нәбә кӧ йәк щаһьлтийа тә беһӧрмәт кә» (1 Тимотʹейо 4:12). Сәрда, те кʹьфше кӧ бал Тимотʹейо жи «стьрийәк» һәбу, чьмки Кʹьтеба Пироз дьбежә кӧ әԝ гәләк щара нәхԝәш дькʹәт (1 Тимотʹейо 5:23). Ле Тимотʹейо заньбу кӧ бь сайа рʹӧһʹе пироз, Йаһоԝа ԝе ԛәԝате бьдә ԝи, ԝәки әԝ бькарьбә мьзгине бәла бькә у аликʹарийа хушк у бьра бькә (2 Тимотʹейо 1:7). w21.05 21 ¶6-7

Әв принсипа жь Аԛуб 1:19, бешьк бона кәсед кӧ ширәте дьдьн, гәләк керһати йә: «Бьра һәр мәрьв бьһистьнеда сәрхԝә бә, ле хәбәрдан у һерскʹәтьнеда гьран бә». Рʹуспик дькарә бьфькьрә ԝәки әԝ дәрһәԛа кәсәки һәр тьшти занә, ле гәло бь рʹасти ӧса йә? Мәтʹәлок 18:13 ӧса дьбежә: «Йе һе нәбьһисти щабе дьдә, әԝ беһʹьш у ԛара ԝи йә». Ләма жи ԝе баш бә, ԝәки әԝ рʹуспи бәри пешьн жь ви кәси бьпьрси һәла чь ԛәԝьмийә, у пешийа кӧ хәбәр дә, рʹьнд гӧһ бьде ԝи кәси. Әԝ дькарә пьрсед ӧса бьдә ԝи: «Тӧ ԛә ча ни? Әз ча дькарьм али тә бькьм?» Һәгәр рʹуспи хирәт бькьн кӧ һʹале хушк-бьра рʹьнд фәʹм бькьн, әԝе бькарьбьн дьһа баш али ԝан бькьн у ԝана ԛәԝи кьн. Сәва кӧ әм ширәтед керһати бьдьн, бәс нинә кӧ әм тʹәне чәнд рʹеза бьхуньн. Хушк-бьред мә гәрәке бьвиньн, ԝәки әм ԝана фәʹм дькьн, бона ԝан хәм дькьн у жь дьл дьхԝазьн али ԝан бькьн. w22.02 17 ¶14-15