Тирмәһ

Пьштгьрийа сафикьрьна рʹуспийа бькә. Гава кәсәк жь щьвате те дәрхьстьне, әв йәк те һʹәсабе ԝәки Йаһоԝа ԝи ширәт дькә. Ширәткьрьна ԝи бона ԛәнщийа һәр кәси йә – демәк бона кәсе кӧ жь щьвате һатийә дәрхьстьне жи. Һьнә кәс дькарьн ве сафикьрьне бькьнә бьн шьке, чьмки нахԝазьн дәрһәԛа кәсе кӧ гӧнә кьрийә, тьштәки хьраб бежьн йан жи кьред ԝийә хьраб әʹйан кьн. Ле гәрәке әм бир нәкьн кӧ әм һәр тьшти ньзаньн. Ләма, әм гәрәке итʹбарийа хԝә рʹуспийа биньн, чьмки ԝана ль гора принсипед Кʹьтеба Пироз әԝ йәк сафи кьрьнә у бона ве сафикьрьне бәр Йаһоԝа щабдар ьн (2 Дирок 19:6). Һәгәр тӧ пьштгьрийа сафикьрьна рʹуспийа бьки, әв йәк дькарә али кәсе кӧ жь щьвате һатийә дәрхьстьне бькә, ԝәки әԝ вәгәрʹә бал Йаһоԝа. Елизабет ӧса дьбежә: «Мәрʹа гәләк чәтьн бу һәләԛәтийа хԝә тʹәви кӧрʹе хԝәйи мәзьн бьԛәтиньн. Ле гава әԝ вәгәрʹийа щәм Йаһоԝа, әԝи гот ԝәки әԝ бь рʹасти жи һежа бу жь щьвате бе дәрхьстьне. Паше, әԝи гот кӧ әԝ гәләк тьштед фәрз һин бу». w21.09 28-29 ¶11-12

Дәрһәԛа ве жьнәбийе бьфькьрә. Әԝе бешьк дьхԝәст дьһа зедә тьшт бьда Йаһоԝа. Диса жи, әԝе чь жь дәсте ԝе дьһат, кьр. Әԝе тьште һәри баш, йе кӧ дәсте ԝеда һәбу, да Йаһоԝа. Ӧса жи, Иса заньбу кӧ Баве ԝи ԛӧрбанкьрьна ве жьнәбийе ԛимәт дькьр. Дәрсәкә фәрз әв ә: һәгәр әм бь дьл у щан Йаһоԝарʹа хьзмәт бькьн, әԝ ԝе жь мә рʹази бә (Мәтта 22:37; Колоси 3:23). Гава әм ԝәхт у ԛәԝата хԝә чьԛас жь дәсте мә те бона хьзмәт у щьвина хәрщ дькьн, Йаһоԝа гәләк ша дьбә. Тӧ чаԝа дькари дәрса жь сәрһатийа жьнәбийе бьди хәбате? Дәрһәԛа ԝан һьнә хушк-бьра бьфькьрә, йед кӧ хәмгин ьн, чьмки әԝана ида нькарьн ча бәре Йаһоԝарʹа хьзмәт бькьн. Дьбәкә щьвата тәда хушкәкә әʹмьрда мәзьн һәйә, йа кӧ хԝә бекер һʹәсаб дькә, чьмки сьһʹәта ԝе ида изне наде кӧ әԝ ча бәре дәркʹәвә хьзмәте. w21.04 6 ¶17, 19-20

Йаһоԝа бона ԛьрʹкьрьна ве система хьраб рʹож кʹьфш кьрийә. Бь сайа сәбра ԝи, бь милйона мәрьвед дьлпʹак һатьнә тʹопкьрьн. Әԝана ша нә кӧ Йаһоԝа сәбьр кьрийә у мәщал дайә ԝан кӧ бенә буйине, ԝи нас бькьн у жийина хԝә бьдьнә дәсте ԝи. Гава бь милйона мәрьв кӧ һʹәта хьлазийе сәбьр кьрьнә бен хьлазкьрьн, һьнге әме бьвиньн ԝәки чьԛас баш бу кӧ Йаһоԝа сәбьр дькьр. Мире-щьна чьԛас еш у дәрд ани жи, йәкә Йаһоԝа шабуна хԝә ӧнда накә, чьмки әԝ «Хԝәдейе хԝәзьли» йә (1 Тимотʹейо 1:11). Әм жи дькарьн бь шабуне сәбьр бькьн һʹәта кӧ Йаһоԝа наве хԝә пироз кә, изна сәрԝертийа хԝә избат кә, хьрабийе кʹокева рʹакә у дәрдед мә кʹӧта кә. Бьра әм сәбра хԝә тʹӧ щара ӧнда нәкьн, ле биньн бира хԝә кӧ Баве мәйи әʹзмана жи сәбьр дькә. w21.07 13 ¶18-19

Гәләк кәса баԝәрийа хԝә һьндава Иса Мәсиһ нәдьани. Бь дитьна ԝан, әԝ кӧрʹе нәщарәки кʹәсиб бу. Ӧса жи, әԝ жь бажаре Ньсрәте бу, бажарәки кӧ жь алийе гәләк мәрьвава дьһат ньмьздитьн. Мәсәлә, пешийа кӧ Натанйел бу шагьрте Иса Мәсиһ, әԝи ӧса готьбу: «Ԛәт дьбә кӧ тьштәки пʹак жь Ньсрәте дәркʹәвә?» Әԝи бәлки дьани бира хԝә кӧ ль гора Ньвисаред Пироз, Мәсиһ ԝе нә кӧ Ньсрәтеда, ле Бәйтләһʹмеда бьһата буйине (Миха 5:2). Ишайа пʹехәмбәр жь бәрева готьбу кӧ дьжмьнед Иса Мәсиһ ԝе һур бь һур дина хԝә нәдьн кӧ Мәсиһ жь кʹижан рʹькʹьнийате һат (Ишайа 53:8). Һәгәр мәрьвед ль рʹожед Иса Мәсиһ дина хԝә бьдана ван һургьлийа, ԝана ԝе фәʹм бькьра кӧ ча Миха 5:2-да һатийә пʹехәмбәртикьрьне, Иса Мәсиһ Бәйтләһʹмеда һатьбу буйине. Ӧса жи, әԝ жь зӧрʹәта Даԝьд Пʹадша бу (Луԛа 2:4-7). Гәло проблема ԝан мәрьва чь бу? Әԝана дькʹәтьн шьке, чьмки һʹәму избаткьрьна рʹьнд леколин нәкьрьбун. w21.05 2-3 ¶4-6

Кʹьтеба Пироз бәʹса һьнә кәсед дьн дькә, йед кӧ ширәт ԛәбул дькьрьн у ахьрийеда дьһатьнә кʹәрәм кьрьне. Мәсәлә, сәрһатийа Ибо бинә бәр чʹәʹве хԝә. Әԝ чьԛас жь Хԝәде дьтьрсийа жи, йәкә һьнә кемасийед ԝи һәбун. Гава әԝ бьн стресәкә мәзьнда бу, әԝи беһʹәмде хԝә хәбәр дьда у тьште шаш дьгот. Ләма жи, һьм Әлиһу һьм жи Йаһоԝа рʹастә-рʹаст ширәт данә ԝи. Гәло Ибо чь кьр? Әԝи әв ширәт бь мьлукти ԛәбул кьрьн. Әԝи гот: «Тьштед кӧ фәʹм нәкьрьмә готьм; . . . Жь бәр вейа, әз хԝә бьчʹук дьвиньм у хԝәли у тʹозеда тʹобә кьрьнеда мә». Сәва мьлуктийа ԝи, Йаһоԝа гәләк кʹәрәм сәр ԝида баранд (Ибо 42:3-6, 12-17). Мьлуктийа ԝи жь ве йәке әшкәрә йә, кӧ әԝи ширәта Әлиһу, йе кӧ жь ԝи бьчʹуктьр бу, ԛәбул кьр (Ибо 32:6, 7). Һәгәр әм бьфькьрьн, кӧ әм һʹәԝще ширәта ниньн, йан һәгәр кәсе кӧ ширәте дьдә мә, жь мә щаһьлтьр бә, мьлукти ԝе али мә бькә, ԝәки әм диса жи ширәте ԛәбул кьн. Бәле, мә һәр кәсирʹа лазьм ә, бәре рʹӧһʹе пироз нав хԝәда пешда биньн у хьзмәтийеда дьһа пешда һәрʹьн. w22.02 11 ¶8; 12 ¶12

Щьватеда, лазьм ә кӧ әм гьшк әʹдьлайе хԝәй кьн у һʹьзкьрьне нишан кьн, ԝәки тʹӧ кәс хԝә тʹәне тʹәхмин нәкә. Готьн у кьрьнед мә дькарьн кәсед дьн бьшьдиньн. Гәло тӧ ча дькари али ԝан хушк-бьра бьки йед кӧ рʹастийеда тʹәне нә, ԝәки әԝана хԝә ча нәфәред щьвате тʹәхмин бькьн? Тʹәви кәсед тʹәзә һәвалтийе бькә. Гава кәсед тʹәзә тен щьвинед мә, бь дьлгәрми сьлаве бьдә ԝан (Рʹомайи 15:7). Ле бәс нинә кӧ әм тʹәне сьлаве бьдьн ԝан, гәрәке әм ԝәхт шунда ԝанрʹа бьбьн дост у һәвал. Ләма, һьндава йед тʹәзәда ԛәнщ бә у бьдә кʹьфше кӧ тӧ бона ԝан хәм дьки. Хирәт бькә кӧ тӧ тәнгасийед ԝан фәʹм бьки, ле нәкʹәвә нав шьхӧлед ԝанә шәхси. Һьнә кәсарʹа чәтьн ә дьле хԝә вәкьн, ләма жи зоре ԝан нәкә. Бь нәрми у мәʹрифәти пьрса бьдә ԝан у гӧһ бьдә щабед ԝан. Мәсәлә, тӧ дькари бьпьрси кӧ ԝана чаԝа дәрһәԛа рʹастийе бьһист. w21.06 11 ¶13-14

Әм ви ԛәдри ԛимәт дькьн кӧ әм бь йәкти Йаһоԝарʹа хьзмәт дькьн. Әм кәрик ьн у шьване мә йәк ә. Кʹьтебәкә мә ӧса дьбежә: «Һәрге тӧ жь ве йәктийе кʹаре дьстини, гәрәке тӧ жи алийе хԝәда тьштәки бьки ԝәки ве хԝәй бьки». Ләма жи, гәрәке әм «хԝә һин бькьн кӧ әм мина Йаһоԝа сәр хушк у бьра бьньһерʹьн». Йаһоԝа мә һʹәмуйа ча зарʹед «бьчʹук» һʹәсаб дькә. Гәло тӧ жи ӧса сәр хушк-бьра дьньһерʹи? Йаһоԝа һәр тьшти ԛимәт дькә чь кӧ тӧ дьки, ԝәки али хушк-бьра бьки (Мәтта 10:42). Әм хушк у бьра һʹьз дькьн, ләма гәрәке әм «ньг нәдьнә ль бәр бьра, кӧ нәлькʹӧмьн йан пʹьшк нәбьн» (Рʹомайи 14:13). Әм хушк у бьра жь хԝә бьльндтьр һʹәсаб дькьн, у әм һазьр ьн кӧ жь дьл бьбахшиньнә ԝан. Бьра әм сәва кьред кәсед дьн нәлькʹӧмьн, ле «әм һьндава һәвда сәр нета әʹдьлайийе у баԝәри авакьрьне бьн» (Рʹомайи 14:19). w21.06 24 ¶16-17

Һәгәр әм бь хирәт леколине бькьн у ширәтед Хәбәра Хԝәде у тʹәшкиләта ԝи жийина хԝәда биньн сери, хәйсәт-һʹӧнӧред мә ԝе һеди-һеди мина йед Иса бьн. Ӧса жи, әме Хԝәде дьһа баш нас бькьн. Иса мьзгинийа Пʹадшатийе бәрамбәри тʹохьмәки кьр, йе кӧ дьле кәсед дьлсахда һеди-һеди мәзьн дьбә. Әԝи гот: «Тʹохьм шин дьбә, бьльнд дьбә у хԝәха [тʹохьмрʹәш] пе наһʹәсә кӧ әв чаԝа дьбә. Әʹрд жь хԝә бәр дьдә, пешийе зил, паше сьмбьл, пәйрʹа жи гәньме гьһишти сьмбьлда» (Марԛос 4:27, 28). Иса дьхԝәст бьгота ԝәки һәма чаԝа гәньм һеди-һеди мәзьн дьбә, ӧса жи мәрьве кӧ мьзгине ԛәбул дькә, рʹӧһʹанида һеди-һеди пешда дьчә. Мәсәлә, чьԛас хԝәндәкʹаред мә дьһа незики Йаһоԝа дьбьн, һаԛас әм дьвиньн ԝәки әԝана алийе башда тенә гӧһастьне (Әфәси 4:22-24). Ле йәкә гәрәке әм бир нәкьн ԝәки йе кӧ тʹохьм мәзьн дькә, Йаһоԝа йә. w21.08 8-9 ¶4-5

Әм дькарьн шабуне бьвиньн һәгәр щийе рʹаст бьгәрʹьн. Мәрьве кӧ бь тьштед «кӧ чʹәʹв дьвинә» ша дьбә, жь һʹале хԝә рʹази йә. Ле мәрьве кӧ һәр тʹьм дьфькьрә тʹәне сәр ве йәке чь кӧ ‹щане ԝи дьхԝазә›, пәй ван тьшта дькʹәвә, йед кӧ щәм ԝи тʹӧнә нә. Әв бона мә чь дәрс ә? Сәва кӧ әм шабуне бьвиньн, гәрәке әм дина хԝә бьдьн сәр тьштед кӧ щәм мә ида һәнә у сәр нетед ӧса кӧ әм бь рʹасти дькарьн бьгьһижьне. Гәло бь рʹасти дьбә ԝәки әм жь тьштед кӧ щәм мә һәнә, рʹази бьн? Һьнә кәс дьфькьрьн кӧ әв йәк набә, чьмки мәрьв щики насьтьрә у һәр тʹьм тьштед тʹәзә дьгәрʹә. Ле бь рʹасти әԝ йәк дьбә! Әм дькарьн бь тьштед «кӧ чʹәʹв дьвинә» һьм рʹази бьн һьм жи шабуне бьстиньн. Гәло чь щурʹәйи? Мәсәла Иса дәрһәԛа тәланта леколин бькьн, йа кӧ Мәтта 25:14-30-да ньвисар ә, у дина хԝә бьдьне кӧ чь һун дькарьн жь ве мәсәле һин бьн ԝәки шабуне ӧнда нәкьн у чаԝа шабуна хԝә дьһа зедә кьн. w21.08 21 ¶5-6

Йаһоԝа «незики дьлшкәстийа йә». Ԝе баш бә кӧ нә тʹәне рʹуспи, ле әм гьшк дьл бьдьн ван хушк у бьред һежа. Мәсәлә, гава әм жь дьл бона ԝана хәм дькьн, әв йәк ԝана гәш у ԛәԝи дькә. Йаһоԝа дьхԝазә кӧ әм нишани ԝан бькьн, ԝәки әԝ пәзед хԝә чьԛас һʹьз дькә (Мәтʹәлок 19:17). Ӧса жи, мьлуктийа мә дькарә али хушк-бьра бькә. Әм нахԝазьн бьбьн сәбәб кӧ әԝ чʹәʹвнәбарийе мә бькьн, ле әм дьхԝазьн бь сайа һʹӧнӧр у занәбуна хԝә дьл бьдьн һәвдӧ (1 Пәтрус 4:10, 11). Әм дькарьн гәләк тьшт һин бьн жь ве йәке кӧ Иса һьндава шагьртед хԝәда ча бу. Дьнйайеда кәс мина ԝи тʹӧнә бу. Диса жи, Иса «шкәсти» у «дьлмьлаһим» бу (Мәтта 11:28-30). Хәбәрдана ԝи дьле мәрьва дьгьрт, чьмки әԝи бь зьманәки һеса у бь мәсәла хәбәр дьда (Луԛа 10:21). w21.07 23 ¶11-12

Гава пешьн бавежә, ԝәки тʹәви хушк-бьред әʹмьрда мәзьн хәбәрдане дәстпеки. Дьбәкә чʹәʹве ԝан ида рʹьнд навинә, әԝана ида нькарьн зу рʹе һәрʹьн у дәнге ԝан ида ԛәԝи нинә, ле ча те готьне, дьл пир набә. Сәрда жи, ԝана щәм Йаһоԝа «наве баш» ԛазанщ кьрийә (Ԝаиз 7:1, ИМ). Бир нәкә кӧ чьма Йаһоԝа ԝана ԛимәт дькә. Ԛәдре ԝан бьгьрә. Мина Елиша бә. Әԝ һʹәта хьлазийе щәм Елйас ма, у әԝи се щара ԝирʹа гот: «Әз тә бәрʹнадьм» (2 Пʹадшати 2:2, 4, 6). Жь дьл гӧһ бьдә хушк-бьред әʹмьрда мәзьн у бь сайа пьрса ԝана һелан кә дьле хԝә вәкьн (Мәтʹәлок 1:5; 20:5; 1 Тимотʹейо 5:1, 2). Мәсәлә, тӧ дькари пьрсед ӧса бьпьрси: «Гава һун щаһьл бун, һун чаԝа баԝәр бун ԝәки рʹийа Йаһоԝа, рʹийа рʹаст ә? Ԛәԝьмандьнед жийина ԝәда ԝә чаԝа дьһа незики Йаһоԝа кьрьн? Бь дитьна ԝә, мәрьв чаԝа дькарә хьзмәта Йаһоԝада бәхтәԝар бьминә?» (1 Тимотʹейо 6:6-8). Паше, рʹьнд гӧһ бьдә щабед ԝан. w21.09 5 ¶14; 7 ¶15

Гава әм чь жь дәсте мә те дькьн, ԝәки мьзгине бәла кьн у мәрьва бькьн шагьртед Иса, әм нишан дькьн кӧ әм Хԝәде һʹьз дькьн (1 Йуһʹәнна 5:3). Һәла бьфькьрә: Жь бо ве йәке кӧ тӧ Йаһоԝа һʹьз дьки, тӧ мьзгине мал бь мал бәла дьки. Дьԛәԝьмә сәрида тәрʹа чәтьн бу кӧ ве тʹәмийе бини сери. Гава тә щара пешьн ԝәʹде хьзмәте дәре кәсәки хьсти, дьбәкә ньгед тә дьләрьзин. Ле тә заньбу кӧ Иса дьхԝазә ԝәки тӧ ви шьхӧли бьки, ләма тә гӧһ да тʹәмийа ԝи. Ԝәхт шунда, тӧ ида һини ви шьхӧли буйи. Ле гәло тӧ һе дьтьрси һинбунед Кʹьтеба Пироз дәрбаз бьки? Һәгәр ӧса йә, жь Йаһоԝа аликʹарийе бьхԝазә кӧ әԝ ве тьрсе жь дьле тә дәрхә, ԝәки тӧ бькарьби һинбуна Кʹьтеба Пироз дәстпеки. Бәле, бь аликʹарийа Йаһоԝа әм дькарьн хԝәстьна хԝә зедә кьн, кӧ бьбьнә дәрсдар у мәрьва бькьн шагьртед Иса. w21.07 3 ¶7

Ԝәʹде бәре, сәр хӧлама нишан дьһатә дайине, ԝәки бе кʹьфше хԝәйе ԝан кʹе йә. Мина ве йәке, дәԝләтед дьнйайе ԝе бьхԝазьн кӧ сәр дәст йан әʹнийа һәр кәси нишанәкә симболик һәбә. Демәк, әԝана ԝе бьхԝазьн ԝәки мәрьв пе рʹабун-рʹуньштьн у ньһерʹандьна хԝә, бьдьнә кʹьфше кӧ пьштгьрийа система политике дькьн. Гәло әме ве нишана симболик ԛәбул бькьн у пьштгьрийа политике бькьн? Кәсед кӧ ве нишане ԛәбул накьн, ԝе рʹасти тәнгаси у пәйкʹәтьна бен. Кʹьтеба Пироз ӧса дьбежә: «Тʹӧ кәс нькарьбә нә бькʹьрʹә, нә жи бьфьрошә, пештьри ԝи, йе кӧ нишан . . . сәр ә» (Әʹйанти 13:17). Ле хьзмәткʹаред Хԝәде заньн чь ԝе бе сәре кәсед кӧ ве нишане ԛәбул бькьн (Әʹйанти 14:9, 10). Дәԝса кӧ ве нишане ԛәбул бькьн, әԝана ԝе нишанәкә ӧса сәр дәсте хԝә бьньвисьн: «Пʹара Йаһоԝа нә» (Ишайа 44:5). Ньһа йә ԝәʹдә ԝәки амьнийа хԝә һьндава Йаһоԝа ԛәԝи кьн. Һәгәр әм ӧса бькьн, Йаһоԝа ԝе мәрʹа бьбә хԝәйи у хьлазкʹар! w21.09 18 ¶15-16

Сәва кӧ хьзмәтеда пешдачуйи бьн мәрʹа аликʹарийа кәсед дьн лазьм ә. Паԝлосе шанди методед бәлакьрьна мьзгине у һинкьрьне Тимотʹейо һин кьр, у әԝи Тимотʹейо һелан кьр кӧ әԝ бь сайа ван метода аликʹарийа кәсед дьн жи бькә (1 Корьнтʹи 4:17). Ча Тимотʹейо, әм жи дькарьн жь хушк у бьред щерʹьбанди һин бьн. Ӧса жи әм гәрәке жь Йаһоԝа аликʹарийе бьхԝазьн. Һәр щар кӧ тӧ дьчи хьзмәте, жь Йаһоԝа рʹебәрийе бьхԝазә. Бе аликʹарийа рʹӧһʹе пироз, әм нькарьн сәркʹәвьн (Зәбур 127:1; Луԛа 11:13). Дь дӧайед хԝәда рʹастә-рʹаст бежә кӧ хԝәстьна тә чь йә. Мәсәлә, жь Йаһоԝа рʹәща бькә кӧ әԝ рʹебәрийа тә бькә ԝәки рʹасти ԝи кәси бейи, йе кӧ һазьр ә гӧһ бьдә мьзгине. Әм ӧса жи гәрәке бона леколина шәхси ԝәхт вәԛәтиньн. Хәбәра Хԝәде ӧса дьбежә: «Бьзаньбьн чь йә ԛьрара Хԝәде, кӧ ԛәнщи, хԝәши у кʹамьли йә» (Рʹомайи 12:2). Чьԛас кӧ баԝәрийа мә зедә дьбә кӧ әм ль сәр рʹийа рʹаст ьн, кәсед кӧ әм мьзгине дьдьн ԝан ԝе әʹсәйи баԝәрийа мә бьвиньн. w21.05 18 ¶14-16

Соз мәсәлә, хԝәндәкʹарәки тә һәйә у тӧ бона пешдачуйина ԝи һәр тьшт дьки у дӧа дьки. Ле әԝ диса жи рʹӧһʹанида пешда начә у лазьм ә тӧ ве һинбуне бьди сәкьнандьне. Йан жи, дьбәкә һʹәта ньһа тʹӧ хԝәндәкʹаре тә нәһатийә ньхӧмандьне. Гәло лазьм ә тӧ хԝә сущдар бьки у бьфькьри ԝәки Йаһоԝа хьзмәта тә кʹәрәм накә? Йаһоԝа дина хԝә дьдә хирәт у сәбра мә. Бона Йаһоԝа, тьште һәри фәрз әв ә, ԝәки әм шьхӧле ԝи бь дьл у щан бькьн, фьрԛи тʹӧнә мәрьв гӧһ бьдьнә мә йан на. Паԝлос ӧса ньвиси: «Хԝәде сәр нәһәԛийе нинә, ԝәки кьред ԝә у әԝ һʹьзкьрьна кӧ ԝә бона наве ԝи да кʹьфше бир бькә, йа кӧ ԝә щьмәʹта Хԝәдерʹа хьзмәткʹари кьр у дькьн жи» (Ибрани 6:10). Һәгәр хирәта мә хьзмәтеда бәред баш найнә, диса жи Йаһоԝа хирәт у һʹьзкьрьна мә тʹӧ щар бир накә. Әԝ йәк те кʹьфше жь гьлийе Паԝлосе шанди жь рʹеза иройин. w21.10 25 ¶4-6

Ԛәнщи у һʹьзкьрьна Иса дьһатә кʹьфше жь һәләԛәтийа ԝи тʹәви шагьртед ԝи. Әԝи заньбу кӧ фәрәсәт у дәрәщед ԝан жь һәв щӧда нә. Ләма жи, щабдарийед ԝан жь һәв щӧдә дьбун у әԝана нькарьбун хьзмәтеда мина һәв пешдачуйи буна. Диса жи, Иса хирәта һәр йәки жь ԝан ԛимәт дькьр. Ньһерʹандьна Иса жь мәсәла тәланта әшкәрә йә. Ве мәсәледа, аха һәр хӧламед хԝәрʹа «ԝәкә ԛәԝата» ԝан шьхӧл да ԝан. Йәк жь ван хӧлама жь йе дьн зедәтьр тәлант ԛазанщ кьр. Ле аха пʹайе һәрдӧйа мина һәв да: «Әʹфәрьм, хӧламе ԛәнщ у амьн!» (Мәтта 25:14-23). Иса һьндава мәда жи ԛәнщи у һʹьзкьрьн нишан дькә. Әԝ занә кӧ фәрәсәт у дәрәщед мә жь һәв щӧда нә, у гава чь жь дәсте мә те әм бь дьл у щан дькьн, әԝ ша дьбә. Гәрәке әм мина Иса ԛәдре кәсед дьн бьгьрьн. w21.07 23 ¶12-14

Даԝьд Пʹадша нә һәртʹьм дьлрʹәʹмти дьда кʹьфше. Мәсәлә, гава Набал, йе кӧ мәрьвәки ԛӧрʹә бу, Даԝьд у әскәред ԝи беһӧрмәт кьр у хԝарьн нәда ԝан, Даԝьд һерс кʹәт у сафи кьр Набал у һʹәму меред мала ԝида, бькӧжә. Шькьр кӧ жьна Набал, Абигаил, йа кӧ жьнькәкә ԛәнщ у бьсәбьр бу, Даԝьд жь хунрʹетьне хԝәй кьр (1 Самуйел 25:9-22, 32-35). Дина хԝә бьдьн, гава Даԝьд һерс кʹәт, әԝи гот кӧ Набал у һʹәму хӧламед ԝи һежайи мьрьне нә. Щарәке жи Даԝьд фькьри кӧ мере жь чʹирока Натʹан, һежайи мьрьне йә. Илаһи жь дәрәща дӧда, әм дьбәкә әʹщебмайи дьминьн ԝәки мәрьвәки дьлгәрм чьма сафикьрьна һаԛас сәрт кьр. Ԝәрә әм сәр контексте бьфькьрьн. Ԝи чахи исафа Даԝьд нәрʹьһʹәт бу. Һәгәр кәсәк һәртʹьм кәсед дьн сәрт сущдар дькә, әв йәк нишан дькә кӧ әԝ рʹӧһʹанида сьст буйә. w21.10 12 ¶17-18; 13 ¶20

Жь гьлийед рʹеза иройин әм дьвиньн, ԝәки әм дькарьн чʹәʹв бьдьн Хԝәдайе пироз Йаһоԝа. Әм гәрәке рʹабун-рʹуньштьна хԝәда пироз бьн. Жь бо ԝе йәке кӧ әм гӧнәкʹар ьн, әм дьбәкә дьфькьрьн, ԝәки әв йәк жь ԛәԝата мә дәр ә. Пәтрусе шанди хԝәха жи гәләк шаши дькьрьн. Диса жи мәсәла Пәтрус нишан дькә, ԝәки әм дькарьн «пироз бьн». Һьнә кәс дьфькьрьн ԝәки кәсед пироз тʹӧ щар накʹәньн, һәртʹьм хԝә гьран дьгьрьн у кʹьнщед мәхсус хԝә дькьн. Ле бь рʹасти әв йәк найе һʹәсабе пирози. Кʹьтеба Пироз дьбежә ԝәки Йаһоԝа һьм пироз ә, һьм жи «Хԝәдейе хԝәзьли» йә, демәк йәки дьлша йә (1 Тимотʹейо 1:11). Хьзмәткʹаред ԝи жи дьлша нә (Зәбур 144:15). Иса ԝан кәса инкʹар дькьр, йед кӧ кʹьнщед мәхсус хԝә дькьрьн у ԛәнщийе тʹәне бона ԝе йәке дькьрьн, кӧ бькʹәвьнә чʹәʹва (Мәтта 6:1; Марԛос 12:38). Ньһерʹандьна Мәсиһийед рʹаст дәрһәԛа пирозийе сәр һʹиме Кʹьтеба Пироз ә. Әм баԝәр ьн, ԝәки Хԝәдайе мәйи дьлован, тьштед ӧса жь мә дәʹԝа накә, чь кӧ жь ԛәԝата мә дәр ә. w21.12 2 ¶1, 3

Мә гәләк тьштед ԛәнщ жь Хԝәде стандьнә. Пʹешкʹеша һәри ԛимәт әв ә, ԝәки әм дькарьн ԝирʹа хьзмәт бькьн. Гава әм «тʹәмийед ԝи дьԛәдиньн», әм нишан дькьн ԝәки әм ԝи һʹьз дькьн (1 Йуһʹәнна 5:3). Бь һʹӧкӧме кӧ Иса жь Баве хԝә стандьбу, әԝи тʹәми да, ԝәки әм, мәрьвед жь һʹәму мьләта бькьн шагьртед ԝи у ԝана бьньхӧминьн (Мәтта 28:19). Ӧса жи әԝи тʹәми да, ԝәки әм һәвдӧ һʹьз бькьн (Йуһʹәнна 13:35). Бәле, Йаһоԝа ԝе кәсед гӧһдар бькә пʹара малбәта хԝәйә һʹәмдьнйайе (Зәбур 15:1, 2). Мәрьва һʹьз бькә. Һʹьзкьрьн һʹӧнӧре Йаһоԝа йа сәрәкә йә (1 Йуһʹәнна 4:8). Пешийа кӧ мә ԝи нас кьр, Йаһоԝа ида мә һʹьз дькьр (1 Йуһʹәнна 4:9, 10). Гава әм мәрьва һʹьз дькьн, әм чʹәʹв дьдьнә Йаһоԝа (Әфәси 5:1). Һʹәта ԝәхт һәйә, ԝе баш бә кӧ әм али мәрьва бькьн, ԝәки әԝана Йаһоԝа нас бькьн. Бь ве йәке, әме нишан кьн, ԝәки әм мәрьва һʹьз дькьн (Мәтта 9:36-38). Бь сайа ве йәке, әм мәщале дьдьн ԝан кӧ әԝ жи бьбьн нәфәред малбәта Йаһоԝа. w21.08 5-6 ¶13-14

Иса гәләк Йаһоԝа һʹьз дькә, ләма жи әԝи һьм бона хатьре Баве хԝә һьм жи бона мә әʹмьре хԝә ԛӧрбан кьр (Йуһʹәнна 14:31). Жийина Исайә сәр әʹрде әшкәрә дькьр, кӧ әԝ мәрьва чьԛас һʹьз дькә. Рʹож бь рʹож, әԝ һьндава мәрьва, һәла һе һьндава дьжмьнед хԝә жи, бь һʹьзкьрьн у дьлшәԝат бу. Һʹьзкьрьна хԝә һьндава мәрьва Иса ве йәкеда дьда кʹьфше, кӧ дәрһәԛа Пʹадшатийа Хԝәде ԝана һин дькьр (Луԛа 4:43, 44). Сәрда жи Иса һазьр бу кӧ бькʹәвә дәсте гӧнәкʹара, бьчәрчьрә у бе кӧштьне. Әв йәк нишан дькә кӧ Иса чьԛас Хԝәде у мәрьва һʹьз дькә. Бь сайа ве ԛӧрбане, әԝи рʹийа жийина һәрһәйи бона мә һʹәмуйа вәкьрийә. Мә жийина хԝә дайә дәсте Йаһоԝа у әм һатьнә ньхӧмандьне, чьмки әм Баве хԝәйи әʹзмана һʹьз дькьн. Ләма жи мина Иса, гәрәке әм һьндава мәрьва баш бьн у бь ви щурʹәйи нишан кьн кӧ әм Йаһоԝа һʹьз дькьн. Йуһʹәннайе шанди ньвисибу: «Һәгәр әԝе бьре хԝә кӧ дьбинә һʹьз накә, ԝе чаԝа бькарьбә Хԝәде һʹьз бькә кӧ набинә?» (1 Йуһʹәнна 4:20). w22.03 10 ¶8-9

Чьԛас жи әм һʹьз дькьн ԝәʹде хԝә бона Йаһоԝа хәрщ кьн, диса жи щарна әв йәк һеса нинә. Һәр рʹож һʹәзар шьхӧлед мә һәнә у щарна зор ә бона тьштед рʹӧһʹани ԝәхт вәԛәтиньн. Щабдарийед малбәте, хәбат у гәләк шьхӧлед дьн һаԛас ԝәхт жь мә дьстиньн, кӧ әм дьԛәԝьмә дьфькьрьн ԝәки ԝәʹде мә бона дӧа, леколин у фькьрандьна кʹур наминә. Ӧса жи, һьнә тьштед дьн жи дькарьн ԝәʹдә жь мә бьстиньн. Һәгәр әм фәсал нибьн, әм дькарьн бь зедәйи шьхӧлед ӧсава мьжул бьн, чь кӧ дьԛәԝьмә хьраб ниньн, ле ахьрийеда ԝәʹде мә ԝе нәминә, сәва кӧ әм достийа хԝә тʹәви Йаһоԝа ԛәԝи кьн. Әм һьлбәт щарна һʹәԝще һесабуне нә, ле һәгәр әм фәсал нибьн у гәләк ԝәʹдә сәр һесабуне хәрщ кьн, ԝәʹде мә бона шьхӧле рʹӧһʹани ԝе нәминә. Һәмьки ԝәʹдәдәрбазкьрьнед кӧ әм дьжберьн, дькарьн баш бьн, ле диса жи гәрәке әм бир нәкьн ԝәки һесабун, тьште һәри фәрз нинә (Мәтʹәлок 25:27; 1 Тимотʹейо 4:8). w22.01 26 ¶2-3

Гава Йаһоԝа Исраелийарʹа гот, ԝәки әԝана мәрьва һʹьз бькьн, әв йәк нәдьһатә һʹәсабе кӧ гәрәке әԝана тʹәне Исраелийа һʹьз бькьн. Ԝана гәрәке йед хәриб жи һʹьз кьрана, кӧ нав ԝанда дьжитьн. Әв йәк жь Ԛануна Кʹаһинтийе 19:33, 34 те кʹьфше. Лазьм бу, ԝәки әԝана хәриба ча бьнәлийед хԝә һʹәсаб кьн у ԝана мина хԝә һʹьз бькьн. Мәсәлә, ԝана гәрәке изьн бьда һьм хәриба һьм жи кʹәсиба, ԝәки сьмбьлед бәрмайи тʹоп бькьн (Ԛануна Кʹаһинтийе 19:9, 10). Әв принсип бона Мәсиһийед иройин жи фәрз ә (Луԛа 10:30-37). Гәло ча? Тʹәмамийа дьнйайеда, бь милйона кʹочʹбәр һәнә, у дьбәкә һьнәк жь ԝан незики мә дьжин у гәләк фәрз ә, ԝәки әм ԛәдре ԝан бьгьрьн. w21.12 12 ¶16

Чьԛас зедә әм жийина хԝәда рʹебәрийа Йаһоԝа бьгәрʹьн, һаԛас әме дьһа баԝәр бьн кӧ әԝ дькарә ахьрийеда мә хьлаз кә. Жийина мәда гәләк мәщал һәнә ԝәки нишан кьн, кӧ әм хԝә дьсперьн Йаһоԝа. Мәсәлә, баԝәри у хԝәстьнәкә ԛәԝи лазьм ә, кӧ әм һәрʹьн бал мәзьне хәбата хԝә у жь ԝи бьхԝазьн ԝәки изне бьдә мә әм һәрʹьн сәр щьвата мәзьн. Йан жи ԝәки әԝ графика хәбата мә бьгӧһезә, сәва кӧ әм бькарьбьн һәрʹьн һʹәму щьвата у дьһа зедә хьзмәт кьн. Ле һәгәр мәзьне хәбата мә ԛайил нибә у мә жь хәбате дәрхә, һьнге әме ча хԝә бьдьнә кʹьфше? Гәло әме баԝәр бьн, ԝәки Йаһоԝа ԝе мә тʹӧ щар тʹәне нәһелә у бона һʹәԝщед мә хәм бькә? (Ибрани 13:5) Сәрһатийед гәләк хушк-бьред мә кӧ хьзмәта һәртʹьмда ньн, нишан дькьн, ԝәки Йаһоԝа тʹьме те һәԝара хьзмәткʹаред хԝә. Бәле, Йаһоԝа амьн ә. Йаһоԝа тʹәви мә йә, ләма жи нә лазьм ә ԝәки әм ахьрийе бьтьрсьн. Һʹәта кӧ әм шьхӧле Пʹадшатийе датиньн щийе пешьн, Йаһоԝа ԝе тʹӧ щар мә нәһелә. w22.01 7 ¶16-17

Гәло баԝәрийа мә һьндава рʹуспийа чаԝа дькарә бе щерʹьбандьне? Бьдә бәр чʹәʹве хԝә, ԝәки кәсе кӧ жь щьвате һатийә дәрхьстьне, әԝ һәвале мәйи незик ә. Дьбәкә әм бәрхԝә дькʹәвьн һәла рʹуспийа бь рʹасти дина хԝә данә һʹәму фактора йан на. Ӧса жи, дьбәкә әм дӧдьли бьн һәла ԝана бь рʹасти ль гора хԝәстьна Йаһоԝа әв йәк сафи кьрьнә йан на. Гәло чь дькарә али мә бькә ԝәки әм сафикьрьна ԝан ԛәбул кьн? Гава кәсәк жь щьвате те дәрхьстьне, гәрәке әм бир нәкьн ԝәки әв йәк бона кʹара щьвате йә у дькарә кәсе гӧнәкʹаррʹа жи кʹаре бинә. Һәгәр кәсәки кӧ тʹобә накә щьватеда бьминә, әԝ дькарә зьраре бьдә щьвате (Галати 5:9). Ӧса жи, дьбәкә әԝ фәʹм нәкә кӧ гӧне ԝи чьԛас гьран ә, у хирәт нәкә ԝәки ньһерʹандьн у рʹабун-рʹуньштьна хԝә рʹаст кә, сәва кӧ диса достийа хԝә тʹәви Йаһоԝа ԛазанщ кә (Ԝаиз 8:11). Әм дькарьн баԝәр бьн кӧ гава рʹуспи сафи дькьн ԝәки кәсәк гәрәке жь щьвате бе дәрхьстьне, әԝана ве сафикьрьне ль гора принсипед Йаһоԝа дькьн. w22.02 5-6 ¶13-14

Һәгәр кәсәк серида ширәта сәр һʹиме Кʹьтеба Пироз ԛәбул нәкә жи, лазьм ә кӧ рʹуспи диса жи һʹәйф у бь сәбьр бьн. Һәгәр ширәта ԝан дәрберʹа ԛәбул накьн йан жи надьнә хәбате, гәрәке әԝана һерс нәкʹәвьн. Ләма жи ԝе баш бә, кӧ рʹуспи дӧайед хԝәйә шәхсида жь Йаһоԝа һиви кә, ԝәки кәсе кӧ һʹәԝще ширәте йә кʹәрәм кә, али ԝи бькә нета ширәте фәʹм кә у ве ширәте бьдә хәбате. Дьбәкә ԝи кәсирʹа, йе кӧ ширәте дьстинә, ԝәхт лазьм ә ԝәки сәр ве ширәте бьфькьрә. Һәгәр ширәт бь сәбьр у бь нәрми бе дайине, ԝе ԝирʹа дьһа һеса бе ширәте ԛәбул кә. Һәмьки фәрз ә ԝәки ширәт тʹьме сәр һʹиме Кʹьтеба Пироз бе дайине. Ӧса жи, бир нәкә ԝәки ширәта тә гәрәке нә тʹәне керһати бә, ле ӧса жи дьле хушк-бьра ша кә (Мәтʹәлок 27:9). w22.02 18 ¶17; 19 ¶19

Гава әм Йаһоԝарʹа дӧа дькьн, ԝәки әԝ ԛәԝате бьдә мә сәва кӧ сәри бь тәнгасикирʹа дәрхьн йан сәва кӧ әм кемасикә хԝә алт кьн, әм дьбәкә хәмгин дьбьн кӧ чьма щаб дәрәнги дькʹәвә. Гәло Йаһоԝа чьрʹа дәрберʹа щаба һʹәму дӧайед мә надә? Чахе әм жь дьл дӧа дькьн, әԝ дьвинә ԝәки әм бь рʹасти баԝәрийа хԝә ԝи тиньн (Ибрани 11:6). Гава әм дӧа дькьн, Йаһоԝа дьхԝазә бьвинә һәла әм ль гора дӧайе хԝә һәр тьшт дькьн у хирәт дькьн, ԝәки ԛьрара ԝи биньн сери, йан на (1 Йуһʹәнна 3:22). Мәсәлә, гава әм дьхԝазьн тʹәрка хәйсәтәки хьраб йан сьстбунәке бьдьн, ԝе мәрʹа лазьм бә бь сәбьр чь жь дәсте мә те бькьн, ԝәки сәркʹәвьн. Жь ве готьна Иса, әм фәʹм дькьн ԝәки щаба һьнә дӧайед хԝә әме дәрберʹа нәстиньн: «Бьхԝазьн һуне бьстиньн, бьгәрʹьн һуне бьбиньн, дәри хьн ԝе бәр ԝә вәбә. Чьмки кʹи кӧ дьхԝазә дьстинә, кʹи кӧ дьгәрʹә дьбинә у кʹи кӧ дәри дьхә бәр вәдьбә» (Мәтта 7:7, 8). w21.08 8 ¶1; 10 ¶9-10

Сәва кӧ баԝәрийа тә дьһа ԛәԝи бә, гәрәке тӧ бәрдәԝам ки Кʹьтеба Пироз леколин бьки (Йешу 1:8). Дина хԝә бьде кӧ Кʹьтеба Пироз чаԝа пʹехәмбәрти кьрьбу, ԝәки чь ԝе бьԛәԝьмә, у готьнед ньвискʹаред Кʹьтеба Пироз чаԝа һәвва гьредайи нә. Бь ви щурʹәйи, баԝәрийа тә ԝе дьһа ԛәԝи бә кӧ Хԝәдайәки дьлован у билан әм әʹфьрандьнә у Кʹьтеба Пироз жь бина бәр ԝи һатийә ньвисандьн (2 Тимотʹейо 3:14; 2 Пәтрус 1:21). Гава тӧ Кʹьтеба Пироз леколин дьки, бинә бәр чʹәʹве хԝә ԝәки ширәтед ԝе чьԛас керһати нә. Мәсәлә, Кʹьтеба Пироз жь бәрева готьбу кӧ «пʹәрәһʹьзи» тьштәки хьраб ә у дьбә сәбәба «кӧл у дәрда» (1 Тимотʹейо 6:9, 10; Мәтʹәлок 28:20; Мәтта 6:24). Бәле, бь рʹасти жи ширәта Кʹьтеба Пироз кӧ «пʹәрәһʹьз» нибьн, чьԛас керһати йә! Бь тʹәхмина тә, диса кʹижан принсипед дьн жь Кʹьтеба Пироз керһати нә? Чьԛас әм ширәтед Кʹьтеба Пироз ԛимәт бькьн, һаԛас әме хԝә бьсперьн биланийа Хԝәде, кӧ һәр тʹьм керһати йә (Аԛуб 1:5). Ахьрийеда, әме жь жийина хԝә дьһа зедә шабуне бьстиньн (Ишайа 48:17, 18). w21.08 17-18 ¶12-13

Һәгәр тӧ ида кал йан пир буйи, баԝәр бә ԝәки Йаһоԝа шьхӧле кӧ тә щаһьлтийа хԝәда дькьр, бир нәкьрийә. Тә мьзгина Пʹадшатийе бь дьл у щан бәла дькьр. Тә һьмбәри тәнгасийа сәбьр дькьр, тә һәртʹьм гӧһ дьда ԛанунед Хԝәде у тә щабдарийед гьран дьанинә сери. Тә чь жь дәсте тә дьһат дькьр, ԝәки ль гора рʹебәрийа тʹәзә йа тʹәшкиләта Йаһоԝа бьжийи. Тә дьле хушк-бьра ԛәԝи дькьр, ԝәки әԝана хьзмәта хԝә ча пешәнгед һәртʹьм, бәрдәԝам кьн. Бәле, Йаһоԝа тә гәләк һʹьз дькә, чьмки тӧ ԝирʹа амьн дьмини. Хԝәде соз дьдә кӧ әԝе хьзмәткʹаред хԝәйә амьн нәһелә (Зәбур 37:28). Әԝ ӧса дьбежә: «Һʹәта һун пʹорʹспи бьбьн жи әзе ԝә һьлгьрьм» (Ишайа 46:4, ИМ). Ле нәфькьрә кӧ һәгәр тӧ кал йан пир буйи, тӧ тʹәшкиләта Йаһоԝада ида кери тьштәки найейи. Баԝәр бә кӧ бь рʹасти рола тә гәләк фәрз ә! w21.09 3 ¶4

Рʹәʹма Йаһоԝа биланийа ԝийә мәзьнва гьредайи йә. Кʹьтеба Пироз ӧса дьбежә: «Сәрԝахтийа жорьн . . . бь рʹәʹме у бәред ԛәнщийева тʹьжи йә» (Аԛуб 3:17). Чаԝа бавәки дьлован, Йаһоԝа занә кӧ рʹәʹма ԝи кʹаре дьдә зарʹед ԝи (Ишайа 49:15). Мәрьв чьԛас ԛьсурдар бьн жи, әԝана дькарьн хԝә бавежьн бәр рʹәʹма Хԝәде. Биланийа Йаһоԝа бесинор ә. Ләма, һәгәр мәʹни һәбьн, әԝ һазьр ә рʹәʹмтийе бьдә кʹьфше. Йаһоԝа рʹәʹма хԝә бь сәрԝахти әʹйан дькә, ләма әв найе һʹәсабе ԝәки әԝ чʹәʹве хԝә сәр гӧна дадьдә. Бәле, сафикьрьна Йаһоԝа һәртʹьм бь билани йә у бона ԛәнщийа мә йә. Бәʹса хәбәре хьзмәткʹарәки Хԝәде бь һʹәмде хԝә гӧнә кьрийә. Гәрәке әм чь бькьн? Жь бина бәр Хԝәде, Паԝлосе шанди ӧса гот: «Тʹәви ԝи нәбьн» (1 Корьнтʹи 5:11). Кәсед кӧ гӧнед гьран дькьн у тʹобә накьн, жь щьвате тенә дәрхьстьне. Әв йәк лазьм ә сәва кӧ хушк-бьред амьн бед парастьн у принсипед Йаһоԝа хԝәй кьн. w21.10 9-10 ¶7-8

Ԛӧрбанкьрьнед бона шьхӧле Пʹадшатийе жи пʹарәкә һʹәбандьна мә йә. Исраелийарʹа һатьбу готьне ԝәки «дәст вала ль бәр Хӧдан нәсәкьньн» (Ԛануна Дӧщари 16:16). Ԝана дькарьбу һаԛас бьанийана, чьԛас кӧ дәсте ԝанда һәбу. Бь ве йәке ԝана дькарьбу рʹазибуна хԝә бьдана кʹьфше, бона һәр тьште кӧ Йаһоԝа сәва ԝан кьрьбу. Гәло әм чаԝа дькарьн нишан кьн, ԝәки әм Йаһоԝа һʹьз дькьн у кʹәрәмед кӧ әм жь ԝи дьстиньн, гәләк ԛимәт дькьн? Ԝе баш бә кӧ әм чьԛас жь дәсте мә те пе ԛӧрбанед хԝә пьштгьрийа щьвата хԝә у шьхӧле һʹәмдьнйайе бькьн. Паԝлосе шанди ӧса готьбу: «Һәгәр һун бь рʹәзәдьли кʹомәке бьдьн, әԝ ԝәкә ԝе йәке ԛәбул ә, чьԛас дәсте кʹева те, ле нә ԝәкә ԝе йәке, кӧ дестда тʹӧнә» (2 Корьнтʹи 8:4, 12). Бона Йаһоԝа, тьште һәри фәрз нә әв ә кӧ әме чьԛас бьдьн, ле әв ә кӧ әм жь дьл ве йәке бькьн (Марԛос 12:42-44). w22.03 24 ¶13

Рʹуспи һәмьки нькарьн һʹәму чәтьнайед хушк-бьра сафи кьн. Диса жи, Йаһоԝа дьхԝазә кӧ рʹуспи чь жь дәсте ԝан те бькьн, ԝәки хьзмәткʹаред ԝи ԛәԝи кьн у бьпарезьн. Һәгәр шьхӧлед рʹуспийа гәләк ьн, әԝана ча дькарьн аликʹарийе бьдьнә хушк-бьра у дьлбинийе бьдьнә ԝан? Чʹәʹв бьдьнә мәсәла Паԝлосе шанди. Паԝлос мәщал дьгәрʹийа кӧ пʹайе хушк-бьра бьдә у ԝана бьшьдинә. Ԝе баш бә кӧ рʹуспи чʹәʹв бьдьнә ԝи у бь дьловани али хушк-бьра бькьн (1 Тʹесалоники 2:7). Паԝлос ԝанрʹа дьгот ԝәки әԝ ԝана һʹьз дькә у Йаһоԝа жи ԝана һʹьз дькә (2 Корьнтʹи 2:4; Әфәси 2:4, 5). Паԝлос хушк-бьра ча достед хԝә һʹәсаб дькьр у тʹәви ԝана ԝәʹдә дәрбаз дькьр. Әв йәк кӧ әԝи ԝанрʹа аза дәрһәԛа тьрс у кемасийед хԝә гьли дькьр, нишан дькә ԝәки әԝи итʹбарийа хԝә ԝана дьани (2 Корьнтʹи 7:5; 1 Тимотʹейо 1:15). Ле Паԝлосе шанди һәри зедә дина хԝә нәдьда дәрдед хԝә, ле әԝи дина хԝә дьда сәр ве йәке кӧ ча али хушк-бьра бькә. w22.03 28 ¶9-10