ТʹЕМА ЖЬ РʹУЙЕ ЖУРНАЛЕ | КʹИ НӘ ШӘʹДЕД ЙАҺОԜА?
Шәʹдед Йаһоԝа мәрьве чь щурʹәйи нә?
Әм тʹәшкиләта интернасйонали нә, кʹижан кӧ тʹәви тʹӧ религийа гьредайи нинә. Рʹаст ә офиса мәйә сәрәкә дь Дәԝләтед Йәкбуйида нә, ле жь мә һʹәчʹи зәʹф ԝәлатед майинда дьжин. Әм һʹәйшт милйона зедәтьр ьн, у дь 230 зедәтьр ԝәлатада тʹәви мәрьва һинбуна Кʹьтеба Пироз дәрбаз дькьн. Ӧса әм гьлийе Иса дьԛәдиньн, кʹижан кӧ гот: «У әв Мьзгинийа Пʹадшатийе ԝе ль нав тʹәмамийа дьнйайе бе даннасинкьрьне, кӧ һʹәму мьләтарʹа бьбә шәʹдәти у һьнге хьлази ԝе бе» (Мәтта 24:14).
Фьрԛи тʹӧнә әм кʹидәре дьжин, әм ԛануна дәԝләте ча лазьм ә дьԛәдиньн, ле йәкә әм һʹәму тьшти дькьн сәва кӧ тʹәвнәбуйине һьндава политике хԝәй кьн. Чьмки әм гӧрʹа тʹәмийа Иса дькьн кʹижан кӧ да Мәсиһийа, ԝәки нәбьнә «пʹара дьнйайе». Ләма жи әм накʹәвьнә нава проблем у шьхӧлед политике, у нә жи тʹәв шәрʹа дьбьн (Йуһʹәнна 15:19; 17:16). Ԝәʹде Шәрʹе Һʹәмдьнйайейә II, Шәʹдед Йаһоԝа дькьрьнә кәле, дьчәрчьрандьн, у һәла һе дькӧштьн жи, чьмки ԝана тʹәвнәбуйин хԝәй дькьр. Кʹәшише бәре ль Алманйайе гот, кӧ ԝәʹде сәрԝертийа насиста, чаԝа кʹом, тʹәне әԝана бь рʹастийе жь бо баԝәрийа хԝә нәдьчунә әскәрийе.
«[Шәʹдед Йаһоԝа] принсипа ԛәԝи хԝәй дькьн. Мәрьве ԝи щурʹәйи һʹәлал, әм дькарьн бьдьнә хәбате һәла һе дь щийед политика лапә бьльндда жи. Ле әм тʹӧ щар нькарьн ԝана ԛазанщ кьн . . . Рʹаст ә әԝана ԛәдьре һʹӧкӧмәтийа сәрԝера дьгьрьн, ле баԝәр дькьн кӧ тʹәне Пʹадшатийа Хԝәде дькарә проблемед һʹәму инсанәте сафи кә» (Рʹожнамә «Нова Свобода», Кʹомара Чехйе).
Әм ӧса жи хԝә жь мәрьва башԛә накьн. Иса бона пәйчуйед хԝә Хԝәдерʹа дӧа кьр: «Әз һиви накьм кӧ тӧ ԝана жь дьнйайе һьлди» (Йуһʹәнна 17:15). Ләма жи һун дькарьн мә бьвиньн сәр хәбате, дькʹанада, мәкʹтәбада у щийед майин.