Гәло Мәләкед Зöлм Һәнә?

Бәле, мәләкед зöлм һәнә. Ле әwана жь кʹö һатьнә? Бькә бира хwә кö Хwәде, мәләк бь азайа бьжартьне әʹфьрандьн. Һьнә wәʹдә шунда паши wе йәке ча мәрьвед пешьн Адәм у Һева һатьнә әʹфьрандьне, әʹфьринәки рʹöһʹанийи кʹамьл азайа бьжартьна хwә нәрʹаст да хәбате. У әw бу сәбәбе мьqабьлибуне сәр әʹрде. Әwи öса кьр, кö Адәм у Һевайе мьqабьли Хwәде дәркʹәтьн (Дәстпебун 3:1-7; Әʹйанти 12:9). Кʹьтеба Пироз әʹйан накә, кö наве wи әʹфрине рʹöһʹани чь бу у әwи ль әʹзмана чь щи дьгьрт пешийа кö мьqабьли Хwәде дәркʹәта. Ле әʹйан ә кö паши мьqабьлибуна хwә, әw һатә навкьрьне ча Шәйтʹан у Мире-щьна, чь кö те һʹәсабе «Нәйар» у «Бöхданбеж» (Мәтта 4:8-11).

Ле йазьх, мьqабьлибун һьндава Хwәде һәма wе дәре хьлаз нәбу. Wәʹде Нöһ һьнә мәләка «щийе хwә шьһʹьтандьн» у жь малбәта Хwәдейә әʹзмани дәркʹәтьн. Әwана пәйа бунә сәр рʹуйе әʹрде, кʹәтьнә qальбе мәрьвайи сәва кö бенамöсийева мьжул бьн. Рʹасти жи әв кьред wан чьqас щöдә дьбун жь qьрара Хwәде, кö әwи мәләкарʹа кʹьфш кьрьбу (Щьһуда 6; Дәстпебун 6:1-4; 1 Пәтрус 3:19, 20).

Ахьрийе чь һатә сәре wан мәләкед зöлм? Чахе Хwәде селав рʹакьр, сәва кö әʹрде жь зöлмийе тʹәмьз кә, әв мәләк qальбе мәрьвайи һиштьн у пашда wәгәрʹийанә әʹзмен. Ле Хwәде ида изьн нәда wан мәләкед нәамьн, кö wәгәрʹьн «щийе хwә». Дәwсе, Хwәде wана синор кьр у авитә «тәʹристанийа [рʹöһʹани]», чь кö әʹйан ә ча Тартарус (Щьһуда 6; 2 Пәтрус 2:4, ДТʹ). Әw щьн бунә бәрдәстийед Шәйтʹан Мире-щьна, йе кö сәр щьна һʹöкöм дькә у «хwә дькә дьлqе мьлйакʹәте рʹонайи» (Мәтта 12:24; 2 Корьнтʹи 11:14).

Кʹьтеба Пироз әʹйан дькә, кö Пʹадшатийа Хwәде бьн сәрwертийа Иса дь 1914-да һатә кʹьфшкьрьне.a Һәма wи wәʹдәйида Шәйтʹан у щьнед wи жь әʹзмен һатьнә авитьне сәр рʹуйе әʹрде, кʹидәре кö кьред wан һатьн синор кьрьне. Зöлми у бенамусийа бәлабуйи йед кö тʹәмамийа дьнйайе зәфт кьрьнә, әʹшкәрә избат дькьн кö Шәйтʹан жь бо һерсе, һʹәму тьшти һьлдьшинә (Әʹйанти 12:9-12).

Зедәбуна бенамусийе у зöлмийе, öса жи избат дькә кö кʹöтасийа сәрwерийа wанә зöлм ида незик ә. Зутьрәке һʹöкöмкьрьна wан әʹфринед рʹöһʹанийе хьраб, wе бе һьлдане. Паши 1,000 салийа сәрwертийа Пʹадшатийа Хwәде йа сәр әʹрде, әw рʹöһʹед зöлм wе щара пашьн, сәр wәʹдәки кьн бенә бәрдане кö инсанәте бьщерʹьбиньн. Паше ида әwана wе бенә кʹöтакьрьне сәр һʹәта-һʹәтайе (Мәтта 25:41; Әʹйанти 20:1-3, 7-10).