Һәвале Баш бә Һәвалтийа Хwә Öнда Нәкә

ҺӘВАЛЕД баш гәләк qимәт ьн, чьмки һәвалтийа qәwи ньшкева найе. Ле һәрге әм тʹәхмин дькьн wәки һәвале хwә öнда дькьн, әм чь бькьн сәва һәвалтийа хwә хwәй кьн? Wәрә жь Кʹьтеба Пироз чәнд сәрһатийед мәрьва шеwьр кьн, у пебьһʹәсьн кö ча wана һәвалтийа хwә хwәй кьрьнә у чь дәрсе әм дькарьн жь wана һин бьн.

ЧАХЕ ҺӘВАЛ ШАШИЙЕ ДЬКӘ

Даwьде шьван у пʹадша, хwәйе һәвалһогьред баш бу. Һәваләки wи Йонатʹан бу (1 Сам. 18:1). Ле диса һәвалед Даwьд һәбун, мәсәлә Натʹане пʹехәмбәр. Кʹьтеба Пирозда найе готьне ча у кʹәнге wана дәстпекьр һәвалтийе бькьн, ле wәхтәки Даwьд дәстпекьр итʹбарийа хwә Натʹан бинә ча һәвале хwә. Мәсәлә, чахе Даwьд дьхwәст Йаһоwарʹа пʹарьстгәһе ава кә, әwи нета дьле хwә Натʹанрʹа вәкьр. Бәле, Натʹан бона Даwьд һәвал бу у ча мәрьвәки кö рʹöһʹе Йаһоwайи пироз сәр бу (2 Сам. 7:2, 3).

Ле щарәке тьште öса qәwьми, сәва чь жи һәвалтийа wан кʹәтә бьн qәзийе. Даwьд Пʹадша тʹәви Бәт-Шәбайе бенамуси кьр, у һьн жи паше мере wе Урийа кöшт (2 Сам. 11:2-21). Рʹаст ә Даwьд гәләк сала Йаһоwарʹа амьн бу у һәqи дькьр, ле паше әwи гöне гьран кьр! Гәло чьрʹа тʹәви пʹадшаки öса qәнщ тьште öса qәwьми? Гәло әw һаш пе тʹöнә бу wәки гöнәки гәләк гьран кьрийә? Гәло әw дьфькьри wәки әw wе бькарьбә гöне хwә жь Хwәде вәшерә?

Хенщи Натʹан дәрһәqа гöне Даwьд мәрьвед дьн жи заньбун. Ле гәло Натʹан чь кьр? Гәло әw һивийе бу wәки кәсәки дьн пʹадшарʹа дәрһәqа гöне wи бежә? Гәло чьрʹа Натʹан кʹәтә нав шьхöле Даwьд, нә әwи дькарьбу һәвалтийа хwәйә qәwи тʹәви wи öнда кьра? Натʹан заньбу wәки Даwьд, мәрьвәки нәнәһәq Урийа кöшт, у әw дькарә wи жи бькöжә һәрге әw гöне Даwьд әшкәрә бькә.

Ле Натʹан пʹехәмбәр мәрьве Хwәде бу. Әwи заньбу кö һәрге әw хwә кәр кә, һәләqәтийа wи тʹәви Даwьд ида wе мина бәре нибә, у һьн жи исафа wи wе тʹәмьз нибә. Натʹан фәʹм дькьр wәки һәвале wи Даwьд жь рʹийа Йаһоwа дәркʹәт у жерʹа аликʹари лазьм ә сәва диса вәгәрʹә сәр рʹийа рʹаст. Бәле, wи wәʹдәйи Даwьд һʹәwще һәвале рʹаст бу у Натʹан һәма әw һәвал бу. Натʹан сафи кьр wәки хәбәрдана хwә бь мәсәләке дәстпекә, кʹижан кö wе дьле Даwьд бьгьрә. Әwи мәсәла шьван ани, чьмки Даwьд бәре хwәха шьван бу. Бь ви авайи, Натʹан гьлийед Хwәде öса дәрбази Даwьд кьр, кö әw пʹошман бу. Әwи фәʹм кьр кö әwи гöнед гәләк гьран кьрийә у әве йәке wи һелан кьр гöне хwә бинә рʹуйе хwә у тʹобә бькә (2 Сам. 12:1-14).

Ле тәйе чь бькьра һәрге һәвале тә шашикә мәзьн бькьра, йан жи гöне гьран? Дьqәwьмә тö бьфькьри кö һәрге тö жерʹа шашийа wи бежи, тöйе wи öнда ки. Йан жи дьбәкә тö бьфькьри кö һәрге дәрһәqа гöне wи рʹуспийарʹа бежи сәва рʹöһʹанида али wи бькьн, әв те һʹәсабе тö жерʹа мьхәнәтийе дьки. Гәло тәйе чь бькьра ве дәрәщеда?

Щиани дәрһәqа кʹе жи мә жоре гот, тинә бира хwә: «Мьн фәʹм кьр wәки тьштәк qәwьми, чьмки Маурисйо ида ча бәре öса тʹәви мьн незик нибу. Мьнрʹа гәләк чәтьн бу, ле йәкә мьн сафи кьр wәки бона ве йәке тʹәви wи хәбәр дьм. Мьн дьле хwәда дьгот: ‹Ижа әз чь жерʹа бежьм? Нә әw хwәха жи занә чь гәрәке бькә. Һәрге әз жерʹа хәбәр дьм, әw дькарә гәләк һерс кʹәвә!› Ле әw һʹәму тьшт чь кö әwи мьн һин дькьр, бира мьнда бу, у әwе йәке әз һелан кьрьм тʹәви wи хәбәр дьм. Чахе мьнрʹа аликʹари лазьм бу, әwи жи тʹәви мьн хәбәр дьда. Мьн нәдьхwәст һәвалтийа хwә тʹәви wи бьбьрʹьм, ле мьн дьхwәст али wи бькьм, чьмки мьн wи һʹьз дькьр».

Маурисйо зедә дькә: «Щиани бь дьле сах незики мьн бу, у чь кö мьнрʹа дьгот гьшк рʹаст бу. Мьн фәʹм дькьр wәки ахьрийа кьред мьни хьрабда нә Щиани нәһәq ә, нә жи Йаһоwа. Ләма мьн ширәткьрьна рʹуспийа qәбул кьр у wәʹдә дәрбаз бу әз диса рʹöһʹанида qәнщ бум».

ЧАХЕ ҺӘВАЛ ЧӘТЬНАЙЕДА НӘ

Диса һәвалед Даwьд һәбун, йед кö wәʹде чәтьнайа бь амьни кʹеләка wи бун. Мәсәлә, Кʹьтеба Пироз Һуша нав дькә «һәвалбәнде Даwьд» (2 Сам. 16:16; 1 Дир. 27:33). Дьqәwьмә әw wәзир бу, йе кö һәвале пʹадшайи незик бу. У щара Һуша фәрманед öса дьани сери, йед кö конфиденсийал бун.

Чахе кöрʹе Даwьд Абшалом тʹәхте пʹадшатийе зәфт кьр, гәләк Исраели алийе wи гьртьн. Ле Һуша тʹәви Даwьд ма. Чахе Даwьд рʹәвийа кö хwә хьлаз кә, Һуша һьнге жи тʹәви wи чу. Дьле Даwьд гәләк дешийа, чьмки кöрʹе wи тʹәви мәрьвед кö Даwьд итʹбарийа хwә wан дьани, мьqабьли wи дәркʹәтьбун. Ле Һуша Даwьдрʹа амьн ма, әw һәла һе жи һазьр бу бона wи әʹмьре хwә бькә бьн qәзийе. Чаwа Даwьд жерʹа готьбу, әw чу бал дьжмьна у нәһишт wәки нета wан бе сери. Һуша әw йәк кьр нә жь бо борщдарийа хwә чаwа wәзир, ле чьмки әw һәвале амьн бу (2 Сам. 15:13-17, 32-37; 16:15–17:16).

Дьле мә дьлгәрм дьбә чахе әм дьвиньн, кö нава хушк-бьред мәда һәвалтийа рʹаст һәйә. Әм нафькьрьн wәки сәва шьхöлед мәйи щьватеда йан сәва борщед мә, әм гәрәке тʹәви wан һәвалтийе бькьн. Ле әм бь кьред хwә wанрʹа нишан дькьн wәки әм wана һʹьз дькьн у ләма тʹәви wан һәвалтийе дькьн.

Wәрә бьньһерʹьн qәwьмандьна бьре мә Федерико. Федерико бь аликʹарийа һәвале хwә Антонио, чәтьнайед гьранда тәйах кьрийә. Әw гьли дькә: «Чахе Антонио дәрбази щьвата мә бу, зутьрәке әм бунә һәвал. Әм һәрдö жи бәрдәстийе щьвате бун, у мә һʹьз дькьр тʹәвайи һәвкʹарийе бькьн. Һьнә wәʹдә шунда Антонио һатә кʹьфшкьрьне ча рʹуспи. Әw нә кö тʹәне һәвале мьн бу, ле әw öса жи алийе рʹöһʹанида бона мьн мәсәлә бу». Паше öса qәwьми кö Федерико гавәкә нәрʹаст кьр. Әwи дәрберʹа аликʹарийе жь рʹуспийа хwәст, ле ида нькарьбу ча пешәнг йан бәрдәстийе щьвате хьзмәт кьра. Ле гәло Антонио чь кьр?

Федерико тинә бира хwә: «Мьн дьдит кö дьле Антонио сәр мьн дьшәwьти. Әwи чьqас дькарьбу али мьн дькьр wәки әз бәрхwә нәкʹәвьм. Әwи тʹö щар әз нәдьһиштьм у гәләк хәм дькьр wәки әз зу рʹöһʹанида qәнщ бьм. Әwи дьл дьда мьн wәки әз рʹöһʹанида qәwи бьм у сьст нәбьм». Антонио шьровәдькә: «Мьн гәләк wәдә хәрщ дькьр тʹәв Федерико, чьмки мьн дьхwәст wәки әw дьле хwә мьнрʹа вәкә у кöла хwә мьнрʹа гьли кә». Wәʹдә дәрбаз бу у Федерико рʹöһʹанида qәwи бу у диса һатә кʹьфшкьрьне ча пешәнг у бәрдәстийе щьвате. Антонио дьбежә: «Рʹаст ә ньһа әм щурʹә-щурʹә щьватада хьзмәт дькьн, ле ньһа әм һәврʹа һе незик ьн».

ҺӘВАЛЕ ХWӘ ÖНДА НӘКӘ

Тәйе ча хwә тʹәхмин кьра һәрге һәвале тәйи незик пьшта хwә бьда тә чахе тö гәләк һʹәwще wи буйайи? Фәʹмдари йә wәки wе гәләк дьле тә бьешийа. Гәло тәйе бьбахшанда wи? Тәйе хwә диса незики wи бьгьрта ча бәре?

Бьфькьрьн кö чь qәwьми тʹәви Иса чахе әw сәр әʹрде бу. Иса гәләк wәхт хәрщ дькьр тʹәви шандийед хwәйи амьн, у әwана һәврʹа гәләк незик бун. Ләма әwи wана нав дькьр ча достед хwә (Йуһʹн. 15:15). Ле чахе Иса гьртьн у wи гәрәке бькöштана, шанди рʹәвин. Пешийа wе qәwьмандьне Пәтрус бәр шандийа готә Иса кö тʹö щар wи наһелә, ле һәма wе шәва кö Иса wе бьмьра, Пәтрус гот wәки Иса нас накә (Мәт. 26:31-33, 56, 69-75).

Иса заньбу wәки wе щерʹьбандьна хwәйә хьлазийеда тʹәне бьминә. Мәʹнийа wи һәбу wәки дьлтәнг бә у бьхәйидә жи. Ле чәнд рʹож паши сахбуна хwә, жь хәбәрдана wи тʹәви шагьрта qә нәдьһатә кʹьфше wәки әw сәр wана һерс бу, хәйиди бу, йан жи бәр хwә дькʹәт кö wана чьрʹа öса кьр. Иса шашийед wан нәда рʹуйе wан у нә жи wана нәһәq кьр кö чьрʹа чахе әw һатә гьртьне, wана әw тʹәне һиштьн.

Дәwсе, Иса бәр дьле Пәтрус у шандийед дьнда һат. Бона Иса шанди диса жи һәвале wи бун у әwи итʹбарийа хwә wан дьани. Иса тʹәми да wан wәки шьхöләки фәрз у мәзьн бькьн кö тʹәрихийеда qә нәqәwьмибу. Әwи һʹьзкьрьна öса мәзьн wанарʹа да кʹьфше, кö гәләк wәхт бира wана нәдьчу. Әwана сәр хwә дьхәбьтин wәки ида тьштед öса нәкьн. Бь рʹастийе жи, әw шьхöле кö Иса дабу wан, wана гәләк баш ани сери (Кар. Шанд. 1:8; Колс. 1:23).

Хушкәк бь наве Елвира гьли дькә wәки щарәке әwе һәвала хwә Гйулиана да хәйидандьне. Елвира тинә бира хwә: «Чахе әwе мьнрʹа гот wәки мьн бь кьре хwә дьле wе ешандийә, әз гәләк дьлтәнг бум. Изьна wе һәбу сәр мьн һерскʹәвә жи, ле әз зәндәгьрти мам кö әw дьһа зәʹф бона мьн бәр хwә дькʹәт. Әw нәдьхwәст wәки бона кьред хwә әз ахьрийа хьраб бьстиньм. Әзе тʹьме жь wе рʹази бьм, чьмки әwе дина хwә нәда сәр нәрʹастийа мьн һьндава wе, у әwе нәдьхwәст кö әз бона кьред хwә зийане бьстиньм. Әз жь Йаһоwа рʹази бум wәки әwи һәваләкә öса да мьн, йа кö һалхwәшийа мьн сәр йа хwәрʹа дьгьрт».

Демәк мә ве готареда дит кö һәвале баш wе чь бькә чахе һәвалти бьн qәзийеда нә. Әw wе әʹсә тʹәв һәвале хwә бь нәрми хәбәр дә у чахе лазьм бә wе әшкәрә жерʹа бежә дәрһәqа шашийа wи. Әw мина Һуша у Натʹан, wәʹде чәтьнайа бь амьни кʹеләка wи бә у мина Иса һазьр бә бьбахшинә wи. Ле гәло тö һәваләки öса ни?