Пьштгьрийа Сәрwертийа Йаһоwа Бькьн!

1, 2. Чьда гәрәке щәм мә шьк тʹöнә бә? (Бьньһерʹә шькле әʹwльн.)

ГОТАРА пешийа веда, мә шеwьр кьр кö Мире-щьна шәрʹ авитә Йаһоwа, кö йанчь әw сәрwере хьраб ә. Жь гьлийед Шәйтʹан һатә кʹьфше те бежи изьна Йаһоwа тʹöнә кö һʹöкöмтийе бькә у кö инсанәт wе һе бәхтәwар буйа һәрге хwәха сәр хwә сәрwерти бькьра. Гәло гьлийед wи рʹаст ьн? Бәʹса хәбәре, бьдьнә бәр чʹәʹве хwә кö мәрьв хwәха сәр хwә сәрwерти бькьрана у һʹәта-һʹәтайе бьжитана. Гәло әwана wе бей сәрwертийа Хwәде бәхтәwар бьжитана? Ле һуне бәхтәwар буна һәрге wә һʹәта-һʹәтайе бьжита у хwә сәре хwә буна?

² Щаба wан пьрса һун хwәха гәрәке бьдьн. У һәр кәс жь мә гәрәке кʹур бьфькьрә сәр ван пьрса. Гава әм кʹур бьфькьрьн, шьк wе щәм мә тʹöнә бә, кö Йаһоwа сәрwере рʹаст ә у һʹöкöмәтийа wи һәри баш ә. Ләма жи әw һежа йә кö әм бь дьл у щан пьштгьрийа сәрwертийа wи бькьн. Кʹьтеба Пироз мәрʹа избаткьрьна дьдә кö әw йәк бешьк рʹаст ә. Ләма жи wәрә әм ньһа чәнд тьшта шеwьр кьн, кʹижан кö избат дькьн, wәки тʹәне Йаһоwа йә хwәйиһʹöкöме тʹәмамийа гәрдуне.

ТʹӘНЕ ИЗЬНА ЙАҺОWА ҺӘЙӘ СӘРWЕРТИЙЕ БЬКӘ

3. Чьрʹа тʹәне Йаһоwа йә бь qануни хwәйиһʹöкöм?

³ Тʹәне Йаһоwа йә бь qануни хwәйиһʹöкöме дьнйайе, чьмки әw Хwәдейе һьмзор у Әʹфьрандаре һәр тьшти йә (1 Дир. 29:11; Кʹар. Шанд. 4:24). Әʹйанти сәре 4:11-да те гьликьрьне дәрһәqа хәwн-хәйаләке. Ве хәwн-хәйаледа, сәр әʹзмана 144 000 кö тʹәви Мәсиһ wе пʹадшатийе бькьн, гьлийед öса дьбежьн: «Йа Хöдан Хwәдейе мә, тö һежа йи кö рʹумәт, һöрмәте у qәwате бьстини. Чьмки тә һәр тьшт әʹфьрандьн у бь хwәстьна тә әw әʹфьрин у һәнә». Бәле, Йаһоwа һәр тьшт әʹфьрандьн, у ләма бь тʹәмами тʹәне изьна wи һәйә ча сәр әʹрде, öса жи сәр әʹзмана сәр һʹәмуйа сәрwертийе бькә.

4. Рʹаст ә азайа мәрьва һәйә бьжартьна бькьн, ле чьрʹа нәрʹаст ә кö мьqабьли сәрwертийа Хwәде дәрен?

⁴ Шәйтʹан тʹö тьшт нәәʹфьрандийә, ләма жи изьна wи тʹöнә сәрwертийе дьнйайе бькә. Ле әw у мәрьвед пешьн хwәрʹази бун, ләма әwана мьqабьли сәрwертийа Йаһоwа рʹабун (Йерәм. 10:23). Рʹаст ә азайа wан һәбу бьжберьн кö гöрʹа Хwәдеда бьн йан на, ле гәло әw бьжартьн рʹаст бу? На. Азайа бьжартьне мәрьварʹа изьне дьдә кö хwәха бьжартьна у сафикьрьна бькьн, ле әw найе һʹәсабе wәки гәрәке мьqабьли Әʹфьрандаре хwә дәрен, кʹижан кö әʹмьр дайә wан. Демәк, кʹе кö мьqабьли Хwәде дәрте, әw азайа хwә нәрʹаст дьдә хәбате. Бь рʹастийе һʹәму мәрьв гәрәке бьн сәрwертийа Йаһоwада бьн.

5. Чьрʹа әм дькарьн дöдьли нәбьн кö сафикьрьнед Хwәде тʹьме һәq ьн?

⁵ Диса мәʹни һәйә кö чьрʹа тʹәне изьна Йаһоwа һәйә сәрwертийе бькә. Йаһоwа бь һәqийе сәрwертийе дькә. Йаһоwа дьбежә: «Әз Йаһоwа мә, әз бь һʹьзкьрьне, һәqийе у рʹастийе мә һьндава әʹрде, чьмки әw йәк дьле мьн хwәш те» (Йерәм. 9:24, ДТʹ). Йаһоwа занә чь һәq у рʹаст ә, у жерʹа нәлазьм ә qанунед кö мәрьв хwәха чекьрьнә. Йаһоwа хwәха qануна датинә, у әwи ль гора һәqийа хwә мәрьварʹа qанун дайә. «Рʹасти у һәqи әw бьнгәһед тʹәхте . . . [wи] нә». Ләма жи һʹәму qанун, принсип у сафикьрьнед wи рʹаст ьн (Зәб. 89:14; 119:128). Шәйтʹан гот кö йанчь Йаһоwа Һʹöкöмдаре һәq нинә, ле хwәха Шәйтʹан һәqийе у рʹастийе нькарә бинә сәр дьнйайе.

6. Диса жь бо кʹижан мәʹники тʹәне изьна Йаһоwа һәйә сәрwертийе дьнйайе бькә?

⁶ Диса мәʹник һәйә кö чьрʹа тʹәне изьна Йаһоwа һәйә сәрwертийе бькә. Занәбун у биланийа wи һәйә, кö чаwа сәрwертийе гәрдуне бькә. Дина хwә бьдьн, кö Хwәде qәwат да Кöрʹе хwә, wәки нәхwәшийед öса qәнщ кә, кʹижан кö һʹәким нькарьн qәнщ кьн (Мәт. 4:23, 24; Марq. 5:25-29). Бона мә әw кʹәрәм ә, ле бона Йаһоwа әw тьштәк нинә. Әw занә кö бәдәна мә ча чекьри йә у ча дьхәбьтә, у дькарә һәр нәхwәши у зийане qәнщ кә. Әw öса жи дькарә мьрийа рʹакә у тʹәшqәлед тʹәбийәте жи бьдә һьлдане.

7. Чьрʹа дьнйа бьн һʹöкöме Шәйтʹанда нькарә әʹдьлайе бинә?

⁷ Дьнйа бьн һʹöкöме Шәйтʹанда тʹö щар нькарә әʹдьлайе бинә нава мьләта, нә жи нава wәлата. Тʹәне Йаһоwа дькарә әʹдьлайе бинә сәр дьнйайе, чьмки билани у сәрwахтийа wи һәйә (Иша. 2:3, 4; 54:13). Гава әм кʹур бьфькьрьн сәр занәбун у биланийа Йаһоwа, әме жи мина Паwлос бьхwазьн бежьн: «Чьqаси кʹур ьн дәwләмәндти, сәрwахти у занәбуна Хwәде! Qьраред wи чьqаси жь һʹьш-аqьла дур ьн у кәс сәрәдәрийе жь рʹийед wи накә!» (Рʹом. 11:33)

ЙАҺОWА СӘРWЕРЕ ҺӘРИ БАШ Ә

8. Чь wә хwәш те ве йәкеда кö Йаһоwа ча сәрwертийе дькә?

⁸ Бәле, Кʹьтеба Пироз зәлал әʹйан дькә, wәки тʹәне изьна Йаһоwа һәйә һʹöкöмтийе бькә. Ле wедәре öса жи те готьне кö чьрʹа әw сәрwере һәри баш ә. Мәʹник әw ә кö әw бь һʹьзкьрьне сәрwертийе дькә. Чахе әм дьфькьрьн кö әw ча сәрwертийе дькә, әм wи һе qайим һʹьз дькьн. Әw ә Хwәдейе «рʹәʹм у кʹәрәме, сәбьр-ськʹане, бь һʹöб у амьнийеда хьнейо» (Дәркʹ. 34:6). Хwәде һьндава хьзмәткʹаред хwә бь qәдьр ә. Әw занә мәрʹа чь лазьм ә у һе баш мә хwәй дькә, нә кö әм хwәха. Мире-щьна гот кö йанчь Йаһоwа жь хьзмәткʹаред хwә тьштед баш вәдьшерә. Ле әw дәрәwа мәзьн ә! Нә Хwәде бона мә Кöрʹе хwәйи дәлал qöрбан кьр, сәва ахьрийеда әм һʹәта-һʹәтайе бьжин! (Бьхунә Зәбур 84:11; Рʹомайи 8:32.)

9. Әм жь кʹö заньн кö Хwәде бона һәр кәси башqә-башqә хәм дькә?

⁹ Рʹаст ә Йаһоwа тʹәмамийа щьмәʹта хwә һʹьз дькә, ле әw öса жи бона һәр мәрьвәки башqә-башqә хәм дькә. Биньн бира хwә сәрһатике кö бәре qәwьми. Нава се qьрʹнада, Йаһоwа бь сайа һʹакьма рʹебәри щьмәʹта хwә дькьр, у али wан дькьр wәки шәрʹада дьжмьнед хwә алт кьн. Wи wәʹде һәвкʹәтида, Йаһоwа дина хwә дьда сәр һәр мәрьвәки. Йәк жь wан Рʹутʹ бу, йа кö Исраели нибу, ле гәләк тьшт qöрбан кьр wәки бьбә хьзмәткʹаре Йаһоwа. Йаһоwа сәва ве йәке ле кʹәрәм кьр, у әwе мерәки баш станд у кöрʹ жерʹа бу. Һьн жи кöрʹе wе бу пʹара ве рʹькʹьнйате, жь кʹижани гәрәке Мәсиһ бьһата. Хенщи ве йәке, сәрһатийа wе Кʹьтеба Пирозда һатә ньвисаре. Бьдьнә бәр чʹәʹве хwә, кö чахе әw жь мьрьне рʹабә у әwан тьшта пебьһʹәсә, wе чьqас ша бә кö Йаһоwа ча ле кʹәрәм кьрийә! (Рʹутʹ 4:13; Мәт. 1:5, 16)

10. Йаһоwа чь щурʹәйи сәрwертийе дькә?

¹⁰ Йаһоwа сәрwере сәрт нинә у әw нә жи зоре кәсәки дькә кö гöрʹа wида бә. Сәрwертийа wи азайе тинә у мәрьва бәхтәwар дькә (2 Корн. 3:17). Даwьд дәрһәqа Йаһоwа öса гот: «Бьльндайи у мәзьнайи ль бәр wи нә; qöдрәт у кʹефхwәши ль щиһе кö әw ле рʹудьне нә» (1 Дир. 16:7, 27). Зәбурбеж Әйтʹан жи гот: «Хwәзи ль wе щьмәʹте, кö занә дәнг һьлдә щәжьнерʹа. Хöдано, әw бь рʹонайа рʹуйе Тә дьмәшьн. Тʹәмамийа рʹоже бь наве Тә ша дьбьн у бь азадийа Тә бьльнд дьбьн» (Зәб. 89:15, 16).

11. Чьрʹа әм дькарьн дöдьли нәбьн кö сәрwертийа Йаһоwа һәри баш ә?

¹¹ Һәрге әм кʹур бьфькьрьн кö Йаһоwа чьqас qәнщ ә, әме дöдьли нәбьн кö сәрwертийа wи һәри баш ә. У әме жи мина зәбурбеж бьн, кʹижани кö Хwәдерʹа гот: «Рʹаст рʹожәкә һʹәwша Тәда, жь һʹәзар рʹожед дәрәкә четьр ә» (Зәб. 84:10). Йаһоwа мә әʹфьранд у ләма әw занә чь бь рʹастийе мә бәхтәwар у ша дькә. У әw һе зәʹф тьшта дьдә мә, нә кö чьqас мәрʹа лазьм ә. Чь кö Йаһоwа жь мә дәʹwа дькә, тʹьме бона кʹара мә йә у шабуне мәрʹа тинә. Һәрге жи әм жь хwә тьштәки кем дькьн сәва кö гöрʹа wи бькьн, һьнге жи әм шабуне дьстиньн. (Бьхунә Ишайа 48:17.)

12. Бәре әʹwльн чьрʹа әм дьхwазьн пьштгьрийа сәрwертийа Йаһоwа бькьн?

¹² Кʹьтеба Пироз дьбежә кö паши Һʹәзарсалийа Пʹадшатийа Мәсиһ, һьнә мәрьв wе мьqабьли сәрwертийа Йаһоwа рʹабьн (Әʹйан. 20:7, 8). Ле wе чь бьбә мәʹни кö әwана öса бькьн? Мире-щьн wе жь зьндане бе бәрʹдане у бьхwазә инсанәте бьхальфинә. Бешьк, ча һәр гав, әwе диса жи бьхwазә мәрьва бьдә баwәркьрьне кö йанчь әwана дькарьн гöрʹа Хwәде нәкьн у һʹәта-һʹәтайе бьжин. Ле әw йәк дәрәw у qәлп ә. Йәкә пьрс пешда те: «Гәло әме баwәрийа хwә ве qәлпийе биньн?» Һәрге әм Йаһоwа һʹьз дькьн у дöдьли ниньн кö әw qәнщ ә у кö тʹәне әw ә Сәрwере гәрдуне, әме тʹö щар дәрәwе öса баwәр нәкьн. Әме бьхwазьн тʹәне бьн пʹәʹре Йаһоwада бьжин, демәк бьн сәрwертийа wийә һәqда.

БЬ АМЬНИ ПЬШТГЬРИЙА СӘРWЕРТИЙА ХWӘДЕ БЬКЬН

13. Диса ча әм дькарьн нишан кьн кö әм сәрwертийа Хwәде qәбул дькьн?

¹³ Ча мә ида шеwьр кьр, тʹәне Йаһоwа хwәйиһʹöкöм ә у сәрwертийа wи йа һәрә баш ә. Бешьк, Йаһоwа һежа йә, wәки әм пьштгьрийа сәрwертийа wи бькьн. Чахе әм жерʹа хьзмәт дькьн, амьн дьминьн у чʹәʹв дьдьнә wи, öса әм нишан дькьн кö пьштгьрийа сәрwертийа wи дькьн. Чахе әм һәр тьштида ньһерʹандьна Йаһоwа һьлдьдьнә һʹәсаб, әм избат дькьн кö wи һʹьз дькьн у сәрwертийа wи qәбул дькьн. (Бьхунә Әфәси 5:1, 2.)

14. Рʹуспи у малхед мале ча дькарьн чʹәʹв бьдьнә Йаһоwа?

¹⁴ Әм жь Кʹьтеба Пироз пеһʹәсийан кö Йаһоwа бь һʹьзкьрьн сәрwертийе дькә. Рʹуспи у малхед мале, йед кö сәрwертийа Йаһоwа һʹьз дькьн, ве йәкеда wе чʹәʹв бьдьнә Йаһоwа. Әwана wе тʹö щар сәрт нибьн у йед майин контрол нәкьн. Паwлосе шанди тʹьме чʹәʹв дьда Хwәде у Кöрʹе wи (1 Корн. 11:1). Әwи тʹö кәс беһöрмәт нәдькьр у нә жи зоре wан дькьр wәки тьштед рʹаст бькьн. Дәwсе, әwи wана һелан дькьр у жь wан һиви дькьр (Рʹом. 12:1; Әфәс. 4:1; Фьльмн. 8-10). Öса әwи чʹәʹв дьда Йаһоwа. Бәле, һәр кәс жь мә йе кö сәрwертийа Йаһоwа һʹьз дькә, гәрәке һьндава мәрьвада öса бә.

15. Гава әм qәдьре wан дьгьрьн кʹерʹа Йаһоwа һʹöкöм дайә, бь ве йәке ча әм һʹьзкьрьна хwә Йаһоwарʹа нишан дькьн?

¹⁵ Әм гәрәке һәвкʹарийе бькьн тʹәви wан, кʹерʹа Йаһоwа һʹöкöм дайә. Wи щурʹәйи әме нишан кьн кö пьштгьрийа сәрwертийа Йаһоwа дькьн. Һәрге жи әм бь тʹәмами фәʹм накьн йан жи qайил ниньн тʹәви сафикьрьнәкә wан, әме диса жи пьштгьрийа wан бькьн. Ве дьнйайеда öса нинә, ле һәрге әм дьхwазьн бьн сәрwертийа Йаһоwада бьжин, әм гәрәке öса бькьн (Әфәс. 5:22, 23; 6:1-3; Ибрн. 13:17). Хwәде мәрʹа qәнщийе дьхwазә, ләма жи чь кö әw дьбежә, тʹьме бона кʹара мә йә.

16. Әм чаwа гәрәке сафикьрьна бькьн?

¹⁶ Чахе әм сафикьрьна дькьн, һьнге жи әм дькарьн нишан кьн кö пьштгьрийа сәрwертийа Хwәде дькьн. Йаһоwа бона һәр дәрәща мәрʹа тʹәмийед конкрет надә. Ле әw мәрʹа нишан дькә кö ньһерʹандьна wи ча нә. Бәʹса хәбәре, әwи мәрʹа qанун нәдайә кö әм чь кʹьнща гәрәке хwә кьн у чь на. Ле әwи мәрʹа әʹйан кьрийә кö әw дьхwазә wәки әм бь мьлукти хwә кьн у хwә бьхәмьлиньн, ча лайиqи хьзмәткʹаред Хwәде йә (1 Тимтʹ. 2:9, 10). Әw öса жи дьхwазә wәки әм бь кьред хwә у сафикьрьнед хwә мәрьва нәлькʹуминьн (1 Корн. 10:31-33). Чахе әм һәр гавед хwәда фькьред Йаһоwа һьлдьдьнә һʹәсаб, әм жерʹа нишан дькьн кö wи һʹьз дькьн у сәрwертийа wи qәбул дькьн.

17, 18. Жьн-мер ча дькарьн нишан кьн wәки пьштгьрийа сәрwертийа Йаһоwа дькьн?

¹⁷ Wәрә шеwьр кьн, кö жьн у мер ча дькарьн пьштгьрийа сәрwертийа Йаһоwа бькьн щурʹә-щурʹә дәрәщада. Мәсәлә, чахе жьн у мер зәwащеда гәләк чәтьнайа дьвиньн, ле һивийа ве йәке нибун. Йан жи әwана гәләк дьлтәнг дьбьн кö зәwаща wан öса нинә чаwа wана дьхwәст. Һьнге wе гәләк керһати бә һәрге жьн у мер бьфькьрьн кö Йаһоwа ча бу һьндава Исраеле. Йаһоwа хwә нав кьр ча мере ви мьләти (Иша. 54:5; 62:4). Һәләqәтийа Йаһоwа тʹәви ви мьләти мина «зәwащәке» чәтьн бу, чьмки wана гәләк щар дьле wи дешандьн! Ле йәкә Йаһоwа ләз нәкʹәт тʹәрка wан бьдә. Әwи диса у диса рʹәʹма хwә дьда кʹьфше һьндава wан у пәймана хwә тʹәви wан хwәй дькьр. (Бьхунә Зәбур 106:43-45.) Әw һʹьзкьрьна Йаһоwайә öса мәзьн, рʹасти жи дьле мә дьгьрә!

¹⁸ Һәрге жьн у мер Йаһоwа һʹьз дькьн, әwана wе чʹәʹв бьдьнә wи. Һәрге зәwащеда чәтьнайед wан һәнә, әwана wе мәʹнийа нәгәрʹьн сәва кö жь һәв бьqәтьн. Әwана рʹьнд фәʹм дькьн кö Йаһоwа wана кьрийә йәк у әw дьхwазә wәки әwана хwә ль һәвдö бьгьрьн. Кʹьтеба Пироз дьбежә кö тʹәне мәʹник һәйә, жь бо чь жи жьн-мер дькарьн жь һәв бьqәтьн, әw һәйә qави (Мәт. 19:5, 6, 9). Гава мер у жьн алийе хwәда һәр тьшти дькьн сәва зәwаща хwә хwәй кьн, бь ве йәке әwана избат дькьн кö пьштгьрийа сәрwертийа Йаһоwа дькьн.

19. Әм гәрәке чь бькьн чахе шашийа дькьн?

¹⁹ Әм гьшк щара шашийа дькьн у дьле Йаһоwа дешиньн, чьмки әм гöнәкʹар ьн. Әw занә әwе йәке у бона ве йәке Кöрʹе хwә кьрә qöрбан. Ләма чахе әм шашийа дькьн, әм гәрәке жь Йаһоwа бахшандьне бьхwазьн (1 Йуһʹн. 2:1, 2). У жь wан шашийа әм гәрәке хwәрʹа дәрсе һьлдьн, нә кö тʹьме хwә нәһәq кьн у бьчәрчьриньн. Һәрге әм диса жи хwә ль Йаһоwа бьгьрьн, әw wе мә бьбахшинә у бьринед дьле мә qәнщ кә у ахьрийеда әме бьзаньбьн ча wан дәрәщада хwә бьдьнә кʹьфше (Зәб. 103:3).

20. Чьрʹа әм гәрәке ньһа пьштгьрийа сәрwертийа Йаһоwа бькьн?

²⁰ Дьнйа тʹәзәда, һәр кәс wе бьн сәрwертийа Йаһоwада бьжи у дәрһәqа нет-мәрәмед wи һе зедә пебьһʹәсә (Иша. 11:9). Ле ньһа жи әм дькарьн дәрһәqа wи һе зедә пебьһʹәсьн. У зутьрәке wе бе избаткьрьне кö тʹәне изьна Йаһоwа һәйә сәрwерти сәр дьнйайе бькә. Һʹәта әw рʹож бе, wәрә әм пьштгьрийа сәрwертийа Йаһоwа бькьн, демәк гöрʹа wи бькьн, жерʹа хьзмәт кьн, у чьqас дькарьн һәр тьштида чʹәʹв бьдьнә wи.