Дина Хwә Бьдьн сәр Пьрсәкә Лапә Фәрз

1, 2. а) Кʹижан пьрсәкә лапә фәрз сәр һәр тьштирʹа йә? б) Чьqас фәрз ә рʹьнд фәʹм бькьн әве пьрсе?

ИРО сәва гәләк мәрьва пʹәрә тьштәки лапи фәрз ә. Әwана дьфькьрьн чаwа дәwләти бьн, һьнәк жи һәбука хwәрʹа дьләрьзьн. Һәнә мәрьвед öса кö бона wан лапә фәрз ә малбәта wан, сьһʹәт-qәwата wан, йан жи нет-мәрәмед wан.

² Ле һәйә пьрсәкә лапә фәрз кö сәр һәр тьштирʹа йә, әw һәйә пьрса пьштгьрийа сәрwертийа Йаһоwа. Һʹьш-аqьле мә гәрәке тʹьме сәр ве йәке бә, кö чаwа пьштгьрийа һʹöкöмәтийа Хwәде бькьн. Ле һәнә тьшт кʹижан кö дькарьн һʹьш-аqьле мә бьрʹәвиньн у әм бир кьн дәрһәqа ве пьрсе. Бәʹса хәбәре, әм дькарьн бькʹәвьнә һәйрʹа шьхöлед һәррʹожи. Йан жи чахе әм кöл-дәрда дькʹьшиньн әв пьрса фәрз дькарә жь һʹьше мә дәре. Ле һәрге бона мә дьһа фәрз ә пьштгьрийа Йаһоwа бькьн, әме чәтьнайада сәбьр кьн у һе незики Йаһоwа бьн.

ЧЬРʹА ӘW ПЬРСӘКӘ ЛАПӘ ФӘРЗ Ә?

3. Шәйтʹан чь бöхдан авитә сәрwертийа Хwәде?

³ Шәйтʹан дәрһәqа изьна сәрwертийа Йаһоwа бöхдан гьли кьр. Әwи гот wәки йанчь Йаһоwа сәрwере хьраб ә у әw тьштед баш жь мә вәдьшерә. Шәйтʹан öса жи гот wәки йанчь һәрге мәрьва хwәха сәр хwә сәрwерти бькьрана, әwана wе һе бәхтәwар буна (Дәстп. 3:1-5). Әwи öса жи гот, кö йанчь тʹö мәрьв бь дьл Хwәдерʹа амьн нинә, у гава әw бькʹәвьнә тәнгасийа, wе Хwәде чаwа сәрwере хwә qәбул нәкьн (Иб. 2:4, 5). Ләма жи Йаһоwа wәʹдә да, wәки гьшк пе чʹәʹве хwә бьвиньн кö бей сәрwертийа Хwәде жийин гәләк чәтьн ә.

4. Чьрʹа пьрса дәрһәqа сәрwертийа Хwәде гәрәке бе сафикьрьне?

⁴ Йаһоwа занә, wәки чь кö Шәйтʹан гот һʹәму тьшт дәрәw ә. Wәки öса нә, чьрʹа Хwәде wәʹдә да Шәйтʹан кö гьлийед хwә избат кә? Чьмки щаба ве пьрсе һәр кәси дькʹәвә, ча мәрьва öса жи мьлйакʹәта. (Бьхунә Зәбур 83:18.) Адәм у Һеwайе һʹöкöмәтийа Йаһоwа бәр тьштәки һʹәсаб нәкьрьн, у паши wан жи һәбун кәсед öса кö мьqабьли сәрwертийа Хwәде дәркʹәтьн. Ләма жи һьнәк дькарьн бькʹәвьнә шьке у баwәр кьн кö Мире-щьна рʹаст ә. Сәва кö нав тʹәмамийа гәрдунеда әʹдьлайи һәбә, әв пьрс гәрәке бе сафикьрьне. У гава бе избаткьрьне wәки сәрwертийа Йаһоwа йе һәри баш ә, wи чахи ида гьшк wе бьжин бьн сәрwертийа wийә qәнщда у тʹәмамийа гәрдунеда wе әʹдьлайи һәбә (Әфәс. 1:9, 10).

5. Ча әм дькарьн алийе сәрwертийа Йаһоwа бьгьрьн?

⁵ Зутьрәке wе бе избаткьрьне wәки сәрwертийа Хwәде рʹаст ә, ле сәрwертийа Шәйтʹан у мәрьва wе бе һьлдане. Сәрwертийа Хwәде бь сайа Пʹадшатийе, wе нета хwә бинә сери у мәрьвед амьн wе избат кьн кö мәрьв дькарә бь амьни пьштгьрийа сәрwертийа Хwәде бькә (Иша. 45:23, 24). Бешьк, һун дьхwазьн нава wан мәрьвада бьн, öса нинә? Сәва әм амьнийа хwә хwәй кьн, лазьм ә әм фәʹм бькьн, wәки чьqас фәрз ә пьштгьрийа сәрwертийа Хwәде бькьн.

ПЬШТГЬРИЙА СӘРWЕРТИЙА ХWӘДЕ ЖЬ ӘʹМЬРЕ МӘ ФӘРЗТЬР Ә

6. Чьqас фәрз ә wәки бе избаткьрьне кö тʹәне Йаһоwа йә хwәйиһʹöкöм?

⁶ Йа лапә фәрз әw ә, кö бе избаткьрьне wәки тʹәне Йаһоwа йә хwәйиһʹöкöм. Әw йәк дьһа фәрз ә, нә кö әʹмьр у бәхтәwарийа мә. Ле гәло әw те һʹәсабе wәки Йаһоwа мә һʹьз накә у әʹмьре мә бона wи qимәт нинә? Тʹö щар на! Ле әм жь кʹö заньн ве йәке?

7, 8. Әме чь кʹаре бьстиньн гава изьна сәрwертийа Хwәде бе избаткьрьне?

⁷ Йаһоwа мәрьва qайим һʹьз дькә. Әw öса мә qимәт дькә кö Кöрʹе хwә qöрбан кьр сәва әм жийина һʹәта-һʹәтайе бьстиньн (Йуһʹн. 3:16; 1 Йуһʹн. 4:9). Һәрге Йаһоwа созед хwә дәрһәqа ахьрийе нәйнә сери, гьлийед Шәйтʹан wе рʹаст дәрен, кö йанчь Хwәде тьштед баш жь мә вәдьшерә у кö әw сәрwере хьраб ә. Һьн жи мәрьвед кö мьqабьли Хwәде нә, wе qәрфа созед Йаһоwа бькьн бь wан гьлийа: «Кʹа әw созе һатьна wи? Бавед мә әʹмьре Хwәде щи анин чун, ле һәр тьшт һе жь wәхте әʹфьрандьна дьнйайеда öса манә» (2 Пәт. 3:3, 4). Ле Йаһоwа хwәйе созед хwә йә. Гава кö изьна сәрwертийа wи бе избаткьрьне, wи чахи мәрьвед гöһдар wе хьлаз бьн. (Бьхунә Ишайа 55:10, 11.) Бәле, сәрwертийа Йаһоwа сәр һʹиме һʹьзкьрьне йә. Ләма әм гәрәке тʹö щар дöдьли нәбьн, кö әw wе тʹьме хьзмәткʹаред хwәйи амьн һʹьз бькә у qимәт кә (Дәркʹ. 34:6).

⁸ Рʹаст ә пьрса лапә фәрз әw ә кö пьштгьрийа сәрwертийа Йаһоwа бькьн, ле әw найе һʹәсабе wәки әʹмьре мә бәр чʹәʹве Хwәде qимәт нинә. Әм гәрәке рʹаст бьньһерʹьн сәр ве пьрса фәрз у сәр әʹмьре хwә, чьмки öса әме бькарьбьн бь тʹәмами пьштгьрийа сәрwертийа Йаһоwа бькьн.

ИБО НЬҺЕРʹАНДЬНА ХWӘ ЧА ГÖҺАСТ?

9. Шәйтʹан чь шәрʹ авитә Ибо? (Бьньһерʹә шькле әʹwльн.)

⁹ Әм гәрәке рʹаст фәʹм бькьн кö чьрʹа пьрса дәрһәqа сәрwертийа Йаһоwа гәрәке бе сафикьрьне. Кʹьтеба Ибода әw йәк зәлал те кʹьфше. Ль wедәре әм педьһʹәсьн, wәки Шәйтʹан гот кö һәрге Ибо бькʹәвә тәнгасийед гьран у бьчәрчьрә, әw wе пьшта хwә бьдә Хwәде. У әwи Хwәдерʹа гот, wәки Ибо бьчәрчьринә. Йаһоwа әw йәк нәкьр, ле изьн да Шәйтʹан кö әw хwәха Ибо бьщерʹьбинә, у гот: «А вай һʹәчʹи тьштед wи йед һәнә, дь дәсте тәда нә». (Бьхунә Ибо 1:7-12.) Һьнә wәʹдә дәрбаз бу, у Ибо бәрдәстийед хwә, һәбуна хwә, у дәһ зарʹед хwәйи дәлал öнда кьр. Шәйтʹан öса әw бәла ани сәре Ибо, кö бе кʹьфше йанчь хwәха Хwәде әw бәла ани сәре wи (Иб. 1:13-19). Паши ве йәке, Шәйтʹан Ибо нәхwәш хьст бь нәхwәшийа гәләк гьран (Иб. 2:7). Кöла wи бәси wи нибу, жьна wи у се һәвалед wи йед кö һьндава wи һʹәлал нибун, бь гьлийед хwә дьле wи һе зәʹф ешандьн (Иб. 2:9; 3:11; 16:2).

10. а) Ибо ча амьнийа хwә Хwәдерʹа избат кьр? б) Чьда Иборʹа ширәткьрьн лазьм бу?

¹⁰ Ахьрийа ве йәке чь бу? Чь кö Шәйтʹан шәрʹ авитә Ибо, дәрәw дәркʹәтьн. Ибо тәнгасийада пьшта хwә нәда Хwәде (Иб. 27:5). Ле wи wәʹдәйи һьнә фькьред нәрʹаст кʹәтьнә һʹьше Ибо. Әw гәләк кʹәтә һәйрʹа хwә у һәqийа хwә. Әwи һәла һе дәʹwа жи дькьр кö гәрәке бьзаньбә чьрʹа öса һатә сәре wи (Иб. 7:20; 13:24). Һәрге әм хwә дайньн дәwса Ибо, дьбәкә әм бькарьбьн wи фәʹм кьн. Ле Хwәде дит wәки Иборʹа ширәт лазьм ә, чьмки әw нәрʹаст дьфькьри. Ле гәло ча Йаһоwа wи ширәт кьр?

11, 12. Йаһоwа али Ибо кьр wәки чь фәʹм кә?

¹¹ Әв гьлийед кö Хwәде Иборʹа гот, ньвисар ьн кʹьтеба Ибода сәре 38-41. Ле тʹö щики нәньвисар ә wәки Хwәде Иборʹа мәʹнийа кöл-дәрдед wи дьбежә. Һьн жи нета Йаһоwа әw нибу кö хwә һәq дәрхә у Иборʹа шьровәкә кö чьрʹа әw дьчәрчьрә. Дәwсе Хwәде али wи кьр, wәки әw фәʹм кә кö бәр Хwәде әw чьqас бьчʹук ә у кö тьштед дьһа фәрз һәнә нә кö проблемед wи. (Бьхунә Ибо 38:18-21.) Гьлийед Хwәде али Ибо кьрьн wәки ньһерʹандьна хwә рʹаст кә.

¹² Гәло әм дькарьн бежьн, wәки ширәткьрьна Йаһоwа сәрт бу, чьмки Ибо һаqас дәрд дит? На, Хwәде qә сәрт нибу у нә жи Ибо öса фькьри. Рʹаст ә әwи кöл-дәрдед гьран дит, ле ахьрийеда әwи рʹазибуна хwә да кʹьфше Хwәдерʹа. Әwи һәла һе жи гот: «Әз хwә бьчʹук дьвиньм у дь хwәли у тʹозеда тʹобә кьрьнеда мә!» (Иб. 42:1-6). Бәле, ширәткьрьна Йаһоwа баш һʹöкöм бу сәр Ибо. Пешийа wе йәке, Әлиһу жи Ибо ширәт кьр, wәки әw рʹаст бьфькьрә (Иб. 32:5-10). Ибо ширәтед Йаһоwа qәбул кьр, у Йаһоwа дит кö Ибо фькьред хwә гöһаст. Паши ве йәке, Йаһоwа мәрьвед дьнрʹа гот кö әw Ибо qәбул дькә, чьмки әw wәʹде кöл-дәрда Хwәдерʹа амьн ма (Иб. 42:7, 8).

13. Ширәткьрьна Йаһоwа wе чьда кери Ибо бьһата паши тәнгасийед wи?

¹³ Чахе кöл-дәрдед Ибо хьлаз бьбун жи, диса әw ширәтед Йаһоwа кери wи дьһатьн. Йаһоwа хьлазийа әʹмьре Ибо һе зедә кʹәрәм кьр у wәʹдә дәрбаз бу, диса «һʹәфт лаw у се qизед wи жи бун» (Иб. 42:12-14). Рʹаст ә Ибо әw зарʹед хwә һʹьз дькьр, ле әwи бира wан зарʹед хwә жи дькьр йед кö жь дәсте Шәйтʹан һатьнә кöштьн. Дьбәкә әwи нә жи бир дькьр әw һʹәму чәтьнайед хwә кö әwи дит. Һәрге жи Ибо ахьрийеда мәʹнийа щәфе хwә пеһʹәсийа, йәкә дьбәкә wирʹа бь тʹәмами фәʹмдари нибу кö чьрʹа Хwәде һишт, wәки әw кöл-дәрдед öса гьран бьвинә. Ле әw чь жи бьфькьрийа, йәкә әwи ширәтед Хwәде бира хwәда хwәй дькьр у сәр дьфькьри. У әwе йәке wе али wи бькьра кö ньһерʹандьна рʹаст хwәй кә у öса жи бәрдьлийе бьстинә (Зәб. 94:19).

14. Әм чь дькарьн һин бьн жь мәсәла Ибо?

¹⁴ Әм жи дькарьн ньһерʹандьна хwә рʹаст кьн у бәрдьлийе бьстиньн һәрге сәр сәрһатийа Ибо бьфькьрьн. Йаһоwа әw сәрһати хwәй кьр «бона һинбуна мә . . . , wәки әм бь сәбьре у wан готьнед ньвисарада кö бине дьдьнә бәр мә» баwәр бьн (Рʹом. 15:4, ИМ). Гәло әм чь дәрсе һин дьбьн жь сәрһатийа Ибо? Дәрса пешьн әw ә: Әм гәрәке öса нәкʹәвьнә һʹәйра тәнгасийед хwә, кö пьрсәкә лапә фәрз бир кьн, демәк пьштгьрийа сәрwертийа Йаһоwа. Хенщи ве йәке, әм гәрәке бьшекьриньн wи qәдьри кö әм дькарьн пьштгьрийа сәрwертийа Хwәде бькьн, у мина Ибо wәʹде тәнгасийед гьранда жи жерʹа амьн бьминьн.

15. Чь кʹар ә һәрге әм тәнгасийада Хwәдерʹа амьн дьминьн?

¹⁵ Сәрһатийа Ибо мә дьлгәрм дькә, чьмки дьдә кʹьфше кö амьнийа мә бадиһәwа нинә. Һьн жи һәрге әм кöл-дәрда дькʹьшиньн, әw найе һʹәсабе кö Йаһоwа мә qәбул накә. Хенщи ве йәке, әм wәʹде тәнгасийа дькарьн Йаһоwарʹа нишан кьн, wәки әм пьштгьрийа һʹöкöмәтийа wи дькьн (Мәтʹлк. 27:11). Чахе әм сәбьр дькьн у qәwи дьминьн, дьле Йаһоwа ша дьбә, у һьн жи баwәрийа мә бона ахьрийе һе qәwи дьбә. (Бьхунә Рʹомайи 5:3-5.) Сәрһатийа Ибо избат дькә, wәки Йаһоwа «чьqаси исаф у рʹәʹм ә!» (Аqуб 5:11). Бәле, әм гәрәке qә дöдьли нәбьн кö Йаһоwа wе һьн мә хәлат кә у һьн жи һʹәмушка йед кö пьштгьрийа сәрwертийа wи дькьн. Занәбуна ве йәке wе али мә бькә «һәр тьштида бь думька дьреж сәбьр бькьн» у шабуна хwә öнда нәкьн (Колс. 1:11).

БИР НӘКЬН ЛАПӘ ФӘРЗ ЧЬ ЙӘ

16. Чьрʹа лазьм ә әм бир нәкьн кö чьqас фәрз ә пьштгьрийа сәрwертийа Йаһоwа бькьн?

¹⁶ Бәле, дина мә гәрәке сәр ве йәке бә, кö пьштгьрийа сәрwертийа Йаһоwа бькьн. Ле wәʹде тәнгасийа һеса нинә һʹьш-аqьле хwә дайньн сәр ве йәке. Щара чәтьнайа бьчʹук дькарә мәрʹа гәләк мәзьн бе кʹьфше һәрге әм тʹьме дьфькьрьн сәр ве чәтьнайе. Ләма жи wәʹде чәтьнайа фәрз ә тʹьме биньн бира хwә, кö чьqас фәрз ә пьштгьрийа сәрwертийа Хwәде бькьн.

17. Һәрге әм тʹьме нава шьхöле Йаһоwада ньн, әw йәк чьда али мә дькә?

¹⁷ Һәрге әм тʹьме нава шьхöле Йаһоwада ньн, әw йәк wе али мә бькә wәки әм бир нәкьн пьрса лапә фәрз. Wәрә мәсәләке шеwьр кьн. Хушкәкә мә наве кʹижане Рене йә, еша кʹроник дькʹьшанд, инсулте лехьстьбу, у һьн жи рәqа wе һәбу. Һʹәта кö әw нәхwәшханеда бу, әwе шәʹдәти дьда хәбатчийа, нәхwәша у öса жи wан йед кö дьһатьнә нәхwәшхане. Щарәке чахе Рене диса кʹәтә нәхwашхане сәр дö һʹәфтийа у нив, әwе 80 сьһʹәта шәʹдәти да. Һәла һе бәр мьрьне жи Рене тʹö щар бир нәдькьр пьрса лапә фәрз, демәк пьштгьрийа сәрwертийа Йаһоwа. Әwе тʹьме пьштгьрийа сәрwертийа Йаһоwа дькьр у әве йәке әʹдьлайи дьда wе.

18. Ча мәсәла хушкәке дьдә кʹьфше кö әм кʹаре дьстиньн, чахе пьштгьрийа сәрwертийа Йаһоwа дькьн?

¹⁸ Һәр рʹож әм рʹасти чәтьнайа тен, у wи чахи жи әм дькарьн пьштгьрийа һʹöкöмәтийа Йаһоwа бькьн. Хушкәк бь наве Щенифер се рʹожа аеропортеда ма, чьмки wәʹде фьрине әглә бу. Йәк пәй йәке әw фьрин әглә дькьрьн. Щенифер тʹәне бу у вәстийа бу. Wи чахи әwе һеса дькарьбу гöнә хwә хwә бинә у бькʹәвә һәйрʹа хwә. Ле әwе Хwәдерʹа дöа дькьр, сәва мерхасийе бьдә wе, wәки wан мәрьварʹа мьзгинийе гьли кә йед кö һʹале wеда бун. Гәло ахьрийа ве йәке чь бу? Әwе гәләкарʹа шәʹдәти да у гәләк әʹдәбйәт жи бәла кьр. Щенифер гьли дькә: «Мьн тʹәхмин дькьр wәки ве чәтьнайеда Йаһоwа мьн кʹәрәм кьр у qәwат да мьн сәва наве wи рʹумәт кьм». Бәле, һʹьш-аqьле wе сәр qьрара Йаһоwа бу.

19. Чьда щьмәʹта Хwәде щöдә дьбә жь динед qәлп?

¹⁹ Щьмәʹта Хwәде бәреда пьштгьрийа сәрwертийа Йаһоwа дькә. У әв йәк wана щöдә дькә жь динед qәлп. Ләма жи wәрә әм тʹьме алийе хwәда һʹәму тьшти бькьн wәки бәрдәwам кьн пьштгьрийа сәрwертийа Йаһоwа бькьн.

20. Һәрге әм пьштгьрийа сәрwертийа Йаһоwа дькьн, әм чьда дькарьн баwәр бьн?

²⁰ Баwәр бьн кö Йаһоwа qимәт дькә ве йәке, кö һун пьштгьрийа сәрwертийа wи дькьн у бь амьни wирʹа хьзмәт дькьн, һәла һе wи чахи жи гава рʹасти чәтьнайа тен (Зәб. 18:25). Готара дьнда әме шеwьр кьн кö чьрʹа гәрәке пьштгьрийа сәрwертийа Йаһоwа бькьн у ча әм дькарьн әве йәке бькьн.