Әwана бь Рʹәзәдьли Хьзмәт Дькьн: Мйанмареда

«НАНДЬРУН гәләк ә, ле пʹалә һьндьк ьн. Аwа һиви жь хwәйе нандьруне бькьн, wәки пʹала нандьруна хwәрʹа бьшинә» (Луqа 10:2). Әw гьлийед Иса кö әwи wәкә 2 000 сал пешда гот, рʹьнд дьдьнә кʹьфше рʹожа иройин дәрәща Мйанмареда. Чьрʹа? Мйанмареда 55 милйон мәрьв һәнә у нава wанда тʹәне wәкә 4 200 мьзгинван һәнә, йед кö мьзгинийе бәла дькьн.

Ле «хwәйе нандьруне», демәк Йаһоwа, бь сәда хушк-бьра жь щурʹә-щурʹә wәлата һелан кьр, wәки бенә Асйа башура-рʹоһьлате, сәва нандьруна рʹöһʹанида аликʹарийе бьдьн. Ле ча wана сафи кьр wәки wәлатед хwә бьһельн? Чь али wан кьр кö дәрбази wәлате хәриб бьн? У әwана чь кʹәрәма дьстиньн? Wәрә әм пебьһʹәсьн.

«WӘРЕН, МӘРʹА ПЕШӘНГ ЛАЗЬМ ЬН!»

Чәнд сал пешда, щарәке пешәнгәки жь Жапонйайе наве кʹижани Казуһиро йә, qолайи кʹәт, һʹьше хwә öнда кьр у кʹәтә нәхwәшхане. Һʹәким жерʹа гот, wәки әw гәрәке дö сала автойе нәжо. Казуһиро әʹщебмайи ма. Әwи пьрс дьда хwә: «Әзе ча шьхöле хwә бәрдәwам кьм кʹижан кö әз гәләк һʹьз дькьм, демәк пешәнгти?» Әwи гәләк Йаһоwарʹа дöа дькьр у лава дькьр, wәки жерʹа чʹарәке бькә сәва әw пешәнгтийа хwә нәдә сәкьнандьне.

Казуһиро гьли дькә: «Мәһәк шунда, һәвале мьн кö Мйанмареда хьзмәт дькьр, бьһист кö әз qолайи кʹәтьмә. Әwи мьнрʹа тʹеле хьст у гот: ‹Мйанмареда һʹәчʹи зәʹф мәрьв пе отобуса дьчьн-тен. Һәрге тö бейи вьра, тöйе бе авто жи хьзмәтийа хwә бәрдәwам ки!›. Мьн жь һʹәкиме хwә пьрси кö мьнрʹа изьн ә әз һәрʹьм Мйанмаре. Әз әʹщебмайи мам гава әwи мьнрʹа гот: ‹Ньһа һʹәкимәк жь Мйанмаре һатийә вьра Жапонйайе. Әзе тә тʹәви wи бькьмә нас, у һәрге тö wедәре диса qолайи би, әwе али тә бькә›. Мьн әw гьлийед һʹәким, хwәрʹа һʹәсаб кьр ча щаба жь Йаһоwа».

Казуһиро дәрберʹа нәʹмә филиала Мйанмарерʹа шанд, у ньвиси кö әw жьна хwәва дьхwазьн wедәре ча пешәнг хьзмәт кьн. Пенщ рʹож шунда, филиале щаб öса да: «Wәрен, мәрʹа пешәнг лазьм ьн!». Казуһиро тʹәви жьна хwә Мари, автед хwә фьротьн, визә чекьрьн у билетед тәйаре кʹьрʹин. Иро әwана шабунәкә мәзьн дьстиньн кö Мандалайеда, кʹома кәрʹ-лалада хьзмәт дькьн. Казуһиро дьбежә: «Әм дьвиньн кö әw qәwьмандьн баwәрийа мә һьндава созе Хwәде кö Зәбур 37:5-да ньвисар ә, qәwи кьр: ‹Рʹийа хwә жь wирʹа бьһелә хwә бьсперә Хöдан, Әwе бинә щиһ һʹәму пеwьстийан, (ИМ)›».

ЙАҺОWА РʹЕ ВӘДЬКӘ

Сала 2014-да, Шәʹдед Йаһоwа Мйанмареда щьвата мәзьнә мәхсус саз кьрьн. Гәләк хушк-бьра жь wәлатед хәриб һатьн сәр ве щьвате. Жь wана хушкәк wәкә 30 сали бу наве кʹижане Моника йә, йа кö жь Дәwләтед Йәкбуйи йә. Моника гьли дькә: «Чахе әз жь щьвата мәзьн вәгәрʹийам, мьн Йаһоwарʹа дöа дькьр, wәки али мьн бькә әз нета хwә биньм сери. Öса жи мьн де-баве хwәрʹа дәрһәqа нетед хwә гьли кьр. Әм гьшк дьфькьрин wәки әз гәрәке вәгәрʹьм Мйанмаре, ле һʹәта нета мьн һатә сери, wәʹдә лазьм бу у мьн гәләк дöа дькьр». Моника шьровәдькә чьрʹа.

«Иса ширәт да шагьртед хwә, wәки хәрщед хwә һʹәсаб кьн. Ләма жи мьн пьрс дьда хwә: ‹Әзе бькарьбьм дәрбаз бьм? Әзе бькарьбьм әʹбура хwә бькьм, öса wәки гәләк нәхәбьтьм?›». Әw тинә сәр хwә: «Ле алийе пʹәрәда проблема мьн һәбу у әз нькарьбум дәрбази wәлате хәриб бума». Ле әwе ча нета хwә ани сери? (Луqа 14:28).

Моника гьли дькә: «Рʹожәке мәзьна хәбате гази мьн кьр. Әз һьнәки тьрсийам, чьмки мьн тʹьре әw дьхwазә мьн жь хәбате дәрхә. Ле дәwсе әwе мьнрʹа гот, wәки хәбата мьн дьшекьринә у паше гот, кö дьхwазә мьнрʹа пʹәра пʹешкʹеш бьдә. Әw пʹәрә һәма һаqас бу, чьqас мьнрʹа лазьм бу, wәки жь дәйне хwә аза бьм».

Моника жь сала 2014 мәһа Кануна Пешьн, Мйанмареда хьзмәт дькә. Әw дәрһәqа хьзмәтийа хwә, щийе кö һʹәwщәти һәйә, гьли дькә. «Әз öса ша мә wәки әз вьра мә. Әз тʹәви се мәрьва һинбуна Кʹьтеба Пироз дәрбаз дькьм. Йәк жь wана жьнькәкә 67 сали йә. Әw тʹьме бь дьл у щан мьн qәбул дькә у һʹәмез дькә. Чахе әw жьньк пеһʹәсийа wәки наве Хwәде Йаһоwа йә, әw гьрийа. Әwе готә мьн: ‹Әва щара пешьнә әз педьһʹәсьм, wәки наве Хwәде Йаһоwа йә. Мьн дö әʹмьре тә дәрбаз кьрийә, ле тьште лапи фәрз кö әз әʹмьре хwәда пеһʹәсийам, тә мьн һин кьр›. Рʹаст бежьм, әз жи гьрийам. Qәwьмандьнед wи щурʹәйи шабунәкә гәләк мәзьн дьдә wан, йед кö хьзмәт дькьн щийед кö һʹәwщәти һәйә». Чәндәк пешда, Моника Мәкʹтәба сәва Мьзгинванед Пʹадшатийе дәрбаз бу.

Ле гәләк хушк-бьра паши хwәндьна кʹьтеба «Һәрсали йа сала 2013» дәрһәqа Мйанмаре, һелан бунә дәрбази Мйанмаре бьн. Хушкәк бь наве Ли кö wәкә 30 сали йә, Асйайеда дьжи. Әw гәләк дьхәбьти, ле чахе әwе кʹьтеба «Һәрсали» хwәнд, әw һелан бу wәки нете дайнә пешийа хwә кö дәрбази Мйанмаре бә. Әw дьбежә: «Сала 2014 әз чумә Йангоне сәр щьвата мәзьнә мәхсус. Wедәре әз рʹасти жьн-мерәки һатьм, йед кö Мйанмареда дәшта Чинайида хьзмәт дькьн. Әз зьмане Чинайи заньм, у мьн сафи кьр wәки Мйанмареда аликʹарийе бьдьмә кʹома Чинайи. Мьн у Моникайе тʹәвайи сафи кьр, у әм дәрбази Мандалайе бун. Йаһоwа öса әм кʹәрәм кьрьн, wәки мә незики щийе хwә хәбат дит. Мәкʹтәбеда әм дәрсдар ьн, ле нә тʹәмамийа һʹәфте дьхәбьтьн. Рʹаст ә вьра һәwа гәрм ә, у һьнә тьшт һәнә кö гәрәке һини ве йәке бьм, йәкә әз жь хьзмәтийа хwә шабунәкә мәзьн дьстиньм. Щьмәʹт Мйанмареда нәдәwләти дьжин, ле әwана гәләк бь qәдьр ьн у wәʹдә дьвиньн кö гöһ бьдьнә мьзгинийе. Әз öса дьлгәрм дьбьм чахе дьвиньм кö Йаһоwа ча әwи шьхöли ләз дьхә. Әз баwәр дькьм wәки Йаһоwа дьхwәст әз һәма вьра Мандалайеда хьзмәт кьм».

ЙАҺОWА ДÖА ДЬБЬҺЕ

Гәләк хушк-бьред кö дәрбази wан щийа бунә кʹидәре һʹәwщәти һәйә, дитьнә кö qәwата дöа чьqас мәзьн ә. Мәсәлә, Щумпа у жьна wи Нао кö wәкә 30 сали нә, Жапонйайеда хьзмәт дькьрьн щьвата кәрʹ-лалада. Чьрʹа әwана дәрбази Мйанмаре бун? Щумпа гьли дькә: «Мьн у жьна мьн мә тʹьме дьхwәст дәрбази wәлате хәриб бьн, кʹидәре һʹәwщәти һәйә. Бьраки жь щьвата мәйә кәрʹ-лала, дәрбази Мйанмаре бу. Рʹаст ә пʹәре мә һьндьк бу, ле әм жи сала 2010 мәһа Гöлане дәрбази wедәре бун. Хушк-бьред wедәре бь дьл у щан әм qәбул кьрьн». Щумпа дәрһәqа хьзмәтийа Мйанмареда гьли дькә. «Гәләк мәрьв гöһ дьдьнә мә. Чахе әм wанрʹа сәр зьмане кәрʹ-лала видео нишан дькьн, әwана зәндәгьрти дьминьн. Әм öса ша нә wәки мә сафи кьр кö бенә вьра Йаһоwарʹа хьзмәт кьн!».

Ле чаwа Щумпа у Нао чәтьнайа алийе пʹәрада сафи кьрьн? «Паши се сала, мә пʹәре хwә ниве зәʹф хәрщ кьр у чь мабу тʹере нәдькьр сәва саләке пʹәре кʹьрʹе бьдьн. Мьн у жьна хwә гәләк дöа дькьр. Ньшкева, мә нәʹмә жь филиале станд, кö мә тʹәглиф дькьн wәки wәʹдәлу хьзмәт кьн ча пешәнгед мәхсус! Мә итʹбарийа хwә Йаһоwа ани, у паше мә дит wәки әwи әм нәһиштьн. Әw һʹәму алийада бона мә хәм дькә». Wан пашwәхтийада, Щумпа у Нао Мәкʹтәба сәва Мьзгинванед Пʹадшатийе дәрбаз бун.

ЙАҺОWА ДЬЛ ДЬДӘ ГӘЛӘКА

Бьраки мә бь наве Симон кö 43 сали йә жь Италйайе, у жьна wи Анна кö 37 сали йә жь Зәланда Ну, дәрбази Мйанмаре бунә. Гәло чь wана һелан кьр кö дәрбаз бьн? Анна дьбежә: «Әw кʹьтеба ‹Һәрсали› бу, йа сала 2013 дәрһәqа Мйанмаре, кö мә һелан кьр дәрбаз бьн!». Симон жи дьбежә: «Әw qәдьрәки мәзьн ә бона мә кö Мйанмареда хьзмәт кьн. Жийина вьра сьвьк ә, у әз дькарьм һе зедә шьхöле Йаһоwа бькьм. Чахе әм дьвиньн, кö Йаһоwа ча бона мә хәм дькә чахе әм хьзмәт дькьн щийе кö һʹәwщәти һәйә, әw йәк мә гәләк дьшьдинә» (Зәб. 121:5). Анна дьбежә: «Әз тʹö щар öса бәхтәwар нибумә. Әм бь жийина сьвьк дьжин у ләма һе зәʹф дькарьм тʹәви мере хwә wәʹде хwә дәрбаз кьм. Әм бь рʹасти һе незики һәв бунә. Мә öса жи һәвалед тʹәзә хwәрʹа дитьн. Щьмәʹта вьра һьндава Шәʹдед Йаһоwада һʹәйф ьн, у һʹәwаса wана те тʹәви мә хәбәр дьн».

Анна гьли дькә: «Рʹожәке, мьн дькʹанеда qизькәкерʹа шәʹдәти да кʹижан кö университетеда һин дьбу. Хьлазийе мә һәврʹа соз да wәки диса рʹасти һәв бен. Чахе әм рʹасти һәв һатьн, әw тʹәви һәваләкә хwә һат. Щарәкә дьн жи, әwе диса чәнд һәвалед хwә тʹәви хwә ани. Паше, диса һе зедә һәвалед хwә ани. Ньһа әз жь wана тʹәви пенща һинбуна Кʹьтеба Пироз дәрбаз дькьм». Симон дьбежә: «Щьмәʹта ве дәштеда һәвалһʹьз ьн у һʹьз дькьн тьштед тʹәзә пебьһʹәсьн. Гәләк мәрьв дьхwазьн мьзгинийе пебьһʹәсьн, ле wәʹде мә һаqас тʹöнә wәки тʹәви һʹәмушка хәбәр дьн».

Һьнәка чь гав авитьн сәва дәрбази Мйанмаре бьн? Мәзуһо кö жь Жапонйайе йә, гьли дькә: «Әз у мере мьн Сачио, мә тʹьме дьхwәст хьзмәт кьн wәлате öсада, кʹидәре һʹәwщәтийа мьзгинвана һәйә. Ле мә ньзаньбу һәрʹьн кʹö. Чахе мә кʹьтеба «Һәрсали йа сала 2013» дәрһәqа Мйанмаре хwәнд, qәwьмандьнед wедәре öса дьле мә гьртьн, кö мә хwәрʹа нет дани, wәки wедәре хьзмәт кьн һәрге бькарьбьн». Сачио дьбежә: «Мә сафи кьр wәки сәр һʹәфтеки һәрʹьнә Йангоне, шәһәре Мйанмарейи сәрәкә, сәва бьньһерʹьн һәла әw чь щи йә. Чахе әм чун, мә баwәр кьр wәки әм гәрәке дәрбази wи щийи бьн».

ЛЕ ҺУН ДЬКАРЬН ДӘРБАЗ БЬН?

Родней у жьна wи Щейн кö жь Австралйайе нә, у wәкә 50 сали нә, тʹәви кöрʹе хwә Щордан у qиза хwә Даника, жь сала 2010 Мйанмареда хьзмәт дькьн. Родней дьбежә: «Әм әʹщебмайи ман кö щьмәʹта вьра рʹöһʹанида чьqас бьрчи йә. Әз малбәтарʹа ширәте дьдьм wәки хьзмәт кьн щийе мина Мйанмаре». Чьрʹа? «Хьзмәтийа вьра малбәта мә алийе рʹöһʹанида гәләк qәwи кьр! Гәләк щаһьл пәй тʹела, авта, хәбате у диса тьштед дьн дькʹәвьн. Ле зарʹед мә wәʹде хwә хәрщ дькьн кö зьмане тʹәзә һин бьн, wәки хьзмәт кьн. Әwана һин дьбьн кö чаwа хәбәр дьн тʹәви wан мәрьва, йед кö дәрһәqа Кʹьтеба Пироз ньзаньн, öса жи чаwа щаба хwә бьдьн щьватеда, у диса шьхöлед рʹöһʹанива мьжул дьбьн».

Оливер, бьра кö wәкә 30 сали йә у жь Дәwләтед Йәкбуйи йә, әw ширәте дьдә wәки хьзмәтийа wи щурʹәйи бьжберьн у шьровәдькә чьрʹа: «Әw йәк кö әз щийе хәрибда Йаһоwарʹа хьзмәт дькьм, гәләк кʹаре дьдә мьн. Әз кö жь мала хwә дур чумә, әwе йәке баwәрийа мьн һе qәwи кьрийә у әз һе зәʹф итʹбарийа хwә Йаһоwа тиньм, фьрqи тʹöнә әзе рʹасти чь дәрәща бем. Әз хьзмәт дькьм тʹәви wан, кʹижана мьн бәре нас нәдькьрьн, ле баwәрийа wан жи мина йа мьн ә. Әw йәк али мьн дькә wәки дöдьли нәбьм кö ве дьнйайеда жь Пʹадшатийа Хwәде фәрзтьр тʹö тьшт тʹöнә». Иро Оливер тʹәви жьна хwә Аннайе бәрдәwам дькә бь хирәт хьзмәт кә дәшта зьмане Чинайида.

Трезел, хушкәкә жь Австралйайе кö wәкә 50 сали йә, жь сала 2004 Мйанмареда хьзмәт дькә. Әw дьбежә: «Әwед кö дәрәща wан öса нә кö дькарьн дәрбаз бьн, әз wанрʹа дьбежьм wәки хьзмәт кьн щийе кö һʹәwщәти һәйә. Мьн хwәха сәр хwә тʹәхмин кьр кö һәрге кәсәк дьхwазә хьзмәт кә, Йаһоwа wе wи кʹәрәм кә wәки нета хwә бинә сери. Мьн нә жи дькарьбу бьда бәр чʹәʹве хwә wәки әзе wи щурʹәйи бьжим. Әw әʹмьрәки бь кʹәрәма у шабуне тʹьжә йә».

Бьра әw гьлийед wан хушк-бьра, wә һелан кьн кö нете дайньн пешийа хwә, wәки хьзмәт кьн wан щийа, кʹидәре мьзгинван лазьм ьн, у али мәрьвед дьлсах бькьн. Әw хушк-бьра кö дәрбаз бунә, гази йед дьн дькьн, дьбежьн: «Кʹәрәма хwә, wәрен Мйанмаре у али мә бькьн»!.