Тö Дьхwази Кʹе Тә Нас кә у Qимәт кә?

1. Кʹижан хwәстьна тʹәбийәти һәйә бал һʹәму мәрьва?

WӘЙЕ ча хwә тʹәхмин кьра һәгәр мәрьве кö һун нас дькьн у qәдьре wи дьгьрьн, наве wә бир кьра, йан һәла һе жи һун qә нәһатана бира wи? Әw йәк wе дьле wә нәһата, öса нинә? Ле чьрʹа? Чьмки бал мә һәр кәси һәйә хwәстьнәкә тʹәбийәти, әм дьхwазьн wәки мә qәбул кьн. Хенщи ве йәке, әм дьхwазьн wәки мәрьв öса жи бьзаньбьн әм мәрьвнә чь щурʹәйи нә у кьред мә бьшекьриньн (Жьмар 11:16; Иб. 31:6).

2, 3. Чаwа хwәстьна мә кö мәрьв мә qимәт кьн, дькарә алийе нәрʹастда һәрʹә? (Бьньһерʹә шькле әʹwльн.)

² Ле һәрге әм фәсал нибьн, әw хwәстьна мә wәки мәрьв мә qимәт кьн, дькарә алийе нәрʹастда һәрʹә, чьмки әм гöнәкʹар ьн. Әм дькарьн бьхwазьн wәки мәрьв мә бьльнд кьн у мәрʹа фьрнаq бьн. Дьнйа Шәйтʹан мәрьва һелан дькә wәки пәй навдарийе у һöрмәте кʹәвьн. Чахе мәрьв дькʹәвьнә бәр байе ве йәке, әwана бир дькьн кö кʹе бь рʹастийе һежайи һöрмәте у һʹәбандьне йә, демәк Баве мәйи әʹзмана, Йаһоwа Хwәде (Әʹйан. 4:11).

³ Wәʹде Исада һьнә сәрwеред рʹелигийа, нәрʹаст дьньһерʹин сәр һöрмәт у qәбулкьрьне. Иса готә шагьртед хwә: «Һʹәвза хwә жь wан qанунзана бькьн, йед кö һʹьз дькьн бь чöхед дьреж бьгәрʹьн, базарада сьлаве бьдьнә wан, кʹьништада кʹöрсийед пешьн бьгьрьн у шайийада жи һәрәма жорьн рʹунен». Паши wан гьлийа әwи гот: «Диwана wане һе гьран бә» (Луqа 20:46, 47). Ле Иса пʹайе жьнәбикә бәләнгаз да, йа кö гәләк һьндьк пʹәрә qöрбан кьр у дьбәкә кәсәки дина хwә нәда wе (Луqа 21:1-4). Бәле, Иса сәр навдарийе у qәбулкьрьне щурʹәки майин дьньһерʹи. Әw готар wе али мә бькә, wәки рʹаст бьньһерʹьн сәр ве йәке, демәк öса чаwа кö Йаһоwа Хwәде хwәш те.

АЛИЙЕ ЙАҺОWАДА БЕНӘ QӘБУЛКЬРЬНЕ ҺÖРМӘТӘКӘ ЛАПӘ МӘЗЬН Ә

4. Алийе кʹеда һун дьхwазьн бенә наскьрьне у qимәткьрьне, у чьрʹа?

⁴ Ле алийе кʹеда һежа йә wәки әм бенә наскьрьне у qимәткьрьне? Иро мәрьв дьхwазьн наве хwә бьльнд кьн, мәсәлә бь хwәндьна бьльнд, хәбатәкә баш, у навдәнгийа ве дьнйайеда. Ле Паwлос шьровәкьр wәки һежа йә алийе кʹеда әм бенә наскьрьне у qимәткьрьне. Әwи гот: «Ньһа кö wә Хwәде нас кьрийә, ле бәле Хwәде жи һун нас кьрьнә, һун чаwа диса вәдьгәрʹьнә сәр wан сьхьред ве дьнейә беqәwатә нә тʹö тьшт у диса дьхwазьн хöламтийе wанрʹа бькьн?» (Галт. 4:9). Рʹасти жи qәдьрәки чьqас мәзьн ә кö әм дькарьн алийе Хwәдеда бенә наскьрьне, демәк алийе Сәрwере Һәри Бьльнд! Әw бь дьл дьхwазә әм һәләqәтийа хwә тʹәви wи незик кьн. Йаһоwа мә нас дькә, мә һʹьз дькә, у дьхwазә әм бьбьнә достед wи. Әwи әм öса әʹфьрандьнә, кö әм бькарьбьн тʹәви wи достийе бькьн (Wаиз 12:13, 14).a

5. Әм чь гәрәке бькьн сәва алийе Хwәдеда бенә наскьрьне?

⁵ Хwәде Муса wи щурʹәйи кʹәрәм кьр. Чахе әwи жь Йаһоwа һиви кьр, wәки изьн бьдә wи сәва әw бь тʹәмами фәʹм кә рʹейед Wи, Йаһоwа öса щаба wи да: «Әзе ве йәке жи бькьм кö тә гот, чьмки тә ль бәр чʹәʹве мьн кʹәрәм дит у әз тә пе наве тә нас дькьм» (Дәркʹ. 33:12-17). Чахе Йаһоwа мә нас дькә, әм жи дькарьн гәләк кʹәрәма бьстиньн. Ле әм чь гәрәке бькьн wәки алийе Йаһоwада бенә наскьрьне? Әм гәрәке wи һʹьз кьн у әʹмьре хwә тʹәсмили wи бькьн. (Бьхунә 1 Корьнтʹи 8:3.)

6, 7. Чь дькарә бьбә мәʹни кö әм достийа хwә тʹәви Йаһоwа öнда кьн?

⁶ Ле әм гәрәке фәсал бьн wәки һәләqәтийа хwә тʹәви Баве хwәйи әʹзмана öнда нәкьн. Әм мина Мәсиһийед Галати, кʹижанарʹа кö Паwлос ньвиси, гәрәке хwәй кьн хwә жь «сьхьред ве дьнейә беqәwатә нә тʹö тьшт», у öса жи жь навдари у qәбулкьрьна ве дьнйайе (Галт. 4:9). Әw Мәсиһийед qьрʹна йәке, ида алийе Хwәдеда наскьри бун у Хwәде wана qәбул дькьр. Ле йәкә Паwлос гот wәки әw хушк-бьра «диса вәдьгәрʹьн» пәй тьштед пʹучʹ. Щурʹәки майин бежьн, әв бу готьна Паwлос: «Һун öса пешда чунә, чьрʹа һун пашда вәдьгәрʹьн у пәй тьштед бекер у пʹучʹ дькʹәвьн?»

⁷ Ле гәло дькарә тʹәви мә жи öса бьqәwьмә? Бәле, һәрге әм фәсал нибьн. Чахе мә Йаһоwа нас кьр, мә жи мина Паwлос пьшта хwә да навдари у qәбулкьрьна ве дьнйайе. (Бьхунә Филипи 3:7, 8.) Дьqәwьмә мә дькарьбу хwәндьна бьльнд бьстанда, йан навдәнг буна, йан жи гәләк пʹәрә qазанщ кьра, ле мә тʹәрка wан тьшта да. Йан жи дьбәкә әм алийе музикеда рʹьнд һостә нә, у әм дькарьбун навдар у дәwләти буна. Ле мә нәхwәст ве дьнйайеда наве хwә бьльнд кьн, ләма мә тʹәрка wан һʹәму тьшта да (Ибрн. 11:24-27). Бьдьнә һʹәсабе хwә кö wе чьqас нәаqьлайи бә, һәрге әм ньһа бьфькьрьн кö мә бадиһәwа әw тьшт жь дәсте хwә бәрда! Фькьред öса дькарьн мә һелан кьн wәки диса пәй тьштед öса кʹәвьн, кʹижан мә һʹәсаб кьрьбу wәки пʹучʹ ьн у нә тʹö тьшт ьн.b

QӘБУЛКЬРЬНА ЙАҺОWА БЬГӘРʹӘ

8. Чь wе али мә бькә wәки qәбулкьрьна Йаһоwа бьгәрʹьн, нә кö йа ве дьнйайе?

⁸ Ча әм дькарьн нәкʹәвьнә һʹәйра ве йәке wәки әw дьнйа мә qәбул кә, ле дәwсе qәбулкьрьна Йаһоwа бьгәрʹьн? Әм гәрәке бир нәкьн дö тьштед фәрз. Йа пешьн, Йаһоwа тʹьме нас дькә у qимәт дькә wана, йед кö бь амьни жерʹа хьзмәт дькьн. (Бьхунә Ибрани 6:10; 11:6). Бәле, әw гәләк qимәт дькә һәр хьзмәткʹарәки хwә, у әw сәр «нәһәqийе» нинә wәки хәм нәкә бона мәрьвед кö жерʹа амьн ьн. Йаһоwа тʹьме «йед пʹара хwә нас дькә» (2 Тимтʹ. 2:19). Чʹәʹве wи «сәр рʹийа рʹаста йә» у әw занә чаwа wана жь щерʹьбандьна хьлаз кә (Зәб. 1:6; 2 Пәт. 2:9).

9. Мәсәла биньн кö Йаһоwа чаwа qәбулкьрьна хwә щьмәʹта хwәрʹа дьдә кʹьфше.

⁹ Щара Йаһоwа щьмәʹта хwәрʹа qәбулкьрьна хwә бь щурʹәки мәхсус дьдә кʹьфше (2 Дир. 20:20, 29). Мәсәлә, биньн бира хwә, Йаһоwа ча бәр Бәʹра Сор щьмәʹта хwә хьлаз кьр чахе ордийа Фьрәwьнә qәwи пәй wан кʹәт (Дәркʹ. 14:21-30; Зәб. 106:9-11). Әw qәwьмандьн öса сәр щьмәʹте һʹöкöм бу, wәки һәла һе паши 40 сала жи wана дәрһәqа ве qәwьмандьне хәбәр дьдан (Йешу 2:9-11). Зутьрәке Гог жь Магоге wе пәй мә кʹәвә, ле әм гәләк qәwи дьбьн гава дьфькьрьн дәрһәqа һʹьзкьрьн у qәwата Йаһоwа (Һәзqл. 38:8-12). Гава әw wәʹдә бе, әме гәләк ша бьн, чьмки мә qәбулкьрьна Хwәде дьгәрʹийа, нә кö йа ве дьнйайе!

10. Әм дәрһәqа Йаһоwа чь гәрәке бир нәкьн?

¹⁰ Әм öса жи гәрәке бира хwәда хwәй кьн тьштәки фәрз: Йаһоwа дькарә qәбулкьрьна хwә мәрʹа öса бьдә кʹьфше, кö тʹö щар әм нә жи һивийе бун. Мәрьвед кö сәва ве йәке qәнщийе дькьн wәки йед дьн бьвиньн, wе жь Йаһоwа хәлате нәстиньн. Ле чьрʹа? Чьмки әwана бь тʹәмами һәqе хwә дьстиньн, чахе мәрьв пʹайе wан дьдьн. (Бьхунә Мәтта 6:1-5.) Ле Иса гот кö Баве wи «дьзива . . . дьбинә» wана, йед кö бона кьред хwәйә qәнщ, һöрмәт у пʹайи нәстандьнә. Әw кьред wан дьвинә у wе һәр йәкирʹа һәqе wи бьдә. Ле щара Йаһоwа мә бь щурʹәки мәхсус хәлат дькә, кö әм нә жи һивийе бун. Wәрә әм чәнд мәсәла шеwьр кьн.

QИЗЬКӘКӘ МЬЛУК БЬ ЩУРʹӘКИ МӘХСУС ТЕ QӘБУЛКЬРЬНЕ

11. Йаһоwа ча Мәрйәмерʹа qәбулкьрьна хwә да кʹьфше?

¹¹ Йаһоwа qизькәкә мьлук Мәрйәм бьжарт, сәва әw бьбә дийа Кöрʹе wи, демәк Иса. Мәрйәм шәһәре бьчʹукда Ньсрәтеда дьжит, кʹижан кö дури Оршәлиме у пʹарьстгәһа wийә мәзьн бу. (Бьхунә Луqа 1:26-33.) Ле чьрʹа Мәрйәм һатә бьжартьне бона wи qәдьрәки мәзьн? Мьлйакʹәте Хwәде, Щьбрайил, жерʹа гот wәки әw qизька «кʹәрәм ле буйийе» йә. Пе гьлийед Мәрйәме, кö тʹәви мәрьва хwә Елизабете хәбәр дьда, те кʹьфше кö әw йәкә рʹöһʹани бу у Хwәде гәләк һʹьз дькьр (Луqа 1:46-55). Бәле, Йаһоwа дина хwә дьда Мәрйәме, у бона амьнийа wе ле кʹәрәм кьр кö qәдьрәки öса жерʹа да, кʹижан кö әwе нә жи дькарьбу бьда бәр чʹәʹве хwә.

12, 13. Иса чь щурʹәйи һöрмәт станд чахе тʹәзә һатә буйине, у öса жи чахе әw 40 рʹожи бу wи бьрьн пʹарьстгәһе?

¹² Йаһоwа һöрмәт нәда мәрьвед навдәнг, мәсәлә сәрwеред Оршәлиме йан Бәйтләһʹме, кö дәрһәqа буйина Иса wанрʹа әʹлам кьра. Мьлйакʹәт шьванед мьлукрʹа әʹйан бун, йед кö жь Бәйтләһʹм дәр чоле бун бәр кәре пез бун (Луqа 2:8-14). Әw шьван паше чун у зарʹа тʹәзәбуйи дитьн, демәк Иса (Луqа 2:15-17). Мәрйәм у Усьв рʹасти жи wе чьqас ша буна, кö Иса wи щурʹәйи һатә һöрмәткьрьне! Дина хwә бьдьне кö Шәйтʹан чьqас щöдә дьбә жь Йаһоwа. Чахе Шәйтʹан стәйрнас шандьн бал Иса у де-баве wи, тʹәмамийа Оршәлиме тʹәвиһәв бу чахе дәрһәqа зарʹе пеһʹәсийан (Мәт. 2:3). Бона ве әʹламәтийе, гәләк зарʹ бемәʹни һатьнә кöштьне (Мәт. 2:16).

¹³ Чьл рʹож паши буйина Иса, Мәрйәме гәрәке Йаһоwарʹа qöрбан бьанийа пʹарьстгәһа Оршәлимеда. Жь Бәйтләһʹме әw рʹе wәкә 9 километра бу (Луqа 2:22-24). Чахе Мәрйәм тʹәви Усьв рʹеда бу, дьфькьри кö дьqәwьмә кʹаһин wе бәр һʹәмушка дәрһәqа Иса бежә у кö ахьрийеда Иса wе чь бькә. Бь рʹасти Иса пʹарьстгәһеда һатә һöрмәткьрьне, ле нә öса ча дьбәкә Мәрйәме дьда бәр чʹәʹве хwә. Йаһоwа бь Шьмһʹуне «рʹаст, хwәдехоф», у öса жи бь Һанайа пʹехәмбәр кö 84 сали бу у жьнәби бу, әʹйан кьр кö әw зарʹ wе бьбә Мәсиһе создайи (Луqа 2:25-38).

14. Йаһоwа чь кʹәрәм дайә Мәрйәме?

¹⁴ Ле дәрһәqа Мәрйәме әм чь дькарьн бежьн? Гәло Йаһоwа диса жерʹа да кʹьфше qәбулкьрьна хwә сәва ве йәке, кö әwе Кöрʹе wи бь амьни хwәй дькьр у мәзьн дькьр? Бәле. Хwәде кьред wе у гьлийед wе Хәбәра Хwәда дайә ньвисаре. Дьбәкә Мәрйәме нькарьбу тʹәви Иса рʹеwити бькьра wәʹде хьзмәтийа wи кö се сал нива кʹьшанд. Дьqәwьмә әw һьнге жьнәби бу у Ньсрәтеда ма. Рʹаст ә әwе нькарьбу тʹәви wи һәрʹә, ле әw wәʹде мьрьна Иса wедәре бу (Йуһʹн. 19:26). Паше, Мәрйәм тʹәви шагьртед дьн Оршәлимеда бу, гава рʹöһʹе пироз һатә сәр wан (Кʹар. Шанд. 1:13, 14). Әwе жи дьбәкә рʹöһʹе пироз станд, чахе wедәре бу. Һәрге әw йәк öса бу, әw те һʹәсабе wәки әwе диса жи qәдьрәки мәзьн станд, демәк wе тʹәви Иса һʹәта-һʹәтайе сәр әʹзмана бә. Рʹасти жи Хwәде бона хьзмәтийа wейә амьн чьqас wе кʹәрәм кьр!

ЙАҺОWА КÖРʹЕ ХWӘ ҺÖРМӘТ ДЬКӘ

15. Йаһоwа ча qәбулкьрьна хwә һьндава Кöрʹе хwә да кʹьфше, чахе әw сәр әʹрде бу?

¹⁵ Иса нәдьхwәст wәки сәрwеред рʹелигийа йан жи политик wи qәбул кьн у һöрмәте бьдьнә wи. Ле әw чьqас дьлша бу гава хwәха Йаһоwа се щара жь әʹзмана qәбулкьрьна хwә жерʹа да кʹьфше. Һәма паши ньхöмандьна Иса, Йаһоwа гот: «Әв ә Кöрʹе мьни дәлал, кö әз жь wи рʹази мә» (Мәт. 3:17). Ча те кʹьфше, тʹәне Йуһʹәннайе Ньхöмдар әwан гьлийа бьһист. Паше, wәкә саләк пешийа мьрьна Иса, се шандийа дәнге Йаһоwа бьһистьн чахе әwи гот: «Әв ә Кöрʹе мьни дәлал, кö әз же рʹази мә. Гöһдарийа wи бькьн!» (Мәт. 17:5). Чәнд рʹож пешийа мьрьна Иса жи, Йаһоwа тʹәви Кöрʹе хwә жь әʹзмана хәбәр да (Йуһʹн. 12:28).

16, 17. Йаһоwа ча Иса кʹәрәм кьр кö әw нә жи һивийе бу?

¹⁶ Рʹаст ә Иса заньбу кö wе бь мьрьна шәрми бьмьрә, чаwа бöхданбеж, ле әwи дöа кьр wәки qьрара Йаһоwа бе сери, нә кö йа wи (Мәт. 26:39, 42). Әwи стуна щәфе һьлда, «шәрм бәр тьштәки һʹәсаб нәкьр», у тʹö щар һöрмәт у qәбулкьрьна жь ве дьнйайе нәдьхwәст, ле йа жь Баве хwә (Ибрн. 12:2). Чаwа Йаһоwа жерʹа qәбулкьрьна хwә да кʹьфше?

¹⁷ Чахе Иса сәр әʹрде бу, әwи гот кö дьхwазә вәгәрʹинә әw рʹумәта кö бәре сәр әʹзмана бал wи һәбу, чахе тʹәви Баве хwә бу (Йуһʹн. 17:5). Ле тʹö щики найе готьне wәки Иса жь ве зедәтьр дьхwәст. Әw тʹö щар нә жи дьфькьри wәки сәр әʹзмана бьбә йәки һе мәзьн. Ле Йаһоwа чь кьр? Әwи Иса öса хәлат кьр кö wи «бьльнд кьр», у жерʹа кʹәрәмәкә öса да, кö пешийа wи тʹö кәс нәсьтандьбу. Әw һәйә жийина нәмьриc (Фили. 2:9; 1 Тимтʹ. 6:16). Рʹасти жи бона амьнийа хwә Иса чьqас һатә кʹәрәмкьрьне у һöрмәткьрьне!

18. Чь wе али мә бькә qәбулкьрьна ве дьнйайе нәгәрʹьн?

¹⁸ Чь wе али мә бькә wәки әм qәбулкьрьна ве дьнйайе нәгәрʹьн? Әм гәрәке бир нәкьн кö Йаһоwа тʹьме дьшекьринә, qәбул дькә у кʹәрәм дькә хьзмәткʹаред хwәйи амьн у гәләк щар әw кʹәрәмед öса дьдә wан, кö әwана нә жи һивийе нә. Рʹасти жи кʹе занә кʹижан кʹәрәм һивийа мә нә? Ле иро, чахе әм тәнгасийа у щерʹьбандьнада сәбьр дькьн, wәрә тʹö щар бир нәкьн, wәки әw дьнйа wе һöрмәта хwәва кʹöта бә (1 Йуһʹн. 2:17). Баве мәйи Әʹзмана Йаһоwа сәр нәһәqийе нинә, wәки кьред мә у әw һʹьзкьрьна кö әм бона наве wи дьдьнә кʹьфше, бир бькә (Ибрн. 6:10). Бәле, Йаһоwа wе мә кʹәрәм кә, у дьqәwьмә öса кö әм ньһа нә жи дькарьн бьдьнә бәр чʹәʹве хwә!