Жь Хԝәндьна Кʹьтеба Пироз Дьһа Зедә Кʹаре Бьстинә

1. Чь нишан дькә кӧ Ньвисаред Пироз бона Иса фәрз бун?

БИНӘ бәр чʹәʹве хԝә кӧ тӧ гӧһ дьди хәбәрдана Иса Мәсиһ. Готьнед Ньвисаред Пироз тʹьме бира ԝида бун у әԝи гәләк щара әв йәк бь сәрбәсти дьда хәбате! Мәсәлә, готьнед ԝийи пешьн кӧ әԝи паши ньхӧмандьне гот у һьнә готьнед ԝийи пешийа мьрьна ԝи, рʹезед жь Ньвисаред Пироз бунb (Ԛануна Дӧщари 8:3; Зәбур 31:5; Луԛа 4:4; 23:46). Иса ԝәʹде хьзмәтийе жи нава се сал у нивада гәләк щара бәр щьмәʹте жь Ньвисаред Пироз дьхԝәнд, рʹез дьԝәкʹьландьн у шьровәдькьрьн (Мәтта 5:17, 18, 21, 22, 27, 28; Луԛа 4:16-20).

2. Гава Иса мәзьн дьбу, чь али ԝи дькьр кӧ әԝ Ньвисаред Пироз баш бьзаньбә? (Бьньһерʹә шькьле сәр рʹуйе пешьн.)

² Гәләк сала пешийа кӧ Иса хьзмәтийа хԝә дәстпекьр, әԝи тʹьме Хәбәра Хԝәде дьхԝәнд у дьбьһист. Малда, әԝи бешьк дьбьһист кӧ Усьв у Мәрйәме чаԝа рʹастә-рʹаст жь Ньвисаред Пироз хәбәр дьданc (Ԛануна Дӧщари 6:6, 7). Бешьк, Иса тʹьме рʹожа Шәмийе тʹәви малбәта хԝә дьчу кʹьниште (Луԛа 4:16). Чахе ԝедәре Ньвисаред Пироз дьһатьнә хԝәндьне, әԝи баш гӧһдари дькьр. Ԝәхт шунда, әԝ хԝәха жи һин бу Ньвисаред Пироз бьхунә. Ләма жи, Иса Ньвисаред Пироз баш заньбу, әԝи ньвисар һʹьз дькьр у дьһишт кӧ әԝ сәр ԝи һʹӧкӧм бькьн. Мәсәлә, биньн бира хԝә әв дәрәщә, гава Исайе 12 сали пʹарьстгәһеда бу. Дәрсдаред кӧ Ԛануна Муса рʹьнд заньбун, «хәбәрдана ԝи дьбьһистьн, сәр занәбун у щабед ԝи зәндәгьрти дьман» (Луԛа 2:46, 47, 52).

3. Ве готареда, әме дәрһәԛа чь хәбәр дьн?

³ Әм жи дькарьн Хәбәра Хԝәде баш бьзаньбьн у һʹьз бькьн. Бона ве йәке, лазьм ә ԝәки әм һәр рʹож Хәбәра Хԝәде бьхуньн. Гәло әм ча дькарьн жь хԝәндьна Кʹьтеба Пироз һе зедә кʹаре бьстиньн? Әм дькарьн жь хәбәред кӧ Иса ԛанунзана, Ферьси у Садуԛийарʹа готьбу, һьнә тьшта һин бьн. Ԝана гәләк щар Ньвисаред Пироз дьхԝәндьн, ле Хәбәра Хԝәде сәр һʹьш у дьле ԝан һʹӧкӧм нәдькьр. Иса дина ԝан кʹьшандә сәр се тьшта, йед кӧ ԝана нәдькьр. Ве готареда, әме бьвиньн кӧ готьнед ԝи чаԝа али мә дькьн, ԝәки әм (1) тьштед кӧ дьхуньн фәʹм бькьн, (2) рʹастийед ԛимәт бьвиньн, у (3) бьһельн ԝәки Хәбәра Хԝәде сәр һʹьш у дьле мә һʹӧкӧм кә.

ӦСА БЬХУНӘ ԜӘКИ ФӘʹМ БЬКИ

4. Әм жь Луԛа 10:25-29 дәрһәԛа хԝәндьна Кʹьтеба Пироз чь һин дьбьн?

⁴ Әм дьхԝазьн мәʹна готьнед кӧ әм Хәбәра Хԝәдеда дьхуньн фәʹм бькьн. Һәрге әм ӧса нәкьн, әме жь хԝәндьне бь тʹәмами кʹаре нәстиньн. Мәсәлә, дина хԝә бьдә хәбәрдана Иса тʹәви ԛанунзанәки (Бьхунә Луԛа 10:25-29). Әԝи Иса пьрси кӧ әԝ чаԝа дькарә жийина һʹәта-һʹәтайе ԛазанщ кә. Иса щаба ԝи жь Хәбәра Хԝәде да. Иса ӧса гот: «Ԛанунеда чь ньвисар ә? Тӧ чаԝа дьхуни?» Ԝи мери щаба рʹаст да. Әԝи жь Ньвисаред Пироз хәбәр да у гот кӧ гәрәке әм Хԝәде у һәвале хԝә һʹьз бькьн (Ԛануна Кʹаһинтийе 19:18; Ԛануна Дӧщари 6:5). Ле паше әԝи Исарʹа ӧса гот: «Һәвале мьн кʹи йә?» Әве пьрсе дәрһәԛа ԝи тьштәк әшкәрә кьр. Әԝи мәʹна тьштед кӧ хԝәндьбу фәʹм нәкьрьбу. Ләма жи әԝи ньзаньбу кӧ чаԝа ван рʹеза жийина хԝәда бьдә хәбате.

5. Дӧа у хԝәндьна һеди-һеди чаԝа дькарьн али мә бькьн?

⁵ Сәва кӧ тӧ Хәбәра Хԝәде дьһа баш фәʹм бьки, гәло тӧ дькари чь бьки? Әв ширәт дькарьн али тә бькьн. Пешийа хԝәндьне дӧа бькә. Сәва кӧ әм Кʹьтеба Пироз фәʹм бькьн у баш дина хԝә бьдьнә хԝәндьне, мәрʹа аликʹарийа Йаһоԝа лазьм ә. Ләма жи Йаһоԝарʹа дӧа бькә, ԝәки әԝ рʹӧһʹе пироз бьдә тә. Паше һеди-һеди бьхунә. Бь ви щурʹәйи, готьнед Кʹьтеба Пироз ԝе һʹьше тәда бьминьн. Әв йәк жи дькарә али тә бькә: Дьԛәԝьмә тӧ дькари бь дәнге бьльнд бьхуни йан жи Кʹьтеба Пироз бь ньвисандьна дәнг бьбьһейи у перʹа бьхуни. Бь гьлийед майин бежьн, гӧһ дьбьһе, чʹәʹв дьвинә у дьл дьхунә. Демәк тӧ дькари Хәбәра Хԝәде дьһа рʹьнд фәʹм бьки у готьнед Хԝәде һʹьш у дьле хԝәда хԝәй ки (Йешу 1:8). Паши хԝәндьне диса Йаһоԝарʹа дӧа бькә. Шькьрийе бьдә Йаһоԝа, кӧ әԝи Хәбәра хԝә пʹешкʹеши мә кьрийә. Ӧса жи, аликʹарийе жь ԝи бьхԝазә, ԝәки тӧ бькарьби готьнед ԝи жийина хԝәда бини сери.

6. Чьма баш ә ԝәки тӧ ԝәʹде хԝәндьне пьрса бьди хԝә у хԝәрʹа башԛә фькьра бьньвиси? (Бьньһерʹә ӧса жи шькьл.)

⁶ Чь дькарә али тә бькә, ԝәки тӧ Кʹьтеба Пироз дьһа баш фәʹм бьки? Дәрһәԛа ван тьшта чь кӧ тӧ дьхуни, пьрса бьдә хԝә. Дәма кӧ тӧ Кʹьтеба Пироз дьхуни, ль щабед ван пьрса бьгәрʹә: «Ве сәрһатийеда кәсе сәрәкә кʹи йә? Кʹи хәбәр дьдә? Әԝ керʹа хәбәр дьдә у чьрʹа? Әв сәрһати кʹәнге у кʹидәре дьԛәԝьмә?» Пьрсед ӧса ԝе али тә бькьн, ԝәки тӧ фәʹм бьки, кӧ фькьра һәри фәрз чь йә. Ӧса жи, гава тӧ дьхуни, һьнә фькьра хԝәрʹа кьн бьньвисә. Гава тӧ дьньвиси тәрʹа дьһа һеса дьбә ван фькьра зәлал ки, дәрһәԛа чь жи тә хԝәндийә. Сәрда жи, ньвисандьн ԝе али тә бькә, ԝәки чь кӧ тә хԝәндийә бира хԝәда хԝәй ки. Тӧ дькари пьрсед хԝә у тʹәмамкьрьна леколина хԝә, бьньвиси. Фькьред фәрз бь чәнд готьна бьньвисә. Бона хԝә бьньвисә тӧ чь дәрс һин буйи, йан жи сәр тьштед кӧ тә хԝәндьнә, һәстед хԝә бьньвисә. Бь аликʹарийа ван ньвисара, тӧйе фәʹм бьки кӧ Хәбәра Хԝәде бона тә жи һатийә ньвисандьне.

7. Гава әм Кʹьтеба Пироз дьхуньн, кʹижан һʹӧнӧр мәрʹа лазьм ә у чьрʹа? (Мәтта 24:15)

⁷ Иса гот кӧ бона фәʹмкьрьна Хәбәра Хԝәде фәʹмкʹари мәрʹа лазьм ә (Бьхунә Мәтта 24:15). Гәло фәʹмкʹари чь йә? Бь сайа фәʹмкʹарийе, әм дькарьн тедәрхьн кӧ дӧ фькьр чаԝа һәвва гьредайи нә у чаԝа жь һәв щӧдә нә у фькьред кӧ нә зәлал тенә кʹьфше, фәʹм бькьн. Ӧса жи, Иса нишан кьр кӧ фәʹмкʹари лазьм ә, ԝәки әм фәʹм бькьн кӧ созед Кʹьтеба Пироз чаԝа тенә сери. Бәле, бь сайа ви һʹӧнӧре фәрз, әм дькарьн жь хԝәндьна Кʹьтеба Пироз кʹара һәри мәзьн бьстиньн.

8. Әм чаԝа дькарьн бь фәʹмкʹари бьхуньн?

⁸ Йаһоԝа фәʹмкʹарийе дьдә хьзмәткʹаред хԝә. Ләма жи ԝирʹа дӧа бькә у аликʹарийа ԝи бьхԝазә, ԝәки тӧ ви һʹӧнӧре фәрз нав хԝәда пешда бини (Мәтʹәлок 2:6). Гәло тӧ чаԝа дькари ль гора дӧайед хԝә һәрәкʹәт бьки? Сәр тьштед кӧ тӧ дьхуни кʹур бьфькьрә у дина хԝә бьде, кӧ әԝ чаԝа ван тьштава гьредайи йә, кʹижан кӧ тӧ зани. Сәва кӧ занәбуна тә дьһа кʹур бә, һащәтед леколине бьдә хәбате. Мәсәлә, тӧ дькари Рʹебәрийа Леколинкьрьне бона Шәʹдед Йаһоԝа бьди хәбате. Әв әʹдәбйәт ԝе али тә бькьн ԝәки тӧ мәʹнийа готьнед Кʹьтеба Пироз дьһа рʹьнд фәʹм бьки у әʹмьре хԝәда бини сери (Ибрани 5:14). Һәрге тӧ Кʹьтеба Пироз бь фәʹмкʹарийе бьхуни, чьԛас һәрʹә тӧйе Кʹьтеба Пироз һе зедә фәʹм бьки.

БЬХУНӘ У РʹАСТИЙЕД ԚИМӘТ БЬВИНӘ

9. Чʹәʹвед Садуԛийа бона кʹижан рʹастийа фәрз кор бун?

⁹ Садуԛийа һәр 5 кʹьтебед пешьн йед Ньвисаред Ибрани рʹьнд нас дькьрьн. Ле диса жи чʹәʹвед ԝана бона рʹастийед фәрз, кор бун. Мәсәлә, гава дәрһәԛа рʹабуна мьрийа пьрс данә Иса, әԝи щабәкә һʹәԝас да ԝан. Әԝи ԝанрʹа гот: «Ле дәрһәԛа рʹабуна мьрийада, чьма ԝә Кʹьтеба Мусада нәхԝәндийә сәрһатийа дара дьрʹийеда кӧ чаԝа Хԝәде Мусарʹа дьбежә: ‹Әз Хԝәдейе Бьраһим, Хԝәдейе Исһаԛ у Хԝәдейе Аԛуб ьм›?» (Марԛос 12:18, 26). Садуԛийа әв йәк гәләк щара хԝәндьбу. Ле пьрса Иса әшкәрә дькьр кӧ ԝана рʹастикә фәрз ԛәбул нәдькьр. Ԝана баԝәр нәдькьр кӧ кәсед мьри ԝе рʹожәке диса вәгәрʹьн жийине (Марԛос 12:27; Луԛа 20:38).d

10. Гава әм Кʹьтеба Пироз дьхуньн, әм дьхԝазьн дина хԝә бьдьн сәр чь?

¹⁰ Әм жь готьнед Иса чь һин дьбьн? Гава әм Кʹьтеба Пироз дьхуньн, әм дьхԝазьн дина хԝә бьдьн сәр дәрсед кӧ әм жь рʹезәке йан жь сәрһатике һин дьбьн. Әм дьхԝазьн нә тʹәне рʹастийед сәрәкә фәʹм бькьн, ле ӧса жи рʹасти у принсипед кʹур, йед кӧ ча бежи вәшарти нә.

11. Ль гора 2 Тимотʹейо 3:16, 17, гәло әм чаԝа дькарьн Кʹьтеба Пирозда рʹастийед ԛимәт бьвиньн?

¹¹ Гәло тӧ чаԝа дькари ԝәʹде хԝәндьна Кʹьтеба Пироз рʹастийед ԛимәт бьвини? Бона щаба ве пьрсе, дина хԝә бьдә 2 Тимотʹейо 3:16, 17 (Бьхунә). Әв рʹез дьбежьн кӧ «тʹәмамийа ньвисаре . . . керһати йә» бона (1) һинкьрьне, (2) леһьлатьне, (3) рʹасткьрьне у (4) ширәткьрьне. Бь аликʹарийа ван чар тьшта тӧ дькари жь тʹәмамийа Кʹьтеба Пироз кʹаре бьстини. Гава тӧ дьхуни, дина хԝә бьде кӧ сәрһатик дәрһәԛа Йаһоԝа, нета ԝи йан принсипед ԝи чь һин дькә. Бьфькьрә кӧ әԝ готьн чаԝа бона леһьлатьне керһати йә. Ӧса тӧйе нав хԝәда нет у хԝәстьнед хьраб бьвини, сәр хԝә бьхәбьти у Хԝәдерʹа амьн бьмини. Жь хԝә бьпьрсә кӧ әԝ пʹар чаԝа дькарә бона рʹасткьрьна ньһерʹандьнед шаш, мәсәлә йед кӧ мәрьв хьзмәтийеда дьбежьн, бенә хәбьтандьне. У бьфькьрә кӧ рʹезада дәрһәԛа ширәткьрьна рʹийа рʹастийеда чь те готьне. Демәк рʹьнд фәʹм бькә, кӧ тӧ чаԝа дькари мина Йаһоԝа бьфькьри. Һәрге тӧ ван чар тьшта һʹьше хԝәда хԝәй ки, тӧйе жь хԝәндьна Кʹьтеба Пироз дьһа кʹаре бьстини у рʹастийед ԛимәт бьбини.

БЬРА ХԜӘНДЬН СӘР ҺʹЬШ У ДЬЛЕ ТӘ ҺʹӦКӦМ БЬКӘ

12. Иса чьрʹа жь Ферьсийа пьрси: «Ԝә нәхԝәндийә?»

¹² Иса жь Ферьсийа ӧса пьрси: «Ԝә нәхԝәндийә?» Бь ве пьрсе, әԝи әшкәрә кьр кӧ ньһерʹандьна Ферьсийа сәр Ньвисаред Пироз шаш ә (Мәтта 12:1-7).e Ферьсийа сәр шагьртед Иса дьготьн, ԝәки әԝана рʹожа Шәмийе хԝәй накьн. Ләма жи Иса бь дӧ мәсәлед жь Ньвисаред Пироз у бь рʹезәкә жь кʹьтеба Һосәйа щаба ԝан да. Бь ви щурʹәйи, әԝи нишан кьр кӧ ԝана мәʹнийа ԛануна рʹожа Шәмийе фәʹм нәкьрийә у рʹәʹме надьнә кʹьфше. Гәло хԝәндьна Хәбәра Хԝәде чьма сәр һʹьш у дьле ԝан һʹӧкӧм нәдькьр? Чьмки ԝана Ньвисаред Пироз бь нета нәрʹаст у бь бабахийе дьхԝәнд. Әв йәк бу сәбәб, кӧ ԝана Хәбәра Хԝәде фәʹм нәдькьр (Мәтта 23:23; Йуһʹәнна 5:39, 40).

13. Әм гәрәке Кʹьтеба Пироз бь чь нете бьхуньн у чьрʹа?

¹³ Готьнед Иса нишани мә дькьн, кӧ гәрәке әм Кʹьтеба Пироз бь нета рʹаст бьхуньн. Әм нахԝазьн мина Ферьсийа бьн. Әм гәрәке мьлук бьн у жь дьл бьхԝазьн һин бьн. Кʹьтеба Пироз дьбежә: «Бь мьлуктийе ԝе хәбәра нава ԝәда чанди ԛәбул кьн» (Аԛуб 1:21). Һәрге әм мьлук бьн, әме бьһельн кӧ Хәбәра Хԝәде дьле мәда кʹок бәрʹдә. Тʹәне мәрьвед бь нетед ԛәнщ у мьлук дьһельн, ԝәки Хәбәра Хԝәде сәр һʹьш у дьле ԝан һʹӧкӧм бькә у ԝана бькә мәрьвнә дьлрʹәʹм, дьлшәԝат у бь һʹьзкьрьн.

14. Әм чаԝа дькарьн бьзаньбьн һәла Кʹьтеба Пироз сәр һʹьш у дьле мә һʹӧкӧм дькә йан на? (Бьньһерʹә ӧса жи шькьл.)

¹⁴ Мәрьве кӧ һьндава кәсед дьнда ԛәнщ ә, нишан дькә, кӧ Хәбәра Хԝәде сәр һʹьш у дьле ԝи һʹӧкӧме дькә. Ферьсийа нәдьһишт ԝәки Хәбәра Хԝәде бьгьһижә дьле ԝан, ләма жи ԝана «йед бесущ гӧнәкʹар» дькьр (Мәтта 12:7). Бәле, һәрге әм бь готьн у кьред хԝә һьндава мәрьвада ԛәнщ бьн, әме әʹйан кьн ԝәки Кʹьтеба Пироз кʹәтийә һʹьш у дьле мә. Гәло әм дәрһәԛа мәрьва тьштед ԛәнщ дьбежьн, йан әм дәрһәԛа ԛьсуред ԝан хәбәр дьдьн? Гәло әм дьлрʹәʹм ьн у һазьр ьн бьбахшиньнә мәрьва, йан әм нетед ԝан дькьнә бьн шьке у хәйдок ьн? Бь аликʹарийа ван пьрса, әм дькарьн фәʹм бькьн, һәла Хәбәра Хԝәде сәр һәст, фькьр у кьред мә һʹӧкӧм дькә йан на (1 Тимотʹейо 4:12, 15; Ибрани 4:12).

ХԜӘНДЬНА ХӘБӘРА ХԜӘДЕ МӘ БӘХТӘԜАР ДЬКӘ

15. Иса дәрһәԛа Ньвисаред Пироз чь тʹәхмин дькьр?

¹⁵ Иса Ньвисаред Пироз һʹьз дькьр. Хәбәра Хԝәдеда дәрһәԛа һәстед ԝи ӧса һатьбу пʹехәмбәртикьрьне: «Әз дьхԝазьм хԝәстьна Тә бьԛәдиньм, йа Хԝәде у ва йә һинкьрьна Тә дьле мьнда йә» (Зәбур 40:8). Әԝи Хәбәра Хԝәде һʹьз дькьр, ләма жи әԝ бәхтәԝар бу у хьзмәтийа Йаһоԝада пешдачуйи бу. Һәрге әм жи Хәбәра Хԝәде бьхуньн у же һʹьз бькьн, әме дьлхԝәш у пешдачуйи бьн (Зәбур 1:1-3).

16. Сәва кӧ тӧ жь хԝәндьна Хәбәра Хԝәде һе зедә кʹаре бьстини, тӧ дьхԝази чь бьки? (Бьньһерʹә чаргошә «Готьнед Иса Дькарьн Али Тә Бькьн ԝәки Чь кӧ Дьхуни Фәʹм Бьки».)

¹⁶ Мәсәла Иса у готьнед ԝи мә һелан дькьн ԝәки әм хԝәндьна Кʹьтеба Пирозда тʹьме пешда һәрʹьн у методед тʹәзә һин бьн. Сәва кӧ әм Кʹьтеба Пироз дьһа баш фәʹм бькьн, гәрәке әм дӧа бькьн, һеди-һеди бьхуньн, пьрса бьдьнә хԝә у фькьред кьн хԝәрʹа башԛә бьньвисьн. Фәʹмкʹари ԝе али мә бькә ԝәки әм бь аликʹарийа әʹдәбйәтед мә, сәр тьштед кӧ дьхуньн кʹур бьфькьрьн. Һәрге әм ԝәʹде хԝәндьна Кʹьтеба Пироз рʹастийед ԛимәт бьгәрʹьн, әме Кʹьтеба Пироз бь щурʹе дьһа баш бькарьбьн бьдьнә хәбате. У сәва кӧ Хәбәра Хԝәде сәр һʹьш у дьле мә һʹӧкӧм кә, гәрәке әм ԝе бь нета рʹаст бьхуньн. Гава әм хирәт бькьн, кӧ Кʹьтеба Пироз ԝи щурʹәйи бьхуньн, әме жь хԝәндьна Кʹьтеба Пироз һе зедә кʹаре бьстиньн у дьһа незики Йаһоԝа Хԝәде бьн (Зәбур 119:17, 18; Аԛуб 4:8).