«Сәрԝахт бьн, Һʹьшйар Бьминьн!»

1. Иса шагьртед хԝәрʹа дәрһәԛа һатьна хьлазийе чь гот, у әԝи чь тʹәми да ԝан?

ЧӘНД рʹож пешийа мьрьна Иса Мәсиһ, чар шагьртед ԝи ле пьрсин: «Нишана . . . ахьрийа ве дьнйайе ԝе чаԝа бә?» (Мәтта 24:3). Шагьрта дьхԝәст пебьһʹәсьн кӧ Оршәлим у пʹарьстгәһ ԝе кʹәнге бенә ԝеранкьрьне. Гава Иса щаба ԝан да, әԝи нә тʹәне бәʹса ԝеранкьрьна Оршәлим у пʹарьстгәһе кьр, ле әԝи бәʹса ахьрийа ве дьнйайе жи кьр. Иса дәрһәԛа һатьна хьлазийе ӧса гот: «Ле бона ԝе рʹоже у ԝе сьһʹәте тʹӧ кәс ньзанә, нә мьлйакʹәтед әʹзмен у нә жи Кӧрʹ, ле тʹәне Бав». Паше әԝи тʹәми да шагьртед хԝә, кӧ әԝана «һаш жь хԝә һәбьн!» у «һʹьшйар бьминьн!» (Марԛос 13:32-37).

2. Чьрʹа фәрз бу ԝәки Мәсиһийед ԛьрʹна йәке, кӧ Щьһустанеда дьжитьн, һʹьшйар бьминьн?

² Мәсиһийед кӧ ԛьрʹна йәкеда ль Щьһустане дьжитьн, гәрәке һʹьшйар бьмана, ԝәки әʹмьре хԝә ӧнда нәкьрана. Иса шагьртед хԝәрʹа готьбу кӧ әԝана чаԝа дькарьн тедәрхьн, ԝәки ԝеранкьрьна система Щьһуйа незик буйә. Әԝи ӧса гот: «Гава һун бьбиньн кӧ ордийа дора Оршәлиме гьртийә, һьнге бьзаньбьн кӧ ԝеранбуна ԝе незик ә». Ԝи чахи гәләк фәрз бу кӧ әԝана гӧһ бьдьн тʹәмийа Иса у «бьрʹәвьнә чʹийа» (Луԛа 21:20, 21). Чахе Рʹомайа Оршәлим ԝеран кьрьн, кәсед кӧ гӧһ данә тʹәмийа Иса, сах ман.

3. Ве готареда әме щабед кʹижан пьрса бьстиньн?

³ Иро әм ахьрийа ве дьнйа хьрабда дьжин. Ләма жи гәрәке әм һаш жь хԝә һәбьн у һʹьшйар бьминьн. Ве готареда, әме щабед ван пьрса бьстиньн: Әм чаԝа дькарьн бь ньһерʹандьна рʹаст сәр тьштед кӧ дьнйайеда дьԛәԝьмьн бьньһерʹьн? Әм чаԝа дькарьн һаш жь готьн у кьред хԝә һәбьн? У әм чаԝа дькарьн ԝәʹде хԝә рʹаст бьдьнә хәбате?

СӘР ТЬШТЕД КӦ ДЬНЙАЙЕДА ДЬԚӘԜЬМЬН НЬҺЕРʹАНДЬНА РʹАСТ ХԜӘЙ КЬН

4. Чьрʹа әм дьхԝазьн һаш жь һʹале дьнйайе һәбьн?

⁴ Фәʹмдари йә кӧ әм дьхԝазьн һаш пе һәбьн кӧ дьнйайеда чь дьԛәԝьмә, чьмки әв ԛәԝьмандьн пʹехәмбәртийед Кʹьтеба Пироз тиньн сери. Мәсәлә, Иса пешда йәк бь йәк готьбу кӧ әм чаԝа дькарьн тедәрхьн, ԝәки хьлазийа дьнйа Мире-щьна незик ә (Мәтта 24:3-14). Гьлийед Пәтрусе шанди мә һелан дькьн, ԝәки әм рʹьнд дина хԝә бьдьн сәр ван пʹехәмбәртийед кӧ бәр чʹәʹве мә тенә сери, ԝәки баԝәрийа мә дьһа ԛәԝи бә (2 Пәтрус 1:19-21). Кʹьтеба пашьн, йа Кʹьтеба Пироз, бь ван гьлийа дәстпедьбә: «Әʹйантийа Иса Мәсиһ ә, кʹижан Хԝәде да ԝи, ԝәки әԝ ԝан тьштед кӧ гәрәке зутьрәке бьԛәԝьмьн, нишани хӧламед ԝи кә» (Әʹйанти 1:1). Ләма жи, әм дьхԝазьн һаш жь тьштед кӧ дьнйайеда дьԛәԝьмьн һәбьн, чьмки дьхԝазьн бьзаньбьн һәла пʹехәмбәртийед Кʹьтеба Пироз чаԝа тенә сери. Һәмьки әм бь дьл у щан дьхԝазьн тʹәви кәсед дьн дәрһәԛа ве йәке хәбәр дьн.

5. Әм гәрәке чь бькьн у чь нәкьн? (Бьньһерʹә ӧса жи шькьл.)

⁵ Гава әм тʹәви кәсед дьн дәрһәԛа пʹехәмбәртийед Кʹьтеба Пироз хәбәр дьдьн, әм гәрәке бәр хԝә дәрнәхьн кӧ дьбәкә чь у ча ԝе бьԛәԝьмә. Гәло чьрʹа? Чьмки әм нахԝазьн пе гьлийед хԝә йәктийа щьвате хьраб кьн. Мәсәлә, дьбәкә сәрԝеред дьнйайе бежьн, кӧ ԝана бона проблемәке чʹарә дитийә у дьхԝазьн әʹдьлайе у бехофийе биньн дьнйайе. Дәԝса кӧ әм бь тʹәхмина хԝә бежьн, ԝәки әԝ йәк пʹехәмбәртийа жь 1 Тʹесалоники 5:3 тинә сери, дьһа баш ә ԝәки әм дина хԝә бьдьн фәʹмкьрьна һәри тʹәзә, йа кӧ әʹдәбйәтед мәда һатийә зәлалкьрьне. Һәрге хәбәрдана мә сәр һʹиме әʹдәбйәтед тʹәшкиләта Йаһоԝа бә, әме йәктийа щьвате бьпарезьн у «сәр нет-мәрәмәки бьн» (1 Корьнтʹи 1:10; 4:6).

6. Әм жь 2 Пәтрус 3:11-13 чь дәрса һин дьбьн?

⁶ Бьхунә 2 Пәтрус 3:11-13. Паԝлосе шанди али мә дькә, ԝәки әм бьфькьрьн сәр ве мәʹнийе, кӧ чьрʹа әм гәрәке пʹехәмбәртийед Кʹьтеба Пироз леколин бькьн. Әԝ йәк дьле мә ԛәԝи дькә, кӧ әм «һивийа Рʹожа Хԝәде бьн». Гәло чьрʹа? Чьмки әм нә кӧ дьхԝазьн бьзаньбьн кӧ Һармәгәдон ԝе хут кʹижан ‹рʹоже у сьһʹәте› бе, ле әм дьхԝазьн «жийина һʹәлал у хԝәденасийеда бьмәшьн» (Мәтта 24:36; Луԛа 12:40). Демәк бь готьнәкә дьн, әм дьхԝазьн тьштед рʹаст бькьн у Йаһоԝарʹа хьзмәт кьн, чьмки әм гәләк ԝи һʹьз дькьн. Сәва кӧ әм ӧса бьфькьрьн у ӧса бькьн, әм гәрәке мьԛати хԝә бьн у һаш жь готьн у кьред хԝә һәбьн.

ЧЬ ТЕ ҺʹӘСАБЕ «МЬԚАТИ ХԜӘ БЬН»?

7. Әм чаԝа дькарьн мьԛати хԝә бьн? (Луԛа 21:34)

⁷ Иса шагьртед хԝәрʹа гот кӧ гәрәке әԝана дина хԝә нә тʹәне бьдьн һʹале дьнйайе, ле гәрәке мьԛати хԝә бьн. Бьхунә Луԛа 21:34 у сәр тʹәмийа Иса кʹур бьфькьрә. Әԝи ӧса готьбу: «Мьԛати хԝә бьн». Кәсе кӧ мьԛати хԝә дьбә у һаш жь хԝә һәйә, дина хԝә дьдә тьштед кӧ дькарьн зьраре бьдьн достийа ԝи тʹәви Йаһоԝа, у әԝ алийе хԝәда һәр тьшти дькә, ԝәки хԝә жь ван хофа хԝәй кә. Бь ви щурʹәйи, әԝ һʹьзкьрьна Хԝәдеда дьминә (Мәтʹәлок 22:3; Щьһуда 20, 21).

8. Паԝлосе шанди Мәсиһийарʹа чь готьбу?

⁸ Паԝлосе шанди Мәсиһийарʹа готьбу, ԝәки әԝана мьԛати хԝә бьн. Мәсәлә, әԝи Әфәсийарʹа ӧса готьбу: «Аԝа бьньһерʹьн кӧ һун ньге хԝә фәсал бавежьн, нәбьнә мина бефәʹма, ле мина сәрԝахта» (Әфәси 5:15, 16). Мире-щьна тʹьме хирәт дькә, ԝәки достийа мә тʹәви Йаһоԝа хьраб кә. Ләма жи Кʹьтеба Пироз ве ширәте дьдә мә: «Бьзаньбьн чь йә ԛьрара Хӧдан». Һәрге әм ӧса бькьн, әме хԝә жь һʹәму һʹьщумед Мире-щьна бьпарезьн (Әфәси 5:17).

9. Әм чаԝа дькарьн сафикьрьна хԝә ль гора ԛьрара Йаһоԝа бькьн?

⁹ Кʹьтеба Пирозда дәрһәԛа һәр тьште кӧ дькарә зьраре бьдә достийа мә тʹәви Йаһоԝа, найе готьне. Гәләк щар, гәрәке әм ԝан сафикьрьна бькьн, дәрһәԛа кʹижана Кʹьтеба Пироз рʹастә-рʹаст тьштәки набежә. Сәва кӧ әм сафикьрьнед баш бькьн, әм гәрәке фәʹм бькьн кӧ «чь йә ԛьрара» Йаһоԝа. Ләма жи гәләк фәрз ә, ԝәки әм һәр рʹож Хәбәра Хԝәде бьхуньн у сәр готьнед ԝе кʹур бьфькьрьн. Чьԛас әм фәʹм бькьн кӧ хԝәстьна Йаһоԝа чь йә, у чьԛас әм ль гора «нет-фькьра Мәсиһ» бьфькьрьн, әме һаԛас зедә мина ‹сәрԝахта бьмәшьн›. Һәрге әм ӧса бькьн, бона һәр тьшти мәрʹа ида ԝе ԛанун у ԛәйдә нә лазьм бьн (1 Корьнтʹи 2:14-16). Һьнә тʹәлька әм һеса дькарьн тедәрхьн, ле һьнәк жи вәшарти нә.

10. Һьнә тʹәлькед кӧ гәрәке әм хԝә жь ван хԝәй кьн, чь нә?

¹⁰ Һьнә тʹәлькед кӧ гәрәке әм хԝә жь ԝан дур бьгьрьн әԝ ьн: Флирт, хԝарьн у вәхԝарьна зедә, готьнед кӧ дьла бьриндар дькьн йан жи ньһерʹандьна зордарийе, порнографийайе у тьштед мина ԝе (Зәбур 101:3). Дьжмьне мә Мире-щьна һәр гав мәщала дьгәрʹә, ԝәки зьраре бьдә достийа мә тʹәви Йаһоԝа (1 Пәтрус 5:8). Һәрге әм һаш хԝә тʹӧнә бьн, Мире-щьна дькарә тʹохьмед һʹәвсудийе, ԛәлпийе, тьмайе, кʹин у нәфрʹәте, ԛӧрʹәбун у хәйде, һʹьш у дьле мәда бьчинә (Галати 5:19-21). Серида, дьԛәԝьмә әв фькьр у хԝәстьн нә гәләк ԛәԝи бьн. Ле һәрге әм ԝана зу кʹокева рʹанәкьн, әԝе мина шинкайа жәʹрдадайи шин бьн у зьраре бьдьнә мә (Аԛуб 1:14, 15).

11. Әм гәрәке хԝә жь кʹижан тʹәлькед вәшарти дур бьгьрьн у чьрʹа?

¹¹ Һәвалтийа хьраб тʹәлькәкә вәшарти йә. Ве мәсәле бьдә бәр чʹәʹве хԝә. Тӧ тʹәви кәсәки дьхәбьти, йе кӧ Шәʹде Йаһоԝа нинә. Тӧ дьхԝази ԝәки әв һәвалхәбатчийе тә дәрһәԛа Шәʹдед Йаһоԝа хьраб нәфькьрә. Ләма жи тӧ жерʹа ԛәнщ у һʹәйф и. Дьԛәԝьмә һун щар-щара тʹәвайи хԝарьне дьхԝьн. Ԝәʹдә шунда, әв йәк ԝәрʹа дьбә ида хәйсәт. Щарна, хәбәрдан дәрһәԛа тьштед бенамус дьчә. Серида, тӧ ӧса дьки, ԝәки хәбәрданед ӧса пьшт гӧһе хԝәва бавежи. Паше, гӧһе тә һини хәбәрдана ԝи дьбә у тӧ ԛә сәр хәбәрдана ԝи әʹщьз наби. Рʹожәке, һәвалхәбатчийе тә дьхԝазә еваре тʹәви тә тьштәки вәхԝә у тӧ ԛайил дьби. Һеди-һеди, фькьред тә дьбьн мина фькьред ԝи. Зу йан дәрәнг, рʹабун у рʹуньштьна тә ԝе бьбә мина йа һәвалхәбатчийе тә. Һәмьки, әм ԛәдьре һәр кәси дьгьрьн у ԝанрʹа ԛәнщ ьн. Ле гәрәке әм ве йәке бир нәкьн: Кәсед кӧ әм ԝәʹде хԝә тʹәви ԝан дәрбаз дькьн, дькарьн гәләк сәр мә һʹӧкӧм кьн (1 Корьнтʹи 15:33). Һәрге әм ль гора ширәта Иса һаш жь хԝә һәбьн, әме тʹәви кәсед ӧса һәвалтийе нәкьн, чьмки әԝ ль гора ԛанун у принсипед Йаһоԝа Хԝәде намәшьн (2 Корьнтʹи 6:15). Әм гәрәке пешда тʹәльк у хофе тедәрхьн у хԝә жь ван дур бьгьрьн.

ԜӘʹДЕ ХԜӘ БЬ ЩУРʹЕ ҺӘРИ БАШ БЬДӘ ХӘБАТЕ

12. Гава шагьртед Иса һивийа ахьрийе бун, ԝана чь дькьр?

¹² Гава шагьртед Иса һивийа ԝеранкьрьна Оршәлим у пʹарьстгәһе бун, Иса дьхԝәст ԝәки әԝана шьхӧләки бькьн. Әԝи ԝанрʹа готьбу кӧ гәрәке әԝана мьзгинийе «Оршәлимеда гьрти тʹәмамийа Щьһустане, Самәрйайе у һʹәта сәре дьне жи» бәла бькьн (Кʹаред Шандийа 1:6-8). Бь рʹасти жи, әв шьхӧл, шьхӧләки гәләк мәзьн ә! Жь бо ве йәке кӧ ԝана шьхӧле хԝә бь дьл у щан дькьр, ԝана ԝәʹде хԝә бь щурʹе һәри баш дьда хәбате.

13. Чьрʹа әм гәрәке ԝәʹде хԝә бь щурʹе һәри баш бьдьнә хәбате? (Колоси 4:5)

¹³ Бьхунә Колоси 4:5. Сәва кӧ әм мьԛати хԝә бьн, гәрәке әм бьфькьрьн кӧ әм ԝәʹде хԝә чаԝа дәрбаз дькьн. Тьштед хьраб дькарьн бенә сәре һәр кәси (Ԝаиз 9:11). Мәсәлә, ньшкева әм дькарьн жийина хԝә ӧнда кьн.

14-15. Әм чаԝа дькарьн ԝәʹде хԝә бь щурʹе һәри баш бьдьнә хәбате? (Ибрани 6:11, 12) (Бьньһерʹә ӧса жи шькьл.)

¹⁴ Һәрге әм ль гора хԝәстьна Йаһоԝа һәрәкʹәт бькьн у достийа хԝә тʹәви ԝи дьһа ԛәԝи кьн, әме ԝәʹде хԝә бь щурʹе һәри баш бьдьнә хәбате (Йуһʹәнна 14:21). Гәрәке әм «ԛәԝин бьминьн, жь щийе хԝә нәһʹәжьн, һәр гав шьхӧле Хӧданда пешда һәрʹьн» (1 Корьнтʹи 15:58). Паше, гава хьлазийа жийина мә йан жи хьлазийа ве дьнйа хьраб бе, әме нәбежьн: «Хԝәзи мьн дьһа зедә Йаһоԝарʹа хьзмәт кьра» (Мәтта 24:13; Рʹомайи 14:8).

¹⁵ Иро, Иса рʹебәрийа шагьртед хԝә дькә, ԝәки әԝана мьзгинийа Пʹадшатийа Хԝәде һʹәму дәра бәла кьн. Бь сайа тʹәшкиләта Йаһоԝа, Иса мә һин дькә у һащәтед лазьм дьдә мә, ԝәки әм мьзгинийе бәла кьн (Мәтта 28:18-20). Әм дьхԝазьн гӧрʹа Иса бькьн, ләма жи әм мьзгинийе бь дьл у щан бәла дькьн у мәрьва һин дькьн. Ӧса жи, һʹәта кӧ Йаһоԝа хьлазийа ве дьнйа хьраб бинә, әм дьхԝазьн һʹьшйар бьминьн. Һәрге әм ширәта жь Ибрани 6:11, 12 биньн сери, әме «һʹәта хьлазийе» һевийа хԝә ӧнда нәкьн (Бьхунә).

16. Әм дьхԝазьн бь дьл у щан чь бькьн?

¹⁶ Йаһоԝа ида рʹож кʹьфш кьрийә кӧ кʹәнге дьнйа Мире-щьна ԛьрʹ кә. Гава әԝ рʹож бе, Йаһоԝа ԝе һʹәму созед хԝә бинә сери. Дьбәкә әм щарна дьфькьрьн кӧ хьлазийа ве дьнйайе дәрәнги дькʹәвә. Ле рʹожа Йаһоԝа ‹ԝе дәрәнг нәминә› (Һәбаԛуԛ 2:3, ИМ). Һʹәта һьнге, әм дьхԝазьн бь дьл у щан у бь сәбьр «һивийа Хԝәде хьлазкʹаре хԝә» бьн (Миха 7:7, ДТʹ).