Баԝәрийа Һьндава Йаһоԝа Дьле Мьн Рʹьһʹәт Дькә

ЙАҺОԜА НАС ДЬКЬМ У БАԜӘРИЙА ХԜӘ ԜИ ТИНЬМ

Әз сала 1948-да ль Нижәрйайе гӧндәки бьчʹукда һатьмә буйине. Ԝе дәме апе мьн Мустафа у паше бьре мьни мәзьн Ԝаһаби, бунә Шәʹдед Йаһоԝа. Гава әз нәһ сали бум, баве мьн мьр. Әз гәләк хәмгин бум. Ԝаһаби мьнрʹа гот кӧ рʹожәке, баве мә ԝе жь мьрьне рʹабә у әме ԝи диса бьвиньн. Әв готьнед хԝәш сәр мьн ӧса һʹӧкӧм бун, кӧ мьн һинбуна Кʹьтеба Пироз дәстпекьр. Әз сала 1963-да һатьмә ньхӧмандьне. Паше се бьред мьни дьн жи һатьнә ньхӧмандьне.

Сала 1965-да, әз чумә бажаре Лагосе щәм бьре хԝә Ԝилсон. Ԝедәре, мьн гәләк щар тʹәви пешәнгед һәртʹьм йед щьвата Игбобийе ԝәʹдә дәрбаз дькьр. Хирәт у шабуна ԝан әз һелан кьрьм, ԝәки бьбьмә пешәнг. Ләма жи мәһа Чьләйе, сала 1968-да, мьн жи хьзмәтийа пешәнгти дәстпекьр.

Ль бакӧра Нижәрйайе пешәнгед мәхсус гәләк лазьм бун. Ләма жи бьраки бь наве Алберт Олугбеби, йе кӧ ль Бәйтʹәле хьзмәт дькьр, бона мә щаһьла щьвинәкә мәхсус саз кьр у бәʹса ве һʹәԝщәтийе кьр. Готьнед ԝи һʹәта ньһа бира мьнда ньн: «Һун щаһьл ьн у дькарьн ԝәʹдә у ԛәԝата хԝә бона Йаһоԝа бьдьнә хәбате. Бона ԝә гәләк шьхӧл һәйә!» Әз мина Ишайа пʹехәмбәр бь дьл у щан һазьр бум, кӧ ль гора хԝәстьна Йаһоԝа бьжим, ләма жи мьн бланка бона пешәнгтийа мәхсус тʹьжә кьр (Ишайа 6:8).

Мәһа Гӧлане, сала 1968-да, әз чаԝа пешәнге мәхсус һатьмә шандьне ль бажаре Канойе, ль бакӧра Нижәрйайе. Ԝе дәме Шәрʹе Бийафрайе (1967-1970) ԝе һәремеда бьбу сәбәбе еш у мьрьне, у паше әԝ шәрʹ дәрбази ль рʹоһьлата Нижәрйайе бу. Бьраки бь нета ԛәнщ дьхԝәст рʹийа мьн бьгьрә, сәва кӧ әз нәчьмә ԝедәре. Ле мьн ԝирʹа гот: «Зәʹф рʹази мә кӧ тӧ бона мьн хәм дьки. Ле һәрге Йаһоԝа дьхԝазә ԝәки әз ԝедәре жерʹа хьзмәт кьм, бе шьк әԝе тʹәви мьн бә».

ДӘМА ШӘРʹ ДЬЧУ МЬН ХԜӘ ДЬСПАРТӘ ЙАҺОԜА

Һʹале бажаре Канойе гәләк хьраб бу. Жь бо шәрʹ, әв бажар ԝеран бьбу. Щарна хьзмәтийеда мә щьнйазед ԝан мәрьва дьдит, йед кӧ шәрʹда һатьбун кӧштьне. Бәре ль бажаре Канойе чәнд щьват һәбун, ле һʹәчʹи зәʹф хушк-бьра рʹәвийа бун. Панздәһ мьзгинвана кемтьр мабун, у әԝана жи гәләк дьтьрсийан у дьлтәнг дьбун. Гава әз у 5 пешәнгед мәхсус чунә ԝедәре, әԝана гәләк ша бун. Мә ԝана һелан кьр у дьле ԝан рʹьһʹәт бу. Мә али ԝан кьр, ԝәки әԝана диса дәркʹәвьн хьзмәтийе, һәрʹьн щьвата у ӧса жи дәстпекьн һʹәсабед хьзмәтийе у сьфарʹәшед бона әʹдәбйәта бьшиньн филиале.

Мә пешәнгед мәхсус, һинбуна зьмане Һауса дәстпекьр. Гава мәрьва мьзгини сәр зьмане хԝә дьбьһистьн, гәләк щар ԝана гӧһ дьданә мә. Ле әндәмед религийәкә навдар әм һʹәз нәдькьрьн, ләма жи лазьм бу кӧ әм һаш жь хԝә һәбуна у фәсал буна. Щарәке, мерәк пе кʹере пәй мә кʹәт. Әм зу рʹәвийан у әԝ нәгьһиштә мә. Шькьр Хԝәдерʹа! Ԝәʹде дәрәщед хоф жи Йаһоԝа әм хԝәй дькьрьн, у мьзгинван зедә дьбун (Зәбур 4:8). Иро, 11 щьватед Канойеда 500 мьзгинвана зедәтьр һәнә.

МЬԚАБЬЛИБУНА НИЖӘРЕДА

Әз тʹәне чәнд мәһа ль Канойе мам, паше мәһа Тʹәбахе, сала 1968-да, тʹәшкиләте әз у дӧ пешәнгед мәхсус шандьн Нийамейе, пʹайтʹәхта Кʹомара Нижәре. Ԝәʹдәки кьнда, мә тедәрхьст ԝәки Нижәр бь рʹасти жи ԝәлатәки гәләк гәрм ә. Лазьм бу кӧ әм һьм һини һәԝайе бьн, һьм жи зьмане фәрми, демәк Франси һин бьн. Рʹаст ә әв тьшт нә һеса бун, ле мә хԝә спартә Йаһоԝа у ль пʹайтʹәхте, тʹәви чәнд мьзгинванед һәреме дәстпекьр хьзмәт кьн. Ԝәʹдәки кьнда, мә кʹьтеба бона һинбуна Кʹьтеба Пироз бь наве Рʹастийа кӧ Дьбә бәрбь Жийина Һʹәта-Һʹәтайе, бьнәлийед Нийамейерʹа бәла кьр. У һәр кәсе кӧ дькарьбу бьхԝәнда, әв кʹьтеб станд. Һьнә мәрьва жи әм дьгәрʹийан у әв кʹьтеб жь мә дьхԝәстьн!

Паши дәмәкә кьн, мә фәʹм кьр, кӧ сәрԝеред дәԝләте Шәʹдед Йаһоԝа һʹәз нәдькьрьн. Мәһа Тирмәһе, сала 1969-да, ль ԝи ԝәлати щьвата мәзьнә пешьн дәрбаз бу у ԝәкә 20 мәрьв һатьбун. Әм бь дьл у щан һивийа ньхӧмандьна дӧ мьзгинванед тʹәзә бун. Ле рʹожа пешьнә щьвата мәзьн, полис һатьн у бәрнамә данә сәкьнандьне. Ԝана пешәнгед мәхсус у бәрпьрсийаре мьһале бьрьн полисхане. Паши пьрсдайине, ԝана фәрман да, ԝәки әм рʹожа дьн диса бенә полисхане. Гава мә фәʹм кьр кӧ полис дьхԝазьн бона мә проблема чекьн, мә организә кьр ԝәки готара ньхӧмандьне мала кәсәкида бе хԝәндьне у дьзикава әԝ мьзгинванед тʹәзә чʹәмәкида ньхӧмандьн.

Паши чәнд һʹәфтийа, дәԝләте фәрман да, ԝәки әз у пенщ пешәнгед мәхсус жь ԝәлат дәркʹәвьн. Бона ве йәке, ԝана тʹәне 48 сьһʹәт данә мә, у гәрәке мә әв йәк кʹисе хԝә бькьра. Әм рʹастә-рʹаст чунә филиала ль Нижәрйайе. Ԝедәре мә кʹьфшкьрьнед тʹәзә станд.

Мә шандьнә гӧндәки Нижәрйайе бь наве Орисунбаре. Ԝедәре кʹомәкә бьчʹук йа мьзгинвана һәбу у хәлԛе дьхԝәст рʹийа рʹастийе нас бькьн. Ле паши шәш мәһа, филиале хԝәст ԝәки әз тʹәне вәгәрʹьм Нижәре. Пешийе әз әʹщебмайи мам у тьрсийам, ле паше мьн бь шабуне хԝәст ԝәки хушк-бьред ль Нижәре диса бьвиньм!

Әз вәгәрʹийамә Нийамейе. Паши рʹожәке, базьрганәки Нижәрйайи фәʹм кьр кӧ әз Шәʹде Йаһоԝа мә, у әԝи дәрһәԛа Кʹьтеба Пироз гәләк тьшт жь мьн пьрси. Мьн тʹәви ԝи һинбуна Кʹьтеб Пироз дәстпекьр. Паши кӧ әԝи кʹьшандьна щьхаре у ичкәвәхԝарьна зедә тʹәрк да, әԝ һатә ньхӧмандьне. Паши ве йәке, мьн гәләк һәремед Нижәреда хьзмәт дькьр у гәләк сал дьдит, кӧ мәрьв чаԝа рʹастийе ԛәбул дькьн. Чахе әз тʹәзә һатьм, ԝедәре тʹәне 31 Шәʹдед Йаһоԝа һәбун, ле чахе әз жь ԝедәре чум, һәжмара ԝан гьһиштә 69.

«ӘМ ҺАШ ЖЬ ХУШК-БЬРЕД ГИНӘЙАЙЕДА ТʹӦНӘ НӘ»

Хьлазийа сала 1977, әз бона һинбуне вәгәрʹийамә Нижәрйайе. Хьлазийа ве һинбуна се һʹәфтийе, координаторе Комитейа Филиале, бьре Малколм Виго, нәʹмәкә жь Филиала Сиерра-Леоне да мьн. Ԝана бьраки сьһʹәт-ԛәԝат у нәзәԝьщи дьгәрʹийа, йе кӧ бь зьмане Инглизи у Франси хәбәр дьдә, ԝәки әԝ ча бәрпьрсийаре мьһале Гинәйайеда хьзмәт бькә. Бьре Виго мьнрʹа гот, ԝәки әз бона ве кʹьшфкьрьне һатьмә һинкьрьне. Әԝи да кʹьфше, ԝәки әва кʹьфшкьрьнәкә һеса нинә. Әԝи ширәтәкә ӧса да мьн: «Пешийе бьфькьрә у паше сафи кә». Мьн дәрберʹа щаб да у гот: «Йаһоԝа мьн дьшинә ԝедәре, ләма жи әзе һәрʹьм».

Әз бь тәйаре чумә Сиерра-Леонейе у мьн бьред жь филиале дитьн. Әндәмәки Комитейа Филиале мьнрʹа ӧса гот: «Әм һаш жь хушк-бьред Гинәйайеда тʹӧнә нә. Әм ньзаньн әԝана чаԝа хьзмәт дькьн». Рʹаст ә әв филиал щабдар бу бона шьхӧле бәлакьрьна мьзгинийе Гинәйеда, теклибуна тʹәви мьзгинвана нәдьһатә стандьне, чьмки ԝедәре алийе политикида һʹал хьраб бу. Филиале чьԛас щар бьрак дьгәрʹийа ԝәки бьшинә Гинәйе, һаԛас щар әв йәк нәдьһатә стандьне. Ләма жь мьн һатә хԝәстьне ԝәки әз һәрʹьм ль пʹайтʹәхта Гинәйе, бажаре Конакрийе у изьне жь дәԝләте бьстиньм, ԝәки ԝедәре бьминьм.

Гава әз гьһиштьмә Конакрийе, әз чумә консулхана Нижәрйайе. У мьн консулрʹа гот, кӧ әз дьхԝазьм мьзгинийе ль Гинәйе бәла кьм. Әԝи ширәт да мьн, ԝәки әз ԝедәре нәминьн, чьмки хоф һәбу кӧ әзе бемә гьртьне йан жи зийане бьстиньм. Әԝи гот: «Вәгәрʹә Нижәрйайе у ԝедәре мьзгинийе бәла кә». Мьн гот: «Әз дьхԝазьм вьра бьминьм». Ләма әԝи нәʹмәк Ԝәзире Гинәйерʹа ньвиси у әԝи ԝәзири али мьн кьр.

Һьнә ԝәхт шунда, әз вәгәрʹийамә филиала Сиерра-Леоне у мьн дәрһәԛа сафикьрьна ԝи ԝәзири ԝанрʹа гот. Гава бьра бьһистьн кӧ Йаһоԝа ча рʹеԝитийа мьн кʹәрәм кьрийә, әԝана гәләк ша бун. Мьн жь дәԝләте изьн станд ԝәки Гинәйеда бьминьм!

Жь сала 1978 һʹәта 1989, мьн ча бәрпьрсийаре мьһале Гинәйеда у Сиерра-Леонейеда хьзмәт дькьр, у ча аликʹарчийе бәрпьрсийаре мьһале Либәрйайеда хьзмәт дькьр. Дәстпекеда, әз гәләк щар нәхԝәш дькʹәтьм. Әв йәк щарна ль һәремед дур дьԛәԝьми. Ле хушк-бьра чь жь дәсте ԝан дьһат, дькьрьн кӧ мьн бьвьнә нәхԝәшхане.

Щарәке, әз бь маларйайе гьран нәхԝәш кʹәтьм у зьке мьнда кӧрм һәбун. Паши кӧ әз һьнәки ԛәнщ бум, мьн бьһист ԝәки гава әз гәләк нәхԝәш бун, бьра тʹьре әзе бьмьрьм у дьфькьрин һәла мьн кʹидәре чʹәʹл кьн! Бәр мьрьне жи, фькьра кӧ әз кʹьфшкьрьна хԝә бьһельм, һʹьше мьнрʹа жи дәрбаз нәдьбу. У әз һе баԝәр бум ԝәки тʹәне Йаһоԝа дькарә мә хԝәй кә у һәла һе жь мьрьне жи рʹакә.

ӘЗ У ЖЬНА МЬН ИТʹБАРИЙА ХԜӘ ЙАҺОԜА ТИНЬН

Сала 1988-да, мьн Дорка нас кьр. Әв хушка пешәнг гәләки Йаһоԝа һʹәз дькә у зәʹф мьлук ә. Әм зәԝьщин, у мә тʹәвайи шьхӧле бәрпьрсийартийеда кʹар дькьр. Дорка кʹӧлфәтәкә гәләк дьлован ә, у һазьр ә гәләк тьшт бона Йаһоԝа ԛӧрбан кә. Жь щьватәке һʹәта щьватәкә дьн, әм гәләк щар бь чәнтʹед хԝә 25 километра дьчун. Бона щьватед һе дур, мә һәр щурʹе транспорт дьда хәбате, ԝәки сәр рʹийед һʹәрʹи у чʹәʹл-кʹоррʹа һәрʹьн.

Дорка гәләк мерхас ә. Мәсәлә, щарна әм гәрәке чʹәмед ӧсарʹа дәрбаз буна, кʹижанада тʹьжә тимсәһ (крокодил) һәбун. Рʹеԝитикә пенщ рʹожида, әм мәщбур бун кӧ ԛәйике бьдьнә хәбате, чьмки пʹьред жь дар йед ль сәр чʹем, шькәсти бун. Чахе Дорка жь ԛәйике пәйа дьбу, әԝ кʹәтә ава кʹур. Мә совәкʹари ньзаньбу у чʹәмда тимсәһ һәбун. Ча баш ә кӧ һьнә щаһьла хԝә авитьнә аве у әԝ хьлаз кьрьн. Чәндәке, мә дәрһәԛа ве ԛәԝьмандьне хәԝнед хьраб дьдитьн, ле диса жи мә хьзмәтийа хԝә бәрдәԝам дькьр.

Дәстпека сала 1992-да, гава әм пеһʹәсийан кӧ Дорка һʹәмлә йә, әм гәләк әʹщебмайи ман. Гәло һʹәԝщә бу кӧ әм ньһа хьзмәтийа хԝәйә ча пешәнгед мәхсус бәрдәԝам кьн? Мә һәврʹа дьгот: «Йаһоԝа әм кʹәрәм кьрьнә!» Ләма жи мә сафи кьр ԝәки наве кәчʹа хԝә дайньн Йаһгифт (кӧ бь зьмане Ингьлизи те һʹәсабе «пʹешкʹеша жь Йаһ»). Чар сал шунда паши буйина Йаһгифте, бьре ԝе Ерик һатә буйине. Һәр дӧ зарʹед мә бь рʹасти жи пʹешкʹешед жь Йаһоԝа нә. Йаһгифте һьнә ԝәʹдә офиса ԝәлгәрʹандьнеда ль Конакрийе хьзмәт дькьр, у Ерик жи бәрдәстийе щьвате йә.

Сәва кӧ жьна мьн, зарʹед мә мәзьн кьра, лазьм бу кӧ әԝ хьзмәтийа хԝәйә ча пешәнга мәхсус бьда сәкьнандьне. Ле йәкә әԝе ча пешәнга һәртʹьм хьзмәт дькьр. Бь аликʹарийа Йаһоԝа, мьн хьзмәтийа хԝәйә ча пешәнге мәхсус бәрдәԝам дькьр. Чахе зарʹед мә мәзьн бун, Доркайе диса дәстпекьр ча пешәнга мәхсус хьзмәт кә. Иро әм һәр дӧ жи ча мисйонер ль дәшта Конакрийе хьзмәт дькьн.

ЙАҺОԜА МӘ ДЬПʹАРЕЗӘ

Йаһоԝа әз дьшандьмә кʹидәре, әз дьчумә ԝедәре. Мьн тʹәви жьна хԝә гәләк щара дьдит, кӧ чаԝа Йаһоԝа мә дьпарезә у кʹәрәм дькә. Мә хԝә нәдьспартә тьштед материали, ле баԝәрийа хԝә Йаһоԝа дьани, бь сайа чь жи әм жь гәләк хәм у дәрда һатьнә пʹарастьне. Әз у Дорка жь сәрһатийед хԝә һин бун, кӧ Йаһоԝа «Хԝәдайе Хьлазийа мә» йә, ләма дьле мә һәртʹьм рʹьһʹәт ә (1 Дирок 16:35). Әз ве йәкеда баԝәр ьм: Хԝәде ԝе һәр кәсе кӧ хԝә дьсперә ԝи, бьпʹарезә (1 Самуйел 25:29).