Рʹӧһʹанида Гьһишти бьн

1. Хԝәстьна Йаһоԝа чь йә?

ГАВА зарʹ те буйине, де-баве ԝи гәләк ша дьбьн. Ле диса жи, әԝана нахԝазьн кӧ зарʹа ԝан һәртʹьм бьчʹук бьминә. Һәрге зарʹ мәзьн нәбуйа, әԝана ԝе хәмгин буна. Мина ве йәке, гава әм тʹәзә дәстпедькьн пәй Иса һәрʹьн, Йаһоԝа гәләк ша дьбә, ле әԝ нахԝазә кӧ әм нава рʹастийеда ча зарʹ бьминьн (1 Корьнтʹи 3:1). Әԝ дьхԝазә кӧ әм бьбьнә мәрьвнә «гьһишти» (1 Корьнтʹи 14:20).

2. Ве готареда әме чь шеԝьр кьн?

² Гәло чь те һʹәсабе бьбьнә мәрьвнә рʹӧһʹанида гьһишти? Әм ча дькарьн бәрбь гьһиштибуне һәрʹьн? Сәва кӧ рʹӧһʹанида пешда һәрʹьн, чьрʹа лазьм ә кӧ әм рʹастийед Кʹьтеба Пироз кʹур лекʹолин бькьн? Чьрʹа әм гәрәке бь зедәйи хԝәда баԝәр нибьн? Ве готареда әме щабед ван пьрса бьстиньн.

ЧЬ ТЕ ҺʹӘСАБЕ РʹӦҺʹАНИДА ГЬҺИШТИ БЬН?

3. Гәло чь те һʹәсабе бьбьнә мәрьвнә рʹӧһʹанида гьһишти?

³ Хәбәра Йунани, йа кӧ Кʹьтеба Пирозда һатийә ԝәлгәрʹандьне ча «гьһишти», һьндава кәсед кʹамьл йан кәсед мәзьн, демәк кәсед кӧ ида зарʹ ниньн, те хәбьтандьнеa (1 Корьнтʹи 2:6). Чахе әм рʹӧһʹанида ида зарʹ ниньн, достийа мә тʹәви Йаһоԝа дьһа ԛәԝи дьбә у әм дьбьнә мәрьвнә гьһишти. Гава әм бьгьһижьнә ве нете, һәмьки лазьм ә, кӧ әм щида нәсәкьньн, ле бәрдәԝам бькьн пешда һәрʹьн (1 Тимотʹейо 4:15). Һәрге тӧ һе щаһьл и жи, тӧ дькари рʹӧһʹанида бьби мәрьвәки гьһишти. Гәло ча те кʹьфше һәла мәрьв рʹӧһʹанида гьһишти йә, йан на?

4. Мәрьве рʹӧһʹанида гьһишти йәки чаԝа йә?

⁴ Мәрьве рʹӧһʹанида гьһишти ль гора хԝәстьна хԝә һәрәкʹәт накә, ле һәртʹьм гӧһ дьдә Йаһоԝа. Һәмьки әԝ мәрьв диса жи ԛьсурдар ә у щарна шашийа дькә, ле әԝ бь рʹабун-рʹуньштьна хԝә нишан дькә, кӧ фькьр у кьред ԝи ль гора хԝәстьна Хԝәде нә. Әԝи нав хԝәда гӧһастьн кьрийә у хирәт дькә, кӧ ньһерʹандьнед ԝи сәр һʹиме ньһерʹандьнед Хԝәде бьн (Әфәси 4:22-24). Әԝи хԝәрʹа кьрийә хәйсәт, ԝәки ль гора принсипед Йаһоԝа сафикьрьнед баш бькә, ләма жерʹа нәлазьм ә, кӧ бона һәр гавед ԝи ԛанун ньвисар бьн. Гава әԝ сафикьрьна дькә, әԝ һәр тьшти дькә, ԝәки ль гора ван сафикьрьнед хԝә һәрәкʹәт бькә (1 Корьнтʹи 9:26, 27).

5. Чьрʹа нәбаш ә, кӧ мәрьв рʹӧһʹанида ча зарʹок бьминә? (Әфәси 4:14, 15)

⁵ Жь алийе дьнва жи, мәрьве кӧ рʹӧһʹанида ча зарʹок дьминә, һеса дькарә бькʹәвә бәр байе һинкьрьнед дәрәԝ, йед кӧ рʹабәр нучәйада бәла дькьнb (Бьхунә Әфәси 4:14, 15). Мәрьве ӧса дькарә бьбә йәки һʹәвсуд, шәрʹуд йан жи хәйдок у чахе әԝ те щерʹьбандьне, әԝ зу шашийа дькә (1 Корьнтʹи 3:3).

6. Гьһиштибуна рʹӧһʹани бәрамбәри чь дьбә? (Бьньһерʹә ӧса жи шькьл.)

⁶ Ча мә жоре гот, Кʹьтеба Пирозда гьһиштибуна рʹӧһʹани бәрамбәри гьһиштибуна зарʹа дьбә. Зарʹ гәләк тьшта ньзаньн, ләма жи лазьм ә кӧ мәзьн ԝана бьпʹарезьн у рʹебәрийа ԝан бькьн. Мәсәлә, де дьбежә ԛиза хԝәйә бьчʹук кӧ дәсте ԝе бьгьрә, гава әԝана рʹе дәрбаз дьбьн. Чахе кәчʹьк мәзьн дьбә, дьбәкә дайик ида изьне бьде, ԝәки әԝ тʹәне рʹе дәрбаз бә. Диса жи, әԝе жерʹа бежә, кӧ әԝ фәсал бә у рʹьнд дина хԝә бьдә рʹе чахе дәрбаз бьбә. Чьԛас кәчʹьк мәзьн дьбә, һаԛас әԝ дьһа баш занә кӧ ча дәрәщед ӧсада фәсал бә. Чаԝа кӧ аликʹарийа мәзьна лазьм ә, кӧ зарʹ жь тьштед хоф хԝәйкьри бә, Мәсиһийед нәгьһишти жи һʹәԝще аликʹарийа кәсед гьһишти нә, ԝәки әԝана хԝә жь тьштед кӧ дькарьн достийа ԝана тʹәви Йаһоԝа хьраб кьн, дур бьгьрьн у сафикьрьнед баш бькьн. Жь алийе дьнва жи, гава кәсе рʹӧһʹанида гьһишти тьштәки сафи дькә, әԝ сәр принсипед Кʹьтеба Пироз дьфькьрә у тедәрдьхә, һәла ньһерʹандьна Йаһоԝа чь йә. Паше әԝ ль гора ван принсипа һәрәкʹәт дькә.

7. Гәло кәсед гьһишти һʹәԝще аликʹарийе нә?

⁷ Гәло әв йәк те һʹәсабе, кӧ кәсед рʹӧһʹанида гьһиштирʹа ԛә аликʹари нәлазьм ә? Һәмьки на. Кәсед рʹӧһʹанида гьһишти жи щарна һʹәԝще аликʹарийе нә. Диса жи ортʹа кәсед гьһишти у нәгьһиштида фьрԛи һәйә. Мәрьве рʹӧһʹанида нәгьһишти, дьԛәԝьмә һивийе йә, кӧ кәсед дьн дәԝса ԝи сафикьрьна бькьн, йан жи жерʹа бежьн кӧ гәрәке әԝ чь бькә. Ле мәрьве рʹӧһʹанида гьһишти, гава жь кәсед билан у щерʹьбанди аликʹарийе дьхԝазә, диса жи әԝ занә кӧ гәрәке һәр кәс «баре хԝә һьлгьрә», демәк хԝәха сафикьрьна бькә (Галати 6:5, ИМ).

8. Кәсед гьһишти чьда жь һәв щӧдә дьбьн?

⁸ Чаԝа кӧ рʹува мәрьв жь һәв щӧдә дьбьн, ӧса жи мәрьвед рʹӧһʹанида гьһишти жь һәв щӧдә дьбьн, мәсәлә һʹӧнӧред ӧсада ча билани, мерхаси, мәрʹдани у дьловани. Хенщи ве йәке, гава дӧ мәрьвед рʹӧһʹанида гьһишти рʹасти дәрәщәке тен, дьбәкә сафикьрьнед ԝан жь һәв щӧдә бьн, ле диса жи сәр һʹиме Кʹьтеба Пироз бьн, илаһи гава әԝана ль гора исафа хԝә сафикьрьна дькьн. Ләма жи әԝана һәвдӧ сущдар накьн, ле хирәт дькьн, ԝәки йәктийеда бьминьн (Рʹомайи 14:10; 1 Корьнтʹи 1:10).

ГӘЛО ӘМ ЧА ДЬКАРЬН РʹӦҺʹАНИДА ГЬҺИШТИ БЬН?

9. Һәрге әм ԛәԝате нәдьнә хәбате, гәло әме бькарьбьн рʹӧһʹанида бьгьһижьн?

⁹ Һәмьки, чьԛас ԝәʹдә дәрбаз дьбә, зарʹ һаԛас мәзьн дьбә, ле һәләԛәтийа мә тʹәви Йаһоԝа хԝәха ԛәԝи набә, чьмки бона ве йәке әм гәрәке ԛәԝате бьдьнә хәбате. Мәсәлә, хушк-бьред жь бажаре Корьнтʹе мьзгинийа хере ԛәбул кьрьн, һатьнә ньхӧмандьне, рʹӧһʹе пироз стандьн у жь Паԝлосе шанди гәләк тьшт һин бун (Кʹаред Шандийа 18:8-11). Ле диса жи чәнд сал паши ньхӧмандьне, һьнәк жь ԝан мәрьва һәла һе рʹӧһʹанида нәгьһишти бун (1 Корьнтʹи 3:2). Ле әм гәрәке чь бькьн, ԝәки әв йәк нәйе сәре мә?

10. Сәва кӧ әм бьбьнә мәрьвнә гьһишти, әм гәрәке чь бькьн? (Щьһуда 20)

¹⁰ Сәва кӧ әм рʹӧһʹанида бьбьнә мәрьвнә гьһишти, гәрәке хԝәстьна мә һәбә кӧ әм бьгьһижьнә ве нете. Кәсед кӧ ԛәԝате надьнә хәбате ԝәки рʹӧһʹанида пешда һәрʹьн, ԝе рʹӧһʹанида ча зарʹ бьминьн у пешда нәчьн (Мәтʹәлок 1:22). Әм нахԝазьн мина ԝан мәрьва бьн, йед кӧ ида мәзьн бунә, ле диса жи һивийе нә, ԝәки де-баве ԝан дәԝса ԝан сафикьрьна бькьн. Әм дьхԝазьн хԝәха бона рʹӧһʹанийа хԝә щабдар бьн (Бьхунә Щьһуда 20). Һәрге тӧ хирәт дьки ԝәки рʹӧһʹанида гьһишти би, дӧа кә кӧ Йаһоԝа хԝәстьна тә зедә кә у ԛәԝате бьдә тә (Филипи 2:13).

11. Йаһоԝа ча али мә дькә, кӧ әм рʹӧһʹанида гьһишти бьн? (Әфәси 4:11-13)

¹¹ Йаһоԝа занә, сәва кӧ әм рʹӧһʹанида бьгьһижьн, әм һʹәԝще аликʹарийе нә. Рʹуспийед щьвате һазьр ьн али мә бькьн, ԝәки әм «бьбьнә мәрьвед гьһишти», һәләԛәтийа хԝә тʹәви Йаһоԝа ԛәԝи кьн у ве йәкеда чʹәʹв бьдьнә Иса (Бьхунә Әфәси 4:11-13). Йаһоԝа ӧса жи рʹӧһʹе пироз дьдә мә, ԝәки «нет-фькьра Мәсиһ сәре мәда» бә (1 Корьнтʹи 2:14-16). Хенщи ве йәке, Хԝәде чар кʹьтебед Мьзгинийә пешьн дайә мә, ԝәки әм пебьһʹәсьн кӧ Иса ча һин дькьр, ча хәбәр дьда у чь дькьр һʹәта кӧ әԝ сәр әʹрде бу. Һәрге әм чʹәʹв бьдьнә фькьр у кьред Иса, әме бькарьбьн бьбьнә Мәсиһийед гьһишти.

ЛЕКʹОЛИНА КʹУР ФӘРЗ Ә

12. «Һинбунед пешьнә» дәрһәԛа Мәсиһ кʹижан ьн?

¹² Сәва кӧ әм рʹӧһʹанида пешда һәрʹьн, «һинбунед пешьнә» дәрһәԛа Мәсиһ бәс нинә. Һьнә тьштед пешьн кӧ әм һин бунә, әв һәнә тʹобәкьрьн, баԝәри, ньхӧмандьн у сахкьрьна мьрийа (Ибрани 6:1, 2). Һинкьрьнед ӧса һʹиме баԝәрийа мә нә. Ләма жи Пәтрусе шанди Рʹожа Пенщийә Һʹәсабе, мәрьварʹа бәʹса ван тьшта кьр (Кʹаред Шандийа 2:32-35, 38). Сәва кӧ әм бьбьнә шагьртед Иса, әм гәрәке ван һинкьрьнед сәрәкә ԛәбул кьн. Мәсәлә, Паԝлосе шанди готьбу, кӧ һәрге кәсәк һинкьрьна дәрһәԛа рʹабуна мьрийа инкʹар кә, әԝ нькарә бьбә шагьрте Иса Мәсиһ (1 Корьнтʹи 15:12-14). Ле сәва кӧ әм бьбьнә Мәсиһийед гьһишти, бәс нинә кӧ әм тʹәне ван тьшта бьзаньбьн.

13. Әм чаԝа дькарьн жь «хԝарьна гьран», йа кӧ Ибрани 5:14-да ньвисар ә, кʹаре бьстиньн? (Бьньһерʹә ӧса жи шькьл.)

¹³ Хенщи һинбунед сәрәкә жь Кʹьтеба Пироз, әм гәрәке принсипед Йаһоԝа жи бьзаньбьн, ԝәки әм ньһерʹандьна ԝи фәʹм бькьн. Сәва кӧ әм ван принсипа һин бьн, әм гәрәке «хԝарьна гьран» жь Кʹьтеба Пироз һур бь һур лекʹолин кьн, сәр ԝе кʹур бьфькьрьн у ль гора ве йәке бьжин. Бь ви щурʹәйи, әм һин дьбьн сафикьрьнед баш бькьн, йед кӧ Йаһоԝа хԝәш тенc (Бьхунә Ибрани 5:14).

14. Паԝлос ча али Корьнтʹийа кьр, ԝәки әԝана рʹӧһʹанида гьһишти бьн?

¹⁴ Гава лазьм дьбә кӧ ль гора принсипед Кʹьтеба Пироз сафикьрьна бькьн, әв йәк гәләк щар бона мәрьвед рʹӧһʹанида нәгьһишти һеса нинә. Һәрге дәрһәԛа сафикьрьнед ԝан ԛанун тʹӧнә йә, һьнәк дькарьн бьфькьрьн, кӧ изьна ԝан һәйә ль гора дьле хԝә сафикьрьна бькьн. Һьнә мәрьв жи, гава һьнә дәрәщада ԛәйдә нәлазьм ьн, диса жи ԛәйда дәʹԝа дькьн. Мәсәлә, ча те кʹьфше, Мәсиһийед жь бажаре Корьнтʹе хԝәстьн, ԝәки Паԝлос ԝанрʹа рʹастә-рʹаст бежә, һәла әԝана дькарьн хԝарьна кӧ пʹутарʹа һатьбу ԛӧрбанкьрьне бьхԝьн, йан на. Ле дәԝса кӧ ԛәйдәке дайнә, Паԝлос ԝанрʹа гот, кӧ ве дәрәщеда һәр кәс гәрәке ль гора исафа хԝә сафи кә. Әԝи сәр һʹиме принсипа ԝанрʹа зәлал кьр, кӧ һәр кәс ча дькарә ль гора исафа хԝә һәрәкʹәт бькә, ле бона кәсед дьн нәбә кәвьре лькʹӧмандьне (1 Корьнтʹи 8:4, 7-9). Әԝи ԝана һин кьр, кӧ Ньвисаред Пироз бьдьнә хәбате, ԝәки ль гора ве йәке хԝәха сафикьрьна бькьн, нә кӧ ԛәйда дәʹԝа кьн. Бь ви щурʹәйи, Паԝлос али хушк-бьред жь Корьнтʹе кьр, ԝәки әԝана рʹӧһʹанида пешда һәрʹьн.

15. Паԝлос ча али хушк-бьред Ибрани кьр, ԝәки әԝана рʹӧһʹанида пешда һәрʹьн?

¹⁵ Әм жь гьлийед Паԝлос кӧ әԝи Ибранийарʹа ньвиси, дькарьн дәрсәкә фәрз һин бьн. Һьнәк жь ԝан рʹӧһʹанида пешда нәдьчун. Әԝана «һәла һе һʹәԝще шир» бун, нә кӧ һʹәԝще «хԝарьна гьран» (Ибрани 5:12). Әԝана тьштед тʹәзә һин нәдьбун, йед кӧ Йаһоԝа тʹьме бь сайа щьвата ԝана һин дькьр (Мәтʹәлок 4:18). Мәсәлә, ԝәкә 30 сал шунда, чахе Ԛануна Муса сәр һʹиме ԛӧрбанбуна Иса һатьбу бәталкьрьне, гәләк Мәсиһийед Щьһу бәрдәԝам дькьрьн хԝә ль Ԛануна Муса бьгьрьн (Рʹомайи 10:4; Тито 1:10). Бе шьк, 30 сал бәс бу, ԝәки ԝана фәʹм кьра, кӧ әԝана ида гәрәке пәй Ԛануна Муса нәчьн. Нәʹма хԝәйә Ибранийарʹа, Паԝлос һәр тьшт кьр, ԝәки хушк-бьра рʹастийед кʹур, йед кӧ әԝи ԝана һин дькьр, ԛәбул кьн. Бь сайа ве нәʹме, Паԝлос баԝәрийа ԝана дьһа ԛәԝи кьр, ԝәки рʹийа Мәсиһ, рʹийа һәрә бьльнд ә, у али ԝан кьр мерхас бьн у ԝәʹде пәйкʹәтьна жи бәрдәԝам кьн мьзгинийе бәла кьн (Ибрани 10:19-23).

БЬ ЗЕДӘЙИ ХԜӘБАԜӘР НИБӘ

16. Хенщи ве йәке кӧ әм рʹӧһʹанида бьгьһижьн, әм гәрәке чь бькьн?

¹⁶ Гәләк фәрз ә, ԝәки әм нә тʹәне бьбьнә мәрьвнә гьһишти, ле ӧса жи рʹӧһʹанийа хԝә хԝәй кьн. Әм гәрәке фәсал бьн, ԝәки нәфькьрьн кӧ әм ида мәрьвнә рʹӧһʹанида гьһишти нә, у ида нәлазьм ә һәләԛәтийа хԝә тʹәви Йаһоԝа ԛәԝи кьн (1 Корьнтʹи 10:12). Әм гәрәке бәрдәԝам кьн «дьле хԝә бьщерʹьбиньн» у тедәрхьн, һәла әм рʹӧһʹанида пешда дьчьн, йан на (2 Корьнтʹи 13:5).

17. Ль гора нәʹма Колосйарʹа, чьрʹа фәрз ә ԝәки әм мәрьвнә рʹӧһʹанида гьһишти бьминьн?

¹⁷ Нәʹма хԝәйә Колосйарʹа, Паԝлосе шанди диса гот, кӧ гәләк фәрз ә, ԝәки әм мәрьвнә рʹӧһʹанида гьһишти бьминьн. Әԝана чьԛас жи рʹӧһʹанида гьһишти бун, диса жи Паԝлос ԝанрʹа гот, кӧ әԝана нәкʹәвьн бәр байе фькьред дьнйайе (Колоси 2:6-10). Ӧса жи Епарас, йе кӧ ча те кʹьфше хушк-бьред ԝедәре рʹьнд нас дькьр, тʹьме дӧа дькьр ԝәки әԝана «гьһишти мьԛәрʹм сәкьни бьн» (Колоси 4:12). Һьм Паԝлос һьм жи Епарас фәʹм дькьрьн, сәва кӧ кәсәк гьһишти бьминә, әԝ гәрәке хирәт бә у жь Хԝәде аликʹарийе бьстинә. Ԝана дьхԝәст, ԝәки хушк-бьред Колоси нава чәтьнайада жи рʹӧһʹанида гьһишти бьминьн.

18. Чь дькарә бе сәре мәрьве рʹӧһʹанида гьһишти? (Бьньһерʹә ӧса жи шькьл.)

¹⁸ Паԝлос Ибранийарʹа гот, кӧ мәрьве гьһишти жи һәрге фәсал нибә, дькарә һʹәта-һʹәтайе ԛәбулкьрьна Хԝәде ӧнда кә. Дьбәкә дьле кәсәки ӧса һʹьшк бә, кӧ әԝе ида нәхԝазә тʹобә кә у бахшандьна Хԝәде бьстинә. Шькьр кӧ хушк-бьред Ибрани нәкʹәтьбун һʹаләки ӧса (Ибрани 6:4-9). Ле әм чь дькарьн бежьн дәрһәԛа ԝан мәрьва, йед кӧ тʹәрка хьзмәтийе дьдьн, йан жи жь щьвате тенә дәрхьстьне, ле паше тʹобә дькьн? Әв йәк кӧ әԝана бь мьлукти тʹобә дькьн, нишан дькә ԝәки әԝана щӧдә дьбьн жь ԝан мәрьва, дәрһәԛа кʹижана Паԝлос ньвисибу. Ле гава әԝана вәдьгәрʹьн бал Йаһоԝа, әԝана һʹәԝще аликʹарийа ԝи нә (Һәзәԛел 34:15, 16). Ләма жи дьԛәԝьмә рʹуспийед щьвате хушк йан бьраки щерʹьбандирʹа бежьн, ԝәки әԝ али ԝан бькә, кӧ достийа хԝә тʹәви Йаһоԝа тʹәзәда ава кьн.

19. Нета мә гәрәке чь бә?

¹⁹ Һәрге тӧ бь дьл у щан рʹӧһʹанида пешда һәрʹи, тӧйе бьгьһижи нета хԝә! Бәрдәԝам кә рʹастийед кʹур жь Кʹьтеба Пироз һин бә у бьра фькьред тә ль гора фькьред Йаһоԝа бьн. У һәрге тӧ ида рʹӧһʹанида гьһишти йи, чь дәсте тә те бькә, ԝәки бәрдәԝам ки рʹӧһʹанийа хԝә хԝәй ки.