ПЬРСЕД ЩАҺЬЛА
Чаԝа бәр Кӧл-Дәрда Тәйах кьм?
Һәр кәс дькарә рʹасти кӧл-дәрда бе. Кʹьтеба Пироз дьбежә: «Пешбази нә бона мәрьвед кӧ ньгед ԝан ләз ьн у щәнг [шәрʹ] нә бона әʹгида нә . . . жь бәр кӧ ԝәхт у рʹәԝш [ԛәԝьмандьн] пергинийа вана һʹәмуйа дькьн» (Ԝаиз 9:11). Әԝ гьли бона һьнә щаһьла йә жи, йед кӧ рʹасти кӧл-дәрда һатьнә. Ле гәло ԝана ча бәр ԝан кӧл-дәрда тәйах кьрьнә? Ва дӧ мәсәлә.
РЕБЕКА
Гава әз 14 сали бум, де-баве мьн жь һәв ԛәтийан.
Мьн хԝәрʹа дьгот, ԝәки бь рʹасти де-баве мьн жь һәв нәԛәтийанә, у баве мьнрʹа лазьм ә һьнә ԝәʹдә тʹәне бьминә. Әз дьфькьрим, ԝәки баве мьн ԝе жь дийа мьн нәԛәтә, чьмки әԝ ле һʹьз дькә. Чьрʹа әԝи гәрәке әз бьһиштама?
Мьнрʹа чәтьн бу дәрһәԛа ве йәке тʹәви кәсәки хәбәр дьм у мьн хԝә жь һʹәмушка дур дьгьрт. Дьле хԝәда әз һерс дькʹәтьм, ле һьнге мьн нә жи тедәрдьхьст. Жь бо ве йәке дьле мьн нәрʹьһʹәт бу, чьмки хәмгинийева тʹьжә бу, у хәԝ нәдькʹәтә чʹәʹве мьн.
Әз чахе 19 сали бум, дийа мьн жь бо кʹансәре мьр. Әԝ һәваләкә мьнә һәрә незик бу.
Чахе де-баве мьн жь һәв ԛәтийан, әԝ бона мьн дәрдәки мәзьн бу, ле гава дийа мьн мьр, жь ве еше гьрантьр тʹӧ тьшт тʹӧнә бу. Әз һʹәта ньһа һе сәр һʹьше хԝәда нәһатьмә. Мьнрʹа дьһа чәтьн буйә рʹазем, у дьле мьн диса хәмгин ә.
Ле ԝи ԝәʹдәйи тьштед ӧса жи һәбун, йед кӧ гәләк али мьн дькьрьн. Мәсәлә, Мәтʹәлок 18:1-да те готьне, ԝәки хԝә жь мәрьва дур нәгьрьн, у әз сәр хԝә дьхәбьтьм ԝәки ль гора ве ширәте бькьм.
Әз ча Шәʹде Йаһоԝа, әʹдәбйәтед мә кӧ сәр һʹиме Кʹьтеба Пироз ьн дьхуньм, чьмки әԝана дьлбинийе дьдьнә мьн. Мәсәлә, гава де-баве мьн жь һәв ԛәтийан, кʹьтеба Пьрсед Щаһьла у Ширәтед Керһати гәләк али мьн кьр, илаһи сәрик жь Пʹара 2 бь наве «Гәло Әзе бе Де йан бе Бав Малбәта Хԝәда Бәхтәԝар бьм?»
Мәтта 6:25-34 гәләк али мьн кьрьн, ԝәки бь зедәйи хәм нәкьм. Рʹеза 27-да, Иса пьрсе дьдә: «Иди жь ԝә кʹи дькарә бь хәмед хԝә дәԛәке сәр әʹмьре хԝәда зедә кә?»
Бәле, һʹәму мәрьв рʹасти кӧл-дәрда тен, ле мәсәла дийа мьн али мьн кьр фәʹм кьм, кӧ чьԛас фәрз ә бәр ван кӧл-дәрда тәйах кьн. Дийа мьн рʹасти гәләк тәнгасийа һат, мәсәлә баве мьн ле һишт, у паше жи әԝ гьран нәхԝәш кʹәт. Ле диса жи, әԝе ньһерʹандьна хԝәйә позитив ӧнда нәдькьр у баԝәрийа ԝе һьндава Хԝәде һʹәта хьлазийе ԛәԝи ма. Әзе тʹӧ щар бир нәкьм, ча әԝе тʹьме дәрһәԛа Йаһоԝа мьнрʹа гьли дькьр.
Бьфькьрә: Чаԝа хԝәндьна Кʹьтеба Пироз у әʹдәбйәтед сәр һʹиме Кʹьтеба Пироз дькарьн али тә бькьн, ԝәки бәр кӧл-дәрда тәйах ки? (Зәбур 94:19)
КОРДЕЛ
Чахе әз 17 сали бум, мьн пе чʹәʹве хԝә дит ча баве мьн рʹӧһʹе хԝә да. Әԝ дәрдәки гәләк гьран бу бона мьн. Мьн хԝә бечʹарә тʹәхмин дькьр.
Мьн тʹьре баве мьн нә мьрийә, у чахе кʹәфән авитьнә сәр ԝи, мьн тʹьре әԝ баве мьн нинә. Мьн хԝәрʹа дьгот: «Әԝе сьбе һʹьшйар бә». Әз гәләк дьлшкәсти бум.
Әз у малбәта мьн Шәʹдед Йаһоԝа нә, у чахе баве мьн мьр, щьвата мә гәләк бәр дьле мәда дьһат. Ԝана хԝарьн мәрʹа дьанин, дьлбини дьданә мә, у нә тʹәне чәндәке кʹеләка мә бун, ле гәләк ԝәʹдә. Аликʹарийа ԝан бона мьн избатийа ве йәке бу, кӧ Шәʹдед Йаһоԝа Мәсиһийед рʹаст ьн (Йуһʹәнна 13:35).
Гьлийед жь 2 Корьнтʹи 4:17, 18, гәләк әз ԛәԝи кьрьм. Ԝедәре те готьне: «Щәфед мәйә дәм-дәмә сьвьк мә дькьнә хԝәйийе рʹумәта гьранә һʹәта-һʹәтайейә бе һьмбәр. Аԝа әм дина хԝә надьнә тьштед хӧйа дьбьн, ле йед нәхӧйа, чьмки тьштед хӧйа бона ԝәхтәки нә, ле йед нәхӧйа һʹәта-һʹәтайи нә».
Рʹеза 18 гәләк дьле мьн гьрт. Тәнгасийед баве мьн ԝәʹдәлу бун, ле Хԝәде жийина һʹәта-һʹәтайе соз дьдә. Мьрьна баве мьн әз һелан кьрьм, ԝәки бьфькьрьм һәла әз әʹмьре хԝә ча дәрбаз дькьм у чь нета датиньм пешийа хԝә.
Бьфькьрә: Чаԝа кӧл-дәрд дькарьн мә һелан кьн, ԝәки нетед хԝәйә жийине бьгӧһезьн? (1 Йуһʹәнна 2:17)