ПЬРСЕД ЩАҺЬЛА
Гәло Әз Рʹува Ча Темә Хане?
Чьма гәрәке дина хԝә бьдьм кʹьнщхԝәкьрьна хԝә? Чьмки кʹьнщ гәләк тьшт дькарьн дәрһәԛа мәрийа әʹйан кьн. Ле кʹьнщхԝәкьрьна тә, дәрһәԛа тә чь әʹйан дькә?
Се шашийед мәзьн кӧ модева гьредайи нә у ча ԝан шашийа нәкьн
Шашийа #1: Чахе изьн дьди, ԝәки реклама кʹьнщхԝәкьрьна тәда сәр тә һʹӧкӧм кә.
Кәчʹька щаһьл бь наве Тереза дьбежә: «Щар-щара ӧса дьбә ԝәки дина мьн дьчә сәр модайе, чьмки әв йәк гәләк те рекламкьрьне. Чахе тӧ тʹьме дьвини мәрьвед кӧ пәй моде дьчьн, чәтьн ә нәкʹәви бәр байе ԝан у дина хԝә нәди ԝан».
Ле модә нә тʹәне сәр кәчʹька һʹӧкӧм дьбә. Кʹьтебәкеда ӧса тә готьне: «Гәдә жи дькʹәвьнә бәр байе модайе, ләма жь әԝед кӧ реклама моде дькьн, дькарьн һеса сәр ԝан һʹӧкӧм кьн» (The Everything Guide to Raising Adolescent Boys).
Бьжартьна рʹаст. Кʹьтеба Пирозда ӧса те готьне: «Мәрьве сахьке дьле хԝә һәр готьне баԝәр дькә, ле йе аԛьл дина хԝә дьдә гавед хԝә» (Мәтʹәлок 14:15). Әве принсипе һьлдә һʹәсаб у кʹур бьфькьрә дәрһәԛа ве йәке, чь кӧ пе рекламе нишан дькьн. Мәсәлә, һәрге рекламада кʹьнщед тәнг у вәкьри нишан дькьн, пьрсе бьдә хԝә:
Һәрге әз пәй моде һәрʹьм, әв йәк ԝә кʹерʹа кʹаре бинә?
Гава мәрьв мьн бьвиньн, әв йәк дәрһәԛа мьн ԝанарʹа ԝе чь әʹйан кә?
Гәло кʹьнщхԝәкьрьна мьн дьдә кʹьфше, кӧ бь рʹасти әз кʹи мә у хԝә ль кʹижан принсипа дьгьрьм?
Ширәт. Нава һʹәфтийеда дина хԝә бьдә реклама кʹьнщхԝәкьрьне у хәмьландьне, кʹижан кӧ нишан дькьн. Бьфькьрьн әԝ кʹьнщхԝәкьрьн у хәмьландьн бәр бь чь һелан дькьн? Әв реклам надә кʹьфше ԝәки тӧ гәрәке әʹсәйи хԝә ль ве моде бьгьри? Кәчʹька бь наве Карин ӧса дьбежә: «Модә гәләк сәр мәрийа һʹӧкӧм дькә у ԝана һелан дькә, кӧ әԝана кʹьнщед бьһа хԝә кьн у пе кʹьнщхԝәкьрьна хԝә, бәдәна хԝәйә бәдәԝ бьдьнә кʹьфше». Мәрьвед кӧ реклама дькьн, фәʹм дькьн, ԝәки әԝана һеса дькарьн сәр щаһьла һʹӧкӧм кьн.
Шашийа #2: Чахе хԝә ль моде дьгьри, сәва кӧ жь мәрийа щӧдә нәби.
Хортәки бь наве Мануел дьбежә: «Чахе стиләкә кʹьнща моде данә, һьнге һʹәмушк жи пәй ве моде дьчьн. Һәрге тӧ пәй моде начи, тӧ сәва ԝан ча мәрьвәки пашдамайи йи». Кәчʹька бь наве Анна ӧса дьбежә: «Бь рʹасти мәʹни модә нинә, ле әԝ ԝә кӧ жь мәрийа щӧдә нәбьн.
Сафикьрьна рʹаст. Кʹьтеба Пирозда ӧса те готьне: «Нәкʹәвьнә кьрасе бәнде ве дьнйайе» (Рʹомайи 12:2). Әве принсипе һьлдә һʹәсаб, дина хԝә бьдә кʹьнщед хԝә у пьрсе бьдә хԝә:
«Чь һʹӧкӧм дькә сәр бьжартьна кʹьнщхԝәкьрьна мьн?»
«Гәло әз дьфькьрьм ԝәки әʹсәйи гәрәке ԝан кʹьнща хԝә кьм, кʹижане кӧ дизайнеред навдар дәрхьстьнә?»
«Әз пе кʹьнщхԝәкьрьна хԝә дьхԝазьм дина мәрийа бькʹшиньм сәр хԝә?»
Ширәт. Дәԝса бьфькьри ԝәки дӧ бьжартьнед тә һәнә, мәсәлә пәй моде һәри, сәва кӧ мәрьв тә ԛәбул кьн, йан жи жь моде хԝә дур бьгьри у мәрьв ве тʹәрка тә бьдьн, ԝе баш бә тьштәки дьн һьлди һʹәсаб. Чьԛас һе зедә тӧ кʹьнщхԝәкьрьна хԝәда баԝәр би у хԝә рʹьһʹәт тʹәхмин ки, һаԛас һе кем тӧйе бьхԝази ԝе йәкеда пәй мәрийа һәрʹи.
Шашийа #3: Кʹьнщ чьԛас вәкьри бә, һаԛас ве баш бә.
Кәчʹька бь наве Щенифер дьбежә: «Рʹаст бежьм щар-щара хԝәстьна ӧса щәм мьн пешда те, кӧ кʹьнще нәщайиз хԝә кьм. Мәсәлә, гәләк кьн, тәнг, йан жи вәкьри».
Бьжартьна рʹаст. Кʹьтеба Пирозда те готьне: «Бьра хәмьла ԝә дәрвава бь гӧливәгьртьне . . . нибә, ле йа мәрьве һьндӧрʹе дьлда» (1 Пәтрус 3:3, 4). Сәр һʹиме ве принсипе бьфькьрә, бона тә чь дьһа фәрз ә, бәдәԝбуна кʹьнща йан жи бәдәԝбуна дьле мәрийа?
Ширәт. Хәмьландьна тәйи һәри бәдәԝ әԝ мьлуктийа тә йә. Иро әв хәйсәт нав мәрьвада найе ԛимәт кьрьне у бәлабуйи нинә. Ле һәла дәрһәԛа ве йәке бьфькьрә:
Дьԛәԝьмә тӧ рʹасти мәрьвәки ӧса һатьбуйи, кʹижан һʹәчʹи зәʹф тʹәне дәрһәԛа хԝә хәбәр дьда у дина хԝә дьда тʹәне сәр хԝә. Йазьх кӧ мәрьве ӧса, һашпе тʹӧнәйә у ԝи щурʹәйи әԝ мәрийа жь хԝә дур дьхә.
Ча кʹьнщхԝәкьрьн ӧса жи хәбәрдан, дькарә хԝәһʹьзийа те бьдә кʹьфше, чь кӧ мәрийа ԝе жь тә дур хә
Чахе кʹьнщхԝәкьрьна мәрийа нәщайиз ә, һьнге әԝ жи дьбә мина ԝан мәрийа. Кʹьнщед ӧса те бежи дькьнә гази: «Дә мьн бьньһерʹә!» Жь ве йәке ӧса те кʹьфше, те бежи тӧ хԝәда баԝәр нини, йан жи дина тә педа сәр тә йә. Алийе дьнда жи ӧса дькарә бе кʹьфше, ԝәки тӧ һʹьзрәт и кӧ мәрьв дина хԝә бьдьнә сәр тә, фьрԛи тʹӧнә әԝ щайиз бә йан нәщайиз бә.
Ӧса бькә ԝәки мәрьв дәрһәԛа тә рʹаст бьфькьрьн, ләма жи ԝе баш бә мьлуктийе бьди кʹьфше. Кәчʹька бь наве Моника дьбежә: «Мьлук би найе һʹәсабе мина пирька кʹьнща хԝә ки, ле әԝ те һʹәсабе ԝәки ԛәдьре хԝә у ԛәдьре мәрьвед дьн бьгьри».