Сәрһати 1

Хԝәде Дәстпедькә Тьшта Чекә

ҺʹӘМУ тьштед баш кӧ бал мә һәйә, жь Хԝәде йә. Әԝи тәʹв чекьр кӧ рʹонайи һәбә, һив у стәйрк чекьр кӧ шәве жи һьнәки рʹонайи һәбә. Ӧса жи Хԝәде әʹрд чекьр, ԝәки әм ль сәр бьжин.

Ле тәʹв, һив, стәйрк у әʹрд чекьрьна Хԝәде пешьн ниньн. Пешийа һʹәму тьшти Хԝәде кәсед мина хԝә әʹфьранд. Дь Кʹьтеба Пирозда ль сәр ԝан мьлйакʹәт те готьне. Хԝәде ԝана мина хԝә чекьр, у ләма мьлйакʹәт жи найнә дитьне. Ле чьрʹа Хԝәде ԝана чекьр? Чьмки Хԝәде дьхԝәст, кӧ әԝана тʹәви ԝи ль әʹзмана бьжин.

Мьлйакʹәте пешьн, йе кӧ Хԝәде чекьр, нә мина мьлйакʹәтед дьнена йә. Әԝ әʹфьрандьна Хԝәдейә пешьн ә, у ләма жи те һʹәсаве ча кӧрʹе ԝийә пешьн. Чахе Хԝәде тәʹв, һив, стәйрк, әʹрд у һʹәму тьштед дьнена чедькьр, кӧрʹе ԝийә пешьн тʹәви ԝи бу у али ԝи дькьр.

Гәло сәре сәрида әʹрд чь щурʹәйи бу? Ԝи чахи тʹӧ кәс ль сәр әʹрде нәдьжит. Ль сәр тʹәмамийа әʹрде, хенщи аве тʹӧ тьшт тʹӧнә бу. Ле Хԝәде дьхԝәст, кӧ ль сәр әʹрде мәри бьжин, ләма жи әԝи дәстпекьр һʹәму тьшт сәва мәрийа һазьр кә. Кʹа әм бьвиньн, әв тьшт чь бун.

Пешийе сәва әʹрде лазьм бу рʹонайи, ләма жи Хԝәде тәʹв чекьр, ԝәки рʹонайи бьдә. Әԝи ӧса кьр, кӧ ль сәр әʹрде һьн рʹож һәбә, һьн жи шәв. Паши ве йәке, Хԝәде жь бьн аве әʹрд дәрхьст.

Ле ԝи чахи тʹӧ тьшт ль сәр әʹрде һе тʹӧнә бу. Ча ль сәр ви шькьли те кʹьвше әʹрд ви щурʹәйи бу. Нә кӧлирк, нә дар у нә жи һʹәйԝан тʹӧнә бун. Һәла һе мәʹси жи нав бәʹре тʹӧнә бун. Һе гәләк тьшт Хԝәде гәрәке чекьра, кӧ әʹрд сәва жийана мәрьва у һʹәйԝана рʹасти жи бәдәԝ у баш буйа.

Йерәмийа 10:12; Колоси 1:15-17; Дәстпебун 1:1-10.