Сәрһати 20

Динаһ Дьбә Хԝәйе Кӧл У Дәрда

БЬНЬҺЕРʹӘ ль сәр ԝан, бәрбь кʹе Динаһ те. Гәло әԝ кʹи нә? Әԝ ԛизед Кәнане нә, у Динаһ те сәрики ԝан хә. Ле гәло баве ԝе Аԛуб ве йәкерʹа ԛайил ә? Сәва кӧ щава ве пьрсе бьдьн, ԝәрә әм биньнә бира хԝә, Бьраһим у Исһаԛ дәрһәԛа ԛизед Кәнане ча дьфькьрин.

Те бира тә кӧ Бьраһим нәдьхԝәст, ԝәки кӧрʹе ԝи Исһаԛ жь Кәнане жьн бьстинә. Йан жи Исһаԛ Рʹәбәка, дьхԝәстьн кӧ кӧрʹе ԝан Аԛуб ԛиза Кәнане жьнти бинә? Ԝәлә ԝана жи нәдьхԝәст. Ле зани чьрʹа?

Чьмки мәрийед Кәнане сәре хԝә ль бәр хԝәдайед ԛәлп датанин. Әԝана нәһежа бун кӧ тʹәви ԝан нә һәвалти бькьн, нә жи бьзәԝьщьн, чьмки әԝана гәлә хьрав бун. Ләма жи әм дькарьн баԝәр бьн кӧ Аԛуб ԛайил ни бу, ԝәки ԛиза ԝи тʹәви ԝан һәвалтийе бькә.

Аһан мәʹни, чьрʹа Динаһ бу хԝәйе кӧл у дәрда. Һәла бьньһерʹә сәр шькьл у дина хԝә бьдә кӧ мерәк ль сәр Динаһ дьньһерʹә. Зани әԝ кʹи йә? Наве ԝи Шәкәм ә. Рʹожәке, чахе Динаһ һатә мала ԝи меван, Шәкәм ле зоре вәләзанд у тʹәви ԝе рʹаза. Әв йәк нә рʹаст бу, чьмки мер у жьн йе кӧ тʹәв нәзәԝьщинә, изьна ԝан тʹӧнә кӧ тʹәви һәв рʹазен. Әԝ тьште хьрав йе кӧ Шәкәм сәре Динаһ кьр, гәлә кӧл у дәрда пешда ани.

Чахе бьред Динаһ дәрһәԛа ве йәке пеһʹәсийан, әԝана гәлә һерс кʹәтьн. Шьмһʹун у Леԝи жь һерса шуред хԝә һьлдан у кʹәтьнә шәһәре, ԝи чахи кӧ әԝана һивийе нибун. Һинге Шьмһʹун у Леԝи тʹәви бьред хԝә, кӧштьн Шәкәм у һʹәму меред дьне. Аԛуб гәлә һерс кʹәт, чьмки кӧрʹед ԝи нәһәԛийе гьран кьрьн.

Һәла дьшьрмиш бә, әв һʹәму тьшт чьрʹа ԛәԝьми? Әв һʹәму тьшт ләма ԛәԝьми, чьмки Динаһ тʹәви ԝан һәвалти кьр, йе кӧ бь ԛануне Хԝәде нәдьжитьн. Кʹа әм тʹӧ щар тʹәви мәрийед ӧса һәвалтийе нәкьн!

Дәстпебун 34:1-31.