Паԝлос Щьватарʹа Дьньвисә

ШЬХӦЛЕД щьвата Мәсиһийед тʹәзә, гәләк лазьм бун бона пеканина ԛьрара Йаһоԝа. Ле Мәсиһийед пешьн дәрберʹа рʹасти пәйкʹәтьна һатьн. Гәло әԝана ԝе бькарьбьн бәр чәтьнайед щьватеда у һьм жи чәтьнайед жь щьвате дәр, тәйах кьн у амьн бьминьн? Мьзгинида, демәк Ньвисаред Йунанида 21 нәʹмә һәнә, йед кӧ ширәтед керһати дьдьнә мә, у мә дьлгәрм дькьн.

Жь ван 21 нәʹма, 14 һʹәв жь Рʹомайи һʹәта Ибрани, Паԝлосе шанди ньвиси. Наве ван нәʹма әʹйан дькьн, кӧ һәр нәʹмәк бона кʹе һатийә ньвисаре, бона мәрьвәки, йан бона щьватәки. Ԝәрен әм ньһа һьнә фькьред жь ван нәʹма пебьһʹәсьн.

Намус у рʹабун-рʹуньштьн. Кʹи кӧ бенамусийе, ԛавийе у гӧнед дьнейә гьран дькьн «пʹадшатийа Хԝәде ԝар набьн» (Галати 5:19-21; 1 Корьнтʹи 6:9-11). Рʹаст ә хьзмәткʹаред Хԝәде жь щурʹә-щурʹә мьләта нә, ле гәрәке йәктийе хԝәй кьн (Рʹомайи 2:11; Әфәси 4:1-6). Әԝана гәрәке бь дьл у әшԛ али ԝан хушк-бьред хԝә бькьн, йед кӧ тәнгасийеда ньн (2 Корьнтʹи 9:7). Паԝлос ширәте дьдә: «Һәр гав дӧа бькьн». Әв йәк али Мәсиһийа дькә, ԝәки әԝана һʹәму нетед дьле хԝә Йаһоԝарʹа вәкьн (1 Тʹесалоники 5:17; 2 Тʹесалоники 3:1; Филипи 4:6, 7). Сәва кӧ Хԝәде дӧайед ԝана бьбьһе, лазьм ә бь баԝәрийе дӧа бькьн (Ибрани 11:6).

Малбәт ча дькарә бәхтәԝар бә? Мер гәрәке жьна хԝә һʹьз бькә ча бәдәна хԝә, ле жьн гәрәке кʹур ԛәдьре мере хԝә бьзаньбә. Зарʹарʹа лазьм ә гӧрʹа де-баве хԝә бькьн, чьмки әв йәк Хԝәде хԝәш те. Де у бав гәрәке бь һʹьзкьрьн зарʹед хԝә ширәт кьн, у ширәтед жь Хәбәра Хԝәде бьдьнә хәбате (Әфәси 5:22-6:4; Колоси 3:18-21).

Фәʹмкьрьна нета Хԝәде. Ԛануна Муса щьмәʹта Исраел хԝәй дькьр у һʹәта һатьна Иса рʹебәрийа ԝан дькьр (Галати 3:24). Ле Мәсиһи, сәва кӧ Хԝәдерʹа хьзмәт кьн, әʹсәйи нибу кӧ хԝә ль ван Ԛануна бьгьрьн. Нәʹма Ибранида, Мәсиһийед Щьһурʹа, Паԝлос һур бь һур шьровәдькә, кӧ ԛануна Муса сәва чь һатьбу дайине, у ча нета Хԝәде бь Иса Мәсиһ те сери. Паԝлос шьровәкьр, ԝәки ван щурʹә-щурʹә ԛанунада сийа пʹехәмбәртийе һәбу. Мәсәлә, ԛӧрбанкьрьна һʹәйԝана кʹьфш дькьр ԛӧрбанкьрьна Иса, кʹижан кӧ рʹасти жи гӧнед мәрийа афу дькә (Ибрани 10:1-4). Паши мьрьна Иса, Хԝәде пәймана Ԛануне, да гӧһастьне, чьмки ван ԛануна шьхӧле хԝә ида кьрьн (Колоси 2:13-17; Ибрани 8:13).

Рʹебәри бона шьхӧлед щьвате. Меред кӧ дьхԝазьн щьватеда сәрԝертийе бькьн, гәрәке пе нормед намусийейә мәзьн бьжин, у рʹӧһʹанида гьһишти бьн (1 Тимотʹейо 3:1-10, 12, 13; Тито 1:5-9). Хьзмәткʹаред Йаһоԝа, гәрәке һәргав тʹоп бьн у һәвдӧ һелан кьн (Ибрани 10:24, 25). Щьвата Мәсиһийа гәрәке бьшьдиньн, у ԝана ширәт кьн (1 Корьнтʹи 14:26, 31).

Паԝлос жь һәр дӧ нәʹмед хԝә Тимотʹейорʹа, йәк Рʹомеда ньвиси. Ԝи чахи әԝ гьрти бу, у һивийа суще хԝә бу. Тʹәне чәнд һәвалед ԝи нәтьрсийан бенә щәм ԝи. Паԝлос фәʹм дькьр ԝәки ԝәʹде ԝи һьндьк майә, у әԝи ньвиси: «Ләщеда әз ԛәнщ рʹәвим, мьн рʹийа хԝә ԛәданд, баԝәри хԝәй кьр» (2 Тимотʹейо 4:7). Ча әʹйан ә, Паԝлос паши ве йәке зутьрәке һатә кӧштьне. Ле нәʹмед ԝи, һʹәта рʹожа иройин рʹебәрийе дьдьнә Мәсиһийед рʹаст.

​—Сәр һʹиме кʹьтебед Рʹомайи; 1 у 2 Корьнтʹи; Галати; Әфәси; Филипи; Колоси; 1 у 2 Тʹесалоники; 1 у 2 Тимотʹейо; Тито; Фьлимон; Ибрани.