«Әw Пʹешкʹешәкә Пʹьрʹ Баш бу кö Данә Мьн»

Әw гьлийе жоре готи, кәчʹька 13 сали готьбу, кʹижанерʹа кʹучʹьк пʹешкʹеш кьрьбун. Кʹöлфәтәкә пешдачуйи гот, кö чахе әwе мәкʹтәба бьльнд хьлас кьрьбу, баве wе компотәр wераʹ кʹьрибу. Ль гора гьлийе wе, әве пʹешкʹеше жийина wе гöһаст. Мерәк жи дьбежә, кö чахе сәр сала зәwаща wан, жьна wи пʹешкʹешәкә бьчʹук да wи, кʹижан кö бь дәсте хwә чекьрьбу, әв пʹешкʹеш бона wи гәләк qимәт бу.

Бәле, һәр сал гәләк мәрьв wәʹдә у qәwате хәрщ дькьн, кö бона һәвал йан пьзмамед хwә, пʹешкʹешәкә «пʹьр баш» бьвиньн. У чахе әм пʹешкʹеше дьдьнә кәсәки, wе мәрʹа жи хwәш бьһата, wәки мә бьбьһиста кö пʹешкʹеша мә бәгәм дькьн. Ле тö чь дьфькьри? Ле тәйе бьхwәста бьда йан бьстанда пʹешкʹешәкә öса, кö бь рʹасти жи бьһата qимәт кьрьне?

Сәва кö мәрьв жь пʹешкʹеша тә шабуне бьстинә, әв йәк нә кö тʹәне пʹешкʹешева гьредайи йә, ле öса жи кö чь щурʹәйи тö әве пʹешкʹеше дьди. Кʹьтеба Пироз дьбежә: «Хwәзи ль дайийа, нә кö ль стандийа» (Кʹаред Шандийа 20:35). Һәмьки чахе тö дьвини кö мәрьв пʹешкʹеша тә qимәт дькә, шабуна тә һе мәзьн дьбә.

Чь тö дькари бьки кö пʹешкʹеша тә шабуне бьдә һьм тә, һьм жи wи мәрьви кʹижанирʹа тö пʹешкʹеше дьди? Ле һәрге тö нькари пʹешкʹешәкә «пʹьрʹ баш» бьди, һьнге чь дькари бьки кö пʹешкʹеша тә бь рʹасти бе qимәткьрьне?