Чаwа Пʹешкʹешәкә Баш Бьвиньн?

Һьнәк дьфькьрьн кö чәтьн ә бона кәсәки пʹешкʹешәкә баш бьвиньн. Чь жи һәбә, мәрьве кö пʹешкʹеше дьстинә, тʹәне wирʹа wе бе кʹьфше әw пʹешкʹеш чьqас qимәт ә. У һәрге йәк дьфькьрә кö пʹешкʹеш qимәт ә, дьбәкә йе дьн öса нафькьрә.

Мәсәлә щаһьл дькарә бьфькьрә кö пʹешкʹеша лапә баш әw һәйә һащәтед әләктроник. Ле бона мәзьна гәләк qимәт ә пʹешкʹеша кö жь кал-баве хwә стандьнә. Һьнә културада, ча бона щаһьла öса жи бона мәзьна, пʹешкʹеша лапә баш пʹәрә йә, чьмки әwана чь бьхwазьн, wе wи жи бькʹьрьн.

Чь жи һәбә гәләк мәрьвед сәрwахт бәрдәwам дькьн пʹешкʹеша öса бьгәрʹьн, чь кö wе лайиq бә. Нә һеса йә тʹьме пʹешкʹешәкә öса бьвини, ле һәрге һьнә тьшта һьлдьн һʹәсаб, әw дькарә аликʹарийе бьдә кö ве пьрседа сәрфьраз бьн. Wәрен әм шеwьр кьн чар тьшта, чь кö wе али мә бькә, wәки пʹешкʹешәкә лайиq бьвиньн.

Хwәстьна мәрьв. Мерькәки жь Бәлфасте, Ирландайа Бакöре дьбежә, кö чахе әw 10-11 сали бу wирʹа бисиклет пʹешкʹеш кьрьн. Әв пʹешкʹешәкә пʹьрʹ баш бу бона wи, чь кö шабунәкә мәзьн wирʹа ани. Чьма? Әwи гот: «Чьмки мьн гәләк әв дьхwәст». Чаwа те кʹьфше хwәстьна мәрьвава гьредайи йә, кö әwе ве пʹешкʹеше qимәт кә йан на. Ләма жи бьфькьрьн дәрһәqа wи мәрьви кʹижанирʹа кö һун дьхwазьн пʹешкʹеше бьдьн. Тедәрхә мәрьв чь qимәт дькә, чьмки гәләк щар әв йәк һʹöкöм дькә сәр хwәстьнед wан. Мәсәлә, кал-пир тʹьме qимәт дькьн тʹәви малбәта хwә wәʹдә дәрбаз кьн. Дьбәкә хwәстьна wан әw ә, кö тʹьме тʹәви зарʹед хwә у нәбийед хwә wәʹдә дәрбаз кьн. Мәсәлә кал-пир һʹәсаб дькьн, кö пʹешкʹешәкә лапә баш бона wан әw ә, һәрге нәфәред wан, wана жи тʹәглиф кьн тʹәви хwә сәр тʹатʹиле.

Сәва кö хwәстьнед мәрийа тедәрхьн, әм гәрәке гöһдарванед баш бьн. Кʹьтеба Пироз дьбежә кö, бьһистьнеда бь ләз бьн, ле хәбәрданеда гьран бьн (Аqуб 1:19). Чахе тö һәр рʹож тʹәви һәвал йан пьзмамед хwә хәбәр дьди, рʹьнд гöһ бьдә wан, чьмки әwе али тә бькә тедәрхи кö чь wана хwәш те, у чь на. Öса те бькарьби пʹешкʹешәкә баш бьди wан чь кö wе шабуна wан зедә кә.

Һʹәwщед мәрьва. Мәрьв дькарә һәла һе пʹешкʹешәкә бьчʹук у арзан жи qимәт кә, һәрге әв wирʹа лазьм ә у һәрге әwе бькарьбә бьдә хәбате. Ле чаwа тö дькари тедәрхи, кö чь мәрьврʹа лазьм ә?

Даһа һеса йә жь мәрьв бьпьрсьн, кö әw чь дьхwазә у чь wирʹа лазьм ә. Ле һәрге әм дьфькьрьн, кö чаwа бь пʹешкʹеша хwә мәрьва әʹщебмайи кьн, әв йәк wе ида шабуне мәрʹа нәйинә. Рʹаст ә һьнәк мәрьв дькарьн һеса бежьн кö чь әwана дьхwазьн, ле гәләк щар мәрьв wе нәбежьн кö чь wанарʹа лазьм ә.

Сәрwахт бә у дина хwә бьдә дәрәщед мәрийа. Гәло әw мәрьв щаһьл ә, әʹмьрда мәзьн ә, азәп ә, зәwащеда нә, би йә, хәбатчи йә йан нахәбьтә? Дина хwә бьде, кö wан дәрәщада тö дькари кʹижан пʹешкʹеша бьди мәрийа. Öса жи бьфькьрә кö кʹижан пʹешкʹеш дькарә хут бона һʹәwщед мәрьв бә.

Сәва кö бькарьби һʹәwщед мәрьв һьлди һʹәсаб у пʹешкʹешәкә лайиq бьди, хәбәр дә тʹәви wан мәрийа йед кö рʹасти дәрәщед öса һатьнә. Дьбәкә әwана дәрһәqа тьштед öса бежьнә тә, чь кö нәәʹйан ьн. Öса те бькарьби пʹешкʹешәкә баш бьки.

Wәʹдә. Кʹьтеба Пироз дьбежә: «Чьqас хwәшә һәр хәбәр wәхте хwәда!» (Мәтʹәлок 15:23). Әв рʹез дьдә кʹьфше кö хәбәред мә йед кö wәхтда тенә готьн, гәләк муһим ьн. Әве йәке әм дькарьн бежьн дәрһәqа кьред хwә жи. Хәбәред кö кәсәкирʹа wәʹдәки лазьмда те готьн, шабуне тинә. Анәгори wе йәке пʹешкʹеша кö wәʹдә у дәрәща лазьмда те дайин, дькарә шабунәкә мәзьн бьдә мәрьв.

Жере ве бе готьне дәрһәqа һьнә дәрәща, кö чь чах әм дькарьн пʹешкʹеша бьдьн. Һәвал дьхwазә бьзәwьщә. Щаһьл ида мәкʹтәбе хьлаз дькә. Жьн-меррʹа гәрәке зарʹ бьбә. Һьнәк мәрьв дьфькьрьн wәки wе керһати бә, һәрге дәрһәqа wан дәрәща хwәрʹа бьньвисьн, йе кö wе нава саледа бьqәwьмьн. Öса әwана дькарьн пешда дәрһәqа пʹешкʹешәкә лайиq бьфькьрьн.a

Һәмьки һәнә дәрәщед мәхсус чахе тö гәрәке пʹешкʹеша бьди. Тö тʹьме дькари жь дайине шабуне бьвини. Ле тьштәки гәрәке бир нәкьн. Мәсәлә һәрге мерәк бе мәʹни пʹешкʹеше дьдә кʹöлфәте, әw дькарә бьфькьрә кö әw wи хwәш те у дьхwазә һе рʹьнд ле нас кә. Демәк пʹешкʹеша wи щурʹәйи дькарә мәрийа бьхәльфинә йан тʹәви һәв кә. Ле әм гәрәке тьштәки һьлдьн һʹәсаб: нетед мәрьва.

Нетед мәрьва. Чаwа жь мәсәлед жорʹе готи те кʹьфше, wе баш бә чахе әм пʹешкʹеша дькьн, һьлдьн һʹәсаб, кö мәрьв wе дәрһәqа нета мә чь бьфькьрьн. Хенщи wе йәке wе баш бә кö әм бир нәкьн, wәки бь чь нети әм пʹешкʹеше дьдьн. Гәләк мәрьв бь дьл у щан пʹешкʹеша дьдьн, ле һьнәк жи тʹәне дәрәщед мәхсусда пʹешкʹеша дьдьн, чьмки дьфькьрьн кö мәщбур ьн öса бькьн. Һәнә йед öса жи, кö пʹешкʹешкьрьнеда кʹара хwә дьгәрʹьн.

Пьрсе бьдә хwә: Әз бь чь нете пʹешкʹеш дькьм? Кʹьтеба Пироз дьбежә: «Бьра һәр кьрьнед wә бь һʹьзкьрьне бьн» (1 Корьнтʹи 16:14). Һәрге нета дайина тә һʹьзкьрьн ә у хәмгинйева гьредайи йә, мәрьв wе бь шабун пʹешкʹеша тә бьстиньн, у тöйе жи шабунәкә мәзьн бьстини жь бо дьлрʹәмйа хwә. Чахе тö бь дьл дьди, тö Баве хwәйи әʹзмана жи ша дьки. Паwлосе шанди, пʹайе Мәсиһийед Корьнтʹийе да, чахе әwана бь мәрʹдани у шабуне пьштгьрйа Мәсиһийед Щьһустане кьрьбун. Паwлос готә wан «Хwәде йе бь дьл у әшq дьдә һʹьз дькә» (2 Корьнтʹи 9:7).

Һәрге тö дина хwә бьди тьштед жоре готи, әв йәк wе али тә бькә wәки пʹешкʹеша лайиq бьки, чь кö wе шабуне мәрьварʹа бинә. Әw тьштед жоре готи у öса жи тьштед дьн, пʹарәкә жь нета Хwәде бун бона инсанәте, кö әwана пʹешкʹешәкә лапә баш бьстиньн. Әм wә тʹәглиф дькьн готара дьн бьхуньн, у һе зедә дәрһәqа ве пʹешкʹеша баш пебьһʹәсьн.