Гәрмайа Ԛәԝи у Хоф Нав Тʹәмамийа Дьнйайеда Һавине Сала 2023—Кʹьтеба Пироз Чь Дьбежә?

Сәр тʹәмамийа дьнйайе мәрьв дәст гәрмайа ԛәԝи у жь бо зийана кӧ жь гәрме те, дьчәрчьрьн. Дина хԝә бьдьнә ԝан һʹәсаба:

• «Дьнйа жь бо ԛьжә-ԛьжа гәрме мәһа Һʹәзиранеда дьчәрчьри. Әв мәһ нава 174 салед пашьнда сәр тʹәмамийа дьнйайе, мәһа һәрә гәрм бу».—National Oceanic and Atmospheric Administration, U.S. Department of Commerce, 13 Тирмәһе, 2023.

• «Гәрмайи ль Италйа, Испанйа, Франса, Алманйа у Полонистане зәʹф ԛәԝи бу, у һивийе нә ԝәки сәр гьравед Сисилйа у Сардинйайе гәрмайа һәԝайе бьгьһижә 48°C [118°F] – чь кӧ нава тʹәрихийа Әԝропайеда ԝе температура лапә бьльнд бә».—European Space Agency, 13 Тирмәһе, 2023.

• «Жь бо ве йәке кӧ планета мә һе зедә у зедә гәрм дьбә, әм һивийе нә ԝәки баран жи ԝе һе ԛайим у һе гәләк щар бьбарьн, жь бо чь жи лейи у селав ԝе рʹабьн».—Стефан Уленбрук, директоре һидролжийайе, аве у криосфере жь тʹәшкиләта World Meteorological Organization, 17 Тирмәһе, 2023.

Һун хәмгин дьбьн жь бо ве йәке кӧ нав тʹәмамийа дьнйайеда гәрмайи зедә дьбә? Дина хԝә бьдьне кӧ Кʹьтеба Пирозда дәрһәԛа ве тʹемайе чь те готьне.

Гәло Кʹьтеба Пирозда дәрһәԛа зедәбуна гәрмайе һатийә пʹехәмбәртикьрьне?

Әре. Кʹьтеба Пирозда дәрһәԛа рʹожед мә һатийә готьне кӧ тʹәшԛәлед тʹәбийәте ԝе бьԛәԝьмьн, дькʹәвә нава ве ӧса жи гәрмайа ԛәԝи у хьраббуна һәԝайе. Мәсәлә, Иса пʹехәмбәрти кьр, ԝәки «ль әʹзмен жи тьштед хоф у тьрс» ԝе бьԛәԝьмьн, демәк тьштед әʹщеб (Луԛа 21:11). Зедәбуна гәрмайе нав тʹәмамийа дьнйайеда тьрсе дькә дьле мәрьва кӧ жийин сәр әʹрде ида ԝе нькарьбә һәбә.

Гәло сәр әʹрде жийин ԝе тʹӧнә бә?

Ԝе ӧса нибә. Хԝәде әʹрд сәва ԝе йәке чекьрийә, ԝәки сәва инсанәте маләкә һʹәта-һʹәтайе бә. Әԝ изьне надә кӧ мәрьв әʹрде хьраб кьн у кʹӧта кьн (Зәбур 115:16; Ԝаиз 1:4). Дәԝсе, Хԝәде соз дайә ԝәки «ԛьрʹа ԝан» бинә, йед кӧ әʹрде хьраб дькьн (Әʹйанти 11:18).

Кʹьтеба Пироз нишан дькә, ԝәки Хԝәде дькарә әʹрде бьпʹарезә, у әԝе әʹсә ве йәке бькә.

• «[Хԝәде] фьртонә сәԛьрʹандьн у пʹел данә сәкьнандьн» (Зәбур 107:29). Ԛәԝата Хԝәде һәйә кӧ тʹәшԛәлед тʹәбийәте контрол кә. Әԝ дькарә ԝан проблемед тʹәбийәте жи сафи кә, жь бо чь гәрмайа һәԝайе зедә дьбә у мәрьв дьчәрчьрьн.

• «Чʹәʹве Тә сәр әʹрде йә, Тӧ ԝе ав дьди, дәԝләмәнд дьки» (Зәбур 65:9). Хԝәде ԝе әʹрде кʹәрәм бькә у әве бьбә щьнәт.

Сәва кӧ һе зедә пебьһʹәсьн дәрһәԛа созед жь Кʹьтеба Пироз бона тʹәбийәте у әʹрде, бьньһерʹьн готар «Кʹи ԝе Әʹрде Хьлаз кә?»