Ча Нәкʹәвьмә бәр байе Щерʹьбандьне?

Паԝлосе шанди ньвиси: «Гава дьхԝазьм кӧ ԛәнщийе бькьм, бе һʹәмде мьн дьбә хьраби» (Рʹомайи 7:21). Дьбәкә тә жи хԝә ӧса тʹәхмин кьрийә? Һәрге ӧса нә, әв готар ԝе али тә бькә кӧ пәй хԝәстьнед хԝәйә нәрʹаст нәкʹәви.

• Тӧ гәрәке чь бьзаньби

• Тӧ чь дькари бьки

• Щаһьлед дьн чь дьбежьн

Тӧ гәрәке чь бьзаньби

Гәләк щар әм дькарьн тьштед нәрʹаст бькьн, чьмки дькʹәвьн бәр байе мәрьвед дьн. Бь рʹасти Кʹьтеба Пироз дьбежә «һәвалтийа хьраб мәрьве хԝәйипʹәргал хьраб дькә» (1 Корьнтʹи 15:33). Мәсәлә, әм тʹәви кʹе һәвалтийе дькьн, чь дьньһерʹьн, дьбьһен у дьхуньн, сәр фькьр у рʹабун-рʹуньштьна мә һʹӧкӧм дьбә. Әԝ һәр тьшт дькарьн дьле мәда хԝәстьнед нәрʹаст пешда биньн, йед кӧ ԝе мә бәрбь кьред нәрʹаст бьвьн. У әм дькарьн дәстпекьн тьштед нәщайиз жи бькьн, чьмки пʹьрʹанийа мәрьва ве йәке дькә (Дәркʹәтьн 23:2).

«Чахе кәсәк дькʹәвә һʹәйра наве хԝә, ԝәки мәрьва хԝәш бе, әԝ дәстпедькә тьштед ӧса бькә чь кӧ әԝана дькьн» (Щереми).

Бьфькьрә: Чьрʹа мәрьве кӧ гәләк дькʹәвә һʹәйра наве хԝә, һеса дькарә бькʹәвә щерʹьбандьне? (Мәтʹәлок 29:25)

Фькьра сәрәкә: Нәһелә ԝәки жь бо мәрьвед дор-бәре хԝә принсипед хԝәйә намусийе бир бьки.

Тӧ чь дькари бьки

Баԝәрийа хԝәда ԛәԝи бә. Һәгәр тӧ баԝәрийа хԝәда ԛәԝи нини, мәрьвед дьн ԝе һеса тә контрол кьн. Дьһа бь аԛьлайи йә кӧ ве ширәта Кʹьтеба Пироз һьлди һʹәсаб: «Һәр тьшти бьщерʹьбиньн, тьштед ԛәнщ ԛәԝин бьгьрьн» (1 Тʹесалоники 5:21). Гава тӧ рʹьнд фәʹм дьки кӧ чь баԝәр дьки, тәрʹа ԝе дьһа һеса бә хԝә ль принсипед хԝә бьгьри у ԝәʹде щерʹьбандьна ԝан принсипа бир нәки».

Бьфькьрә: Чьрʹа тӧ баԝәр дьки кӧ принсипед Хԝәде бона кʹара тә нә?

«Мьн тедәрхьст кӧ мәрьв һе зедә ԛәдьре мьн дьгьрьн, чахе әз хԝә ԛәԝи ль принсипед хԝә дьгьрьм у накʹәвьмә бәр байе кәсәки, кӧ тьштед нәрʹаст бькьм» (Кимберли).

Мәсәла жь Кʹьтеба Пироз: Данийел. Һе щаһьлтийа хԝәда әԝи ида дьле хԝәда сафи кьрьбу кӧ гӧрʹа ԛанунед Хԝәде бькә (Данийел 1:8).

Кемаси у сьстбунед хԝә бьзаньбә. Кʹьтеба Пироз дьбежә кӧ «дьлхԝәстьнед щаһьлтийе» гәләк ԛәԝи нә (2 Тимотʹейо 2:22). Ле әва нә тʹәне дәрһәԛа хԝәстьнед сексуали те готьне, ле ӧса жи дәрһәԛа хԝәстьна кӧ гьшк тә һʹьз бькьн у ӧса жи жь де-бава аза би гава һе һазьр нини жи хԝәсәри хԝә бьжи.

Бьфькьрә: Кʹьтеба Пироз дьбежә кӧ «һәр кәс дьбә машоԛе дьлһавьжийед хԝә, дьхапә у те щерʹьбандьне» (Аԛуб 1:14). Ле кʹижан хԝәстьн тә дькьнә щерʹьбандьне?

«Бь һʹәлали бинә сәр хԝә кӧ бәр кʹижан щерʹьбандьна тӧ сьст и. Паше леколина бькә кӧ ча хԝә жь ԝан тьшта хԝәй ки. У гава тӧ диса рʹасти ве щерʹьбандьне бейи, те ида бьзаньби кӧ чь бьки» (Силвйа).

Мәсәла жь Кʹьтеба Пироз: Даԝьд. Щара Даԝьд дькʹәтә бәр байе мәрьва у пәй хԝәстьнед хԝә дькʹәт. Ле әԝ сәр шашийед хԝә һин дьбу у һәр тьшти дькьр, кӧ ида ԝан шашийа нәкә. Әԝи Йаһоԝарʹа дӧа дькьр: «Дьләки паԛьж нав мьнда бьәʹфьринә у рʹӧһʹәки рʹаст нав мьнда сәр һәвда бинә» (Зәбур 51:10).

Хԝәгьрти бә. Кʹьтеба Пироз дьбежә: «Нәһелә хьраби сәр тә кʹәвә, ле бь ԛәнщийе тӧ сәр хьрабийе кʹәвә» (Рʹомайи 12:21). Әԝ те һʹәсабе кӧ тәва гьредайи йә те бькʹәви щерʹьбандьне йан на, демәк әва бьжартьна тә йә.

Бьфькьрә: Тӧ ча дькари хԝәгьртьне нишан ки, гава дькʹәви дәрәщәкә ӧса, кӧ тьште нәрʹаст бьки?

«Әз дьфькьрьм дәрһәԛа ве йәке, кӧ ԝе чь бьԛәԝьмә һәрге әз пәй хԝәстьна хԝә кʹәвьм? Гәло әԝ йәк мьнрʹа дьлрʹьһʹәтийе бинә? Дьбәкә жи, ле ԝәʹдәлу. Ле паше? Паше әзе дьһа хьраб хԝә тʹәхмин кьм. Ԛә әԝ йәк һежа йә? На!» (Софйа).

Мәсәла жь Кʹьтеба Пироз: Паԝлос. Рʹаст ә щара щәм Паԝлос жи хԝәстьнед нәрʹаст пешда дьһатьн, ле әԝ нәдькʹәтә бәр байе ван. Әԝи ньвиси: «Әз зордарийе ԛальбе хԝә дькьм у ԝе зәфт дькьм» (1 Корьнтʹи 9:27).

Фькьра сәрәкә: Жийин ԝәк рʹе йә, ле тӧ ажован и. У әва ида дәсте тәда йә кӧ бькʹәви «чʹәлед» щерʹьбандьна йан на.

Бир нәкә кӧ хԝәстьнед нәрʹаст ԝәʹдәлу нә. Мелиса йа кӧ 20 сали йә дьбежә: «Гәләк тьшт кӧ мәкʹтәбеда бона мьн щерʹьбандьн бун, ида дина мьн накʹьшиньн. Щерʹьбандьнед ньһа жи ԝәʹдәлу нә, у һәгәр әз пәй хԝәстьнед нәрʹаст нәкʹәвьм, әзе бона тʹӧ тьшти пʹошман нәбьм».