Чʹәʹв Бьдьнә Хьзмәткʹаред Йаһоwайи Амьн

1, 2. Даwьд ча амьнийа хwә һьндава Хwәде да кʹьфше? (Бьньһерʹә шькьле әʹwльн.)

НИВЕ шәве, Даwьд у Абишә һеди-һеди бәр 3 000 әскәред рʹазайирʹа дәрбаз дьбун. Wана ортʹа wан әскәрада, Шаwул Пʹадша дитьн, кӧ кʹур рʹазайи бу. Шаwул дь бәрʹийа Щьһустанеда бу, чьмки әwи Даwьд дьгәрʹийа сәва бькӧжә. Абишә Даwьдрʹа дькә пʹьстә-пʹьст: «Бьһелә кӧ әз бь дәрбәке, бь рʹьме wи ль әʹрдева бькʹӧтьм у щара дӧwәмин әз ль wи нахьм». Ле щаба Даwьд рʹасти жи әʹщебмайи йә. Әwи Абишәрʹа гот: «Ма wе кʹи дәсте хwә дьрежи мәсиһийе Хӧдан бькә у бесущ бьминә?» Даwьд ӧса жи гот кӧ әw тʹӧ щар нькарә дәсте хwә сәр рʹункьрийе Йаһоwа һьлкʹьшинә (1 Сам. 26:8-12).

² Даwьд фәʹм дькьр кӧ чь дьһатә һʹәсабе амьн бьминә Хwәдерʹа. Qә һʹьше wирʹа дәрбаз нәдьбу кӧ зийане бьдә Шаwул. Ле чьрʹа? Чьмки Йаһоwа Шаwул кʹьфш кьрьбу ча пʹадше Исраеле. Бәле, хьзмәткʹаред Йаһоwайи амьн qәдьре wан дьгьрьн, кʹижана Йаһоwа кʹьфш дькә. У Йаһоwа дәʹwа дькә, кӧ жь щьмәʹта wи һәр кәс амьнийе хwәй кә. (Бьхунә Миха 6:8.)

3. Абишә ча амьнийа хwә һьндава Даwьд избат дькьр?

³ Абишә гәләк qәдьре Даwьд дьгьрт. Мәсәлә: Чахе Даwьд тʹәви Бат-шәбайе бенамуси кьр, әwи бьре Абишә Йоабрʹа гот, кӧ әw ӧса бькә wәки мере wе Урийа шәрʹда бе кӧштьне (2 Сам. 11:2-4, 14, 15; 1 Дир. 2:16). Дьбәкә Абишә заньбу дәрһәqа ве йәке, ле йәкә әwи бәрдәwам дькьр qәдьре Даwьд бьгьрә чаwа рʹункьрийе Хwәде. Һьн жи Абишә тʹӧ щар һʹӧкӧмәта хwә ча сәрәскәр сәва ве йәке нә дьда хәбате кӧ бьбә пʹадша. Дәwсе, әwи Даwьд хwәй дькьр жь дьжмьнед wи (2 Сам. 10:10; 20:6; 21:15-17).

4. а) Әм жь кʹӧ заньн кӧ Даwьд амьн бу Хwәдерʹа? б) Ве тʹемайеда әме дәрһәqа чь шеwьр кьн?

⁴ Даwьд кӧ зийан нәда Шаwул Пʹадша, бь ве йәке әwи избат кьр кӧ әw хьзмәткʹаре Йаһоwайи амьн ә. Чахе әw щаһьл бу, әw мьqабьли Голиатʹе тәрʹьки дәркʹәт, кʹижан кӧ нәтьрсийа кӧ qәрфе хwә ордийа Хwәдейе сах бькә! (1 Сам. 17:23, 26, 48-51). Паше чахе Даwьд бу пʹадша у гӧне мәзьн кьр, демәк бенамуси у кӧштьн, әwи ширәткьрьн у рʹасткьрьна Натʹан qәбул кьр у гӧне хwә ани рʹуйе хwә (2 Сам. 12:1-5, 13). Чахе Даwьд әʹмьрда мәзьн бу, һьнге жи бәрдәwам дькьр Хwәдерʹа амьн бьминә. Мәсәлә, әwи гәләк тьштед qимәт qӧрбан кьр, сәва кӧ пʹарьстгәһе ава кә бона Йаһоwа (1 Дир. 29:1-5). Бәле, Даwьд шашийед мәзьн кьр, ле йәкә әwи амьнийа хwә һьндава Йаһоwа хwәй дькьр (Зәб. 51:4, 10; 86:2). Әме ньһа шеwьр кьн qәwьмандьнед дәрһәqа Даwьд у wан мәрьва йед кӧ wәʹде wида дьжитьн. У wәрә wәʹде шеwьркьрьне бьвиньн щабед wан пьрса: «Әм гәрәке пешийе кʹерʹа амьн бьн? У әм гәрәке кʹижан һʹӧнӧра бьдьнә кʹьфше һәрге дьхwазьн амьн бьн?»

ПЕШИЙЕ КʹЕРʹА ӘМ ГӘРӘКЕ АМЬН БЬН?

5. Әм чь дәрсе һин дьбьн жь шашийа Абишә?

⁵ Чахе Абишә дьхwәст Шаwул бькӧжә, әwи бь ве йәке дьхwәст амьнийа хwә һьндава Даwьд бьдә кʹьфше. Ле әw йәк нәрʹаст бу, у ләма Даwьд wи да сәкьнандьне, чьмки заньбу кӧ изьн тʹӧнә «дәсте хwә дьрежи мәсиһийе Хӧдан бькә» (1 Сам. 26:8-11). Жь ве мәсәле әм дәрсәкә фәрз һин дьбьн: Чахе әм гәрәке сафи кьн кӧ пешийе кʹерʹа амьн бьминьн, әм гәрәке бьфькьрьн дәрһәqа принсипед Кʹьтеба Пироз, кʹижан кӧ дәрәща мәда дькарьн али мә бькьн.

6. Рʹаст ә әw йәк тʹәбийәти йә кӧ әм дьхwазьн амьн бьн малбәта хwәрʹа у һәвалед хwәрʹа, ле чьрʹа әм гәрәке ве йәкеда фәсал бьн?

⁶ Амьни жь дьл те, ле дьле мәрьва хапинок ә (Йерәм. 17:9). Ләма әw мәрьве кӧ Хwәдерʹа амьн ә, һеса дькарә амьнийа хwә һьндава һәвале незик йан мәрьвед незик дайнә щийе пешьн, һәла һе һәрге жи әw мәрьв тьштед нәрʹаст дькә. Әм гәрәке гәләк фәсал бьн илаһи һьнге, чахе кәсәк мәрьве мәйи незик жь рʹастийе дәрдькʹәвә. Әм гәрәке бира хwәда хwәй кьн кӧ амьнийа мә Йаһоwарʹа гәрәке сәр щийе пешьн бә. (Бьхунә Мәтта 22:37.)

7. Ча хушкәк амьн ма Хwәдерʹа дәрәща чәтьнда?

⁷ Амьнийа мә те щерʹьбандьне, чахе кәсәк жь мәрьвед мәйи незик жь щьвате һатийә дәрхьстьне. Бьньһерʹьн мәсәлә. Дийа Ана^[1] ,жь щьвате һатә дәрхьстьне. Әwе Анайерʹа тʹелехьст, чьмки хwә дьлтәнг тʹәхмин дькьр кӧ жь малбәте башqә бу, у дьхwәст һәрʹә мала Анайе. Жь бо ве йәке Ана гәләк бәрхwә кʹәт у дийа хwәрʹа гот кӧ wе бь нәʹмәке щаба wе бьдә. Ле пешийа кӧ нәʹмәке бьньвисә, Анайе принсипед Кʹьтеба Пироз леколин кьр (1 Корн. 5:11; 2 Йуһʹн. 9-11). Анайе бь нәрми дийа хwәрʹа ньвиси, кӧ дийа wе хwәха хwә жь малбәте qәтанд бь шьхӧлед хwәйи нәрʹаст, у кӧ гӧне хwә нәани рʹуйе хwә. У Анайе гьлийед ӧса жерʹа ньвиси: «Тӧ дькари рʹьһʹәтийе бьстини тʹәне ви чахи һәрге вәгәрʹи щәм Йаһоwа» (Аqуб 4:8).

8. Кʹижан һʹӧнӧр wе али мә бькьн кӧ Хwәдерʹа амьн бьн?

⁸ Хьзмәткʹаред Хwәдейи амьн wәʹде Даwьдда, ӧса жи мьлук, qәнщ у мерхас бун. Wәрә әм шеwьр кьн кӧ ча әw һʹӧнӧр дькарьн али мә бькьн кӧ амьн бьминьн Йаһоwарʹа.

ӘМ ГӘРӘКЕ МЬЛУК БЬН

9. Чьрʹа Абнәр дьхwәст Даwьд бькӧжә?

⁹ Чахе Даwьд сәре Голйатʹ ани да бәр Шаwул Пʹадша, кӧрʹе Шаwул Йонатʹан у ӧса жи Абнәре сәрәскәр әw йәк дитьн (1 Сам. 17:57-18:3). Паше чахе Шаwул дьхwәст Даwьд бькӧжә, Абнәр пьшта Шаwул гьрт. Даwьд ньвиси: «Зордар дьхwазьн бьстиньн щане мьн» (Зәб. 54:3, ИМ; 1 Сам. 26:1-5). Ле чьрʹа ньһерʹандьна Абнәр нә мина йа Йонатʹан бу? Абнәр жи заньбу кӧ Хwәде Даwьд бьжартийә сәва кӧ бьбә пʹадше Исраеле. Паши мьрьна Шаwул Абнәр дькарьбу мьлукти бьда кʹьфше, у пьштгьрийа Даwьд бькьра, нә кӧ йа кӧрʹе Шаwул Иш-бошет. Ӧса әwи wе амьнийа хwә Хwәдерʹа избат кьра. Паше, чахе әwи тʹәви щарийа Шаwул бенамуси кьр, бь ве йәке әwи дьбәкә хwәст кӧ дәwса Шаwул бьбә пʹадша (2 Сам. 2:8-10; 3:6-11).

10. Чьрʹа Абшалом Хwәдерʹа амьн нибу?

¹⁰ Кӧрʹе Даwьд Абшалом Хwәдерʹа амьн нибу, чьмки мьлук нибу. Абшалом дьхwәст бьбә пʹадша, ләма «бона хwә әрәбәк у һәспан у бона кӧ ль пешийа wи баз бьдьн пенщи зьлам» qазанщ кьр (2 Сам. 15:1). Әwи щьмәʹт бәрбь хwә дькʹьшанд кӧ wирʹа амьн бьминьн. Әwи жи заньбу кӧ Йаһоwа Даwьд бьжартийә чаwа пʹадше Исраеле, ле йәкә мина Абнәр дьхwәст Даwьд бькӧжә (2 Сам. 15:13, 14; 17:1-4).

11. Әм чь дәрсе дькарьн хwәрʹа һьлдьн жь мәсәла Абнәр, Абшалом у Барук?

¹¹ Мәсәла Абнәр у Абшалом әʹйан дькьн, кӧ һәрге мәрьв нәмьлук ә у һе зедә һʹӧкӧмәтийе дьхwазә, әw дькарә Хwәдерʹа нәамьн бә. Бәле, тʹӧ кәс жь мә нахwазә мина Абнәр у Абшалом хwәһʹьз бә у нетед нәрʹаст бьдә пешийа хwә. Ле һәрге хwәстьна мә һәйә кӧ әм ве дьнйайеда дәwләти бьн у хәбата баш хwәрʹа qазанч кьн, әв йәк дькарә һәләqәтийа мә тʹәви Йаһоwа хьраб кә. Wәʹдәке, Барук аликʹарчийе Йерәмийа тьштәки гьринг дьхwәст, жь бо чь жи әwи шабуна хwә хьзмәткьрьнеда ӧнда кьр. Йаһоwа Барук ширәт кьр: «Йа кӧ ава кьрьмә әзе хәра бькьм у йа кӧ чькандьмә әзе жь щиһ рʹакьм, һьм жи ль һʹәмуйа wәлет. У ма тӧ ль тьштед мәзьн дьгәри? Нәгәрʹә!» (Йерәм. 45:4, 5). Барук гӧһ да Йаһоwа у ширәта wи qәбул кьр. Әм жи гәрәке гӧһ бьдьнә Хwәде, чьмки зутьрәке әw wе дьнйа зӧлм кʹӧта кә.

12. Гьли кьн кӧ чьрʹа һәрге әм хwәһʹьз ьн әм нькарьн амьн бьн Хwәдерʹа.

¹² Даниел бьра жь Мәксикайе, бәр бьжартьне бу кӧ Хwәдерʹа амьн бьминә йан пәй хwәстьне хwә һәрʹә. Әwи дьхwәст йәкә нәбаwәр бьстинә. Даниел гьли дькә: «Мьн бәрдәwам дькьр wерʹа бьньвисьм, һәла һе жи чахе пешәнге һәртʹьм бум. Ле ахьрийе мьн хwә мьлук кьр у рʹуспийе щерʹьбандирʹа гьли кьр кӧ амьнийа мьн һьндава Хwәде бьн qәзийеда нә. Әwи али мьн кьр wәки әз фәʹм кьм, кӧ гәрәке Хwәдерʹа амьн бьминьм у ида кәчʹькерʹа нәньвисьм. Паши гәләк дӧа у һесьра, мьн әw йәк кьр. Зутьрәке шабуна мьн хьзмәткьрьнеда диса мәзьн бу». Паше Даниел хушкәкә баш станд у ньһа ча бәрпьрсийаре мьһале хьзмәт дькә.

АМЬНИ ХWӘДЕРʹА АЛИ МӘ ДЬКӘ КӦ QӘНЩ БЬН

13. Чахе Даwьд гӧнә кьр, Натʹан ча амьн ма һьн Хwәдерʹа, һьн жи Даwьдрʹа?

¹³ Һәрге әм Йаһоwарʹа амьн бьн, әме бькарьбьн мәрьварʹа жи амьн бьн у али wан бькьн. Натʹан пʹехәмбәр амьн ма Даwьдрʹа, у һьн жи амьнийа хwә Хwәдерʹа хwәй кьр. Натʹан пеһʹәсийа кӧ Даwьд бенамуси кьр у кӧ әwи ӧса кьр wәки мере Бат-шәбайе шәрʹда бе кӧштьн. Чахе Йаһоwа Натʹан шанд кӧ wи ширәт кә, Натʹан гӧрʹа Хwәде кьр у бь мерхаси хwә кʹьфш кьр. Һьнге әw Даwьдрʹа жи амьн ма. Натʹан wи ширәт кьр бь билани у нәрми. Сәва кӧ али Даwьд бькә кӧ әw фәʹм кә гьранийа гӧне хwә, Натʹан wирʹа мәсәлә ани. Дь ве мәсәледа әwи гьли кьр дәрһәqа нәһәqийа мәрьвәки дәwләти, кʹижани кӧ бәрха мәрьвәки кʹәсиб һьлда. Чахе Даwьд һерс кʹәт сәр нәһәqийа wи мәрьве дәwләти, Натʹан готә wи: «Әw зьлама тӧ йи». Паши wан гьлийа Даwьд фәʹм кьр кӧ әwи бәр Йаһоwа гӧнә кьр (2 Сам. 12:1-7, 13).

14. Тӧ ча дькари амьн би, һьн Йаһоwарʹа у һьн жи мәрьвед хwәйи незикрʹа?

¹⁴ Әм жи дькарьн пешийе Йаһоwарʹа амьн бьн у һьн жи йед дьненарʹа чахе qәнщ ьн һьндава wан. Мәсәлә, дьбәкә тӧ зани кӧ кәсәк жь щьвате гӧне гьран кьрийә. Дьбәкә тӧ дьхwази wирʹа амьн бьмини, һәла һе һәрге әw һәвале тә йан мәрьве тәйи незик ә. Ле һәрге тӧ чʹәʹве хwә дади сәр гӧне wи, бь ве йәке нәамьн дьмини Хwәдерʹа. Бәле, амьнийа тә Йаһоwарʹа гәрәке сәр щийе пешьн бә. Ләма чʹәʹв бьдә Натʹан, у qәнщ бә һьндава һәвале хwә. Ширәт кә һәвале хwә йан мәрьве хwәйи незик кӧ аликʹарийе жь рʹуспийа бьхwазә. Һәрге әw ширәта тә qәбул накә, тӧ гәрәке һәрʹи у бежи рʹуспийа. Чьмки бь wе йәке тӧ амьнийа хwә Хwәдерʹа дьди кʹьфше, у ӧса жи qәнщи һьндава һәвале хwә йан мәрьве хwәйи незик. Ле рʹуспи wи мәрьви wе бь нәрми ширәт кьн у рʹаст кьн. (Бьхунә Qануна Кʹаһинтийе 5:1; Галати 6:1.)

СӘВА КӦ АМЬН БЬН ХWӘДЕРʹА МӘРʹА МЕРХАСИ ЛАЗЬМ Ә

15, 16. Чьрʹа Һушарʹа мерхаси лазьм бу сәва кӧ Хwәдерʹа амьн бьминә?

¹⁵ Һушарʹа мерхаси лазьм бу сәва Хwәдерʹа амьн бьминә. Һуша һәвале Даwьди амьн бу. Ле амьнийа wи һатә щерʹьбандьне, чахе кӧрʹе Даwьд Абшалом дьле гәләк исраелийа кʹьрʹи, у хwаст Оршәлиме алт кә у бьбә пʹадша (2 Сам. 15:13; 16:15). Даwьд жь шәһәр рʹәвийа, у һьнге Һуша пешийа бьжартьне сәкьни. Әwи гәрәке бьжбарта кӧ йан Абшаломрʹа амьн бьминә, йан пәй пʹадша һәрʹә, кʹижан кӧ әʹмьрда мәзьн бу у рʹәви сәва кӧ әʹмьре хwә хьлаз кә. Һуша сафи кьр кӧ рʹункьрийе Хwәдерʹа амьн бьминә, ләма жи әw чу сәр Чʹийайе Зейтʹуне рʹасти Даwьд һат (2 Сам. 15:30, 32).

¹⁶ Даwьд готә Һуша кӧ әw вәгәрʹә Оршәлиме у Абшаломрʹа qәстика бьдә кʹьфше йанчь һәвале wи йә, у ӧса бькә кӧ ширәта Аһитофәл нәйе сери. Һуша әʹмьре хwә кьрә бьн qәзийе, у Йаһоwарʹа амьни избат кьр, у ӧса кьр чаwа Даwьд жь wи хwаст. У чаwа кӧ Даwьд дӧа дькьр, ӧса жи бу, ширәта Аһитофәл нәһатийә сери (2 Сам. 15:31; 17:14).

17. Чьрʹа мәрʹа лазьм ә мерхаси сәва кӧ амьн бьн Хwәдерʹа?

¹⁷ Мәрʹа жи лазьм ә мерхаси, сәва кӧ амьн бьн Йаһоwарʹа. Гәләк жь мә амьн манә Йаһоwарʹа wәʹде пәйкʹәтьнед жь нәфәред мале, һәвалхәбаткʹара, йан мәрьвед дәwләте. Мәсәлә, Таро жь Жапонйайе бьчʹуктайеда дьхwаст кӧ тʹьме де-баве хwә рʹази кә у гӧрʹа wан бькә. Әwи әw йәк дькьр нә кӧ чьмки борщдар бу, ле әwи бь рʹастийе дьхwаст дьле де-баве хwә ша кә. Ләма жи, чахе де-баве wи qәдәхә кьрьн кӧ әw тʹәви Шәʹдед Йаһоwа һин бә, һьнге wирʹа гәләк чәтьн бу кӧ wанрʹа бежә wәки әwи сафи кьрийә һәрʹә сәр щьвате. Таро гьли дькә: «Әwана ӧса зәʹф һерс кʹәтьн кӧ бь сала изьна мьн тʹӧнә бу кӧ һәрʹьмә мал. Мьн бона мерхасийе дӧа дькьр кӧ мьн ча сафи кьрийә ӧса бькьм. Ньһа әwана һьндава мьн нәрм бунә, у әз дькарьн тʹьме һәрʹьмә мал». (Бьхунә Мәтʹәлок 29:25.)

18. Жь wе тʹемайе wә чь кʹар станд?

¹⁸ Wәрә әм жи Мина Даwьд, Йонатʹан, у Һуша, Йаһоwарʹа амьнийа хwә избат кьн. У wәрә әм хwәрʹа дәрсе һьлдьн жь Абнәр у Абшалом. Бәле әм дьхwазьн мина Даwьд хwә ль Йаһоwа бьгьрьн. Чьмки әм мәрьве гӧнәкʹар ьн, әм нькарьн хwә жь һʹәму шашийа хwәй кьн. Ле бәле, әм йәкә дькарьн амьнийа хwә Йаһоwарʹа избат кьн, у бәре әʹwльн wирʹа амьн бьминьн.