Гәло Йаһоԝа ԝе Щаба Дӧайед Мьн Бьдә?

1-2. Щарна әм чьрʹа дьфькьрьн, ԝәки Йаһоԝа щаба дӧайед мә надә?

«БЬРА Хӧдан шабуна тә бә, Әԝе хԝәстьнед дьле тә бьдә тә» (Зәбур 37:4). Чь созәки хԝәш ә! Ле гәло әм дькарьн һивийе бьн, кӧ Йаһоԝа ԝе дәрберʹа щаба дӧайе мә бьдә у хԝәстьна мә бинә сери? Гәло әв пьрс чьрʹа фәрз ә? Ԝәрә әм дина хԝә бьдьнә чәнд мәсәла. Хушкәкә азәп дьхԝазә һәрʹә Мәкʹтәба бона Мьзгинванед Пʹадшатийе у сәва ве йәке дӧа дькә. Ле чәнд сал дәрбаз дьбьн у әԝ һәла һе найе тʹәглифкьрьне. Бьраки щаһьл жь Йаһоԝа рʹәща дькә, кӧ жь нәхԝәшикә гьран ԛәнщ бә, ԝәки бькарьбә щьватеда дьһа зедә хьзмәте кә. Ле сьһʹәт-ԛәԝата ԝи баш набә. Де-бав дӧа дькьн, кӧ зарʹед ԝан рʹастийеда бьминьн, ле зарʹәкә ԝан рʹастийе дьһелә.

² Дьԛәԝьмә тә жи жь Йаһоԝа тьштәк рʹәща кьрийә, ле хԝәстьна тә һе нәһатийә сери. Ләма жи, дьбәкә тӧ дьфькьри кӧ Йаһоԝа щаба дӧайед кәсед дьн дьдә, ле йа тә надә. Йан жи дьбәкә тӧ дьфькьри, ԝәки тә тьштәк нәрʹаст кьрийә. Хушкәкә бь наве Щенисb ӧса дьфькьри. Әԝе у мере ԝе дӧа дькьрьн, ԝәки Бәйтʹәледа хьзмәт кьн. Әԝ дьбежә: «Әз баԝәр бум, кӧ ԝе зу мә тʹәглифи Бәйтʹәле кьн». Ле гәләк сал дәрбаз бун у әԝана нәһатьнә тʹәглифкьрьне. Щенис дьбежә: «Әз хәмгин бум у тʹәв ль һәв бум. Әз дьфькьрим кӧ чьрʹа Йаһоԝа жь мьн рʹази нинә. Мьн гәләк щар дәрһәԛа ве хԝәстьна хԝә жерʹа дӧа дькьр. Әԝи чьрʹа щаба дӧайе мьн нәдьда?»

3. Ве готареда әме чь пебьһʹәсьн?

³ Щара дьбәкә әм дӧдьли дьбьн, кӧ Йаһоԝа дӧайед мә дьбьһе. Ԝәʹде бәре, һьнә меред амьн жи ԝе йәкеда дӧдьли дьбун (Ибо 30:20; Зәбур 22:2; Һәбаԛуԛ 1:2). Ле тӧ чьрʹа дькари баԝәр би, кӧ Йаһоԝа дӧайед тә дьбьһе? (Зәбур 65:2) Сәва кӧ щаба ве йәке бьстиньн, әме дина хԝә бьдьнә ван пьрса: (1) Әм дькарьн жь Йаһоԝа һивийа чь бьн? (2) Йаһоԝа дьхԝазә кӧ әм чь бькьн? (3) Чьрʹа дьбәкә лазьм бә кӧ әм һьнә хԝәстьнед хԝә бьгӧһезьн?

ӘМ ДЬКАРЬН ЖЬ ЙАҺОԜА ҺИВИЙА ЧЬ БЬН?

4. Ль гора Йерәмйа 29:12, Йаһоԝа чь соз дайә?

⁴ Йаһоԝа соз дьдә кӧ әԝе дӧайед мә бьбьһе (Бьхунә Йерәмйа 29:12). Хԝәдайе мә хьзмәткʹаред хԝәйә амьн һʹәз дькә, ләма жи әԝе дӧайед ԝан тʹӧ щар пьшт гӧһе хԝәва нәвежә (Зәбур 10:17; 37:28). Ле әв найе һʹәсабе кӧ әԝе һʹәму хԝәстьнед мә бинә сери. Сәва кӧ һьнә хԝәстьнед мә бенә сери, дьԛәԝьмә лазьм бә, кӧ әм һʹәта дьнйа тʹәзә һивийе бьн.

5. Гава Йаһоԝа дӧайед мә дьбьһе, әԝ дина хԝә дьдә чь? Шьровәкә.

⁵ Йаһоԝа дина хԝә дьде, кӧ хԝәстьнед мә ча нета ԝива гьредайи нә (Ишайа 55:8, 9). Нета ԝи әԝ ә, кӧ дьне бь мәрьвед ӧса тʹьжә кә, йед кӧ гӧһ дьдьнә ԝи у сәрԝертийа ԝи. Ле Мире-щьна дьфькьрә, һәрге мәрьв сәрԝертийе бькьн, һʹале ԝан ԝе дьһа баш бә (Дәстпебун 3:1-5). Сәва кӧ дәрәԝе Мире-щьна әʹйан буйа, Йаһоԝа изьн да, ԝәки мәрьв сәрԝертийе бькьн. Ле бь рʹасти сәрԝеред дьне, бунә сәбәбед гәләк проблема, рʹасти кʹижана кӧ әм иро тен (Ԝаиз 8:9). Әм заньн, кӧ Йаһоԝа ԝе ньһа һʹәму проблемед дьнйайе сафи нәкә. Һәрге әԝ ӧса бькә, дьбәкә һьнә мәрьв бьфькьрьн, ԝәки сәрԝеред дьне дькарьн кӧл-дәрда бьдьнә һьлдане.

6. Чьрʹа әм гәрәке баԝәр бьн, ԝәки Йаһоԝа ԝе һәр тьшти ль гора һʹәзкьрьн у һәԛийе сафи кә?

⁶ Йаһоԝа дькарә бь щурʹә-щурʹә метода щаба дӧайед мә бьдә. Мәсәлә, гава Һьзԛийа Пʹадша гьран нәхԝәш бу, әԝи жь Йаһоԝа лава дькьр, кӧ ԝи ԛәнщ бькә. Паше Йаһоԝа щаба ԝи да у ԝи ԛәнщ кьр (2 Пʹадшати 20:1-6). Жь алийе дьнва, гава Паԝлосе шанди жь Хԝәде рʹәща кьр, кӧ «дәрзике» жь бәдәна ԝи дәрхә, Йаһоԝа әԝ ԛәнщ нәкьр, дьԛәԝьмә хԝәстьна ԝи әв бу, кӧ жь нәхԝәшике ԛәнщ буйа (2 Корьнтʹи 12:7-9). Ӧса жи, дина хԝә бьдьнә мәсәла Аԛуб у Пәтрусе шанди. Һеродәс Пʹадша дьхԝәст ԝана бькӧшта. Хушк-бьред щьвате һьм бона Пәтрус һьм жи бона Аԛуб дӧа дькьрьн. Пәтрус һатә хьлазкьрьне, ле Аԛуб һатә кӧштьне (Кʹаред Шандийа 12:1-11). Дьбәкә әм бьфькьрьн, гәло чьрʹа Йаһоԝа Пәтрус хьлаз кьр, ле Аԛуб хьлаз нәкьр?» Кʹьтеба Пироз дәрһәԛа ве йәке тьштәки набежә.c Ле әм дькарьн баԝәр бьн, кӧ «нәһәԛи» щәм Йаһоԝа тʹӧнә йә (Ԛануна Дӧщари 32:4). Әм заньн ԝәки Йаһоԝа ча жь Пәтрус ӧса жи жь Аԛуб рʹази бу (Әʹйанти 21:14). Щарна Йаһоԝа щаба дӧайед мә ӧса надә, чаԝа кӧ әм дьхԝазьн. Ле әм баԝәр ьн, кӧ Йаһоԝа һәр тьшти тʹьме ль гора һʹәзкьрьн у һәԛийе дькә, ләма жи гава әԝ щаба дӧайед мә бь щурʹәки дьн дьдә, әм бәр хԝә накʹәвьн (Ибо 33:13).

7. Әм гәрәке чь нәкьн у чьрʹа?

⁷ Әм гәрәке һʹале хԝә бәрамбәри һʹале кәсед дьн нәкьн. Мәсәлә, дьԛәԝьмә әм Йаһоԝарʹа дӧа дькьн кӧ али мә бькә, ле дәрде мә сьвьк набә. Паше, әм педьһʹәсьн ԝәки кәсәки дьн жи бона ԝи тьшти дӧа кьрийә у ӧса те кʹьфше кӧ Йаһоԝа проблема ԝи сафи кьрийә. Хушкәкә бь наве Анна рʹасти дәрәщәкә ӧса һатьбу. Әԝе дӧа дькьр ԝәки мере ԝе Метйу жь кансәре ԛәнщ бә. Ԝи чахи кансәра дӧ хушкед әʹмьрда мәзьн жи һәбу. Аннайе сәва Метйу у һәр дӧ хушка гәләк дӧа дькьр. Хушк ԛәнщ бун, ле мере ԝе мьр. Серида Анна дьшьрмиш дьбу, гәло Йаһоԝа әԝ һәрд хушк ԛәнщ кьр, йан на? Һәрге әре, чьрʹа Әԝи дӧайед ԝе нәбьһист у мере ԝе ԛәнщ нәкьр? Һәмьки әм ньзаньн, кӧ әԝ дӧ хушк чьрʹа ԛәнщ бун. Ле әм заньн, ԝәки Йаһоԝа Хԝәде ԝе һʹәму еш у дәрдед мә бьдә һьлдане, у әԝ жь дьл дьхԝазә достед хԝә жь мьрьне рʹакә (Ибо 14:15).

8. (а) Ль гора Ишайа 43:2, Йаһоԝа чаԝа али мә дькә? (б) Гава әм рʹасти тәнгасийед гьран тен, дӧа чаԝа дькарә али мә бькә? (Бьньһерʹьн видео бь наве Дӧа Али Мә Дькә, кӧ Тәйах кьн.)

⁸ Йаһоԝа ԝе тʹьме али мә бькә. Баве мәйи дьлован, Йаһоԝа, нахԝазә кӧ әм еше бькʹьшиньн (Ишайа 63:9). Диса жи, әԝ мә жь һʹәму тәнгасийа напʹарезә. Тәнгасийед мә дькарьн мина чʹәм йан жи алава агьр сәр мәда бен (Бьхунә Ишайа 43:2). Ле Хԝәде соз дайә, кӧ ԝе али мә бькә, ԝәки әм бькарьбьн һьмбәри тәнгасийед хԝә сәбьр кьн. Әԝе ԛә изьне нәдә, ԝәки тәнгаси зьрарәкә мәзьн бьдьнә мә. Ӧса жи, Йаһоԝа бь сайа рʹӧһʹе пироз ԛәԝате дьдә мә, кӧ әм сәбьр кьн (Луԛа 11:13; Филипи 4:13). Бәле, сәва кӧ әм сәбьр кьн у Хԝәдерʹа амьн бьминьн, әм дькарьн жь дьл баԝәр бьн, ԝәки Әԝе һәр тьште кӧ мәрʹа лазьм ә, бьдә мә.d

ЙАҺОԜА ДЬХԜАЗӘ КӦ ӘМ ЧЬ БЬКЬН?

9. Ль гора Аԛуб 1:6, 7, чьрʹа әм гәрәке баԝәр бьн, кӧ Йаһоԝа ԝе али мә бькә?

⁹ Йаһоԝа дьхԝазә кӧ әм итʹбарийа хԝә ԝи биньн (Ибрани 11:6). Щарна дәрдед мә бечʹарә тенә кʹьфше. Дьԛәԝьмә шьк дькʹәвә дьле мә, гәло Йаһоԝа ԝе али мә бькә йан на. Ле Кʹьтеба Пироз дьбежә, ԝәки бь ԛәԝата Хԝәде, әм дькарьн «сәр сурарʹа» банздьн (Зәбур 18:29). Ләма жи дәԝса кӧ әм дӧдьли бьн, әм гәрәке жь дьл дӧа бькьн у баԝәр бьн, кӧ Йаһоԝа ԝе щаба дӧайед мә бьдә (Бьхунә Аԛуб 1:6, 7).

10. Әм чаԝа дькарьн ль гора дӧайед хԝә кʹар бькьн? Мәсәле биньн.

¹⁰ Йаһоԝа дьхԝазә кӧ әм ль гора дӧайед хԝә кʹар бькьн. Мәсәлә, бьраки мә Йаһоԝарʹа дӧа дькә, ԝәки сәркʹаре хәбате изьне бьдә ԝи, кӧ һәрʹә сәр щьвата мәзьн. Йаһоԝа чаԝа дькарә щаба дӧайе ԝи бьдә? Әԝ дькарә мерхасийе бьдә бьре мә, кӧ сәркʹаре хԝәрʹа дәрһәԛа ве йәке хәбәр дә, ле бьре мә гәрәке хԝәха һәрә щәм сәркʹаре хԝә у хԝәстьна хԝә жерʹа бежә. Дьԛәԝьмә лазьм бә, ԝәки әԝ гәләк щар изьне жь ԝи бьхԝазә. Дьбәкә бьре мә сәркʹаре хԝәрʹа бежә, ԝәки әԝ дькарә рʹожәкә дьн бьхәбьтә, йан жи һәрге лазьм бә, әԝ дькарә ԝи ԝәʹдәйи гава һәрʹә сәр щьвата мәзьн, һәԛе хԝә нәстинә.

11. Чьрʹа әм гәрәке бәрдәԝам кьн бона хәмед хԝә дӧа бькьн?

¹¹ Йаһоԝа дьхԝазә кӧ әм бәрдәԝам кьн бона хәмед хԝә дӧа бькьн (1 Тʹесалоники 5:17). Жь гьлийед Иса те кʹьфше, кӧ дьбәкә һьнә хԝәстьнед мә зу нәйенә сери (Луԛа 11:9). Ләма жи хирәта хԝә ӧнда нәкә! Тʹьме жь дьл дӧа бькә (Луԛа 18:1-7). Һәрге әм ӧса бькьн, Йаһоԝа ԝе бьвинә кӧ әв йәк бона мә гәләк фәрз ә. Ӧса жи әме избат кьн, кӧ әм хԝә дьсперьн аликʹарийа Йаһоԝа.

ЧЬРʹА ДЬБӘКӘ ЛАЗЬМ БӘ КӦ ӘМ ҺЬНӘ ХԜӘСТЬНЕД ХԜӘ БЬГӦҺЕЗЬН?

12. (а) Дәрһәԛа хԝәстьнед хԝә, әм дькарьн чь жь хԝә бьпьрсьн, у чьрʹа? (б) Әм ча дькарьн избат бьн, кӧ дӧайед мә һӧрмәте дьдьнә Йаһоԝа? (Бьньһерʹә чаргошә «Гәло Хԝәстьнед Мьн Һӧрмәте Дьдьнә Йаһоԝа?».)

¹² Һәрге әм щаба дӧайе хԝә настиньн, әм дькарьн се пьрса бьдьнә хԝә. Йа йәке: Гәло әз бона тьштед рʹаст дӧа дькьм? Гәләк щар, әм дьфькьрьн кӧ әм заньн тьште һәри баш бона мә чь йә. Ле дьԛәԝьмә әв хԝәстьна мә бона кʹара мә нинә. Дьбәкә әм дьфькьрьн кӧ әм сафикьрьна проблемәке заньн у бона ԝе йәке дӧа дькьн. У дьԛәԝьмә һьнә тьштед кӧ әм дьхԝазьн, нә ль гора нета Йаһоԝа нә (1 Йуһʹәнна 5:14). Ԝәрә әм дина хԝә бьдьнә мәсәла де у бавәки, дәрһәԛа кʹижана кӧ мә жоре гот. Ԝана жь Йаһоԝа лава дькьр, кӧ зарʹед ԝан хԝә ль рʹастийе бьгьрьн. Рʹаст ә әв хԝәстьнәкә баш ә, ле Йаһоԝа зоре тʹӧ кәси накә, ԝәки жерʹа хьзмәт кә. Әԝ дьхԝазә ԝәки һәр кәс, һәла һе зарʹед мә жи, жь дьл ԝирʹа хьзмәт кьн (Ԛануна Дӧщари 10:12, 13; 30:19, 20). Ләма жи де-бав дькарьн жь Йаһоԝа лава кьн, ԝәки хәбәра Ԝи бьгьһижә дьлед зарʹед ԝан. Бь ви щурʹәйи, әԝана дькарьн али зарʹед хԝә бькьн, кӧ Йаһоԝа һʹәз бькьн у бьбьнә достед ԝи (Мәтʹәлок 22:6; Әфәси 6:4).

13. Ль гора Ибрани 4:16, Йаһоԝа ԝе кʹәнге али мә бькә? Мәсәле биньн.

¹³ Пьрса дӧда: Гәло ньһа ԝәʹде рʹаст ә, кӧ Йаһоԝа хԝәстьна мьн бинә сери? Дьԛәԝьмә әм дьфькьрьн, кӧ әм гәрәке зу щаба дӧайед хԝә бьстиньн, ле бь рʹасти Йаһоԝа ԝәʹде һәри баш али мә дькә (Бьхунә Ибрани 4:16). Һәрге әм щаба дӧайед хԝә зу нәстиньн, дьԛәԝьмә әм бьфькьрьн, кӧ Йаһоԝа дьбежә ‹На›. Ле бь рʹасти әԝ дьбежә ‹Һәла һе на›. Ньһа ԝәрә әм дина хԝә бьдьнә, мәсәла бьре нәхԝәш, йе кӧ дьхԝәст ԛәнщ бә. Һәрге Йаһоԝа ԝи бь кʹәрәмәти ԛәнщ кьра, Мире-щьна дькарьбу бьгота, кӧ әԝ бона ԛәнщийа Йаһоԝа, амьнийе хԝәй дькә (Ибо 1:9-11; 2:4). Йаһоԝа ԝәʹдә кʹьфш кьрийә, кӧ һʹәму нәхԝәшийа бьдә һьлдане (Ишайа 33:24; Әʹйанти 21:3, 4). Һʹәта әԝ рʹож бе, әм нькарьн һивийа кʹәрәмәта бьн. Ләма жи бьре мә дькарә жь Йаһоԝа ԛәԝат у дьлрʹьһʹәтийе бьхԝазә, ԝәки әԝ һәр гав сәбьр кә у бь амьни Ԝирʹа хьзмәт кә (Зәбур 29:11).

14. Тӧ жь сәрһатийа Щенисе чь һин буйи?

¹⁴ Сәрһатийа Щенисе диса бинә бира хԝә. Әԝе бона хьзмәтийа Бәйтʹәле дӧа дькьр. Пенщ сал шунда, әԝе фәʹм кьр, кӧ Йаһоԝа чаԝа щаба дӧайе ԝе дабу. Әԝ дьбежә: «Ԝе дәме, Йаһоԝа әз һин дькьрьм кӧ бьбьмә хьзмәткʹарәкә гьһишти. Лазьм бу кӧ әз һе зедә итʹбарийа хԝә ԝи биньм у бь хирәт лекʹолина шәхси бькьм. Мьн фәʹм кьр, ԝәки шабуна мьн дәрәщед жийинева гьредайи нинә». Паше, Щенис у мере ԝе чаԝа бәрпьрсийаре мьһале һатьнә кʹьфшкьрьне. Иро Щенис дьбежә: «Йаһоԝа щаба дӧайед мьн да, ле нә бь ви щурʹәйи кӧ әз һивийе бум. Гәләк ԝәхт мьнрʹа лазьм бу, сәва кӧ фәʹм бькьм, ԝәки щаба Йаһоԝа бона кʹара мьн бу. Әз бона һʹәзкьрьн у дьлованийа Йаһоԝа гәләк рʹази мә».

15. Чьрʹа щара ԝе баш бә дӧайед хԝәда конкрет нибьн? (Бьньһерʹә ӧса жи шькьл.)

¹⁵ Пьрса сьсийа: Гәло әз гәрәке бона тьштед дьн жи дӧа бькьм? Һәмьки тьштәк хьраб ве йәкеда тʹӧнә йә, кӧ конкрет Йаһоԝарʹа дәрһәԛа хԝәстьнед хԝә бежьн. Ле щарна дьһа баш ә, ԝәки әм дӧайед хԝәда конкрет нәбежьн, кӧ Йаһоԝа чь у ча гәрәке бькә, ԝәки щаба мә бьдә. Бь ви щурʹәйи әме тедәрхьн, кӧ нета Йаһоԝа бона мә чь йә. Ԝәрә әм ньһа дина хԝә бьдьнә мәсәла хушка азәп, йа кӧ дьхԝәст һәрʹә Мәкʹтәба бона Мьзгинванед Пʹадшатийе. Әԝе дьхԝәст һәрʹә щики ӧса, кʹидәре дьһа зедә мьзгинван лазьм бун. Ләма жи, әԝ дькарә һьм бона һинбуне һьм жи бона кӧ һе зедә хьзмәт кә, дӧа бькә (Кʹаред Шандийа 16:9, 10). Паше, әԝ дькарә ль гора дӧайед хԝә кʹар бькә у жь бәрпьрсийаре мьһале бьпьрсә, кӧ кʹижан щьвата незикда дьһа зедә пешәнг лазьм ьн. Йан жи, әԝ дькарә филиалерʹа бьньвисә у бьпьрсә кʹидәре дьһа зедә мьзгинван лазьм ьн.e

16. Әм чьда дькарьн баԝәр бьн?

¹⁶ Чаԝа мә дит, әм дькарьн баԝәр бьн ԝәки Йаһоԝа ԝе щаба дӧайед мә бь дьловани у һʹәзкьрьне бьдә (Зәбур 4:3; Ишайа 30:18). Щарна дьбәкә әм хут ве щабе нәстиньн, йа кӧ һивийе нә. Ле Йаһоԝа ԝе тʹӧ щар дӧайед мә пьшт гӧһе хԝә нәвежә. Әԝ мә гәләки һʹәз дькә у ԝе тʹӧ щар мә нәһелә (Зәбур 9:10). Ләма жи «тʹьме Ԝида гӧман бьн» у «Ԝирʹа дьле хԝә вәкьн»(Зәбур 62:8).