Хwәде йед Амьн Qәбул Дькә

1, 2. Йәфтаһ у qиза wи рʹасти чь чәтьнайе һатьн?

МӘʹНИЙА хәмгинийе ида тʹӧнә. Ньһа дьле wе рʹьһʹәт ә, чьмки әwе дит кӧ баве wе Йәфтаһ сах-сьламәт жь шәрʹ вәгәрʹийа. Әw qизьк дьчә пешийа баве хwә у жь шабуне дәстпедькә бьрʹәqьсә у бьстьре. Ле баве wе дәwса кӧ тʹәви wе ша бә, кʹьнща сәр хwә дьqәльшинә у дькә qарʹин: «Һәй wах qиза мьн, тә пьшта мьн хwар кьр». Паше әw qиза хwәрʹа гьлийе ӧса дьбежә, кʹижан кӧ әʹмьре wе дьгӧһезьн, у нет у хwәстьнед wе һьлдьшиньн. Ле йәкә, qизьк бь дьл щаба баш дьдә баве хwә. Әw баве хwә һелан дькә кӧ әwи ча соз дайә Йаһоwа, бьра ӧса жи бькә. Гьлийед wе әʹйан дькьн баwәрийа wейә qәwи. Әwе итʹбарийа хwә Йаһоwа дьани, wәки әw чь жи жь wе бьхwазә бона wе һәрә баш ә (Һʹакьм. 11:34-37). Баве wе Йәфтаһ wерʹа фьрнаq дьбә, чьмки әw занә qиза wи һазьр ә пьштгьрийа сонда wи бькә, у әw йәк wе Йаһоwа хwәш бе.

² Йәфтаһ у qиза wийә хwәдехоф, һʹәму тьштида итʹбарийа хwә Йаһоwа дьанин, һәла һе чахе wанрʹа чәтьн бу жи. Әwана сәд сәләфи баwәр бун кӧ qәбулкьрьна Хwәде жь һәр qӧрбане qимәттьр ә.

3. Чьрʹа мәсәла Йәфтаһ у qиза wи дькарьн иро али мә бькьн?

³ Бәле, әм заньн кӧ тʹьме һеса нинә Йаһоwарʹа амьн бьминьн. Бь рʹастийе, әм гәрәке бона «баwәрийа» хwә «шәрʹе хwә бькьн» (Щьһуд. 3). Ве йәкеда wе али мә бькә мәсәла Йәфтаһ у qиза wи. Wәрә әм шеwьр кьн кӧ wана чь чәтьнайи дәрбаз кьрьн, у ча әwана Йаһоwарʹа амьн ман.

АМЬН БЬМИНЬН ВЕ ДЬНЙА ХЬРАБДА

4, 5. а) Йаһоwа кʹижан тʹәми да Исраелийа, чахе әwана кʹәтьнә Әʹрде Создайи? б) Ль гора Зәбур 106, ча бу ахьрийа Исраелийа чьмки wана гӧрʹа Хwәде нәкьр?

⁴ Дьqәwьмә Йәфтаһ у qиза wи тʹьме дьанин бира хwә, кӧ чаwа Исраели нәамьн ман Йаһоwарʹа у ләма ахьрийа wан хьраб бу. Wәкә 300 сал пешда, калбавед wан жь Хwәде тʹәми стандьн, кӧ Әʹрде Создайида qьрʹа һʹәму пʹутпʹарьста биньн (Qан. Дщр. 7:1-4). Ле Исраелийа гӧрʹа Хwәде нәкьрьн. У гәләк жь wан чʹәʹв данә Кәнанийа, кʹижан кӧ хӧданед qәлп дьһʹәбандьн, у бенамуси дькьрьн. (Бьхунә Зәбур 106:34-39.)

⁵ Жь бо ве йәке, wана qәбулкьрьна Хwәде у хwәйкьрьна wи ӧнда кьрьн (Һʹакьм. 2:1-3, 11-15; Зәб. 106:40-43). Бь рʹастийе, wәʹде wан салед чәтьн, чьqас чәтьн бу кӧ Исраелийед хwәдехоф амьн бьмана Йаһоwарʹа! Ле Кʹьтеба Пироз гьли дькә, кӧ wи wәʹдәйида һәбун мәрьвед амьн, мәсәлә Йәфтаһ у qиза wи, ӧса жи Әлкана, Һанна, у Самуйел. Wана гьшка дьхwаст qәбулкьрьна Хwәде бьстиньн (1 Сам. 1:20-28; 2:26).

6. Чь ньһерʹандьн иро һәнә ве дьнйайеда, у әм гәрәке чь бькьн сәва кӧ хwә хwәй кьн?

⁶ Әм дьжин ве дьнйайеда, кʹидәре кӧ мәрьв мина wан Кәнанийа дьфькьрьн у дькьн. Чаwа бәре, иро жи мәрьв тʹәне дәрһәqа сексе, зорбәтийе, у һәбуне дьфькьрьн. Ле Йаһоwа тʹәми у ширәта дьдә мә, чаwа дьда Исраелийа, сәва кӧ әм хwә жь wан тьшта хwәй кьн. Әм гәрәке жь шашийед Исраелийа хwәрʹа дәрсе һьлдьн (1 Корн. 10:6-11). Әм гәрәке хwә дур бьгьрьн жь wан фькьр у кьред ве дьнйайе хьраб (Рʹом. 12:2). Ле әм бона ве йәке чь дькьн?

АМЬН БЬМИНЬН ЧАХЕ НӘҺӘQИЙЕ WӘ ДЬКЬН

7. а) Щьмәʹта Йәфтаһ чь нәһәqи wи дькьрьн? б) Wан дәрәщада Йәфтаһ ча хwә да кʹьфше?

⁷ Wәʹде Йәфтаһда, щьмәʹта Исраел гӧрʹа Йаһоwа нәкьрьн, ләма жи кʹәтьнә бьн дәсте Фьльстина у Амонийада, у дьһатьнә дьзерандьн (Һʹакьм. 10:7, 8). Ле проблема Йәфтаһ тʹәне әw тәнгасийа жь дьжмьна нибу. Бьред Йәфтаһ у рʹуспийед Исраели нәһәqи wи дькьрьн. Ниве бьрайед wи жь бо чʹәʹвнәбарийе у нәфрʹәтийе бәри wи дан. Һьн жи wана беqануни же стандьн мьлкʹе кӧ wирʹа дькʹәт ча ньхӧри (Һʹакьм. 11:1-3). Ле Йәфтаһ изьн нә да, кӧ әw нәһәqийа һьндава wи ньһерʹандьна wи хьраб кьн. Әw йәк бь кьред wи дьһатә кʹьфше. Мәсәлә, рʹаст ә рʹуспийед щьмәʹте нәһәqи Йәфтаһ кьрьн, ле йәкә чахе wана аликʹари жь wи хwастьн, әwи али wан кьр (Һʹакьм. 11:4-11). Ле гәло чь Йәфтаһ һелан дькьр кӧ хwә кʹьфш кә чаwа мәрьвәки рʹӧһʹани?

8, 9. а) Дьбәкә кʹижан принсипед Qануна Мусада али Йәфтаһ кьрьн? б) Бона Йәфтаһ чь һе фәрз бу?

⁸ Йәфтаһ әскәрәки qәwи бу. Һьн жи әwи жь дирока Исраеле заньбу, кӧ Йаһоwа ча бу һьндава щьмәʹта Хwәда. Бь ве йәке әw һин бу тедәрхә, кӧ бәр чʹәʹве Йаһоwа чь рʹаст ә у чь нәрʹаст ә (Һʹакьм. 11:12-27). Принсипед Хwәде кӧ һʹиме Qануна Муса бун, һʹӧкӧм дьбун сәр ньһерʹандьн у дьле Йәфтаһ. Әwи заньбу кӧ Йаһоwа хwәш найе чахе мәрьв кʹине дажо, чьмки Хwәде жь щьмәʹта Хwә дәʹwа дькьр кӧ әwана һәвдӧ һʹьз бькьн. Qанун ӧса жи һин дькьр кӧ мәрьв гәрәке пьштгӧһе хwәва нәвежә һʹәwщед мәрьвед дьн, у һәла һе wи мәрьви жи кʹе wи нәфрʹәт дькә. (Бьхунә Дәркʹәтьн 23:5; Qануна Кʹаһинтийе 19:17, 18.)

⁹ Дьqәwьмә мәсәла Усьв жи һʹӧкӧм дьбу сәр Йәфтаһ. Усьв мәрьвәки амьн бу. У әw рʹәʹм бу һьндава бьред хwә, йед кӧ wи нәфрʹәт дькьрьн (Дәстп. 37:4; 45:4, 5). Дьбәкә Йәфтаһ дьфькьри сәр мәсәлед wи щурʹәйи, у әwе йәке али wи кьр тьштед ӧса бькә, чь кӧ Йаһоwа хwәш те. Бешьк, бьред Йәфтаһ дьле wи гәләк ешандьн, ле йәкә әwи диса бәрдәwам дькьр Йаһоwарʹа хьзмәт бькә у али щьмәʹта хwә бькә (Һʹакьм. 11:9). Бона Йәфтаһ һе фәрз әw бу наве Йаһоwа һӧрмәт бә, нә кӧ бькʹәвә һʹәйра проблемед хwә. Әwи qәwи сафи кьрьбу Йаһоwарʹа амьн бьминә, у әве йәке һьн wирʹа у һьн жи мәрьвед дьнрʹа кʹар дьани (Ибрн. 11:32, 33).

10. Ча принсипед Хwәде дькарьн али мә бькьн кӧ әм Мәсиһийед баш бьн?

¹⁰ Ле әм жь мәсәла Йәфтаһ чь дәрсе хwәрʹа һьлдьдьн? Әм жи гәрәке мина Йәфтаһ принсипед Хwәде бьдьнә хәбате, сәва нәкʹәвьнә һʹәйра чәтьнайед хwә. Дьбәкә хушк-бьред щьватеда дьле мә ешандьнә йан нәһәqи мә кьрьнә. Һәрге ӧса нә, әм гәрәке сәва ве йәке щьватед хwә бәрнәдьн у хьзмәткьрьна хwә Йаһоwарʹа нәдьн сәкьнандьн. Ӧса әме мәсәла баш бьн бона йед дьн (Рʹом. 12:20, 21; Колс. 3:13).

ЧАХЕ ӘМ ҺАЗЬР ЬН QӦРБАНА БЬКЬН БАWӘРИЙА МӘ ТЕ КʹЬФШЕ

11, 12. Йәфтаһ чь сонд хwар, у сонда wи чь дьһатә һʹәсабе?

¹¹ Йәфтаһ фәʹм дькьр wәки бей аликʹарийа Йаһоwа, әw wе нькарьбә Исраеле жь Амонийа хьлаз кә. Ләма әwи соз дабу Йаһоwа, wәки һәрге Йаһоwа ӧса бькә кӧ әw сәркʹәвә, әw чахе жь шәрʹ вәгәрʹә, wе wи кәси бькә qӧрбан ча «пʹешкʹеша шәwьтандьне», кʹижан кӧ пешийе жь мала wи дәркʹәвә (Һʹакьм. 11:30, 31). Ле гәло әw пʹешкʹеш чь дьһатә һʹәсабе?

¹² Йаһоwа нәфрʹәт дькә wе йәке чахе мәрьва дькьнә qӧрбан. Демәк, әʹйан ә кӧ готьна Йәфтаһ әw нибу, кӧ рʹасти кәсәки бькә qӧрбан (Qан. Дщр. 18:9, 10). Пе Qануна Муса пʹешкʹеша шәwьтандьне бь тʹәмами Йаһоwарʹа дькʹәт. Ләма, бь рʹастийе Йәфтаһ дьхwаст бьгота, wәки әwе wи мәрьви бь тʹәмами тʹәсмили Хwәде бькә сәва wирʹа хьзмәт кә. Әw сонд дьһатә һʹәсабе, кӧ әw мәрьв тʹәмамийа әʹмьре хwәда коне Йаһоwада хьзмәт бькә. Йаһоwа сонда wи qәбул кьр, у әw кʹәрәм кьр. Әw шәрʹда сәркʹәт у qьрʹа дьжмьнед хwә ани (Һʹакьм. 11:32, 33). Ле wе кʹе бьбуйа чаwа «пʹешкʹеша шәwьтандьне» бона Хwәде?

13, 14. Гьлийед Йәфтаһ кʹьтеба Һʹакьмти 11:35-да, ча баwәрийа wи әʹйан дькьн?

¹³ Биньн бира хwә дәрәща дәстпека ве тʹемайе. Чахе Йәфтаһ жь шәрʹ вәгәрʹийа, пешийе qиза wийә һʹьзкьри, зарʹа wийә тайе тʹәне жь мал дәркʹәт у һатә пешийа wи! Ньһа Йәфтаһ те щерʹьбандьне у гәрәке бьжартьне бькә! Гәло әw wе сонда хwә хwәй кә, у wе qиза хwә бькә qӧрбан, wәки әw тʹәмамийа әʹмьре хwә конда хьзмәт бькә?

¹⁴ Бәле, диса принсипед Хwәде али Йәфтаһ кьрьн, wәки әwи сафикьрьна рʹаст кьр. Дьqәwьмә wәʹде сафикьрьне әwи ани бира хwә гьлийед жь Дәркʹәтьн 23:19. Wедәре щьмәʹта Хwәдерʹа һатә готьне, wәки әwана тʹьме йа лапә баш бьдьнә Йаһоwа. Qанунеда ӧса жи дьһатә готьне, wәки һәрге мәрьв сонд дьхwә, гәрәке әʹсә әwи сонди бинә сери. Qануне дьгот: «Гава мерәк ль бәр Хӧдан ад-qьрар бькә йан сонд бьхwә . . . , әw гәрә иди хәбәра хwә нәтʹәрʹьбинә, ле һәр тьшт чь кӧ жь дәве wи дәркʹәтийә, гәрәке бинә сери» (Жьмар 30:2, ПКʹМ). Йәфтаһ жи мина Һаннайа амьн, кʹижане дьбәкә wәʹде wида дьжит, гәрәке сонда хwә бьанийа сери. Ле әwи заньбу wәки әw сонд дьһатә һʹәсабе ахьрийа wи у qиза wи. Хенщи wе qизе, зарʹед wи тʹӧнә бун. Ләма тʹәне qиза wи карьбу рʹькʹьнйата wи бәрдәwам кьра, сәва наве wи хwәй бә, у бьбуйа хwәйе мьлкʹе wи Исраеледа (Һʹакьм. 11:34). Ле йәкә Йәфтаһ гьлийед ӧса гот: «Мьн жь Хӧданрʹа гот, еди әз нькарьм вәгәрʹьм» (Һʹакьм. 11:35). Йаһоwа qӧрбана Йәфтаһйә мәзьн qәбул кьр у әw кʹәрәм кьр. Ле тәйе ча бькьра дәрәща ӧсада?

15. Гәләка жь мә чь соз данә, у әм ча дькарьн амьн бьн кӧ әwи сози биньн сери?

¹⁵ Чахе әм хwә тʹәсмили Йаһоwа дькьн, әм соз дьдьнә wи wәки әме тʹьме qьрара wи биньн сери. У әм заньн кӧ сәва анәгори ви сози бьжин, лазьм ә тьштәки qӧрбан кьн. Ле һеса нинә әwе йәке бькьн. Чьмки щара дьбәкә жь мә бе хwәстьне кӧ тьштәки ӧса бькьн, чь мә хwәш найе. Чахе әм тьштед ӧса qӧрбан дькьн, у Хwәдерʹа ӧса хьзмәт дькьн кӧ накʹәвьнә һʹәйра комфорта хwә, бь ве йәке әм амьнийа хwә избат дькьн. Ле кʹәрәмед Хwәде тʹьме жь wан һʹәму qӧрбана кӧ әм дькьн мәзьнтьр ьн (Малх. 3:10). Ле әм чь дькарьн һин бьн жь qиза Йәфтаһ?

16. Qиза Йәфтаһ чахе пеһʹәсийа дәрһәqа сонда баве хwә, әwе ча хwә да кʹьфше? (Бьньһерʹә шькьле әʹwлн.)

¹⁶ Бона qиза Йәфтаһ һеса нибу сонда баве хwә qәбул кә. Әw сонд жь сонда Һаннайе щӧдә бу. Һаннайе сонд хwар кӧ кӧрʹе хwә тʹәсмил кә, wәки конда хьзмәт бькә чаwа Нәсир (1 Сам. 1:11). Изьна Нәсир һәбу кӧ бьзәwьщә у малбәта wи һәбә. Ле qиза Йәфтаһ «пʹешкʹеша шәwьтандьне» бу. Әwе гәрәке нә мер кьра, нә жи зарʹ бьанийа (Һʹакьм. 11:37-40). Әw qиза әскәре qәwи у сәроке Исраели бу, ләма әwе дькарьбу Исраеледа мәрьвәки гәләк баш бьстанда. Ле ньһа, әw гәрәке пʹарьстгәһеда хьзмәткʹара мьлук бә. Ле әwе qиза щаһьл хwә ча да кʹьфше? Әwе да кʹьфше кӧ хьзмәткьрьна хwә Хwәдерʹа дани щийе пешьн у готә баве хwә: «Баво тә жь Хӧданрʹа гот . . . , чаwа жь дәве тә дәркʹәтьбә, ӧса бькә» (Һʹакьм. 11:36). Әwе хwәстьнед хwәйә тʹәбийәти, кӧ мере wе у зарʹед wе һәбьн, да алики сәва кӧ Йаһоwарʹа хьзмәт кә. Ле әм ча дькарьн чʹәʹв бьдьнә wе, кӧ рʹӧһʹе хwәqӧрбанкьрьне бьдьнә кʹьфше?

17. а) Әм ча дькарьн чʹәʹв бьдьнә баwәрийа Йәфтаһ у qиза wи? б) Ча гьлийед жь Ибрани 6:10-12 wә һелан дькә кӧ qӧрбана бькьн?

¹⁷ Бь һʹәзара Мәсиһийед щаһьл qӧрбана дькьн бь ве йәке кӧ назәwьщьн йан мер накьн, йан жи йед кӧ зәwащеда ньн һе зарʹа найньн. Ле гәло чьрʹа әwана хwәстьнед хwә qӧрбан дькьн? Чьмки әwана дьхwазьн һе зедә Йаһоwарʹа хьзмәт бькьн. Йед әʹмьрда мәзьн жи qӧрбан дькьн wи wәʹдәйи, кʹижан кӧ дькарьн хәрщ кьн тʹәви зарʹед хwә у нәбийед хwә. Мәсәлә, әwана шьхӧлед авакьрьнеда кʹар дькьн, йан дәрбаз дьбьн Мәкʹтәба сәва Мьзгинванед Пʹадшатийе, у хьзмәт дькьн wан щийада кʹидәре һʹәwщәтийа Мьзгинвана һәйә. Һьнәк жи, шьхӧлед хwәйи шәхси дьдьнә алики, сәва wәʹде незикайа Евара Биранине, кампанийед хьзмәткьрьнеда кʹар бькьн. Әw хьзмәткьрьна wанә бь дьл у щан дьле Йаһоwа гәләк ша дькә. У Йаһоwа wе тʹӧ щар бир нәкә шьхӧлед wан у һʹьзкьрьна кӧ wана wирʹа данә кʹьфше. (Бьхунә Ибрани 6:10-12.) Ле тӧ дькари тьшта qӧрбан ки, wәки һе зедә Йаһоwарʹа хьзмәт бьки?

ӘМ ЧЬ ДӘРСА ҺИН БУНӘ

18, 19. Әм чь дәрсе һин бун жь Йәфтаһ у qиза wи, у әм ча дькарьн чʹәʹв бьдьнә wан?

¹⁸ Рʹаст ә чәтьнайед Йәфтаһ гәләк бун, ле йәкә әwи чахе бьжартьн дькьр, тʹьме рʹебәрийа Йаһоwа дьгәрʹийа, у ньһерʹандьна Йаһоwа һьлдьда һʹәсаб. Әwи хwә жь мәрьвед хьраб дур дьгьрт у нәдькʹәтә бәр байе wан. Йәфтаһ Хwәдерʹа һьнге жи амьн дьма, чахе йед дьн дьле wи дьешандьн. Йәфтаһ у qиза wи һазьр бун сәва Хwәде qӧрбанкьрьна бькьн, ләма жи Йаһоwа әwана кʹәрәм кьрьн. Йаһоwа әwана данә хәбате сәва һʹәбандьна тʹәмьз пешда бьвә. Һьнге, чахе мәрьвед дьн принсипед Хwәде һиштьн, Йәфтаһ у qиза wи тʹьме принсипед wи дьанин сери.

¹⁹ Кʹьтеба Пироз мә ширәт дькә wәки «чʹәʹв бьдьнә wан, йед кӧ бь баwәрийе у сәбьре созед Хwәде wар дьбун» (Ибрн. 6:12). Wәрә әм чʹәʹв бьдьнә Йәфтаһ у qиза wи, wәки тʹьме бира хwәда хwәй кьн, кӧ Хwәде йед амьн qәбул дькә.