Фәсал бә Чахе Тьшта Дьди Бәр Чʹәʹве Хwә Зандара

тедәрхьстьнә wәки тьштәки кӧ чапа wи wәкә 1.4 килограм ә, «гәрдунеда тьштәки лапи зор ә». Гәло әw чь йә? Әw һәйә мәжуйе мәрьва. Әw бь рʹастийе тьштәки әʹщеб ә. Чьqас зәʹф әм дәрһәqа ве педьһʹәсьн, әм һе гәләк рʹази дьбьн сәва кʹаред Йаһоwайи пʹьрʹ баш (Зәб. 139:14). Wәрә әм шеwьр кьн тʹәне дәрһәqа фәрәсәтәки, кӧ мәжуйе мә дькарә бькә, демәк әw фәрәсәт кӧ әм дькарьн тьшта бьдьнә бәр чʹәʹве хwә.

Ле әм ча дькарьн әви фәрәсәти бьдьнә хәбате? Мәсәлә, әм дькарьн «һʹьше хwәда бьдьнә бәр чʹәʹве хwә wан дәрәща йан нета, кʹижан кӧ бона мә тʹәзә у һʹәwас ьн, йан жи кʹижан мә тʹӧ щар сәр хwә тʹәхмин нәкьрийә». Әви фәрәсәти һун хwәха жи тʹьме дьдьнә хәбате, ӧса нинә? Мәсәлә, дьбәкә wә хwәндийә йан бьһистийә дәрһәqа щики, кʹижан wә тʹӧ щар нәдитийә. Ле тʹӧ тьшт wә нагьрә кӧ һʹьше хwәда wи щийи бьдьнә бәр чʹәʹве хwә. Бь рʹастийе, чахе әм дьфькьрьн дәрһәqа wан тьшта, кʹижан әм нькарьн бьвиньн, бьбьһен, тәʹм кьн, дәсте хwә бьдьне, йан бин кьн, wи чахи әм дьдьнә хәбате wи фәрәсәти кӧ дькарьн бьдьнә бәр чʹәʹве хwә.

Кʹьтеба Пироз али мә дькә кӧ әм фәʹм кьн у бьшекьриньн, wәки мәрьв дьлqе Хwәдеда һатьнә әʹфьрандьне (Дәстп. 1:26, 27). Гәло әw найе һʹәсабе кӧ щәм әʹфьрандаре мә Йаһоwа жи әw фәрәсәт һәйә, демәк әw жи дькарә тьшта бьдә бәр чʹәʹве хwә? Хwәде әм бь wи фәрәсәти әʹфьрандьнә, ләма жи әw һивийе йә wәки әм әви фәрәсәти бьдьнә хәбате сәва qьрара wи фәʹм кьн (Wаиз 3:11). Ле әм ча дькарьн әви фәрәсәти бь билани бьдьнә хәбате?

ФӘСАЛ БЬН ЧЬ У ЧЬЧАХ ДЬДЬНӘ БӘР ЧʹӘʹВЕ ХWӘ

1) Чахе wәʹде нәрʹастда хwәстьнед хwә дьдьнә бәр чʹәʹве хwә йан жи хwәстьнед нәрʹаст.

Чахе мәрьв хwәстьнед хwә дьдә бәр чʹәʹве хwә, ве йәкеда тьштәки хьраб тʹӧнә. Һьн жи һәнә избаткьрьн кӧ әw кʹаре жи тинә. Ле йәкә, Wаиз 3:1 али мә дькә кӧ әм фәʹм кьн, wәки «дәма һәр тьшти» һәйә. Демәк дьqәwьмә кӧ әм һьнә тьшта wәʹде нәбашда бькьн. Мәсәлә, һәрге wәʹде щьвате йан һинбуна шәхси әм тьшта дьдьнә бәр чʹәʹве хwә, һьнге фькьред мә дьрʹәвьн. Һун ча дьфькьрьн һьнге әw фәрәсәт кʹаре дьдә мә йан зьраре? Иса пешда әм ширәт кьрьн кӧ гәләк хоф ә чахе мәрьв һʹьше хwәда фькьред нәрʹаст пешда тинә, мәсәлә фантазийед бенамуси (Мәт. 5:28). Һьнә тьшт кʹижан дьбәкә әм изьне бьдьнә хwә кӧ бьдьнә бәр чʹәʹве хwә, дькарьн Йаһоwа хwәш нәйен. Фантазийед бенамуси дькарьн мә бәрбь кьред бенамуси бьвьн. Ләма жи, әм гәрәке qәwи сафи кьн, кӧ изьне нәдьнә хwә wәки һʹьше хwәда тьштед ӧса бьдьнә бәр чʹәʹве хwә, кʹижан дькарьн мә жь Йаһоwа дур хьн.

2) Чахе дьфькьрьн кӧ һәбун дькарә мә хwәй кә.

Пʹәрә у тьштед материали фәрз ьн у керһати нә. Ле һәрге әм бьфькьрьн кӧ хwәйкьрьна мә у бәхтәwарийа мә һәбукева у пʹәрәва гьредайи йә, әме әʹсә дьлтәнг бьн у бәрхwә кʹәвьн. Сьлемане билан ньвиси: «Һәбуна мәрьве дәwләти шәһәре wийи qәwи йә, әв бәр чʹәʹве wи мина диwарәки бьльнд ә» (Мәтʹлк. 18:11, ДТʹ). Бьньһерʹьн кӧ чь qәwьми сала 2009 Филипинеда. Жь бо баранед qайим селав рʹабу у шәһәре Маниле 80 сәләфи зедәтьр кʹәтә нава аве. Гәло һьнге һәбуке мәрьв хьлаз кьрьн? Мерәки дәwләти, кʹижани һәбука хwә ниве зәʹф ӧнда кьр, гот: «Әwе селаве йед дәwләти у кʹәсиб кьрә wәкә һәв, чьмки һәрдӧарʹа жи чәтьнайи у кӧл-дәрд ани». Бәле, мәрьв гәләк һеса дькарә хwәрʹа бьфькьрә кӧ һәбун мәрьва хwәй дькә. Ле бь рʹастийе һәбун нькарә әʹмьре мәрьва хьлаз кә.

3) Чахе хәмгин дьбьн дәрһәqа тьштед ӧса кӧ дькарьн qә нә жи бьqәwьмьн.

Иса мә ширәт кьр кӧ әм гәләк «хәма нәкьн» (Мәт. 6:34). Чахе мәрьв тʹьме хәмгин дьбә, әw дәрһәqа гәләк тьшта дьфькьрә у гәләк тьшта дьдә бәр чʹәʹве хwә. Ләма әм дькарьн бадиһәwа гәләк qәwата хwә хәрщ кьн кӧ хәмгин бьн сәва wан проблема, кʹижан әм дьдьнә бәр чʹәʹве хwә. Әw проблем дьqәwьмә һе тʹӧнәнә у нә жи wе һәбьн. Кʹьтеба Пироз дьбежә кӧ һәрге мәрьв бь wи щурʹәйи хәмгин бә, әw дькарә дьлтәнг бә у һәла һе бькʹәвә депресийе жи (Мәтʹлк. 12:25). Бәле, чьqас фәрз ә кӧ ширәта Иса бьдьнә хәбате, wәки пʹьрʹ хәма нәкьн у бькарьбьн хәмед һәррʹожи дәрбаз кьн.

ЧЬ ТЕ ҺʹӘСАБЕ БЬ БИЛАНИ ТЬШТА БЬДЬНӘ БӘР ЧʹӘʹВЕ ХWӘ

1) Пешда бьдьнә бәр чʹәʹве хwә дәрәщед хоф кӧ дькарьн рʹасти мә бен у бьфькьрьн ча хwә жь wан хwәй кьн.

Кʹьтеба Пироз мә һелан дькә кӧ әм бәрбьһер бьн у пешда бьфькьрьн (Мәтʹлк. 22:3). Әм дькарьн пешийа сафикьрьнед хwә, бьдьнә бәр чʹәʹве хwә кӧ әw сафикьрьн wе чь ахьрийе биньн. Мәсәлә, һәрге тӧ һати тʹәглифкьрьне сәр кʹефәке, ча әw фәрәсәт кӧ дькари тьшта бьди бәр чʹәʹве хwә, дькарә али тә бькә сәва бь билани сафи ки һәрʹи йан на? Мәсәлә, чахе тӧ бьзаньби кӧ кʹе wе диса бе сәр ве кʹефе, чьqас мәрьв wе бен, у кʹәнге у кʹидәре әw wе бьqәwьмә, һьнге бьфькьрә: Ль wе дәре чь дькарә бьqәwьмә? Гәло тӧ дькари әwе кʹефе бьди бәр чʹәʹве хwә ӧса, кӧ әw керһати бә у ль гора принсипед Кʹьтеба Пироз бә? Фькьрандьна ӧса дькарә тә һелан кә, кӧ әwе qәwьмандьне һʹьше хwәда бьди бәр чʹәʹве хwә. Бәле, әw фәрәсәте кӧ әм дькарьн тьшта бьдьнә бәр чʹәʹве хwә, әм гәрәке бьдьнә хәбате wәки бь билани тьшта сафи кьн. Әw йәк wе али мә бькә, кӧ хwә хwәй кьн жь wан дәрәща, кʹижан кӧ дькарьн зийане бьдьнә рʹӧһʹанийа мә.

2) Пешда бьдьнә бәр чʹәʹве хwә кӧ чаwа проблема сафи кьн.

Фәрәсәт кӧ әм дькарьн тьшта бьдьнә бәр чʹәʹве хwә, ӧса жи али мә дькә кӧ әм бәр проблема тәйах кьн у сафи кьн. Мәсәлә, һәрге тӧ у кәсәк щьватеда жь һәв хәйидинә. Тӧйе ча незики wи бьра йан хушке би, сәва кӧ диса һәв бен у әʹдьлайе хwәй кьн? Һәнә гәләк тьшт чь кӧ тӧ гәрәке бьди һʹәсаб. Мәсәлә, хәбәрдана wи йан wе чь щурʹәйи йә? Чахе wе wәʹде баш бә кӧ тʹәви wи йан wе дәрһәqа ве проблеме хәбәрди? Кʹижан хәбәра гәрәке бьжбери у ча бежи? Чахе тӧ гәләк щурʹә сафикьрьна һʹьше хwәрʹа дәрбаз дьки, паше тӧ дькари сафикьрьнәке бьжбери, кʹижан кӧ wе йа лапә баш бә бона дәрәща тә (Мәтʹлк. 15:28). Чахе тӧ проблема фькьранди сафи ки, әw йәк wе әʹдьлайа щьвате qәwи кә. Әw йәк ӧса жи те һʹәсабе кӧ әм әви фәрәсәти кӧ дькарьн тьшта бьдьнә бәр чʹәʹве хwә, рʹаст дьдьнә хәбате.

3) Хwәндьна Кʹьтеба Пироз у һинбуна хwәйә шәхси һе дәwләти кә.

Хwәндьна Кʹьтеба Пироз һәррʹож гәләк фәрз ә. Ле фәрз нинә кӧ һәррʹож гәләк бәлг бьхуньн. Фәрз әw ә, кӧ жь wан бәлгед мә хwәнд, хwәрʹа дәрсе һьлдьн. У һьн жи әм гәрәке wан тьшта чь педьһʹәсьн жийина хwәда бьдьнә хәбате. Рʹазибуна мә бона кьред Йаһоwа гәрәке һе мәзьн бә бь сайа хwәндьна Кʹьтеба Пироз. Ве йәкеда әw фәрәсәт кӧ әм дькарьн тьшта бьдьнә бәр чʹәʹве хwә, дькарә али мә бькә. Ле чаwа? Шеwьр кьн кʹьтеба «Чʹәʹв Бьдьнә Баwәрийа Wан». Хwәндьна ве кʹьтебе, дькарә али мә бькә кӧ әм бьдьнә бәр чʹәʹве хwә һʹал, дәрәщә у дирока wан мәрьва, сәрһатийа кʹижана Кʹьтеба Пирозда һатийә ньвисаре. Әw кʹьтеб ӧса һатийә ньвисаре, кӧ әм бь-карьбьн wан сәрһатийа ӧса бьдьнә бәр чʹәʹве хwә, кӧ ча бежи әм бь чʹәʹве хwә һʹәму тьшти дьвиньн, дәнга дьбьһен, у тедәрдьхьн һәстед wан мәрьвед сәрһатийеда. Ӧса әм дькарьн жь wан сәрһатийед Кʹьтеба Пироз хwәрʹа дәрсед баш һьлдьн у дьлгәрм бьн, һәрге жи әм дьшьрмиш дьбун кӧ әм ида wан сәрһатийа рʹьнд заньн. Һәрге әм wәʹде хwәндьна Кʹьтеба Пироз у һинбуна хwәйә шәхси дьдьнә бәр чʹәʹве хwә чь кӧ дьхуньн, һинбуна мә wе һе дәwләти у керһати бә.

4) Дьлшәwатийе бал хwә пешда биньн у бьдьнә кʹьфше.

Дьлшәwати һʹӧнӧрәки гәләк баш ә. Әw һʹӧнӧр ӧса һатә шьровәкьрьне, кӧ әм дьле хwәда тʹәхмин дькьн еша мәрьве дьн. Бәле, Йаһоwа у Иса әwи һʹӧнӧри дьдьнә кʹьфше, ләма әм жи гәрәке чʹәʹв бьдьнә wан (Дәркʹ. 3:7; Зәб. 72:13). Ле әм ча дькарьн әwи һʹӧнӧри нав хwәда пешда биньн? Йа лапә баш әм дькарьн әви һʹӧнӧри бьдьнә кʹьфше, чахе дьдьнә хәбате әwи фәрәсәте кӧ дьдьнә бәр чʹәʹве хwә. Мәсәлә, дьqәwьмә чәтьнайед ӧса рʹасти мә нәһатьнә, кʹижан кӧ рʹасти хушк-бьред мә тен. Ле йәкә, әм дькарьн бькʹәвьнә һʹале wан у пьрсе бьдьнә хwә: «Һәрге әз ве дәрәщеда бума, мьне хwә ча тʹәхмин кьра? Wи чахи әзе һʹәwще чь бума?» Щабед сәр wан пьрса, wе али мә бькьн кӧ әм һе дьлшәwат бьн. Бь рʹастийе һәрге әм дьлшәwатийе бьдьнә кʹьфше, әw йәк жийина мәда wе тʹьме мәрʹа кʹаре бинә, һьн хьзмәткьрьнеда у һьн жи һәләqәтийа мә тʹәви Мәсиһийед дьнда.

5) Бьдьнә бәр чʹәʹве хwә кӧ жийин дьнйа тʹәзәда wе чаwа бә.

Кʹьтеба Пирозда һур бь һур те гьликьрьне дәрһәqа жийина дьнйа тʹәзәда, кʹижан Хwәде соз дайә (Иша. 35:5-7; 65:21-25; Әʹйан. 21:3, 4). Әʹдәбйәтед мәда гәләк шькьлед бәдәw дәрһәqа дьнйа тʹәзә һәнә. Ле гәло чьрʹа лазьм ьн әw шькьл? Шькьл мә һелан дькьн кӧ әм бьдьнә бәр чʹәʹве хwә жийина дьнйа тʹәзәда. У ӧса әw шькьл али мә дькьн, әм wан кʹәрәмед создайи сәр хwә тʹәхмин кьн. Йаһоwа, мә әʹфьранд бь фәрәсәте ӧса, кӧ әм дькарьн тьшта бьдьнә бәр чʹәʹве хwә, у әw һе рʹьнд занә кӧ әw фәрәсәт чьqас qәwи йә. У чахе әм сәр созед wи дьфькьрьн у дьдьнә бәр чʹәʹве хwә, баwәрийа мә һе qәwи дьбә һьндава созед wи, у али мә дькьн кӧ әм амьн бьминьн һәла һе wәʹде тәнгасийа жи.

Йаһоwа әw фәрәсәт жь һʹьзкьрьне дайә мә. Әw фәрәсәт бь рʹастийе дькарә али мә бькә кӧ wирʹа бь дьл у щан хьзмәт кьн. Wәрә әм һәр рʹож әwи фәрәсәти бь билани бьдьнә хәбате, у бь ве йәке рʹазибуна хwә бьдьнә кʹьфше Хwәдайе хwә Йаһоwарʹа, кʹижани әw фәрәсәте баш дайә мә.