Пьрсед Хwәндәвана

Чьрʹа изьн тʹöнә wәки әʹдәбйәтед Шәʹдед Йаһоwа бькьнә сәр малпәра хwәйә шәхси йан жи малпәред дьн?

Әм әʹдәбйәтед хwәйә сәр һʹиме Кʹьтеба Пироз бе пʹәрә бәла дькьн, у ләма һьнәк дьфькьрьн кö изьн һәйә wан әʹдәбйәта копи бькьн у бькьнә сәр малпәред дьн. Ле әw йәк мьqабьли Qәйде Хәбьтандьнаa малпәред мә нә, у проблемед мәзьн пешда тинә. Ви Qәйде Хәбьтандьнеда зәлал те готьне, кö изьна тʹö кәси тʹöнә wәки «шькьл, әʹдәбйәтед әләктроник, мьqам, текст у видео» жь малпәра мә, бькьнә Интернете (нә жи ль сәр рʹупʹелед бәлакьрьне, нә ль сәр малпәред сосиали у нә жи ль сәр тʹö малпәрәкә дьн). Чьрʹа изьн тʹöнә wан тьшта бькьн?

Һʹәму материал у әʹдәбйәт сәр малпәред мә тенә хwәйкьрьне. Рʹабәр у йед кö мьqабьли Шәʹдед Йаһоwа нә, дьхwазьн әʹдәбйәтед мә бьдьнә хәбате сәр малпәред хwә, сәва Шәʹдед Йаһоwа у мәрьвед дьн бьхальфиньн у бькьнә тʹәльке. Нета wан әw ә, кö бь сайа wан малпәра шьке бькьнә дьле хwәндәвана (Зәб. 26:4; Мәтʹлк. 22:5). Һьнә мәрьв жи материалед жь әʹдәбйәтед мә йан жи нишана jw.org дьдьнә хәбате рекламада йан жи әʹламәтийада, мәсәлә бона фьротана тьшта, у öса жи бона програмед мобили (apps). Сәва wан тьшта изьна мәйә бь qануни һәйә, wәки wан хәбьтандьнед нәрʹаст бьдьнә сәкьнандьне, чьмки әʹдәбйәтед мә у нишанед малпәра мә, бь qануни хwәйкьри нә. Ләма жи изьн тʹöнә кәсәк wан тьшта копи бькә йан жи бьдә хәбате (Мәтʹлк. 27:12). Ле һәрге әм хwәха дьһельн, wәки кәсәк һәла һе жи хушк-бьред мә тьштед малпәред мәда бькьнә малпәред дьн, йан жи нишана jw.org бьдьнә хәбате бона фьротана тьшта, диwан wе ида пьштгьрийа мә нәкә, wәки әм рʹабәра у йед мьqабьл бьдьнә сәкьнандьне.

Хоф ә һәрге әʹдәбйәтед мә бькʹьшиньн жь малпәред дьн, нә кö жь jw.org. Йаһоwа щабдари дайә тʹәне «хöламе амьн у сәрwахт» сәва хwарьна рʹöһʹани бьдә (Мәт. 24:45). Әw «хöлам» малпәред хwәйә фәрми дьдә хәбате сәва хwарьна рʹöһʹани бәла кә. Әw дьдә хәбате www.jw.org, tv.jw.org, у wol.jw.org. Хенщи ве йәке, әм тʹәне ван се програмед мобиле (apps) дьдьнә хәбате: JW Languagе^®, JW Library^®, у JW Library Sign Languagе^®. Әм дькарьн итʹбарийа хwә ван малпәра у програма биньн, чьмки wедәре тьштед qәлп йед кö дьнйа Шәйтʹан бәла дькә, тʹöнә нә. Ләма жи стандьна хwарьна рʹöһʹани пе малпәред дьн йан жи канийед дьн, нә кö пе ван кʹижан кö мә жоре гот, хоф ә, чьмки дькарә тьштед qәлп у гöһасти һәбьн (Зәб. 18:26; 19:8).

Хенщи ве йәке, һәрге әм әʹдәбйәтед мә дькьн сәр wан малпәра кʹидәре кö коментарийа датиньн йан жи шеwьр дькьн, әw йәк бона рʹабәра у мәрьвед дьн рʹе вәдькә сәва һьндава тʹәшкиләта Йаһоwа шьке бькьнә дьле мәрьва. Һьнә хушк-бьра кʹәтьнә ве тʹәльке кö пе онлайне дькʹәвьнә дәʹwе тʹәви мәрьвед майин, у бь ве йәке наве Йаһоwа беһöрмәт дькьн. Әw форумед онлайн щики лайиq ниньн бона ве йәке кö «бь ширьнайи йед мьqабьл ширәт» кьн (2 Тимтʹ. 2:23-25; 1 Тимтʹ. 6:3-5). Öса жи һатә кʹьфше wәки малпәред qәлп һатьнә чекьрьне сәр наве тʹәшкиләта мә, Кʹома Рʹебәрийе у әндәмед ве. Ле бь рʹасти малпәра шәхси йа тʹö әндәмәки Кʹома Рʹебәрийе тʹöнә у әwана нә жи малпәред сосиалида ньн.

Чахе әм дина мәрьва дьдьн сәр jw.org, әм аликʹарийе дьдьн бәлакьрьна мьзгинийе. (Мәт. 24:14) Һʹәму техноложийед кö әм хьзмәтийа хwәда дьдьнә хәбате, тʹьме тенә тʹәзәкьрьне. Әм дьхwазьн кö һәр кәс кʹаре бьстинә. Ләма жи чаwа кö Qәйде Хәбьтандьнеда те готьне, һун дькарьн копийа әләктроники йед әʹдәбйәтед мә, йан жи линк жь малпәра мә jw.org, мәрьварʹа бьшиньн. Чахе әм дина мәрьва дьдьнә сәр малпәред мә, әм дина wан дьдьн сәр «хöламе амьн у сәрwахт», демәк сәр ве кʹоме кö хwарьна рʹöһʹани дьдә.