Ԝә Заньбу?

Ньвисарәкә кәвьн чаԝа пьштгьрийа Кʹьтеба Пироз дькә?

ЛЬ БАЖАРЕ Оршәлиме, ль Мйузәйа Ԝәлатед Кʹьтеба Пироз, кәвьрәки бь ньвисарәкә һʹәԝас һәйә. Әв ньвис ԝәкә сала 700-600 йа Б.Д.М. һатийә ньвисандьн. Кәвьр ль шькәфтәкә незьки бажаре Һәброне (Исраел), йа кӧ ԝәк мәзәл дьһат хәбьтандьн, һат дитьн. Ньвисар ӧса дьбежә: «Бьла Йаһԝә Сәбаот бәлайа Һагаф кӧрʹе Һагав бьде.» Гәло әв ньвисара кәвьн чаԝа пьштгьрийа Кʹьтеба Пироз дькә? Әв ньвисар нишан дькә кӧ ль дәмед бәре, мәрьва наве Йаһоԝа, йе кӧ бь һʹәрфед Ибрани йед кәвьн ԝәк «ЙҺԜҺ» дьһат ньвисандьн, һьм заньбун һьм жи ль жийана һәррʹожида дьданә хәбате. Ньвисаред дьн йед кӧ ль ԝан шькәфта һатьн дитьн, нишан дькьн кӧ кәсед кӧ дь шькәфтада тʹәвайи тʹоп дьбун йан жи хԝә вәдьшартьн, һьм наве Хԝәде һьм жи навед мәрьва кӧ теда наве Хԝәде һәйә, гәләк щара ль сәр диԝара дьньвисин.

Др. Рейчел Набулси жь Занингәһа Щорщийайе ӧса дьбежә: «Әв йәк кӧ наве ЙҺԜҺ гәләк щара те хәбьтандьн, тьштәки фәрз нишан дькә. . . . Ньвисаред Пироз у әв ньвисар нишан дькьн кӧ ЙҺԜҺ дь жийана Исраел у Щьһудада щийе фәрз дьгьрт.» Әв йәк пьштгьрийа Кʹьтеба Пироз дькә, ль кʹижанида наве Хԝәде бь һʹәзара щара дәрбаз дьбә. Ӧса жи, наве Хԝәде дь һӧндьре гәләк навед мәрьвада һәбу.

Готьнед «Йаһԝә Сәбаот», йед кӧ ль сәр кәвьр ньвиси нә, те һʹәсабе «Йаһоԝайе ордийа». Әв йәк нишан дькә кӧ ль дәмед бәре, нә тʹәне наве Хԝәде, ле хәбәра «Йаһоԝайе ордийа» жи дьһат хәбьтандьн. Әв готьн дь Кʹьтеба Пирозда 283 щара дәрбаз дьбә, илаһи дь ньвисаред Ишайа, Йерәмйа у Зәкәрйада.