Пьрсед Хԝәндәвана

Шәʹдед Йаһоԝа сәр малпәред бона һәвдӧнаскьрьне чаԝа дьньһерʹьн?

Йаһоԝа һьлбәт дьхԝазә кӧ жьн у мер бәхтәԝар бьн у һʹәта-һʹәтайе тʹәвайи бьминьн (Мәтта 19:4-6). Һәгәр тӧ дьхԝази бьзәԝьщи йан мер ки, гәло тӧ ча дькари хԝәрʹа кәсәки лайиԛ бьвини? Йаһоԝа әм әʹфьрандьнә, ләма жи әԝ занә кӧ гәрәке әм чь бькьн, ԝәки зәԝаща мә бәхтәԝар бә. Ләма, һәгәр тӧ дәрһәԛа зәԝаще принсипед ԝи һьлди һʹәсаб, тӧйе пешдачуйи би. Ԝәрә әм дина хԝә бьдьнә һьнә жь ван принсипа.

Йа пешьн, гәрәке әм рʹастийа ван готьна ԛәбул бькьн: «Дьл жь һәр тьшти зедәтьр хапиноки йә» (Йерәмйа 17:9). Ԝәхта кӧ дӧ кәс һәвдӧ тʹәзә нас дькьн у дьхԝазьн һәвдӧ бьстиньн, һәстед ԝан дькарьн һаԛас ԛайим бьн кӧ әԝ ида нькарьн сафикьрьнед рʹаст бькьн. Сафикьрьнед кӧ мәрьв тʹәне ль гора һәст у дьле хԝә дькьн, гәләк щара дьбьн сәбәба һʹаләки хьраб (Мәтʹәлок 28:26). Һʹәта кӧ дӧ кәс һәвдӧ рʹьнд нас нәкьн, ԝе баш бә кӧ әԝ зу һәвдӧрʹа готьнед романтик нәбежьн у соза зәԝаще нәдьн һәвдӧ.

Мәтʹәлок 22:3 ӧса дьбежә: «Йе аԛьл хьрабийе кӧ дьбинә һʹәвза хԝә дькә, ле йе дьлсах пешда дьчьн у зьраре дьбинә». Гәло тʹәлькед хәбьтандьна малпәред бона һәв-дӧнаскьрьне чь нә? Сәд һʹәйф кӧ һьнә кәс бь сайа малпәред ӧса дькʹәвьн тʹора кәсед дәрәԝин. Сәрда, һьнә кәсед дӧрʹу, һʹәсабед ԛәлп саз дькьн кӧ кәсед дьлсах бьхапиньн у пʹәре ԝан бьдьзьн. Щарна, әԝ кәсед ԛәлп дьбежьн кӧ йанчь әԝана Шәʹдед Йаһоԝа нә.

Тʹәлькәкә дьн жи һәйә: Сәр һьнә малпәред бона һәвдӧнаскьрьне бь сайа теста тедәрдьхьн кӧ йанчь кʹе лайиԛи кʹе йә. Ле ԛә избат тʹӧнә кӧ методед ӧса рʹаст ьн. Бона зәԝащәкә бәхтәԝар, гәло логики йә кӧ мәрьв хԝә бьсперә ньһерʹандьна мәрьва у програмед компӧтәре, нә кӧ принсипед Кʹьтеба Пироз? (Мәтʹәлок 1:7; 3:5-7)

Мәтʹәлок 14:15 ӧса дьбежә: «Мәрьве сахьке дьле хԝә һәр готьне баԝәр дькә, ле йе аԛьл дина хԝә дьдә гавед хԝә». Пешийа кӧ тӧ кәсәкирʹа бьзәԝьщи, гәләк фәрз ә кӧ тӧ ви кәси рʹьнд нас бьки. Ле бь сайа малпәред бона һәвдӧнаскьрьне әв йәк гәләк зор ә. Һун чьԛас профилед хԝә һәвдӧрʹа нишан бькьн у гәләк нәʹма һәвдӧрʹа бьшиньн жи, гәло тӧ бь рʹасти дькари бежи кӧ тӧ ви кәси нас дьки? Гава кәсед кӧ һәвдӧ бь сайа малпәрәке нас кьрьбун, рʹу бь рʹу рʹасти һәв тен, әԝана гәләк щара әʹщебмайи дьминьн.

Зәбурбеж ӧса готьбу: «Әз тʹәви дәрәԝина рʹунаним у тʹәви дӧрʹуйа рʹе начьм» (Зәбур 26:4). Гәләк кәс дьфькьрьн кӧ нормал ә ԝәки мәрьв ԛьсуред хԝә сәр профила малпәра Интернете вәшерә у хԝә дьһа хԝәшьк нишан бькә. Ләма жи әԝ хәйсәт-һʹӧнӧред хԝә йед хьраб малпәред Интернетеда әшкәрә накьн. Һьнә кәс бәлки дьбежьн кӧ әԝ Шәʹдед Йаһоԝа нә, ле гәло әв йәк рʹаст ә? Гәло әԝ жь алийе рʹӧһʹанива гьһишти нә? Гәло достийа ԝан тʹәви Йаһоԝа чь һʹалида йә? Щьвата ԝан сәр ԝан чаԝа дьньһерʹә? Гәло дьбә кӧ әԝ жь алийе рʹӧһʹанива сьст ьн йан жи ‹һәвалед хьраб› ьн? (1 Корьнтʹи 15:33; 2 Тимотʹейо 2:20, 21) Ӧса жи, гәло ль гора Кʹьтеба Пироз изьна ԝан һәйә кӧ бьзәԝьщьн? Гәрәке тӧ ван тьшта бьзаньби, ле һʹәта кӧ тӧ тʹәви Шәʹдед дьн, йед кӧ ви кәси рʹьнд нас дькьн, хәбәр нәди, гәрәке итʹбарийа хԝә ԝи нәйни (Мәтʹәлок 15:22). Ӧса жи, хьзмәткʹаре Йаһоԝа йе амьн, ԝе һьлбәт бь кәсәки нәбаԝәрмәндрʹа нәкʹәвә «бьне нирәки» (2 Корьнтʹи 6:14; 1 Корьнтʹи 7:39).

Тʹәлькед хәбьтандьна малпәред бона һәвдӧнаскьрьне гәләк ьн, у ԝе дьһа баш бә кӧ тӧ бь щурʹед дьн һәваләки бьгәрʹи. Гәло тӧ чаԝа дькари кәсәки нас бьки? Гава Шәʹдед Йаһоԝа сәр щьвата, щьватед мәзьн йан жи бона нетед дьн тʹәвайи тʹоп дьбьн, тӧ дькари хушк у бьра рʹу бь рʹу нас бьки.

Ԝәхта кӧ әм нькарьн тʹәвайи тʹоп бьн, мәсәлә сәва пандәмийа COVID-19 йан сәбәбед дьн, әм бь сайа һащәтед әләктроник дькʹәвьн щьвина. Ԝәʹде ӧса, тӧ дькари Шәʹдед азәп нас бьки у жь готар у щабед ԝан фәʹм бьки кӧ һʹале ԝан йе рʹӧһʹани чаԝа йә (1 Тимотʹейо 6:11, 12). Паши щьвина, һун бәлки дькарьн кʹомед бьчʹукда, йед кӧ паши щьвина тен сазкьрьн, тʹәвайи хәбәр дьн. Ӧса жи, гава хушк у бьра бь Интернете бона хәбәрдане тʹәвайи тʹоп дьбьн, тӧ дькари бьвини ԝәки кәсе кӧ тә бәгәм кьрийә йәки чаԝа йә (1 Пәтрус 3:4). Ԝәʹдә шунда, чьԛас һун һәвдӧ дьһа баш нас бькьн, һуне бьвиньн кʹа нет у фькред ԝә мина һәв ьн у һун ль һәв тен йан на.

Гава хушк у бьред азәп ль гора принсипед Кʹьтеба Пироз һәвдӧ нас дькьн, һьнге әԝана дькарьн һәваләки баш хԝәрʹа бьвиньн у бәхтәԝар бьн. «Кʹи жьне дьбинә, хер у хьзне дьбинә у жь Хӧдан рʹәʹм-кʹәрәме дьстинә» (Мәтʹәлок 18:22).