Xwedê qudret daye Îsa Mesîh ku ew hemû problemên mirovan çareser bike. Bi mucîzeyên xwe, Îsa Mesîh nîşan dida ku ew dikare bi hêza xwe problemên ku çareya wan ne di destê me de ye, safî bike. Mesela, hêza wî heye ku me ji sebebê eslî yê kul û derdên mirovan xelas bike – ji gunehê mîrasgirtî û ji netîceyên wî, yanî ji nexweşî û mirinê jî (Meta 9:1-6; Romayî 5:12, 18, 19). Mucîzeyên wî bi zelalî nîşan dida ku ew dikare “hemû” nexweşiyan qenc bike û heta mirovan jî ji mirinê rake (Meta 4:23; Yûhena 11:43, 44). Wekî din, qeweta wî heye ku firtoneyan bisekinîne û mirovan ji tesîra cinan xelas bike (Marqos 4:37-39; Lûqa 8:2). Ma em dilxweş nabin ku Yehowa qudreteke ew qas mezin daye Kurê xwe? Em dikarin ji sedî sed bawer bin ku hemû sozên Yehowa wê bi destê Padîşahiya wî bên cih. Mucîzeyên ku Îsa Mesîh li dinyayê kiribûn mîsalên ji bo pêşerojê ne. Yanî di demeke nêzîk de, ewê wek Padîşahê ezmanî mucîzeyên hê jî mezintir bike. w23.04 3 par. 5-7

Eger di civata te de gelek mizgînvan hebin, û destê te neyê dîtin, belkî tu ji xwe re wisa bibêjî: “Ez êdî nema cewaban didim. Ezê tenê guhdarî bikim.” Lê dev ji xîreta xwe bernede ku tu cewaban bidî. Tu dikarî ji bo her civînekê çend cewaban hazir bikî. Eger te di serê civînê de cewab neda, di dewama civînê de wê dîsa fersend bikeve destê te. Gava tu ji bo lêkolîna Birca Çavdêriyê haziriyê dikî, bifikire ku her paragrafek çawa bi mijara sereke ve girêdayî ye. Eger tu wisa bikî, tuyê bikaribî di civînê de cewabên baş bidî. Wekî din, tu dikarî bersivên li ser rastiyên kûr, ên ku şîroveya wan ne hêsan in, hazir bikî. Gelo çima? Ji ber ku gelek kes ji bo paragrafên wisa destê xwe bilind nakin. Lê eger dîsa jî di çend civînan de fersend neketibe destê te, tu dikarî çi bikî? Berî civînê, tu dikarî herî cem îdarevan û jê re bibêjî ku tu dixwazî cewaba kîjan pirsê bidî. w23.04 21-22 par. 9-10

Ûsiv tim hazir bû ku guh bide rêberiya Yehowa. Loma ew zilamekî baş bû. Qet nebe sê caran, Xwedê di heqê malbata wî de rêberî da wî. Çi qas zehmet bû jî, Ûsiv her car zû guh dida Yehowa (Meta 1:20; 2:13-15, 19-21). Di netîceyê de, Ûsiv Meryem diparast û xwedî lê derdiket. Îcar xeyal bike ku Meryemê çi qas qedrê Ûsiv digirt û jê hez dikir! Zilamno, ji bo xwedîkirina malbata xwe, hûn dikarin di Kitêba Pîroz de li şîretan bigerin û bi vî rengî Ûsiv ji xwe re mîsal bigirin. Gava hûn – çi qas zehmet be jî – guh didin van şîretan, hûn nîşan didin ku hûn ji jina xwe hez dikin û dixwazin zewaca xwe xurttir bikin. Xwişkeke li girava Vanûatûyê, ya ku zêdetirî 20 salan zewicî ye, dibêje: “Gava zilamê min li rêberiya Yehowa digere û xîret dike ku li gor vê rêberiyê bimeşe, ez zêdetir qedrê wî digirim. Ez xwe rihet hîs dikim û dizanim ku qerarên wî pir baş in.” w23.05 21 par. 5