Çawa Dua Dikare Alî Te Bike

Pamêla giran nexweş ket. Ew ji bo kanserê gelek diçerçirî û alîkariya doxdira xwest. Hemikî ewê Xwedêra jî dua dikir, wekî qewatê bidê ku ber vê çetinayê teyax ke. Gelo dua alî wê kir?

Pamêla dibêje: “Çaxê min alîkariya mêdîsînayê distand, min xwe gelek xirab texmîn dikir. Lê gava min Yehowa Xwedêra dua dikir, min rihetiya dil distand, û fikirên min zelal dibûn. Heta niha ez ji bo nexweşiya xwe gelek êşê dikişînim, lê dîsa jî dua alî min dike nihêrandina pozîtîv xweyî kim. Gava meriv ji min dipirsin, ku ez çawa nim, ez dibêjim: ‘Nebaş im, lê yeke şabûna xwe unda nakim!’”

Hemikî eseyî nîne em hîviyê bin, heta ku tiştek bê serê me, paşê destpêkin dua bikin. Her kes ji me rastî çetinaya tê, firqî tune çetinayên mezin yan yên biçûk, lema jî em hewcê alîkariyê ne. Lê dua dikare alî me bike?

Kitêba Pîroz dibêje: “Tu barê xwe ji Xudanra bihêle, Ewê te li ser lingan bihêle. Ew tucar nahêle, ku yê rast bikeve” (Zebûr 55:22). Ev gilî çiqas xweş in û berdiliyê didin! Dêmek dua çawa dikare alî te bike? Gava tu Xwedêra rast dua dikî, ew wê eseyî alî te bike wê yekêda, çida tu hewce yî, ku bikaribî ber çetinayên xwe teyax kî. (Binihêre çargoşe “Dua Çi Karê Dikare Tera Bîne”).

Dua Çi Karê Dikare Tera Bîne

Rihetiya dil

“Bira bi dua-dirozga, razîbûnêva tevayî, Xwedêva eyan be. Û edilayiya Xwedê ku ji her hiş-aqilî derbaztir e, wê dil û fikirêd we yektiya Mesîh Îsada xwey ke” (Fîlîpî 4:6, 7). Çaxê tu derdê dilê xwe Xwedêra dibêjî, ew wê alî te bike rihetiya dil xwey kî û nava çetinayada jî bi bîlanî xwe kifş kî.

Bîlaniya ji Xwedê

“Heger serwaxtiya yekî ji we têra wî nake, bira hîvî ji Xwedê bike û wê ji wîra bê dayînê. Ew bi merdanî dide hemûya û tu kesî bêqedir nake” (Aqûb 1:5). Gava em rastî tengasiya tên, mera çetin e safîkirinên baş bikin. Hergê tu bîlaniyê ji Xwedê bixwazî, ew wê gelek prînsîpên kêrhatî ji Kitêba Pîroz bîne bîra te, kîjan ku alî te bikin.

Qewat û berdilî

“Ez her tiştî bi saya wî dikarim, yê ku qewatê dide min” (Fîlîpî 4:13). Yehowa Xwedayê Himzor dikare qewatê bide te, ku bikaribî ber çetinaya teyax kî, û ew wê piştgiriya te bike (Îşaya 40:29). Kitêba Pîrozda ser Yehowa usa jî tê gotinê “Xwedêyê hemû berdiliyê”. Ew dikare “nava hemû telî-tengiyada” berdilê meda bê (2 Korintî 1:3, 4).