ಪ್ರಗತಿಪರ ಬೈಬಲ್‌ ಅಧ್ಯಯನಗಳನ್ನು ನಡೆಸುವುದು
ಭಾಗ 4: ತಯಾರಿಸಲಿಕ್ಕಾಗಿ ವಿದ್ಯಾರ್ಥಿಗಳಿಗೆ ತರಬೇತಿನೀಡುವುದು
1 ಪಾಠವನ್ನು ಮುಂಚಿತವಾಗಿಯೇ ಓದುವ, ಉತ್ತರಗಳಿಗೆ ಅಡಿಗೆರೆ ಹಾಕುವ ಮತ್ತು ಅವುಗಳನ್ನು ಸ್ವಂತ ಮಾತುಗಳಲ್ಲಿ ಹೇಗೆ ವ್ಯಕ್ತಪಡಿಸಬಲ್ಲೆ ಎಂದು ಯೋಚಿಸುವ ಒಬ್ಬ ವಿದ್ಯಾರ್ಥಿಯು ಸಾಮಾನ್ಯವಾಗಿ ವೇಗವಾಗಿ ಆಧ್ಯಾತ್ಮಿಕ ಪ್ರಗತಿಯನ್ನು ಮಾಡುತ್ತಾನೆ. ಆದುದರಿಂದ, ಕ್ರಮವಾದ ಅಧ್ಯಯನವು ಸ್ಥಾಪಿಸಲ್ಪಟ್ಟ ಕೂಡಲೆ, ತಯಾರಿಸುವುದು ಹೇಗೆ ಎಂಬುದನ್ನು ವಿದ್ಯಾರ್ಥಿಗೆ ತೋರಿಸಲಿಕ್ಕಾಗಿ ಅವನೊಟ್ಟಿಗೆ ಕುಳಿತು ಒಂದು ಪಾಠವನ್ನು ತಯಾರಿಸಿರಿ. ಹೆಚ್ಚಿನ ವಿದ್ಯಾರ್ಥಿಗಳೊಂದಿಗೆ, ಇಡೀ ಅಧ್ಯಾಯವನ್ನು ಅಥವಾ ಪಾಠವನ್ನು ಒಟ್ಟಿಗೆ ತಯಾರಿಸುವುದು ಸಹಾಯಕಾರಿಯಾಗಿರಬಹುದು.
2 ಉತ್ತರಗಳಿಗೆ ಅಡಿಗೆರೆ ಹಾಕುವುದು ಮತ್ತು ಟಿಪ್ಪಣಿ ಬರೆಯುವುದು: ಮುದ್ರಿತ ಪ್ರಶ್ನೆಗಳಿಗೆ ನೇರವಾದ ಉತ್ತರಗಳನ್ನು ಹೇಗೆ ಕಂಡುಕೊಳ್ಳಬಹುದು ಎಂಬುದನ್ನು ವಿವರಿಸಿರಿ. ನೀವು ಅಧ್ಯಯನ ಪ್ರಕಾಶನದ ನಿಮ್ಮ ಸ್ವಂತ ಪ್ರತಿಯಲ್ಲಿ ಮುಖ್ಯ ಪದಗಳು ಅಥವಾ ವಾಕ್ಯಗಳಿಗೆ ಮಾತ್ರ ಹಾಕಿರುವ ಅಡಿಗೆರೆಗಳನ್ನು ವಿದ್ಯಾರ್ಥಿಗೆ ತೋರಿಸಿರಿ. ನೀವು ವಿಷಯಭಾಗವನ್ನು ಪರಿಗಣಿಸುವಾಗ, ವಿದ್ಯಾರ್ಥಿಯು ನಿಮ್ಮ ಮಾದರಿಯನ್ನು ಹಿಂಬಾಲಿಸುತ್ತಾ ಉತ್ತರವನ್ನು ಮರುಜ್ಞಾಪಿಸಿಕೊಳ್ಳಲು ಸಹಾಯಮಾಡುವ ವಿಷಯಗಳಿಗೆ ಮಾತ್ರ ಅಡಿಗೆರೆ ಹಾಕಲು ಬಯಸಬಹುದು. (ಲೂಕ 6:40) ಅನಂತರ ತನ್ನ ಸ್ವಂತ ಮಾತುಗಳಲ್ಲಿ ಉತ್ತರವನ್ನು ಕೊಡುವಂತೆ ಅವನನ್ನು ಕೇಳಿರಿ. ಇದು ಅವನು ವಿಷಯಭಾಗವನ್ನು ಎಷ್ಟು ಉತ್ತಮವಾಗಿ ಅರ್ಥಮಾಡಿಕೊಳ್ಳುತ್ತಾನೆ ಎಂಬುದನ್ನು ತಿಳಿದುಕೊಳ್ಳಲು ನಿಮಗೆ ಸಹಾಯಮಾಡುವುದು.
3 ಉದ್ಧರಿಸಲ್ಪಟ್ಟಿಲ್ಲದ ಶಾಸ್ತ್ರವಚನಗಳನ್ನು ಶ್ರದ್ಧೆಯಿಂದ ಪರಿಶೋಧಿಸುವುದು ಅಧ್ಯಯನಕ್ಕಾಗಿ ವಿದ್ಯಾರ್ಥಿಯು ಮಾಡುವ ತಯಾರಿಕೆಯ ಮುಖ್ಯ ಭಾಗವಾಗಿದೆ. (ಅ. ಕೃ. 17:11) ಸೂಚಿಸಲ್ಪಟ್ಟಿರುವ ಪ್ರತಿಯೊಂದು ವಚನವು ಪ್ಯಾರಗ್ರಾಫ್‌ನಲ್ಲಿರುವ ಒಂದು ಅಂಶವನ್ನು ಬೆಂಬಲಿಸುತ್ತದೆ ಎಂಬುದನ್ನು ನೋಡುವಂತೆ ವಿದ್ಯಾರ್ಥಿಗೆ ಸಹಾಯಮಾಡಿರಿ. ಅವನ ಅಧ್ಯಯನ ಪ್ರಕಾಶನದ ಮಾರ್ಜಿನ್‌ನಲ್ಲಿ ಚುಟುಕಾದ ಟಿಪ್ಪಣಿಗಳನ್ನು ಹೇಗೆ ಬರೆದುಕೊಳ್ಳುವುದು ಎಂಬುದನ್ನು ಅವನಿಗೆ ತೋರಿಸಿರಿ. ಅವನು ಕಲಿಯುತ್ತಿರುವ ವಿಷಯಕ್ಕೆ ಆಧಾರವು ಬೈಬಲಾಗಿದೆ ಎಂಬ ವಾಸ್ತವಾಂಶವು ಅವನ ಮುಂದೆ ಎದ್ದುಕಾಣುವಂತೆ ಮಾಡಿರಿ. ಅಧ್ಯಯನವು ನಡೆಯುತ್ತಿರುವ ಸಮಯದಲ್ಲಿ ಸೂಚಿಸಲ್ಪಟ್ಟಿರುವ ಶಾಸ್ತ್ರವಚನಗಳನ್ನು ತನ್ನ ಹೇಳಿಕೆಗಳಲ್ಲಿ ಉದಾರವಾಗಿ ಉಪಯೋಗಿಸುವಂತೆ ಅವನನ್ನು ಪ್ರೋತ್ಸಾಹಿಸಿರಿ.
4 ಸಂಕ್ಷಿಪ್ತ ಮೇಲ್ನೋಟ ಮತ್ತು ಪುನರ್ವಿಮರ್ಶೆ: ಅಧ್ಯಯನದ ವಿಷಯಭಾಗವನ್ನು ವಿದ್ಯಾರ್ಥಿಯು ಕೂಲಂಕಷವಾಗಿ ತಯಾರಿಸಲು ಹೋಗುವ ಮುಂಚೆ, ಆ ವಿಷಯವಸ್ತುವಿನ ಸಂಕ್ಷಿಪ್ತ ಮೇಲ್ನೋಟವನ್ನು ಪಡೆದುಕೊಳ್ಳುವುದು ಅವನಿಗೆ ಸಹಾಯಕರವಾಗಿರುವುದು. ಅಧ್ಯಾಯದ ಶೀರ್ಷಿಕೆ, ಉಪಶೀರ್ಷಿಕೆಗಳು ಮತ್ತು ಚಿತ್ರಗಳನ್ನು ಸಂಕ್ಷಿಪ್ತವಾಗಿ ಪರೀಕ್ಷಿಸುವ ಮೂಲಕ ವಿಷಯಭಾಗದ ಮೇಲ್ನೋಟವನ್ನು ಪಡೆದುಕೊಳ್ಳಬಲ್ಲನೆಂದು ಅವನಿಗೆ ತೋರಿಸಿರಿ. ತನ್ನ ತಯಾರಿಕೆಯ ಅವಧಿಯನ್ನು ಕೊನೆಗೊಳಿಸುವ ಮುಂಚೆ, ಪಾಠದಲ್ಲಿ ಕೊಡಲ್ಪಟ್ಟಿರುವ ಮುಖ್ಯ ಅಂಶಗಳನ್ನು ಪುನರ್ವಿಮರ್ಶಿಸಲು ಸ್ವಲ್ಪ ಸಮಯವನ್ನು ತೆಗೆದುಕೊಳ್ಳುವುದು ವಿವೇಕಯುತವಾಗಿರುವುದು. ಇದನ್ನು ಪ್ರಾಯಶಃ ಒಂದು ಪುನರ್ವಿಮರ್ಶಾ ಚೌಕ ಕೊಡಲ್ಪಟ್ಟಿರುವುದಾದರೆ ಅದನ್ನು ಉಪಯೋಗಿಸುತ್ತಾ ಮಾಡಬಹುದು. ಇಂತಹ ಪುನರಾವರ್ತನೆಯು ಮಾಹಿತಿಯನ್ನು ಮನಸ್ಸಿನಲ್ಲಿಟ್ಟುಕೊಳ್ಳಲು ಅವನಿಗೆ ಸಹಾಯಮಾಡುವುದು.
5 ಅಧ್ಯಯನಕ್ಕಾಗಿ ಉತ್ತಮ ರೀತಿಯಲ್ಲಿ ತಯಾರಿಸುವಂತೆ ವಿದ್ಯಾರ್ಥಿಗೆ ತರಬೇತಿನೀಡುವುದು, ಸಭಾ ಕೂಟಗಳಲ್ಲಿ ಅವನು ಅರ್ಥಭರಿತ ಹೇಳಿಕೆಗಳನ್ನು ನೀಡುವಂತೆ ಅವನಿಗೆ ಸಹಾಯಮಾಡುವುದು. ಮತ್ತು ಇದು ಅವನಿಗೆ ಉತ್ತಮ ಅಧ್ಯಯನ ರೂಢಿಗಳನ್ನು ಬೆಳೆಸಿಕೊಳ್ಳುವಂತೆ ನೆರವುನೀಡಿ ಅವನ ವೈಯಕ್ತಿಕ ಬೈಬಲ್‌ ಅಧ್ಯಯನವು ಕೊನೆಗೊಂಡ ಬಳಿಕ ದೀರ್ಘಕಾಲದ ವರೆಗೂ ಅವನಿಗೆ ಪ್ರಯೋಜನವನ್ನು ತರುವುದು.