Ebaruha Yakabiri Okwa Banya Korinto
4 Busana n’ekyo, kundi thuwithe obuherezya obu erilhabira omwa bughanyiri obwa thwakanganibawa, sithuli lhuhirira. 2 Aliwe thwabirighana emyatsi y’embaku-mbaku eyikahemulha, isithuli lendera omwa bughobya kutse eritsandya ekinywe kya Nyamuhanga; aliwe omw’iminyikalya ekwenene, thukabya ky’erileberyako ekyuwene okwa buli bunyamuthima-thima bw’abandu embere sya Nyamuhanga. 3 Kundi kwenene engulhu yuwene eyo thukathulha yamabya iyiri kw’ekitambara, iyiri kw’ekitambara okwa bakaheribawa, 4 abali omwa bath’ikirirye abo nyamuhanga w’omulembe ono abirilibaniako obulengekania, nuku ekyakakalha ky’engulhu yuwene y’olhukengerwa eyihambire oku Kristo, oyuli kisosekanio kya Nyamuhanga sikibahikeko. 5 Kundi thukathulhughanaya, butsira ebithuhambireko, aliwe ebihambire oku Yesu Kristo ng’Omukama, nethu ng’abaghombe benyu busana na Yesu. 6 Kundi Nyamuhanga yuwabugha athi: “Muleke ekyakakalha kikoleraye omwa mwirima,” kandi abirikolerya emithima yethu erikoleryayo omwa menge wa Nyamuhanga aw’olhukengerwa erilhabira omwa busu bwa Kristo.
7 Aliwe, thuwithe eby’obughuli ebi omwa bindu by’eribumba,* nuku amaaka awalhabire aw’obuli kiro abye wa Nyamuhanga butsira erilhua okw’ithwe. 8 Thukanuba kutsibu omwa buli kindu, aliwe sithubohirwe erihika okw’ibya isithwanga thoka erighenda; thukayibulha-bulha, aliwe sithulibya ng’abathawithe eky’erikolha;* 9 thukendereribawa, aliwe sithuli sighanibawa; thukathinirawa, aliwe sithuli thoghothibawa. 10 Mughulhu wosi omwa mubiri wethu thukayiyiniraya ebyanga thukolya okwa lhuholho ebya Yesu aghalhawamo, nuku engebe ya Yesu nayu yanga minyikalibwa omwa mibiri yethu. 11 Kundi ithwe thuliho, thukabya ithunemusangangana n’olhuholho busana na Yesu, nuku engebe ya Yesu nayu yanga minyikalibwa omwa mibiri yethu eyikahonda. 12 Kwesi olhuholho lhunemukolha omw’ithwe, aliwe engebe omw’inywe.
13 Neryo kundi thuwithe omuthima iwan’oyo ow’erikirirya eriri ng’eryahandikawako lithi: “Munakangania erikirirya, neryo munabugha”; nethu thukakanganaya erikirirya, busana n’ekyo thukabugha, 14 ithunasi ngoku Oyuwalhubukaya Yesu, nethu akendi syathulhubukya eribya haghuma na Yesu n’erithukangya embere siwe haghuma nenyu. 15 Emyatsi yosi eyi ni busana nenyu, nuku erikanyirira ly’olhukogho lyangongera kutsibu kundi abandi bangyi banemuha ewasingya neryo ikyaha Nyamuhanga y’olhukengerwa.
16 Busana n’ekyo, sithuli lhuhirira, aliwe nomwakine indi omundu oyo thuli eyihya anemusunzughuthuka, ahathe erithika-thika omundu oyo thuli omwakathi akayirawamo muhya-muhya obuli kiro. 17 Nomwakine, amalighe* ni w’obuthuku buke kandi anguhirire, akathulethera olhukengerwa olhulengire kutsibu ebyosi* kandi olhwa kera na kera; 18 ithunemuhira ameso wethu, butsira okwa bindu ebikalhangirawa, aliwe okwa bindu ebithelhangirawa. Kundi ebindu ebikalhangirawa ni by’obuthuku buke, aliwe ebindu ebithelhangirawa ni bya kera na kera.