Ebaruha y’Erimbere eya Yohana
5 Obuli mundu oyuk’ikiriraya ngoku Yesu ni Kristo akabuthawa na Nyamuhanga, n’obuli mundu oyukanza oyuwabirileka iniabya wa Nyamuhanga anzire n’oyuwabuthawa n’oyo. 2 Omw’eki, thunasi ku thwanzire abaana ba Nyamuhanga, omughulhu thukanza Nyamuhanga n’erighendera okwa bihano biwe. 3 Kundi erianza Nyamuhanga likamanyisaya kino, kithi thughendere okwa bihano biwe; kandi ebihano biwe si muheke, 4 kundi obuli mundu oyukabuthawa na Nyamuhanga akakinda ekihugho. Kandi eri ly’erikinda eryabirikinda ekihugho, erikirirya lyethu.
5 Nindi oyuwanga kinda ekihugho? Mbwino si y’oyukirirye ngoku Yesu ni Mughalha wa Nyamuhanga? 6 Oyu yuwasa erilhabira omwa maghetse n’omusasi, Yesu Kristo, butsira omwa maghetse masa aliwe omwa maghetse n’omusasi. N’omulimu anemuha obwema, kundi omulimu y’ekwenene. 7 Kundi hali bindu bisathu ebikaha obwema: 8 omulimu n’amaghetse n’omusasi; kandi ebisathu ebi bikalighirana.
9 Thwamaligha obwema bw’abandu, obwema bwa Nyamuhanga ibulengire kutsibu. Kundi buno bw’obwema obo Nyamuhanga akaha, obwema obo abiriha obuhambire oku Mughalha wiwe. 10 Oyuk’ikiriraya Mughalha wa Nyamuhanga awithe obwema omw’iyo iyuwene-wene. Oyuth’ikiriraya Nyamuhanga abirimuyiramo mubehi, kundi syath’ikirirya omwa bwema obo Nyamuhanga aha obuhambire oko Mughalha wiwe. 11 Kandi buno bw’obwema, indi Nyamuhanga mwathuha engebe y’erikotha, n’engebe eyi yiri omu Mughalha wiwe. 12 Oyuwithe Omughalha awithe engebe eyi; oyuthawithe Mughalha wa Nyamuhanga syawithe engebe eyi.
13 Ngabahandikira emyatsi eyi nuku mwanga minya ngoku muwithe engebe y’erikotha, inywe muk’ikiriraya omwa lina lya Mughalha wa Nyamuhanga. 14 Kandi lino ly’eriyikethera erya thuwithe embere siwe, indi mbulha thwamasabaki erikwamana n’erisonda liwe akathwowa. 15 Kandi thwamabya ithunasi ngoku akathwowa mbulha thwamamusabaki, thukaminya ngoku akendi thuha ebya thukamusaba, kundi thwabirimusababyo.
16 Owosi-wosi amalhangira mulikyabo akakolha ekibi ekithekolhaya okw’ithibwa, iniakendi saba, na Nyamuhanga iniakendi muha engebe, ee, okw’abo abathekolha ekibi ekikakolhaya okw’ithibwa. Hali ekibi ekikakolhaya okw’ithibwa. Ekibi ekyo sikyo ngabugha indi iniasaba busana nakyo. 17 Obuthathunganene obwosi ni kibi, aliwe hane ekibi ekithekolhaya okw’ithibwa.
18 Thunasi ngoku obuli mundu oyukabuthawa na Nyamuhanga syalibera erikolha ekibi, aliwe oyukabuthawa na Nyamuhanga akamutheghaya, n’omubi syanga muthulhako. 19 Thunasi ku thuli bandu ba Nyamuhanga, aliwe ekihugho kyosi kiri omwa buthoki bw’omubi. 20 Aliwe thunasi ngoku Mughalha wa Nyamuhanga abiryasa, kandi abirithuha amenge nuku thwangabana eriminya ery’oyuli kwenene. Kandi thumathikene n’oyuli kwenene, erilhabira omo Mughalha wiwe Yesu Kristo. Oyu ni Nyamuhanga w’okwenene kandi ngebe y’erikotha. 21 Baana balere, muyitheghaye okwa syosanamu.