Mbwino Enduli Yiri Hakuhi?

Nyamuhanga anemwendi lighira abandu erilholha mbere eribendekerya abandi n’erikolha ebyanga leka ibahwa amaha? Eyihi, ngoku thwabirilhangira, akendi yira eky’akakolha erighunzaho eriaghalhwa n’erinuba lyosi eryamabirighunza mughulhu muuli. Omuhangiki anzire iwaminya ebikakanganaya ngoku akisigha iniakolha eki. Akakolesayaki nuku wuminye?

Ng’eky’erileberyako: Abandi bakabya bakathegheka erighenda bulebe, bakanatsuka erilebya okwa Intaneti, okwa mapu, n’ahandi hosi-hosi, eribakangirira eya bakaya. Neryo bakabya bakatsuka erilhangira ebyapa n’ebindi biminyikalho ebya balyakangirirawa, bakaminya ngoku bakayahika. Kuthya, Nyamuhanga nayu abirithuha Ekinywe kiwe ekikakanaya okwa biminyikalho birebe. Thukabya thukalhangira ebiminyikalho ebi bikabererera, thukaminya ndeke ngoku enduli yiri hakuhi.

E Biblia yikasoborera ngoku endambi yanga hikire ikyaminyikalha ndeke-ndeke enduli kwa yiri hakuhi-kuhi. Okwa buthuku obo omwa kihugho kyosi imwabya ebindu n’emibere eyithe yathabya. Thalebya ebighuma by’okwa biminyikalho ebiri omwa Kinywe kya Nyamuhanga.

1. EMIHITHO OMWA KIHUGHO KYOSI Obuminyereri obuli omu Matayo esura 24 bukathondogholha ebindu ebinemubya omwa kihugho ebikakanganaya ekiminyikalho ‘eky’erihwererera ly’emighulhu’ neryo enyuma w’aho ‘enduli iyahika.’ (Omulhondo wa 3, 14) Ebi mwamuli esyonyuhi, esyonzalha, emisiki ehandi n’ehandi, erikanyirira ly’obubi, olhwanzo erikeha, n’abasondoli b’amadini erithebya abandu. (Omulhondo wa 6-26) Ni kwenene, kera ebindu ng’ebi byanabya bikabya okwa lhulengo lhulebe. Aliriryo, enduli yangabere yikaseghera hakuhi, ebyosi ebi byangabere omwa mughulhu mughuma ow’ebiro by’enyuma-nyuma. N’ebindi bisathu ebiri ahikwa hano byangabere.

2. EMIBERE Y’ABANDU E Biblia yikabugha yithi ‘okwa biro by’enyuma-nyuma,’ ni bugha ambu, ebiro ebikakolhaya okwa nduli, emibere y’abandu yanga tsandire kutsibu. Kandi yithi: ‘Abandu basyabya abakayanza, n’eryanza ebindu, abakayipipa, abakayiheka, abatsumi, abatiowa ababuthi babu, abathe n’ewasingya, abathe soma, basyabya b’omuthima akalire, isibeghanyira, abakalegha abandi, ab’omwagha, abatsibu, abathanzire kibuya, basyabya bathebya, ab’omuthwe abimbire, abanzire eriyitsemesya, isibanzire Nyamuhanga.’ (2 Timoteo 3:1-4) Ni kwenene emibere mibi ng’eyi kera yanabyaho, aliriryo yangakanyirire kutsibu omwa biro ‘by’enyuma-nyuma’ erihika okw’ibya ibitholere eryahulha mwa ‘mughulhu owa kalire.’ Wunemulhangira ngoku emibere mibi ng’eyi yabirikanyirira omwa bandu?

3. EKIHUGHO ERITSANDIBWA E Biblia yikabugha yithi Nyamuhanga akendi ‘thoghothya abakatsandaya ekihugho.’ (Eribisulirwa 11:18) Abandu banemutsandya bathi ekihugho? E Biblia kuyikanabugha yithya n’okwa buthuku bwa Noa, yithi: ‘Ekihugho kyabya ikyabiritsanda embere sya Nyamuhanga, n’ekihugho mukyusulha n’omwagha. Neryo Nyamuhanga mwalhangira ekihugho, ikyabiritsanda.’ Nyamuhanga mwabugha okwa lhulengo olhutsandire olho athi: ‘Ngendi syaheryabo.’ (Enzuko 6:11-13) Wunemulhangira ngoku ekihugho lino kinemwongera eryusulha mw’eby’obwithi? Eryongera okw’ekyo, lino abandu bamabirihika okwa kiika ekikalire: Eribya ibangana thoka eritsandya ekihugho kyosi omw’ihwerekererya abandu abosi abali kukyo. Bawithe okwa syombundu esikalha-kalire. Ekihugho kandi kinemutsandibwa n’omwa sindi nzira. Ebindu ebikaleka engebe iyathokekana okwa kihugho, ng’omuka owa thukahumulha, esyongetse, engolangana y’eby’obuhangwa, binemughenda bikatsanda busana n’abandu eribikolesya nabi.

Thayibulya, ‘emyaka nga 100 enyuma, mbwino abandu banabya bawithe amaaka w’erihwerekererya engebe?’ Aliwe munabwire banemukolha ekyo omw’ikolha esyombundu nene-nene n’eritsandya ebithuthimbireko. Abandu babirilemwa eriyitheghererya n’erikakirya ebindu bibi ebikalhwiririra omwa by’etekinologia. Aliriryo abandu sibo banga thwamu ekihugho nga kikendibya kithi omwa buthuku obukasa. Engebe yikendibya yithe yahwerekereribwa eyosi, Nyamuhanga akendi sangwa athoghothya abakatsandayayo. Kw’abiriyilhagha athya!

4. OMUBIIRI W’ERITHULHUGHANIA OMWA KIHUGHO KYOSI Ekindi ky’okwa kiminyikalho ky’enduli w’omubiiri owanga thwere murango: ‘Engulhu yuwene y’Obwami eyi yasyatsuka erithulhughanibwa omwa kihugho kyosi busana n’eriminyisya ebihanda byosi, neryo enduli yasyahika.’ (Matayo 24:14) Erithulhughania eri lyanga bere lya mbaghane kutsibu okw’ikangirirya ery’amadini mangyi amabirighunza myaka mingyi inianemukolha. Omwa biro by’enyuma-nyuma, hangabere omwatsi ow’angahirirwe kw’omuwathu, nagho ‘iy’engulhu yuwene ey’Obwami.’ Wunasi edini yosi-yosi eyikahira omuwathu okwa mwatsi oyu? Hamabya ihane abakabya nga banemuthulhughania omwatsi oyu, mbwino banemuthulhughaniagho ‘omwa kihugho kyosi busana n’eriminyisya ebihanda byosi,’ kutse bakakikolha omwa myanya mike buyira?

Omuthahulha owa www.pr418.com akahira omuwathu w’okwa ‘ngulhu yuwene ey’Obwami.’ Kuli ebikakanaya okwa mwatsi oyo omwa mibughe eyilhabire omu 700. Wangana minya ekindi kyosi-kyosi ekyabirihiribwaho eritsuka kera ekinemuhira omuwathu okwa ngulhu yuwene y’Obwami omwa kihugho kyosi okwa lhulengo ng’olhu? Kera e Intaneti yithe yabyaho, Abema ba Yehova babya ibanasibwe ng’abandu abakathulira engulhu yuwene y’Obwami bwa Nyamuhanga. Eritsuka 1939, okwa kidipa ky’egazeti eya Akaleberyo kukabya ebinywe “Akakarangirira Obwami bwa Yehova.” Ekitabu ekikakanaya okwa madini mukyabugha kithi, “hakabya nga sihali abawithe omuhwa ow’erithulira engulhu ehosi-hosi” ng’ow’Abema ba Yehova. Omubiiri w’erithulira oyu akahira omuwathu okwa mwatsi mubuya ngoku Obwami bwa Nyamuhanga buli hakuhi n’eriletha “enduli.”

OMUGHULHU W’EMBAGHANE

Wanamalhanagira ngoku ebiminyikalho bbini ebyosi okwa biri omwa Biblia ebisoborerwe omwa mwatsi ono ku binemuberera omw’ibyaho lyawu? Hamabirilhaba emyaka eyilhabire omu 100, egazeti eno iyinemuminyisya abakasomayo okwa bikabya omwa kihugho eribawathikya eriyiminyira ngoku enduli yiri hakuhi. Nomuhane ebikakanganaya ndeke ngoku eki ni kwenene, hane abakathika-thika n’erighania, bathi ayo ni mabehi kandi ni malengekania w’abandu. Kandi bathi thukalhangira ekihugho nga kyamayongera eritsanda kundi hathya thukaminya ebikabya omwa kihugho kyosi. Nomwakine, hane abangyi abakaligha ngoku ebikabya bikakanganaya ndeke-ndeke ngoku thuli okw’ihwererera ly’omughulhu w’embaghane omw’ibyaho ly’omundu.

Abanya menge banemulhangira ngoku hakayabya esyombinduka nene-nene okwa kihugho. Ng’eky’erileberyako, omwa 2014, abe Science and Security Board omwa gazeti yabu eya Atomic Scientists mubabwira akathunga ke United Nations Security Council ngoku hane ebindu ebyanga hwerekererya abandu. Abanya seyansi abo mubabugha bathi: “Thwabere thwalebya ndeke, thwamalhangira ngoku ebitsibu ebikalhua omwa ngulha-kulhana y’etekinologia bikendi yongera.” Abandu bangyi banemuligha ngoku kwenene thuli omwa mughulhu ow’embaghane. Abakahulhukaya egazeti eno n’abangyi abakasomayo, bakaligha ngoku omughulhu w’embaghane ono by’ebiro by’enyuma-nyuma kandi ngoku enduli yiri hakuhi. Omwakanya k’erikwa engitsi busana n’obuthuku obukasa, wutholere iwatsema. Busana naki? Kundi kithokekene iwe erilhama okwa nduli!