Abangyi Basyalhama Okwa Nduli Nawu Wangana Lhama

E Biblia yikathubwira ngoku enduli mukendi syabya erithoghothya: ‘Kusangwa okwa biro ebyo hasyabya obulighe bunene isibwebwathabya okw’itsuka ly’ekihugho erihika na lino. Nikwa kumbe Nyamuhanga athalyakuhihaya ebiro ebyo, sihali mundu wangalhamibwe.’ (Matayo 24:21, 22) Aliriryo Nyamuhanga akathulhaghanisaya athi abandu bangyi bakendi syalhama: Kundi ‘ekihugho kyasyahwa. Aliwe oyukakolha erisonda lya Nyamuhanga asyakotha kera na kera.’​—1 Yoane 2:17.

Wamabya wanzire erisyalhama nuku wana ‘syakotha kera na kera,’ ni kyahi ekya wutholere iwakolha? Mbwino wutholere iwatsuka eriyibikira ebindu kutse eriyithegheka kinyamubiri? Eyihi. E Biblia yikathubwira ebya thutholere ithwakolha. Yithi: ‘Neryo kusangwa emyatsi yosi eyi yasyaheribwa yithya, inywe mwangabya bandu b’omusindo wahi kwehi? Mwangabya bandu b’emighendere ibuyirire n’erikenga Nyamuhanga. Mubye mukalindirira n’erihathania erihika ly’ekiro kya Nyamuhanga.’ (2 Petero 3:10-12) “Emyatsi yosi eyi” eyikendi syaheribwa mwamuli amathabali w’ekihugho kibi kino n’abosi abakasighikagho omwakanya k’erisighika obuthabali bwa Nyamuhanga. Kwesi, eriyibikira ebindu by’ekinyamubiri, siryanga thoka erithulhamya.

Omwa kwenene, ithwe erilhama thutholere ithwayihayo oku Yehova Nyamuhanga n’eribya n’emibere n’emikolere eyikamutsemesaya. (Zefania 2:3) Omwakanya k’erighendera okwa bya bandu bangyi munabwire, neryo thukagheghena ebikakanganaya ngoku thuli omwa buthuku bw’enduli, thutholere ‘ithwahathania’ kutse erilengekania ‘okw’ihika ly’ekiro kya Nyamuhanga.’ Abema ba Yehova bangana kukangania omwa Biblia ngoku wangalhama okwa kiro ekikasa eki.