ERIKANIA N’OMULIRANWA
Busana Naki Ithwanza Eriminya Ebiri Omwa Biblia?
Erikanirania eriri ahikwa hano ni mwatsi ow’omughuma w’okwa Bema ba Yehova angana kania n’omuliranwa. Thuthakithwalha thuthi Omwema oyukahulhawa mwa Brian anemukania n’omulhume oyukahulhawa mwa Eric.
E BIBLIA—EBYA YIKAKANAYAKO EBYA KERA BIHIKIRE
Eric: Erithakubwira, ingye eby’edini sindi bighendako kutsibu. Neryo sindi lengekanaya indi thwangana kania okw’ebyo.
Brian: Wasingya erimbwira ekyo. Aliwe erina lyaghe ningye Brian. Nawu n’iwe ndi?
Eric: Ningye Eric.
Brian: Namatsema ingakweya, Eric.
Eric: Nawu wasingya eryasa.
Brian: Leka ndabulya kino, muwanakulira omw’eka eyiri mw’edini?
Eric: Ee. Aliwe nabere naghenda okwa yunivasite, eby’edini munabireka.
Brian: Okee. Muwayasoma ebyaki?
Eric: Eby’emibere y’abandu n’ebya kera. Omwa ngebe yaghe nganzire eriminya ebyabya kera—eriminya aha mundu alhuire.
Brian: Kikatsemesaya kwenene eriminya ebya kera. Wunasi e Biblia nayu ku yikana kanaya okwa bya kera? Wune wathakolesyayo omw’isekulya lyawu?
Eric: Eyihi. Nganasi ku ni kitabu kyuwene, aliwe indwe isingasi indi kikanakanaya n’okwa bya kera.
Brian: Namakusima kundi wukakanaya ekiri okwa muthima. Wamabya iwunawithe obudakika buke, nangana kukangania eby’erileberyako bike omwa Biblia.
Eric: Kale. Aliwe sindi na Biblia.
Brian: Siki. Thukendi kolesya eyaghe. Eky’erileberyako eky’erimbere kiri hano omwa 1 Emyatsi y’Emigulu sura 29, omulhondo 26 n’owa 27. Hathi: ‘Neryo Dawudi mughalha wa Yese mwathabalha oko Baisraeli bosi. N’emighulhu athabalha oko Baisraeli yabya myaka 40; mwathabalha e Heburoni emyaka 7, ne Yerusalemu mwathabalha emyaka 33.’
Eric: Thwangaminya thuthi eki kwenene ku mukyanabya?
Brian: Abandi banabya bakabugha bathi Omwami Dawudi syali athabyaho.
Eric: Akye? Babya bawithe nzumwaki?
Brian: Sihabya kindi yithe Biblia ekikakanganaya indi anabyaho. Aliriryo omwa mwaka wa 1993, abakasekulhaya okwa by’omwa kithaka mubabana eribwe eryakera-kera irinahandikire kw’ekinywe ekikamanyisaya “Enyumba ya Dawudi.”
Eric: Ewu na.
Brian: N’owundi omwa Biblia oyo babya bakathika-thikira eribyaho liwe, abya ini Pontio Pilato, oyuwabya muthabali omwa buthuku bwa Yesu. Omwa bathabali bangyi ab’okwa buthuku obo abakakanibawako omwa Luka 3, omulhondo 1, nayu anemu.
Eric: Aa, sinamalhangira. Kundi hathi omughulhu ‘Pontio Pilato abya muthabali we Yudea, na Herode abya mwami we Galilaya.’
Brian: Ahaa. Ahabw’emyaka mingyi, abandi abasomire babya ibabirithika-thikira eribyaho lya Pontio Pilato. Neryo emyaka nga 50 eyihwere, muhabanika eribwe omwa Asia ikunahandikire erina eryo.
Eric: Hmm. Ebyo sindi nathabyowa.
Brian: Hakiri wamabiri biminya.
Eric: Omwa kwenene, ngasikirye e Biblia ng’ekitabu ekyuwene, aliwe sindi nathayowa nga yangana thuwathikya munabwire. Iyo yanganabya mw’emyatsi eyihikire eyihambire okwa bya kera, aliwe singasi nga yangana thughasira.
E BIBLIA—EKITABU KYA KERA EKINEMUKOLHA MUNABWIRE
Brian: Abangyi ikubangana bugha bathya. Aliwe ingye ng’ahukana n’ekyo. Kandi enzumwa yenu: Ebiyithawa bikulhu omwa ngebe sibiri byathahinduka erilhua na kera. Ng’eky’erileberyako, erihika na munabwire, thukayithagha ebyalya, esyongyimba, n’enyumba. Thukayithagha erikanirania n’abandi ndeke n’eribya n’eka eyitsemire. Mbwino si kwenene indi thukayithagha ebindu ebi?
Eric: Ka thukabiyithagha.
Brian: Ibbwanu e Biblia yangana thuwathikya omwa myatsi yosi eyo. Ni kitabu ekya thwangabugha thuthi ni kyakera, aliwe ekinemukolha munabwire.
Eric: Wukamanyisayaki?
Brian: Nganza eribugha indi: E Biblia yiri mw’emisingyi eyuwene ey’omughaso munabwire ngoku yanabya kera yikahandikwa.
E Biblia yiri mw’emisingyi eyuwene ey’omughaso munabwire ngoku yanabya kera yikahandikwa
Eric: Okee. Omwa mibere nga yahi?
Brian: Thwamabya thwanzire eribya n’amalengekania awuwene okwa bindu ng’eby’esyosente kutse eribya n’eka eyuwene kutse eribya munywani mubuya, emisingyi ye Biblia iyangana thusondolha. Ekitabu kino kiri ng’omusondoli oyukakolhaya okw’isingura. Ng’eky’erileberyako, mbwino nawu siwulirigha ngoku munabwire kikalire erithoka erisondolha ndeke eka yawu, iwe ng’omulhume?
Eric: Okw’eki, ngalighirana nawu. Namabirighunza omwaka ngaliherukirye, aliriryo sikyolho erilighirana na mukali waghe okwa myatsi.
Brian: Ahaa. Aliriryo e Biblia yiri mw’emisingyi myolho-myolho eyanga wathikya. Thuthalebya nga Abanya Efeso sura 5. Thusome omulhondo 22, 23, n’owa 28. Wangana somaho?
Eric: Kale. Hakabugha hathi: ‘Abakali, mwowe abiba benyu ngoku mukowa Omukama, kusangwa omulhume awithe ehamuli okwa mukali wiwe, ngoku Kristo awithe ehamuli okwa kanisa, kandi Kristo ni mulhamya w’ekanisa omubiri wiwe.’ N’omulhondo 28 athi: ‘Lithya abiba ko banze abakali babu bo bathya ngoku bakanza emibiri yabo. Oyukanza omukali wiwe akayanza.’
Brian: Wasingya. Mbwino si kwenene indi abathahenie bamalengaho erighendera okw’ihano eri, obutheke ibukendyuwana?
Eric: Ee, obundi. Aliwe erithabibugha lyolhobire.
Brian: Ni kwenene; sihali oyuhikene. Nibya, omwa sura iyan’eyi mune omulhondo ow’akathuhabulha eribya n’obuyitheghererya butsira eribya bakiru.a Omwa bunywani bwosi-bwosi, mukayithagha obuyitheghererya n’eriyolhobeka. Ingye na mukali waghe thwabirilhangira ngoku e Biblia yikathuwathikaya erikolha ekyo.
Eric: Eyo ni nzumwa.
Brian: Abema ba Yehova banawithe omuthahulha we Intaneti okuli emyatsi eyuwene eyikakanaya okwa butheke. Wamabya iwukinawithe obuthuku, nangana kukangania bike okwa biriko.
Eric: Kale. Ngakinawithe akathambi.
Brian: Oke. Engangirira ey’omuthahulha oyo ni www.pr418.com/koo Epeji y’eritsukirako yeno.
Eric: Namanza ebisasani ebiriko.
Brian: Ebisasani ebi bikakanganaya balikyethu bakathulira, omubiiri owa ithwe bosi thukakolha omwa kihugho kyosi. Wukahimatha hano okwa kinywe “Ebikanganibwe,” neryo iwabana esyogazeti esya lino-lino n’ebindi bitabu ebikakanaya okwa myatsi mingyi imwamuli n’obutheke. Thuthalebya ng’omwa katabu Engulhu Yuwene Erilhua oku Nyamuhanga! Erisomo lighuma omwa katabu aka likabugha lithi “Eka Yawu Yanga Tsema Yithi?”
Eric: Eri n’isomo lyuwene. Nganzire inaminya eky’erisubirya!
Brian: Erisomo eri liri mw’emyatsi eyanga kuwathikya eribana etseme omwa butheke bwawu. Thalebya enungu eyi ahisi sy’ekibulyo 2. Eric, wangana soma ehilayini hibiri ehy’erighunzerera?
Eric: Kale. Hathi: “Omulhume na mukali wiwe batholere ibanzana n’erisikania. Kundi abosi sibahikene, erigha erighanyirana ni kindu ekyanga balethera etseme.” Hmm, ekyo ni kwenene.
Brian: Wasingya erisoma. Abanya Efeso 5:33 ni lighuma ly’okwa masako aw’akanganibweho. E Biblia yeno, wangana soma erisako eri?
Eric: Hathi: ‘Obuli mundu omwa kathi-kathi kenyu anze mukali wiwe ngoku akayanza iyuwene; n’omukali nayo akenge iba wiwe.’
Brian: Wanamalhangira hano ngoku omuwathu amahirwa okw’ihererya owundi eky’akayithagha?
Eric: Singasi ekya wukamanyisaya.
Brian: Mbwino si kwenene indi omulhume akanza mukali wiwe iniamusikya, n’omukali nayu inianza mwira wiwe amukanganaye ndeke olhwanzo?
Eric: Ee, kyan’ekyo.
Brian: Omulhume amabya akakangania mukali wiwe y’olhwanzo, ikikendi olhobera n’omukali erimusikya.
Eric: Ni kwenene.
Brian: Nomwakine indi omulhondo oyu ahandikawa kera emyaka nga 2,000 eyihwere, akakanaya okwa bikayithaghisibawa okwa babiri abosi omwa butheke kandi erihabulha eryuwene eri lyamaghenderwako, ikikendi wathikya.
Eric: Kwenene namaligha, e Biblia siyiri ngoku ngalhue ingalengekania.
Brian: Namatsema ingowa ekyo, Eric. Nganzire inasyakweya hano kandi eriminya ekya wukalengekania okwa kibulyo 3, “Wunatholere iwabikyako obutheke bwamabulha mw’etseme?” ekiri omw’isomo iryanalino okwa muthahulha wethu.b
Eric: Kale. Thukendi yalebyagho na mukali waghe.
Hane mwatsi wosi-wosi owe Biblia owa wukanayibulhayako? Hane kyosi-kyosi omwa by’Abema ba Yehova bikirirye ekya wukananza iwayitheghererya ndeke? Kyamabya ikineho, bulhaya Abema ba Yehova. Ibakendi tsema erikusoborera.
a Lebaya Abanya Efeso 5:17.