Eby’Erisubirya Ebyuwene Ebiri Omwa Biblia Mubyanyitsemesya

ENGEBE YAGHE ENYUMA:

Nabuthirawa omwa tawuni eye Székesfehérvár, e Hungary, etawuni eyithulhaho emyaka eyilhabire omu 1,000 n’eribya mw’ebindu bingyi. Eky’obulighe, ngakin’ibukire eritsandibwa lingyi eryabya irikineho eryalethawa n’olhuhi lhwakabiri olhw’ekihugho kyosi.

Ingakulha, munalemberwa na sukulhu na mukaka ababuthire mama. Ngabakwa olhukando kutsibu, kwilhabirirya mukaka waghe Elisabeth. Mwanyihira mw’omuthima ow’eryanza Nyamuhanga ya kutsibu. Ingane w’emyaka isathu, munatsuka eribya ingasaba nayu obuli igholho-gholho omusabe owasibwe ng’owa Thatha Wethu. Nomubyanabya bithya, nasalha naminya ekya musabe oyo akamanyisaya ingayahikya myaka 30.

Sukulhu na mukaka banyirembera kundi ababuthi baghe ibakakolha omwa kiro n’omw’ithungyi bakasondya esente esy’erighulha enyumba eyuwene. Aliriryo, obuli Kyamukagha ekyakabiri omo kwezi, eka yosi iyikasanga-sangana, ithwalya haghuma. Iningatsemera ekiro ekyo.

Omo mwaka owa 1958, ababuthi baghe mubabana ekya babya bakarondya; mubaghulha enyumba eya thwanganabyamu ithwe bosi basathu. Lero munabya iningend’ikalha n’ababuthi baghe—munatsema! Aliwe habere halhaba myezi mukagha, etseme eyo muyahwa. Thatha waghe mwaholha busana n’ekansa.

Munabunzukalha omwa muthima. Ng’ibuka ingasaba indi: “Nyamuhanga, munakusaba erilhamya thatha waghe. Imbayo esaha eno. Ekyaleka iwaghana erisubirya emisabe yaghe niki?” Munanza kutsibu eriminya thatha ngali hayi. Iningayibulhaya: ‘Mbwino aghendire erilhubulha? Kutse abirikwama kyahwaho?’ Iningayighomba abaana abakinawithe abothatha wabu.

Ahabw’emyaka mingyi, iningaya eyiri esyosinda hakuhi buli kiro. Iningakukama ahali eyisinda ya thatha neryo ingasaba indi: “Kisi, Nyamuhanga, nganza eriminya aha thatha ali.” Kandi iningasaba indi anyiwathikaye ngaminye ekighendererwa ky’engebe.

Ingane w’emyaka 13, munathwamu erigha Olhujeremani. Munalengekania indi omwa bitabu bingyi eby’Ekijeremani, obundi inangana bana mw’eby’erisubirya okwa bibulyo byaghe. Omwa 1967, munatsuka erisomera omwa tawuni ye Jena, eyabya iyikine y’okwa Germany. Munasoma n’omuhwa munene ebitabu ebikakanaya kutsibu okw’ibyaho ly’abandu. Nomwakine indi munanabana mw’emyatsi eyuwene, sihali ekyabya kyasubire omwa bibulyo byaghe. Munalholha embere erisaba eribana eby’erisubirya.

NGOKU E BIBLIA YAHINDULHA ENGEBE YAGHE:

Omwa 1970, munasuba e Hungary, eyo nabana Rose, oyuwabya abere munywani waghe. Okwa buthuku obo, e Hungary yabya omwa mithabalire eyikahulhawa mwa Communist. Enyuma waho, thwabere thwabiriherukania na Rose, muthwatswera e Austria. Thwabya thuwithe ekilhubirirwa eky’erihumira e Sydney, Australia, eya nyokolhome aby’ikere.

Buthuku buke munabana omubiiri e Austria. Kiro kighuma, omukoli mulikyethu mwambwira athi nangana bana eby’erisubirya okwa bibulyo byaghe omwa Biblia. Mwanyiha bitabu birebe ebikakanaya okwa Biblia. Munasoma-soma ebitabu ebyo namanza erithasyaminya bingyi. Neryo munahandikira Abema ba Yehova, abakahulhukaya ebitabu ebyo, namabasaba ebindi bitabu.

Ekiro thwaghunza omwaka omwa butheke, ingye na Rose muthwabungirwa n’Omwema wa Yehova oyukine mulere. Mwaletha ebitabu ebya nabya inabirisaba n’erimbwira athi thwanganabya thuk’igha e Biblia, neryo munaligha. Kundi nabya nganzire kutsibu erigha, ithuk’igha kabiri omwa wiki—erighunza saha ini obuli igha!

Ebya Bema ba Yehova banyeghesaya omwa Biblia mubyanyitsemesya kutsibu. Munasweka bakanyikangya erina lya Nyamuhanga, Yehova, omwa Biblia ey’omubughe waghe. Omwa myaka 27 ingane mughenda omwa kanisa, nabya isindi nathowa erina lya Nyamuhanga likahulhwa kiro na kighuma. Eby’erisubirya ebyuwene ebiri omwa Biblia mubyanyitsemesya. Ng’eky’erileberyako, mun’igha ngoku abaholi sibasiki, bali ng’abali omwa thulho thunene kutsibu. (Omugambuli 9:5, 10; Yoane 11:11-15) Kandi mun’igha okwa mulhaghe we Biblia ow’ekihugho kihya-kihya omuthendi syasabya lhuholho. (Eribisulirwa 21:3, 4) Ngalindirire erisyalholha oku thatha waghe, kundi omwa kihugho kihya-kihya ekyo, ‘hasyabya erilhubuka.’—Emibiri 24:15.

Mukali waghe nayu mwayiyunga okw’ingye omw’igha e Biblia. Muthw’igha ndeke, omwa mezi abiri masa thwamaghunza ekitabu ky’erighiramu! Ithukahindana okwa mihindano eyosi eyabya yikabya okwa Kisenge ky’Obwami. Mukyathutsemesya kutsibu thukalhangira olhwanzo, eriwathikania, n’obughuma obuli omwa Bema ba Yehova.—Yoane 13:34, 35.

Omwa 1976, Ingye na Rose muthwalighirwa eringira omwa Australia. Muthwabana Abema ba Yehova thukanahikayo. Mubathwangirira ndeke, thwamayowa ng’abamahika eka. Omwa 1978, nethu muthwabya Bema ba Yehova.

NGOKU NABIRIGHASIRWA:

Lino nabiribana eby’erisubirya okwa bibulyo byaghe ebyabya ibyabirinyilyambya kutsibu. Ingye eriyithunda hakuhi na Yehova, nabiriyibanira Thatha oyulengire kutsibu. (Yakobo 4:8) Kandi n’amaha aw’erithasyalhangira thatha waghe oyumbuthire omwa kihugho kihya-kihya asikire.—Yoane 5:28, 29.

Omwa 1989, ingye na mukali waghe muthwathwamu erisuba e Hungary nuku thwangaya thulira banywani bethu n’ab’eka yethu n’abosi-bosi abathwanga bana. Thwabiribana olhusunzo olhw’erikangirirya abandu bangyi be Biblia. Abandu abalhabire omu 70 babirithuyiyungako omw’ikolera Yehova, imwamuli na mama waghe.

Munaghunza myaka 17 inganemusaba eribana eby’erisubirya okwa bibulyo byaghe. Hamabirilhaba eyindi myaka 39, kandi nga kina saba—lero hathya ngasaba indi, “Wasingya, iwe Thatha waghe w’elhubulha, erisubirya ebya nabya ngasaba eritsuka bulere.”