Мыйӧ велӧдӧ миянӧс воддза олӧм

Иегова оз лэдз скӧр йӧзыслы бырӧдны Райсӧ. Сэні кутасны овны сӧмын Енлӧн ёртъяс. Мый лоас скӧр йӧзыскӧд? Медым тӧдмавны тайӧс, видзӧдлам Ной йылысь збыльысь вӧвлӧмтор. Ной оліс некымын сюрс во сайын. Сійӧ вӧлі бур мортӧн да пыр зілис Иеговалысь тшӧктӧмсӧ пӧртны олӧмӧ. Но мукӧд йӧзыс му вылас вӧчисны лёктор. Сэки Иегова висьталіс Нойлы, мый сійӧ Потопӧн кӧсйӧ бырӧдны став скӧр йӧзсӧ. Сійӧ тшӧктіс Нойыслы лӧсьӧдны ковчег, медым и Ной, и сылӧн семьяыс эз пӧгибнитны, кор воас Потоп (Олӧм 6:9—18).

Ной да сылӧн семьяыс стрӧитісны ковчег. Ной ӧлӧдіс йӧзсӧ, мый лоас Потоп, но найӧ сійӧс эз кывзыны да водзӧ вӧчисны лёксӧ. Кор ковчегсӧ стрӧитісны, Ной чукӧртіс сэтчӧ пемӧсъяссӧ, сы бӧрын сійӧ семьяыскӧд сідзжӧ пырис ковчегӧ. Сэсся Иегова вӧчис зэв ыджыд бушков. Зэрис 40 лун да 40 вой. Ваыс тыртіс ставнас мусӧ (Олӧм 7:7—12).

Скӧр йӧзыс пӧгибнитісны, а Ной да сылӧн семьяыс мездмисны. Потопсьыс мездӧм бӧрас Иегова сетіс налы му, код вылысь лёкыс лои весалӧма (Олӧм 7:22, 23). Библияас висьталӧма, мый бара локтас кад, кор Иегова бырӧдас найӧс, кодъяс оз кӧсйыны овны веськыда. Бур йӧзыс оз воны пӧгибӧ. Найӧ кутасны помасьтӧг овны Райын му вылын (2 Петырлӧн 2:5, 6, 9).

Талун уна йӧз вӧчӧны лёксӧ. Муыс тырис шогӧн. Иегова пыр выльысь мӧдӧдӧ ассьыс Висьталысьяссӧ ӧлӧдны йӧзсӧ, но унджык йӧзыс оз кӧсйыны кывзыны Иеговалысь кывъяссӧ. Найӧ оз кӧсйыны вежсьыны. Найӧ оз кӧсйыны гӧгӧрвоны, мый Енмыс висьталӧ бур да лёк йывсьыс. Мый лоас накӧд? Вежсясны-ӧ найӧ коркӧ? Унаӧн некор оз вежсьыны. Локтӧ кад, кор скӧр йӧзсӧ лоӧ бырӧдӧма, найӧ некор сэсся выльысьсӧ оз кутны овны (Псалом 91:8).

Муыс оз ло бырӧдӧма — сійӧ лоас Райӧн. Найӧ, кодъяс лоӧны ёртъясӧн Енлы, кутасны помтӧг овны Райын му вылын (Псалом 36:29).