Nkalata Itanshi ku Bena Kolinda
4 Muntu wafwainwa kwituyuka’mba twi ba mingilo ba kwa Kilishitu kabiji twi bakalama ba byafyamika byazhila bya Lesa.+ 2 Onkao mambo, bakalama bafwainwa kwikala ba kishinka. 3 Kechi kyo kintu kyanema kwi amiwa kumpima kwi anweba nangwa kunchibila mambo ku kije kya bantu ne. Kabiji kechi nepima amiwa mwine ne. 4 Mambo jiwi jami ja mu muchima kechi jibena kunzhachisha ne. Bino kechi nabingila mu kino ne; pakuba Yehoba* ye umpima.+ 5 Onkao mambo, kimye byo kikyangye kufika, kechi muchibe mambo+ nangwa amo ne, poso Nkambo waiya. Aye ukasolola patoka bintu byafyamika bya mu mfishi ne kusolola milanguluko iji mu michima ya bantu, kabiji bonse pa muntu pa muntu Lesa ukebatakaika.+
6 Balongo bami, bino bintu neambila amiwa mwine ne Apolosa+ kuba’mba mumwenemo byawama, namba monka mwi atweba mufunde jino jifunde ja kuba’mba: “Kange mupitailenga pa bintu byanembwa ne,” pa kuba’mba mubulenga kwilundumika+ ne kubula kuba misalululo. 7 Mambo ñanyi wimulengela kwimona’mba mwakila bakwenu? Kabiji ñanyi kintu kyo muji nakyo kyo mwabujile kutambula?+ Umvwe mwikitambwile, pano mambo ka o mwitotela uba nobe kechi mwikitambwile ne?
8 Nanchi anweba mwaikuta kala nyi? Nanchi mwanonka kala nyi? Nanchi mwatendeka kala kulama nobe bamfumu+ kwa kubula atweba nyi? Nanchi inge mwatendekele kala kulama nobe bamfumu, pa kuba’mba ne atweba tulame nenu nobe bamfumu.+ 9 Mambo kyamweka kwi amiwa kuba’mba Lesa wituleta atweba batumwa kwikala bapelako nobe bantu bo bazhachisha’mba bafwe,+ mambo twaaluka nobe bantu bo babena kutala ku ba pano pa ntanda,+ ku bamalaika ne ku bantu pamo. 10 Twakosama+ na mambo a Kilishitu, bino anweba mwi ba maana mwi Kilishitu; atweba kechi twakosa ne, bino anweba mwakosa; anweba bemunemeka, bino atweba betulengulula. 11 Kufikatu ne pa kino kimye twatwajijila kwikala na nzala,+ kufwa kilaka,+ kuvwala misakila,* kupumwa*+ ne kubula mazubo 12 ne kwingila na ngovu, saka twingila na maboko etu.+ Umvwe betutuka, twibapesha;+ umvwe betumanyika, tuchinchika saka twatekanya;+ 13 umvwe betubepela byatama, twibakumbula na jiwi jakooka;*+ twaaluka nobe bintu byatutu* ku ba pano pa ntanda, nobe bintu byonse bya bunya kufika ne lelo jino.
14 Nemunembela bino, kechi amba nemulengeshe bumvu ne, bino namba nemufundeko nobe baana bami bo natemwa. 15 Nangwa kya kuba muji na ba kwimulama 10,000 mwi Kilishitu, kechi muji na bashenu bavula ne; mambo mwi Kilishitu Yesu mo mo naikela shenu kupichila mu mambo awama.+ 16 Onkao mambo, nemwambila namba mwikale ba kundondela amiwa.+ 17 O ene mambo, o mbena kwimutumina Timoti, mwanami ye natemwa kabiji wa kishinka mwi Nkambo. Aye ukemuvululamo mashinda ami a kubilamo bintu mu mwingilo wa Kilishitu Yesu+ byonkatu byo mfunjisha konse konse mu bipwilo byonse.
18 Bamo babena kwitota uba nobe amiwa kechi mbena kwiya ko muji ne. 19 Umvwe Yehoba* waswa, nkeya ko muji katataka ne amiwa nkakeba kuyuka kechi byambo bya boba betota ne, poso bulume bwabo. 20 Bufumu bwa Lesa kechi bwaimena pa byamba muntu ne, kana pa bulume. 21 Nanchi kyepi kyo mukeba? Mukeba nkeye ko muji na kamama nyi,+ inyi na butemwe ne na muchima wakooka?