Mwi “kya Kutalatala”!
1 Mutumwa Paulo wanembele’mba: “Twaaluka ke kya kutalatala ntanda yonse, ne ku bamalaika ne ku bantu pamo.” (1 Ko. 4:9) Kino kyaila muka, kabiji kitulamata byepi mu mwingilo wetu lelo jino?
2 Kwakubula nangwa kuzhinaukatu ne, ino ñambilo ya “kya kutalatala” ibavulwilengako bena Kolinda kimye bena Loma kyo batantamikanga bantu bo bazhachishanga ne kwibepaila pa meso a bantu bavula. Byonkabyo, bantu bavula kubikapotu ne bamalaika bamwenenga lumanamo lwamanaminenga bena Kilishitu ba mu kitota-myaka kitanshi na mambo a kushimuna Bufumu. (Hebe. 10:32, 33) Bulumbuluke bwabo bwibalengejile kutalwatalwa ku bantu bavula, byonka byo betutalatala bavula ne atweba lelo jino mu kuchinchika kwetu. Bañanyi betutalatala?
3 Ntanda Yonse ne Bantu: Kimye kimo masawakya a mingilo ya bantu ba Yehoba ambiwapo pa mwela ne mu mapepala a byambo. Nangwa kya kuba tusanchila ano masawakya awama kabiji a kishinka pa mambo a mwingilo wetu, pa kimye ne pa kimye bantu bamichima ibi basampanya masawakya atama a kwitunenauna. Nangwa kiji byonkabyo, twafwainwa kutwajijila na kwilumbulula byo tuji bamwingilo wa Lesa mu kimye kya “kunenwa byatama ne kunenwa byawama.” (2 Ko. 6:4, 8) Bantu bakishinka bamona’mba kine twi baana ba bwanga ba kwa Yesu Kilishitu.
4 Ku Bamalaika: Bilengwa bya mupashi nabyo bitutalatala. Diabola ne bademona banji betutalatala na “bukaji bukatampe,” bwa kukeba kwitulekesha “kukwachisha bukamonyi bwa Yesu.” (Lum. 12:9, 12, 17) Bamalaika bakishinka ba Lesa nabo betutalatala kabiji basekela bingi umvwe bamona ndengamambo umo walapila. (Luka 15:10) Onkao mambo, twafwainwa kukosa mambo twayuka namba bamalaika babena kumona mwingilo wetu wanema kabiji ufweta, ubena kwingijiwa ntanda yonse lelo jino!—Lum. 14:6, 7.
5 Umvwe bemumanyika nangwa mwamona’mba mwingilo wenu kechi ubena kupanga bipangwa ne, vulukai kuba’mba mwi kya kutalatala ku bilengwa byonse. Kuchinchika kwenu kwa kishinka kumwesha byavula pa mambo a bulumbuluke bwenu. Kulutwe na lwendo, ‘bulwi bwenu bwawama bwa lwitabilo’ bukemukwasha “kukwachisha ku bumi bwa myaka.”—1 Timo. 6:12.